འབྱོར་ལྡན་ཚོ་ཨ་རིའི་རྒྱལ་ནང་ལ་ཡོང་ཆེད་དང་ཨ་རིའི་རྒྱལ་ནང་དུ་འདུག་ཆོག་པ། མཐར་མི་སེར་ཆོག་ཐུབ་པའི་ཐོངས་མཆན་གསར་བ་ཞིག་ཕྱིར་བཏོན། ཐོངས་མཆན་འདིའི་མིང་ལ་ཁྲི་རམ་ཕུའི་གསེར་གྱི་བྱང་བུ་ཞེས་འབོད།
ད་ལོའི་ཕྱི་ཟླ་ 1 ནང་ཨ་རིའི་སྲིད་འཛིན་སྒྲོ་ནལ་ཁྲི་རམ་ཕུ་སྲིད་སྟེགས་སུ་སླེབས་རྗེས། འོས་བསྡུའི་སྐབས་སུ་ཁོས་རྒྱབ་སྐྱོར་བ་ཚོར་ཁས་བླངས་ཟིན་པ་ལྟར། ལྷོ་ཕྱོགས་རྒྱལ་མཚམས་བརྟན་སྲུང་དང་། ཕྱི་རྒྱལ་ནས་ཨ་རིའི་རྒྱལ་ནང་དུ་ཡོང་རྒྱུའི་ལམ་ཀ་ཧ་ཅང་ཁག་ཏུ་བཏང་ཞིང་། དུས་དེ་ནས་ད་ལྟ་བར། ཨ་རིས་ཕྱི་རྒྱལ་གྱི་ཐོངས་མཆན་གྲངས་ 85,000 ཕྱིར་བསློགས་ཟིན་པའི་གནས་ཚུལ་ཐོན།
དེ་བཞིན་གཙོ་བོ་དཀྱིལ་ཤར་དང་ཨ་ཧྥེ་རི་ཀའི་རྒྱལ་ཁབ་ 19 ཡི་མིར་ཐོངས་མཆན་སྤྲོད་མཚམས་བཞག་ཅིང་། སྲིད་འཛིན་བྷ་ཀྲན་གྱི་སྐབས་སུ་ཨ་རིའི་རྒྱལ་ནང་དུ་འཛུལ་ཟིན་པའི་མི་མང་པོའི་ཡིག་ཆར་ཞིབ་འཇུག་འགོ་བཙུགས། གནས་སྡོད་ཆོག་མཆན་དེབ་ལྗང་ཁུའི་ཆེད་སྙན་ཞུ་གསར་བ་མི་ལེན་རྒྱུ་དང་། ཡར་ཕུལ་ཟིན་པའི་སྙན་ཞུ་དག་ལ་བསྐྱར་ཞིབ་ཀྱི་ལས་ཀ་ཞིག་འགོ་བཙུགས་ཟིན།
ཡིན་ན་ཡང་། དེ་དང་ལྷན་ཕྱི་རྒྱལ་ནས་འབྱོར་ལྡན་དག་ཨ་རིའི་རྒྱལ་ནང་དུ་ཡོང་རྒྱུའི་སྲིད་བྱུས་ཤིག་ཀྱང་ཞོར་དུ་བཟུང་། སྲིད་བྱུས་འདིའི་འོག་ནས་ཁོས་ཕྱི་རྒྱལ་གྱི་འབྱོར་ལྡན་དག་ཨ་རིའི་རྒྱལ་ནང་དུ་ཡོང་ཆེད་དང་། མཐར་ཨ་རིའི་མི་སེར་ཆགས་རྒྱུའི་ལམ་ཀ་ལས་སླ་རུ་གཏོང་ཆེད།ཐོངས་མཆན་རིགས་གསར་བ་ཞིག་བཟོས། ཐོངས་མཆན་གསར་བ་འདིའི་མིང་ལ་ཁྲི་རམ་ཕུའི་གསེར་གྱི་བྱང་བུ་ཞེས་འབོད་ཅིང་། ཁ་སང་ཁོས་བྱང་བུ་འདི་ཕྱིར་བཏོན།
བྱང་བུ་འདིའི་རིན་གོང་ལ་ཨ་སྒོར་ས་ཡ་ $1 ཡིན་པ་བསྒྲགས། སྤྱིར་འཆར་གཞི་འདི་འདྲ་ཞིག་ཡོད་པ་ད་ལོའི་ལོ་འགོ་ནས་ཁྱབ་བསྒྲགས་བྱས་ཟིན་ལ། སྐབས་དེར་མང་གཙོ་ཚོགས་པས་འདི་ནི་འབྱོར་ལྡན་ཁོ་ནར་དམིགས་པ་ཞིག་དང་། དབྱེ་འབྱེད་ཅིག་ཡིན་པའི་སྐྱོན་བརྗོད་ཀྱང་བྱས།