ཨེ་ཛི་རལ་གྱི་གཞུང་གིས། རྗོར་རྡན་གཙང་པོའི་ནུབ་རྒྱུད་ས་ཁུལ་དུ་གསར་དུ་བརྒྱབས་ཟིན་པ། གྲོང་བརྡལ་གསར་བ་གྲངས་ 19 གཞུང་འབྲེལ་ངང་ངོས་འཛིན་བྱས།
ཨེ་ཛི་རལ་གྱི་གཞུང་གིས། རྗོར་རྡན་གཙང་པོའི་ནུབ་རྒྱུད་ས་ཁུལ་དུ་གསར་དུ་བརྒྱབས་ཟིན་པ། གྲོང་བརྡལ་གསར་བ་གྲངས་ 19 གཞུང་འབྲེལ་ངང་ངོས་འཛིན་བྱས། རྒྱལ་སྤྱིའི་ཁྲིམས་ལྟར་ན་འདི་ནི་ཁྲིམས་འགལ་ཡིན་པ་དང་། རྗོར་རྡན་གཙང་པོའི་ནུབ་བརྒྱུད་ས་ཁུལ་དེ་འབྱུང་འགྱུར་འཛུགས་རྒྱུ་ཡིན་པའི་རྒྱལ་ཁབ། པཱ་ལི་སི་ཐན་གྱི་ས་ཆ་ཡིན་དགོས། ཐག་གཅོད་འདི་ལ་སོ་ཐེ་ཨ་རབ་བྷེ་ཡ་སོགས་ཁ་ཆེ་རྒྱལ་ཁབ་ཚོས་སྐྱོན་བརྗོད་བྱས།
ཕྱི་ལོ་ 1990 ནང་ནོར་ཝེའི་རྒྱལ་ས་ཨོ་སི་ལོར་བཞག་པའི་གྲོས་མཐུན་དག་གི་ཁྲོད། རྗོར་རྡན་གཙང་པོའི་ནུབ་རྒྱུད་ས་ཁུལ་དེ་སྡེ་ཚན་ 3 དུ་བགོས་ཤིང་། ས་ཆ་བརྒྱ་ཆ་ 18% གྱི་བདེ་སྲུང་དང་འཛིན་སྐྱོང་དབང་ཆ་གཉིས་ཀ་པཱ་ལི་སི་ཐན་གྱི་དབང་སྒྱུར་བ་ཚོའི་འོག་ཏུ་འཇོག་རྒྱུ་བྱས། བརྒྱ་ཆ་ 22% ཀྱི་ཞི་བའི་འཛིན་སྐྱོང་དེ་པཱ་ལི་སི་ཐན་གྱིས་བྱ་རྒྱུ་དང་། བདེ་སྲུང་གི་འགན་དེ་ཨེ་ཛི་རལ་གྱིས་འཁུར་རྒྱུ་བྱས། ལྷག་མ་བརྒྱ་ཆ་ 60% ཡས་མས་ཀྱི་བདེ་སྲུང་དང་། འཛིན་སྐྱོང་ཆ་ཚང་ཨེ་ཛི་རལ་གྱིས་འཁུར་རྒྱུ་ཐག་བཅད་ཟིན།
ཟླ་བ་འདིའི་མཇུག་ཏུ་ཨེ་ཛི་རལ་གྱི་སྲིད་བློན་ནེ་ཏན་ཡ་ཧུ་ཨ་རིར་ཡོང་རྒྱུ་དང་། སྲིད་འཛིན་སྒྲོ་ནལ་ཁྲི་རམ་ཕུ་དང་ཁོ་གཉིས། ཧྥི་ལོ་ར་སྒྲ་མངའ་སྡེར་ཡོད་པ། སྒྲོ་ནལ་ཁྲི་རམ་ཕུའི་རྒྱས་སྤྲོ་ཁང་མར་ལ་གྷོ་རུ་ཐུག་རྒྱུ་ཡིན་གསལ། གནས་ཚུལ་ལ་ཐད་ཀར་རྒྱུས་མངའ་ཡོད་པའི་མི་ཞིག་གིས་ཨེན་བྷི་སི་གསར་ཁང་ལ་བཤད་པ་ལྟར་ན། སྐབས་དེར་ནེ་ཏན་ཡ་ཧུ་ཡིས་སྒྲོ་ནལ་ཁྲི་རམ་ཕུ་ལ། ཨེ་རན་གྱིས་ད་ལྟ་ཡང་བསྐྱར་ཉིང་རྡུལ་བསྟི་གནས་དག་བསྐྱར་གསོ་དང་། ཐག་རིང་སྙོབས་པའི་བྷ་ལི་སི་ཀྲི་ཁི་འཕུར་མདའ་བཟོ་སྐྲུན་ཤུགས་ཆེ་རུ་གཏོང་བཞིན་པས། ཨེ་རན་གྱི་སྟེང་སླར་ཡང་གཏོར་རྒོལ་བྱ་དགོས་པའི་བསམ་ཚུལ་འདོན་འཆར་ཡོད་པ་བཤད།
ཨེ་རན་ནི་དཀྱིལ་ཤར་གྱི་ཁ་ཆེ་དྲག་དཔུང་ཧཱ་མ་སི་དང་། ཧེ་ཛི་བྷོ་ལ། ཧུ་ཏེ་བཅས་ཀྱི་རྒྱབ་རྟེན་གཙོ་བོ་དེ་ཡིན་པ་དང་། ད་ལོའི་ཕྱི་ཟླ་ 6 ཚེས་ 13 ནས་ཚེས་ 24 བར། ཨེ་ཛི་རལ་དང་ཨེ་རན་བར་ཐད་ཀར་མཁའ་ཐོག་ནས་གཏོར་རྒོལ་བྱས་རེས་བྱས་ཤིང་། ཨེ་རན་གྱི་ཆེས་མཐོའི་དམག་སྤྱི་དང་ལས་བྱེད། གལ་ཆེན་ཚན་རིག་པ་བཅས་མི་མང་པོ་བསད། འདི་ལ་ཉིན་བཅུ་གཉིས་ཀྱི་དམག་འཁྲུག་ཅེས་འབོད། ཕྱི་ཟླ་ 6 ཚེས་ 22 ཉིན་ཨ་རིའི་འཐབ་འཛིང་གནམ་གྲུ་ B-22 ཡིས། ཨེ་རན་གྱི་ཉིང་རྡུལ་བསྟི་གནས་གཙོ་བོ་ 3 ལ་གཏོར་རྒོལ་བྱས། གྲུབ་འབྲས་ནི་གཙོ་གཞི་ཅན་ཞིག་ཏུ་གྱུར།