པཱ་ཝེལ་རྡུ་རོ་ཝི་ཡིས། གཉེན་སྒྲིག་བྱས་ཟིན་པའི་བུད་མེད་ལོ་ན་ 36 གྱི་འོག་ཅན་སུ་ཞིག་ལ། ཁོའི་ཁུ་བའམ་ཁམས་དཀར་དགོས་ཚེ་སྤྲད་རྒྱུ་དང་། ཁམས་དཀར་དེ་བུད་མེད་ཀྱི་མངལ་དུ་མ་བཞག་བར་གྱི་འགྲོ་གྲོན་ཡང་ཁོས་གཏོང་རྒྱུ་ཡིན་པ་བཤད།
ཏར་འཕྲིན་(Telegram)གྱི་བདག་པོ་རཱ་ཤི་ཡའི་འབྱོར་ལྡན། ན་གཞོན་པཱ་ཝེལ་རྡུ་རོ་ཝི་ཡིས། གཉེན་སྒྲིག་བྱས་ཟིན་པའི་བུད་མེད་ལོ་ན་ 36 གྱི་འོག་ཅན་སུ་ཞིག་ལ། ཁོའི་ཁུ་བའམ་ཁམས་དཀར་དགོས་ཚེ་སྤྲད་རྒྱུ་དང་། ཁམས་དཀར་དེ་བུད་མེད་ཀྱི་མངལ་དུ་མ་བཞག་བར་གྱི་འགྲོ་གྲོན་ཡང་ཁོས་གཏོང་རྒྱུ་ཡིན་པ་བཤད། ཁོས་བཤད་པ་ལྟར་ན། ད་ལྟ་འཛམ་གླིང་གི་རྒྱལ་ཁབ་ 12 སུ་ཁོ་ལ་ཕྲུ་གུ་གྲངས་ 100 ཉུང་མཐར་ཡོད་པ་དང་། ད་ལྟའི་གོ་ལའི་ཁོར་ཡུག་འབག་བཙོག་གི་རྐྱེན་པས། ཕོ་ཡི་སྐྱེད་འཕེལ་ནུས་པ་ཉམ་རྒུད་དུ་འགྲོ་བཞིན་པ་འདི་ནི་གནད་དོན་ཚབས་ཆེན་ཞིག་ཡིན་པས། རང་ངོས་ནས་འདིའི་ཐད་ཞབས་ཞུ་གང་ཐུབ་ཞུ་འདོད་ཡོད་པ་བཤད།
ཁོ་ལྟར་ན་ཕྱི་ལོ་ 2010 ལོར་ཁོས་རང་གི་གྲོགས་པོ། ཕྲུ་གུ་སྐྱེད་རྒྱུར་དཀའ་ངལ་ཡོད་མཁན་ཞིག་ལ། རང་གི་ཁུ་བ་ཞབས་འདེབས་སུ་སྤྲད་ཟིན་པ་དང་། དུས་དེ་ནས་བཟུང་ཁུ་བ་ཞབས་འདེབས་སུ་སྤྲོད་རྒྱུའི་འགོ་བཙུགས་ཟིན་པ་བཤད། ད་ལྟ་ཁོས་ཁུ་བ་གསར་བ་སྤྲོད་ཀྱི་མེད་ནའང་།སྔར་ཞབས་འདེབས་སུ་སྤྲད་ཟིན་པ་དག་སྨན་ཁང་དག་གི་ནང་དུ་ཡོད་པས། སྨན་ཁང་ནས་མུ་མཐུད་དུ་སྤྲོད་བཞིན་པ་ལ་རཱ་ཤི་ཡའི་རྒྱལ་སར་བུད་མེད་མང་པོ་ལེན་དུ་འགྲོ་བཞིན་པ་དང་། ད་ལྟ་ཁོའི་ཁམས་དཀར་དགོས་མཁན་བུད་མེད་གྲངས་བརྒྱ་ཆ་ 14% ཡར་འཕར་ཟིན་པ་རཱ་ཤི་ཡའི་གསར་ཁང་དག་གིས་གནས་ཚུལ་བཀོད། ད་དུང་ཁོས། འབྱུང་འགྱུར་ཁོ་མེད་པའི་རྗེས་སུ་ཁོའི་ཕྲུ་གུ་ཚང་མར་རང་གི་རྒྱུ་ནོར་བགོ་རྒྱུ་ཡིན་པ་བཤད།
ཧྥ་རན་སིའི་གསར་ཤོག་ཅིག་(Le Point)ལ་ཁོས། ངས་རང་གི་ཕྲུ་གུ་ཚོའི་བར་ཁྱད་པར་འབྱེད་རྒྱུ་མིན་ཞེས་བཤད། པཱ་ཝེལ་རྡུ་རོ་ཝི་དང་ཁོའི་སྤུན་གཉིས་ཀྱིས། ཕྱི་ལོ་ 2013 ལོར་ཏར་འཕྲིན་ཐོག་མར་བཟོས་ནས་ཕྱིར་བཏོན་ཅིང་། ཐོག་མར་རཱ་ཤི་ཡ་དང་ཡུ་ཁུ་རན་སོགས་སྔར་གྱི་ཨུ་རུ་སུ་དམར་པོའི་ཆ་ཤས་རྒྱལ་ཁབ་དག་ཏུ་བེད་སྤྱོད་ཤུགས་ཆེན་བྱས་ཤིང་།ད་ལྟ་རྒྱ་གར་དང་བྷིར་ཛིལ། ལྷོ་ཤར་ཨེ་ཤ་ཡའི་རྒྱལ་ཁབ་འགའ་བཅས་སུ་སྤྱོད་མཁན་མང་དུ་ཕྱིན། ཕྱི་ལོ་ 2014 ལོར་ཏར་འཕྲིན་གྱི་རང་དབང་ཆེད་ཁོ་རཱ་ཤི་ཡ་ནས་ཕྱིར་ཐོན། ད་ལྟ་ཁོ་ནི་ཨ་སྒོར་ཐེར་འབུམ་ $17 གྱི་བདག་པོ་ཡིན་པ་ལ། རཱ་ཤི་ཡ་དང་ཧྥ་རན་སི། ཨ་རབ་རྒྱལ་ཕྲན་མཉམ་འབྲེལ་བཅས་རྒྱལ་ཁབ་ 4 ཡི་མི་སེར་ཡིན་པས། ཁོ་ནི་རུ་སྤོས་ནས་འགྲོ་མཁན་གྱི་འབྲོག་པ་ལྟ་བུ་ཞིག་རེད་ཅེས་མི་རྣམས་ཀྱིས་བཤད།