སྤྱི་ཚོགས་དྲྭ་རྒྱའི་སྟེང་འཁོན་སེམས་ཀྱི་སྐད་ཆ་དང་། འཁྲིག་སྤྱོད་དང་འབྲེལ་བའི་བརྙན་པར་སོགས། བྱིས་པའི་སེམས་ཁམས་འཚར་ལོང་ལ་གནོད་པ་མང་པོ་ཁྱབ་བཞིན་པས། རྒྱལ་ནང་གི་བྱིས་པ་ལོ་ན་ 16 གྱི་འོག་ཅན་དག་ལ་སྤྱི་ཚོགས་དྲྭ་རྒྱ་འགོག་རྒྱུ་ཡིན་པ་བསྒྲགས།
ཧྥ་རན་སིའི་རྒྱལ་ས་ཕེ་རི་སིར་ཡོད་པ། ཨེ་ལོན་མ་སི་ཁིའི་སྤྱི་ཚོགས་དྲྭ་སྟེགས་ཨེག་སི་(X)ཡི་ས་གནས་ལས་ཁུངས་སུ། ཧྥ་རན་སིའི་དྲྭ་རྒྱའི་བདེ་འཇགས་ཚན་པའི་ལས་བྱེད་དག་འཛུལ་ཅིང་ཞིབ་བཤེར་བྱས། དོགས་ཡོད་ཉེས་པ་ནི་ལས་ཁུངས་འདིས་ཁྲིམས་འགལ་གྱི་གནས་ཚུལ་རྫུན་བཟོ་དང་། འཁྲིག་སྤྱོད་དང་འབྲེལ་བའི་བྱིས་པའི་བརྙན་པར་སོགས་མཉར་ཡོད་མེད་དེ་གྱུར། ཧྥ་རན་སིའི་ནག་ཉེས་འཛུགས་མཁན་ཚོས། ད་ལོའི་ཕྱི་ཟླ་ 4 ནང་ཨེ་ལོན་མ་སི་ཁི་དང་། ཨེག་སིའི་སྤྱི་གཉེར་ཟུར་བ་ལྕམ་ལིན་རྡ་ཡག་ཀ་རེ་ནོ་(Linda Yaccarino)གཉིས་ཁྲིམས་ཁང་ལ་ཉན་ཞིབ་ཆེད་ཡོང་དགོས་པའི་བཀའ་བཏང་ཟིན་པའི་གནས་ཚུལ་ཐོན།
ཨེ་ལོན་མ་སི་ཁིས། འདི་ནི་ཁོ་དང་ཁོའི་སྤྱི་ཚོགས་དྲྭ་སྟེགས་འདིར་ཆབ་སྲིད་ཀྱི་ཚུར་རྒོལ་བྱས་པ་ཞིག་ཡིན་པ་བསྒྲགས། ཨེག་སི་ཁེ་གཉེར་གྱིས། ཧྥ་རན་སིའི་ཐག་གཅོད་འདི་ལ་བློ་ཕམ་ཡོད་ཀྱང་། འདི་འདྲ་ཞིག་བྱ་རྒྱུ་ཡིན་པར་ཧ་ལས་མ་སོང་ཞེས་བཤད། ཧྥ་རན་སིའི་གཞུང་གིས་ལོ་སྔོན་མའི་ཕྱི་ཟླ་ 1 ནང་ནས་དྲྭ་སྟེགས་འདི་ལ་ཞིབ་འཇུག་འགོ་བཙུགས། དེ་བཞིན་དབྱིན་ཇི་གཞུང་གིས་ཀྱང་། ཨེ་ལོན་མ་སི་ཁིའི་བཅོས་མའི་རིག་པའི་མཉེན་ཆས། གྷི་རོ་ཁི་(Grok)ལ་ཞིབ་འཇུག་འགོ་བཙུགས་ཟིན། སྟེགས་བུ་འདི་དག་གི་སྟེང་མི་སྒེར་གྱི་བརྙན་པར་བེད་སྤྱོད་ཀྱིས་བཟོས་པ།
འཁྲིག་སྤྱོད་ཀྱི་རྣམ་པ་ཐོན་པའི་གནས་ཚུལ་དང་བརྙན་པར་མང་པོ་ཚོད་འཛིན་མེད་པར་བཀྲམས་པའི་གནས་ཚུལ་ཞིག་བྱུང་།
སི་པན་གྱི་སྲིད་བློན་གྱིས། ད་ལྟའི་སྤྱི་ཚོགས་དྲྭ་རྒྱའི་སྟེང་འཁོན་སེམས་ཀྱི་སྐད་ཆ་དང་། འཁྲིག་སྤྱོད་དང་འབྲེལ་བའི་བརྙན་པར་སོགས། བྱིས་པའི་སེམས་ཁམས་འཚར་ལོང་ལ་གནོད་པ་མང་པོ་ཁྱབ་བཞིན་པས། རྒྱལ་ནང་གི་བྱིས་པ་ལོ་ན་ 16 གྱི་འོག་ཅན་དག་ལ་སྤྱི་ཚོགས་དྲྭ་རྒྱ་འགོག་རྒྱུ་ཡིན་པ་བསྒྲགས། དེ་བཞིན་གྷི་རེ་སི་གཞུང་གིས་ཀྱང་བྱིས་པ་ལོ་ན་ 15 ཡི་འོག་ཅན་དག་ལ་དེ་ལྟར་འགོག་ལ་ཉེ་བའི་གནས་ཚུལ་ཐོན། ཧྥ་རན་སིའི་གྲོས་ཚོགས་སུའང་ད་ལྟ་འདིའི་ཐད་ལས་ཀ་བྱེད་བཞིན་པའི་མཚམས། ལོ་ན་ 16 གྱི་འོག་ཅན་དག་ལ་སྤྱི་ཚོགས་དྲྭ་རྒྱ་འགོག་མཁན་ཐོག་མ་དེ་ཨོ་སི་ཁྲོ་ལི་ཡ་གྱུར།