གཟའ་ཕུར་བུ་དང་གཟའ་པ་སངས་ཉིན་གྱི་ཞོགས་པར། སླར་ཡང་རཱ་དམག་གིས། ཡུ་ཁུ་རན་གྱི་རྒྱལ་ས་ཁེ་ཝུ་དང་། ལི་ཝེ་ཝི་ས་ཁུལ་བཅས་ལ་མཁའ་ཐོག་ནས་གཏོར་རྒོལ་དྲག་པོ་བྱས། ལྷག་པར་ལི་ཝེ་ཝི་ས་ཁུལ་དུ་གས་འཐོར་ཆེན་པོ་བྱུང་ཞིང་མཚན་མོའི་མཁའ་དབྱིངས་དམར་པོར་གྱུར།
ཐེངས་འདིར་རཱ་དམག་གིས། སྒྲ་རླབས་ལས་སྡབ་ 10 ཡས་མས་ཀྱི་མགྱོགས་ཤིང་། ཆུ་ཚོད་ 1 རིང་སྤྱི་ལེ་ 13,000 ལ་འཕུར་ཐུབ་མཁན་གྱི་བྷ་ལི་སི་ཀྲི་ཁི་འཕུར་མདའ་ཞིག་འཕངས་ཟིན་པ་ཡུ་ཁུ་རན་གྱིས་བཤད། འདི་འདྲའི་མགྱོགས་པོ་འཕུར་ཐུབ་མཁན་གྱི་འཕུར་མདའི་རིགས་གཅིག་ནི། ཨོར་ཤི་ནེ་ཁི་འཕུར་མདའ་ཡིན་པ་དང་ད་ལྟ་ཡུ་ཁུ་རན་གྱིས་འཕུར་མདའ་འདི་གང་ཡིན་ཞིབ་འཇུག་བྱེད་བཞིན་པ་བཤད།
ཡིན་ན་ཡང་། ད་ལྟ་རཱ་ཤི་ཡའི་བདེ་སྲུང་གིས། རཱ་དམག་གིས་ཐེངས་འདིར་འཕངས་པ་ནི། ཨོར་ཤི་ནེ་ཁི་འཕུར་མདའ་(Oreshnik)ཡིན་ཞེས་བསྒྲགས། དེ་ལྟར་ན་འདི་ནི་རཱ་དམག་གིས་ཨོར་ཤི་ནེ་ཁི་འཕུར་མདའ་སྤྱད་ནས་ཡུ་ཁུ་རན་ལ་ཚུར་རྒོལ་བྱས་པ་ཐེངས་གཉིས་པ་དེ་གྱུར། ཐེངས་དང་པོ་ནི་ཕྱི་ལོ་ 2024 ཟླ་ 11 ནང་སྒྲི་ནེ་པུར་གྲོང་ཁྱེར་ལ་གཏོར་རྒོལ་བྱས་པ་དེ་ཡིན། ཕུ་ཀྲན་གྱིས་འཕུར་མདའ་འདི་འཕངས་ནས། ཡུ་ཁུ་རན་གྱི་རྒྱལ་སའི་ལས་ཁུངས་གཙོ་བོ་དག་ལ་གཏོར་རྒོལ་བྱ་སྲིད་པའི་ཉེན་བརྡའང་བཏང་ཟིན།