ཨ་རིའི་མང་གཙོ་ཚོགས་པའི་འཐུས་མི་ 6 གིས་བརྙན་ཐུང་ཞིག་བརྒྱུད། ཁྲིམས་མཐུན་མ་ཡིན་པའི་བཀའ་ལ་བརྩི་མི་རུང་ཞེས་ཨ་རིའི་དམག་དཔུང་ལ་འབོད་སྐུལ་དྲག་པོ་ཞིག་ཞུས། ཁོ་ཚོས། ད་ལྟའི་གཞུང་འདིས། ཨ་རིའི་དམག་མི་དག་རང་གི་མི་སེར་ལ་རྒོལ་ཆེད་བེད་སྤྱོད་བྱེད་བཞིན་འདུག་ཅེས་བཤད།
ཨ་རིའི་མང་གཙོ་ཚོགས་པའི་འཐུས་མི་ 6 གིས་བརྙན་ཐུང་ཞིག་བརྒྱུད། ཁྲིམས་མཐུན་མ་ཡིན་པའི་བཀའ་ལ་བརྩི་མི་རུང་ཞེས་ཨ་རིའི་དམག་དཔུང་ལ་འབོད་སྐུལ་དྲག་པོ་ཞིག་ཞུས། ཁོ་ཚོས། ད་ལྟའི་གཞུང་འདིས། ཨ་རིའི་དམག་མི་དག་རང་གི་མི་སེར་ལ་རྒོལ་ཆེད་བེད་སྤྱོད་བྱེད་བཞིན་འདུག ང་ཚོ་དང་འདྲ་བར་ཁྱེད་ཚོས་(དམག་མི་ཚོས།)ཀྱང་། རྩ་ཁྲིམས་སྲུང་སྐྱོབ་བྱེད་རྒྱུ་དམ་བཅའ་བཞག་ཟིན། ད་ལྟ་ང་ཚོའི་རྩ་ཁྲིམས་ལ་ཉེན་ཁ་ཕྱི་ནས་ཙམ་མ་ཡིན་པར། ནང་ནས་ཀྱང་སླེབས་བཞིན་འདུག་ཅེས་བཤད།
ད་དུང་ཁོ་ཚོས། ང་ཚོའི་ཁྲིམས་ནི་གསལ་བོ་རེད། ཁྲིམས་འགལ་གྱི་བཀའ་རྒྱ་ཞིག་ཡིན་ན་མ་བརྩིས་པར་ཕྱིར་ཟློག་ཆོག་པ་རེད་ཅེས་སོགས་བཤད། འཐུས་མི་འདི་དག་ནི་མེ་ཆིན་གྷན་མངའ་སྡེ་དང་ཨ་རེ་ཛོ་ན་མངའ་སྡེ། ཕེན་སེལ་ཝེ་ནེ་ཡ། ནེའུ་ཧེམ་ཤེར། ཁཱ་ལོ་ར་སྒྲོ་མངའ་སྡེ་བཅས་ནས་ཡིན་པ་དང་། ཁོ་ཚོ་ཚང་མར་སྔར་ཨ་རིའི་དམག་དཔུང་དང་། གསང་ལས་གང་རུང་གི་ནང་དུ་ལས་ཀ་བྱས་པའི་རྒྱབ་ལྗོངས་ཡོད་པ་གསལ།
ད་ལྟ་སྲིད་འཛིན་སྒྲོ་ནལ་ཁྲི་རམ་ཕུས། ཁྲིམས་འགལ་ངང་ཕྱི་ནས་ཡོང་མཁན་དག་དང་། ནག་ཉེས་ཀྱི་རྒྱབ་ལྗོངས་ཡོད་མཁན་མང་པོ་འཛིན་ཆེད། ཨ་རིའི་གྲོང་ཁྱེར་འགའ་དང་། ལྷག་པར་མང་གཙོ་ཚོགས་པས་བཟུང་བའི་གྲོང་ཁྱེར་དག་ལ་དམག་དཔུང་གཏོང་བཞིན་པས། མང་གཙོ་ཚོགས་པའི་འཐུས་མི་དང་། ཁྲིམས་དཔོན་ཚོས་འདི་ནི་རྩ་ཁྲིམས་དང་འགལ་བ་ཞིག་ཡིན་པ་ཤོད་ཀྱི་ཡོད། དེ་བཞིན་རྒྱལ་ས་ཝ་ཤིན་ཀྲོན་དུ་དམག་མི་བཏང་བའང་ཁྲིམས་འགལ་ཡིན་པ། ཁྲིམས་དཔོན་ཞིག་གིས་བསྒྲགས།
གྲོས་ཚོགས་འཐུས་མི་འདི་དག་གིས་སྐད་ཆ་འདི་བཀྲམས་རྗེས། སྲིད་འཛིན་སྒྲོ་ནལ་ཁྲི་རམ་ཕུས། འདི་ལ་གཞུང་ལ་གྱེན་ལོག་བྱ་རྒྱུར་ངན་སྐུལ་གྱི་བྱ་སྤྱོད་ཅེས་འབོད་པ་རེད། ང་ཚོའི་རྒྱལ་ཁབ་ལ་བློ་ལོག་མཁན་འདི་ཚོ། རེ་རེ་བཞིན་བཟུང་ནས་ཁྲིམས་ཞིབ་བྱ་འོས། ཁོ་ཚོའི་སྐད་ཆ་འདི་རང་གར་འཇོག་རུང་བ་ཞིག་མ་རེད། ང་ཚོར་རྒྱལ་ཁབ་ཟེར་བ་ཞིག་ལྷག་རྒྱུ་མ་རེད། དཔེ་ཞིག་ངེས་པར་དུ་སྟོན་དགོས་འདུག་ཅེས་དང་། དེའི་རྗེས་སུ་ཁོས་ཡང་བསྐྱར། འདི་ནི་ང་ཚོའི་རྒྱལ་ཁབ་ལ་ཉེན་ཁ་རེད། ཁོ་ཚོ་འཛིན་དགོས་པ་ཡིན་ནམ་ཞེས་བྲིས།
ཡང་བསྐྱར་ཁོས། གཞུང་ལ་གྱེན་ལོག་བྱ་རྒྱུར་ངན་སྐུལ་གྱི་བྱ་སྤྱོད་འདིར། སྲོག་ཁྲིམས་ཀྱི་ཉེས་ཆད་འབབ་ཅེས་བྲིས། ཕྱི་ལོ་ 2022 ལོར་གྲོས་ཚོགས་ཚོགས་གཙོ་ཟུར་བ་ལྕམ་ནན་སེའི་ཁྱིམ་དུ་མི་ཞིག་འཛུལ་ཞིང་། སྐབས་དེར་མོ་རང་ཁྱིམ་དུ་མེད་སྐབས་དང་འཁེལ་བས། མོའི་ཁྱོ་གའི་སྟེང་ཐོ་བས་དྲག་རྒོལ་བྱས་པ་དང་། ལོ་སྔོན་མའི་ཕྱི་ཟླ་ 7 ཚེས་ 17 ཉིན་ཅུང་ཙམ་མིན་ན་སྲིད་འཛིན་འོས་མི། སྒྲོ་ནལ་ཁྲི་རམ་ཕུ་མེ་མདས་བསད་ཟིན་པ། ད་ལོའི་ཕྱི་ཟླ་ 9 ཚེས་ 10 ཉིན་རྙིང་ཞེན་ཤོག་ཁག་གི་གཏམ་བཤད་པ་གྲགས་ཅན། ན་གཞོན་ཆར་ལི་ཁར་ཁི་མེ་མདས་བསད། ད་ལོའི་ཕྱི་ཟླ་ 10 ནང་ཞིབ་འཇུག་སྙན་ཐོ་ཞིག་བཏོན་པ་ལྟར་ན། ཨ་རིའི་མི་སེར་བརྒྱ་ཆ་ 85% ཡིས་རྒྱལ་ནང་དུ་དྲག་ཟིང་འདིའི་རིགས་མང་དུ་འགྲོ་བཞིན་པ་ཡིད་ཆེས་བྱེད་བཞིན་པ་བཤད།