ཐོན་མིའི་གཙུག་ལག་ཉིན་རེའི་རྒྱལ་སྤྱིའི་ངོས་ནས། ཕྱི་ལོ་གསར་བ་འཆར་ལ་ཉེ་བའི་མཚམས་འདིར། བོད་ཕྱི་ནང་གི་རྒྱ་ཆེ་ཀློག་པ་པོ་ཀུན་ལ་འཚམས་འཕྲིན་དང་བཅས། ལོ་འདིར་ངེས་ཅག་གི་ལས་དོན་དག་ལ་དངོས་ཤུགས་ནས་རྒྱབ་སྐྱོར་མཁན་གནང་མཁན། བོད་ཕྱི་ནང་གི་རིགས་མཐུན་ཡོངས་ལ་ཐུགས་རྗེ་ཆེ་ཞུ་བ་ལགས།
ཁྱེད་ཅག་གི་རྒྱབ་སྐྱོར་འདི་ལ་བརྟེན་ནས། ད་ལོའི་ཕྱི་ཟླ་ 6 ཚེས་ 25 ཉིན། ཐོན་མིའི་གཙུག་ལག་ཉིན་རེའི་རྒྱལ་སྤྱི་(Thonmi Tsuglag Daily World)ཞེས་པ་གཞུང་འབྲེལ་ངང་དབུ་འབྱེད་བྱས་ཐུབ་ཅིང་། ཕྱི་ཟླ་ 11 ཚེས་ 10 ཉིན་ནས་ཐོན་མིའི་གཙུག་ལག་གི་གསར་འགྱུར་དྲྭ་ཚིགས་བཟོས་གྲུབ་ནས་ཕྱིར་བཏོན་ཟིན་པས། ལོ་འདི་ནི་ངེད་ཅག་ལ་གལ་ཆེ་བའི་ལོ་ཞིག་ཏུ་གྱུར།
ཕྱི་ལོ་ 2025 ལོ་ནི་རྒྱལ་སྤྱིའི་ཁྱོན་དུ་གནས་ཚུལ་གལ་ཆེན་མང་པོ་བྱུང་བའི་ལོ་ཞིག་ཏུ་གྱུར་ཟིན་ནའང་། ང་ཚོས་འབད་པ་བྱས་ཀྱང་གནས་ཚུལ་མང་པོ་ཞིག་ཧྲིལ་བོ་འཛིན་མ་ཐུབ་པའི་ཚོར་བ་སྔར་བཞིན་ལྷག་ཡོད་ལ། ཕྱི་ལོ་གསར་བའི་ནང་མུ་མཐུད་དུ་ང་ཚོ་ཐུན་མོང་གིས་ལྷན་དུ་རྒྱལ་སྤྱིའི་འགྱུར་བ་དག་ལ་ལྟ་ཆོག དེས་ན་ཕྱི་ལོ་ 2025 ལོར་ཐོན་མིའི་གཙུག་ལག་ཉིན་རེའི་རྒྱལ་སྤྱིའི་སྟེང་སྤེལ་བའི་གསར་འགྱུར་གཙོ་བོ་འགའི་སྙིང་པོ་དག་བསྡུས་ན་འདི་ལྟར།
◾ ཨ་རི་དང་རྒྱལ་སྤྱི།
ད་ལོའི་ཕྱི་ཟླ་ 1 ནང་ཨ་རིའི་སྲིད་འཛིན་གསར་བར་སྒྲོ་ནལ་ཁྲི་རམ་ཕུ་སླེབས། རྒྱལ་སྤྱིའི་སྟེང་འཛིན་པའི་ཨ་རིའི་ཆབ་སྲིད་དང་དཔལ་འབྱོར།
ཕྱི་འབྲེལ། སྤྱི་ཚོགས་བདེ་དོན་སོགས་ཀྱི་སྲིད་བྱུས་དག་ལ་འགྱུར་བ་ཆེན་པོ་ཕྱིན་ཅིང་། དུས་ཚོད་ཐུང་ངུ་ཞིག་གི་ནང་དུ། སྔར་གྱི་ཨ་རིའི་སྣང་བརྙན་དེ་མི་རྣམས་ཀྱི་མཐོང་ལམ་ནས་ཡལ། དང་པོ་ནང་སྲིད་ཀྱི་ཆ་ནས་ཨ་རིའི་རྒྱལ་ནང་དུ་འཛུལ་བའི་ཕྱི་མི་མང་པོ་འཛིན་བཟུང་དང་ཕྱིར་ཕུད། དེ་ཚོར་སྤྲོད་པའི་གཞུང་གི་རོགས་སྐྱོར་ལས་གཞི་མང་པོ་ཕྱིར་འཐེན་པ་སོགས། རྒྱལ་ནང་དུ་གཡོ་འཁྱོམ་ཆེན་པོ་བྱུང་དུ་བཅུག་ཅིང་། དེའི་ཆེད་རྒྱལ་ས་གཙོས་གྲོང་ཁྱེར་ཆེ་ཁག་ཏུ་དམག་དཔུང་བ་བཏང་བ་སོགས། ཨ་རིའི་ལོ་རྒྱུས་ནང་བྱུང་བ་དཀོན་པའི་ལས་ཀ་མང་པོ་ཁག་བསྟར་བྱེད།
དེ་བཞིན་ད་ལོར་ཨ་རིའི་གཞུང་སྒོ་བརྒྱབས་པ་དེ། ལོ་རྒྱུས་ནང་གཞུང་སྒོ་བརྒྱབས་པ་དུས་ཡུན་རིང་ཤོས་སུ་གྱུར། ཨ་རིའི་གཙུག་ལག་སློབ་ཆེན་མང་པོའི་རོགས་དངུལ་ཕྱིར་འཐེན་པ་སོགས། སློབ་ཆེན་དག་གི་ཞིབ་འཇུག་སྡེ་ཁག་མང་པོ་ཚད་ཅན་དུ་གྱུར་ཅིང་། ཀྲེག་ས་སི་མངའ་སྡེ་ལྟ་བུ་ཚོའི་འོས་བསྡུའི་ས་ཁོངས་ལ་འགྱུར་བ་གཏོང་བ་བརྒྱུད། མུ་མཐུད་དུ་སྤྱི་མཐུན་ཚོགས་པས་གྲོས་ཚོགས་འཛིན་རྒྱུའི་ཐབས་བྱུས་ཆེན་པོ་ཞིག་ལག་བསྟར་བྱས། དེ་དང་ལྷན་ཕྱི་རྒྱལ་ལ་སྤྲོད་བཞིན་པའི་རོགས་སྐྱོར་ཕལ་ཆེ་བ་ཕྱིར་འཐེན་པ་དང་། རང་དབང་གི་རླུང་བརྙན་འཕྲིན་དག་སྒོ་བརྒྱབས་པ་སོགས། ཨ་རི་ནི་སྒེར་གཅོད་ལ་འཐབ་མཁན་དང་། མང་གཙོ་སྲུང་མཁན་ཞིག་ཡིན་པའི་སྣང་བརྙན་དེ་དྲན་ཡུལ་ཙམ་དུ་བསྒྱུར།
གཉིས་པ། ཕྱི་སྲིད་ཀྱི་ཐད་ནས་དུས་ཕུགས་རྒྱང་གི་ཁས་ལེན་དང་། སྲོལ་རྒྱུན་གྱི་སྒྲིག་འཛུགས་ལ་མོས་པ་དེ་ཙམ་མེད་ཅིང་། ཞེ་ཅེན་ཕིན་དང་ཕུ་ཀྲན། ཀེམ་ཇོང་ཨུན་ད་ལྟ་བུ་དག་ནི་དོན་དངོས་ཀྱི་ནུས་པ་ལྡན་ཞིང་།
དབུ་ཁྲིད་རྒོད་པོ་ཤ་སྟག་ཡིན་པར་འདོད་པའི་སྒྲོ་ནལ་ཁྲི་རམ་ཕུའི་ལྟ་ཚུལ་འོག ཡུ་རོབ་ལྟ་བུའི་སྲོལ་རྒྱུན་གྱི་མཐུན་གྲོགས་རྙིང་པ་དག་ནི་ནུས་མེད་དུ་འདོད་ཅིང་། རྒྱ་གར་ལྟ་བུའི་ཨ་རིའི་མཐུན་གྲོགས་གལ་ཆེན་དུ་འགྱུར་ཆོག་པ་དག་ཀྱང་། ཚོང་འབྲེལ་ལ་ཐུག་དུས་གལ་ཆུང་དུ་བརྩིས། ཐབས་བྱུས་ཀྱི་ཆ་ནས་རཱ་ཤི་ཡ་རང་ཕྱོགས་སུ་འགུག་རྒྱུ་འབད་པ་དང་། རྒྱ་ནག་དང་བྱང་ཀོ་རེ་ཡ་ལྟ་བུ་དག་བཏང་སྙོམས་ཀྱི་སྲིད་བྱུས་ཤིག་གི་འོག་ཏུ་བཅུག སྒོ་ཁྲལ་ཐབས་བྱུས་བརྒྱུད་ཨ་རི་དང་། རྒྱལ་ཁབ་གཞན་བར་གྱི་ཚོང་འབྲེལ་ལ་བསྐྱར་བཅོས་ཀྱི་འགོ་བཙུགས་ཤིང་། རྒྱ་དཀར་ནག་གཉིས་དང་ཨ་རི་བར་གྱི་ཚོང་འབྲེལ་སྔར་བཞིན་བསྐྱར་བཅོས་བྱེད་ཐུབ་མེད་པར་ལྷག
ཁེ་ན་ཀྲ་ཨ་རིའི་མངའ་སྡེ་ཞིག་ཏུ་བསྒྱུར་འདོད་དང་། གྷི་རེན་ལན་ཀྲི་ཨ་རིས་ཉོ་རྒྱུའམ། འཕྲོག་རྒྱུའི་རྣམ་འགྱུར་ཡང་ཡང་བསྟན་ཅིང་། ལྷོ་དང་དབུས་ཨ་མེ་རི་ཀའི་རྒྱལ་ཁབ་དག་རང་ཕྱོགས་སུ་འགུག་ཐབས་དང་། ཝེ་ནེ་ཛོ་ལ་དང་ཀོ་ལིམ་བྷི་ཡ། ཀུ་པ་སོགས་ལ་དམག་དཔུང་གིས་ཉེན་བརྡ་གཏོང་བཞིན་པ་བཅས། ཨ་རི་དང་རཱ་ཤི་ཡ། རྒྱ་ནག་གསུམ་གྱི་བར་གོ་ལ་ཧྲིལ་བོ་འདི་བག་ལེབ་ལྟར་བགོ་རྒྱུ་ཡིན་ན། གོ་ལའི་ནུབ་ཕྱོགས་ཀྱི་སྐམ་ས་དང་རྒྱ་མཚོ་ཆེན་མོ་(Western Hemisphere)ཨ་རིར་བདག་དགོས་པའི་རྣམ་འགྱུར་བསྟན། སྐད་ཆ་གཞན་ཞིག་གིས་བཤད་ན་ཨ་རིས་འགོ་འཁྲིད་པའི་འཁྲུག་ཆེན་གཉིས་པའི་རྗེས་ཀྱི་རྒྱལ་སྤྱིའི་སྒྲོམ་གཞི་དེ་མཇུག་སྡུད་བཞིན་པ་ངོས་ལེན་བྱེད་བཞིན་པ་ལྟ་བུ་གྱུར། དབུ་ཁྲིད་བརྗེས་པ་དང་ཆབ་སྲིད་འགྱུར་འགྲོ་ནའང་། ཨ་རི་དང་མཐུན་ཕྱོགས་ཚོའི་བར་ཐེབས་པའི་གནོད་པ་འདི་དག་དུས་ཐུང་ནང་བསྐྱར་གསོ་དཀའ་བ་བཤད།
◾ རྒྱ་ནག་དང་རྒྱལ་སྤྱི།
ཞེ་ཅེན་ཕིན་གྱིས་མུ་མཐུད་དུ་ལྐོག་ཟ་སོགས་ཀྱི་མིང་ཐོག་ནས། ཆེས་མཐོའི་མི་སྣ་དག་འབུར་འཇོམས་བྱེད་བཞིན་པ་དང་ལྷན། བོད་སོགས་གྲངས་ཉུང་མི་རིགས་ཀྱི་ས་ཁུལ་དག་ལ་སྡུག་རྩུབ་ཀྱི་སྲིད་བྱུས་སྔར་བཞིན་རྒྱུན་སྐྱོང་བཞིན་པ་ལས། དེ་ལ་འགྱུར་བ་ཅུང་ཟད་ཙམ་ཡང་གཏོང་རྒྱུའི་རྣམ་འགྱུར་མ་བསྟན་ཅིང་། ལྷག་པར་གཞི་རྒྱ་ཆེ་ས་ནས་འགྲོ་བ་མིའི་ཐོབ་ཐང་སོགས་ཀྱི་ཐད་ནས། རྒྱ་ནག་ལ་རྗེས་འདེད་གཏོང་མཁན་ངོ་མ་ཞིག་མེད་པར་གྱུར། དཔལ་འབྱོར་གྱི་ཐད་ནས་བཅོས་མའི་རིག་པ་དང་འཕྲུལ་རིག་གསར་གཏོད། མཁའ་དབྱིངས་སུ་འཕུར་མདའ་གཏོང་བ་སོགས། ཡར་རྒྱས་ཆེན་པོ་ཡོད་པ་གཅིག་མཐུན་དུ་ངོས་འཛིན། ཡིན་ན་ཡང་། ས་ཁང་ཁེ་གཉེར་གྱི་དཀའ་ངལ་སེལ་མ་ཐུབ་པའི་སྟེང་། རླངས་འཁོར་བཟོ་གྲྭ་དག་ཉེན་ཁའི་མཚམས་སུ་སླེབས་ཡོད་པའི་ཞིབ་འཇུག་སྙན་ཐོ་བཏོན།
ཕྱི་སྲིད་ཀྱི་ཆ་ནས་ཨ་རིའི་སྒོ་ཁྲལ་གྱི་རྐྱེན་པས། རྒྱ་དཀར་ནག་གཉིས་བར་འབྲེལ་ཐག་ཉེ་རུ་བཏང་ཞིང་། ཨ་རིའི་སྒོ་ཁྲལ་གྱི་སྡུག་ནད་འཁུར་བའི་མོ་དྷི་ད་ལོའི་ཕྱི་ཟླ་ 9 ནང་རྒྱ་ནག་ཐེན་ཅིན་གྲོང་ཁྱེར་དུ་སླེབས་ཤིང་། ཞེ་དང་ཕུ་ཀྲན། མོ་དྷི་གསུམ་གྱིས་གད་མོའི་ངང་ཅི་ཞིག་ཤོད་བཞིན་པའི་བརྙན་པར་སོགས་ཁྱབ། དེའི་གྲུབ་འབྲས་ལྟ་བུར་རྒྱ་དཀརནནག་གཉིས་བར། ཡང་བསྐྱར་ཐད་ཀར་འགྲུལ་སྐྱེལ་གནམ་གྲུ་འཕུར་ཞིང་། རྒྱ་གར་གྱིས་རྒྱ་ནག་གི་ཅ་དངོས་ཉོ་ཚད་ཡར་སྤར་བས། རྒྱལ་ཁབ་གཉིས་བར་གྱི་འདྲ་མཉམ་མ་ཡིན་པའི་ཚོང་འབྲེལ་ཧེ་བག་ཆེ་རུ་ལས། རེ་ཞིག་ཆུང་དུ་འགྲོ་རྒྱུའི་རེ་བ་མེད་པར་གྱུར། དེ་དང་ལྷན་ཞེ་ཅེན་ཕིན་ལྷོ་ཤར་ཨེ་ཤ་ཡར་སྐོར་བསྐྱོད་ཀྱིས། ཨ་རིའི་སྒོ་ཁྲལ་འོག་ཚུད་པའི་རྒྱལ་ཁབ་དག་དང་ལྷན་དཔུང་སྒྲིག་རྒྱུའི་འབད་པ་བྱས།
གནས་སྐབས་ཚོང་འབྲེལ་གྱི་ཆ་ནས་རྒྱལ་ཁབ་འདི་དག་གིས། རྒྱ་ནག་གི་ཅ་དངོས་ཉོ་ཚད་ཡར་འཕར་ཟིན་ནའང་། སྲིད་དོན་ཐབས་བྱུས་ཀྱི་ཆ་ནས་རྒྱལ་ཁབ་འདི་དག་རང་ཕྱོགས་སུ་འགུག་མ་ཐུབ། ཡིན་ན་ཡང་། ཕྱི་ཟླ་ 9 ནང་ཆབ་སྲིད་དང་དཔལ་འབྱོར་གཉིས་ཐད་ནས་ནུབ་ཕྱོགས་ཀྱི་ཉེས་ཆད་འོག་ལྷུང་ཡོད་པ། ཕུ་ཀྲན་དང་ཀེམ་ཇོང་ཨུན་གཉིས་པེ་ཅིང་དུ་སླེབས་ཤིང་།གནམ་བདེ་སྒོ་མོ་ཆེའི་ཡང་སྟེང་དུ་ཞེ་ཅེན་ཕིན་དང་ལྷན་དཔུང་བ་མཉམ་སྒྲིག་བྱས། དེའི་ཞོར་དུ་ཀེམ་གྱིས་རང་གི་བུ་མོ་ཐོག་མར་ཕྱི་རྒྱལ་དུ་འཁྲིད་ནས་སླེབས་ཤིང་། དེ་ནི་སྔར་ཁོའི་ཕ་རྒན་གྱིས་ཁོ་ལ་སྲིད་དབང་རྩིས་སྤྲོད་སྐབས་རང་ལ་དཀའ་ངལ་འཕྲད་པ་ལྟ་བུ། འབྱུང་འགྱུར་རང་གི་བུ་མོ་ལ་མི་འཕྲད་ཆེད་རེད་ཅེས་དང་། ལྷག་པར་ནུབ་ཕྱོགས་ལ། བྱང་ཀོ་རེ་ཡའི་སྲིད་གཞུང་ནི་ཀེམ་ནས་འགོ་བཙུགས་པ་ཞིག་མ་ཡིན་པ་བཞིན། ཀེམ་ནས་མཇུག་བསྡུ་རྒྱུ་ཞིག་ཀྱང་མིན་པའི་སེམས་ཁམས་ཀྱི་བརྡ་གཏོང་ཆེད་རེད་ཅེས་དབྱེ་ཞིབ་ཚོས་བཤད།
◾དམག་འཁྲུག
🔘 ཡུ་རོབ་དང་རཱ་ཡུའི་དམག་འཁྲུག
ཕྱི་ལོ་ 2022 ཟླ་ 2 ཚེས་ 24 ཉིན་ནས་འགོ་བཙུགས་པ། རཱ་ཤི་ཡ་དང་ཡུ་ཁུ་རན་གྱི་དམག་འཁྲུག་མུ་མཐུད་དུ་རྒྱུན་བསྐྱངས། ལོ་སྔོན་མའི་ཕྱི་ཟླ་ 8 ནང་ཡུ་དམག་གིས། རཱ་ཤི་ཡའི་ཁར་སི་ཀི་མངའ་སྡེར་ཕར་རྒོལ་གྱིས་ས་ཆ་ངེས་ཅན་ཞིག་འཕྲོག མཐར་བྱང་ཀོ་རེ་ཡ་དང་རཱ་ཤི་ཡའི་དམག་དཔུང་མཉམ་འབྲེལ་གྱིས་འཐབ་མཐར། ད་ལོའི་ཕྱི་ཟླ་ 3 ནང་ཡུ་དམག་ཁར་སི་ཀི་མངའ་སྡེ་ནས་ཕྱིར་ཡོངས་སུ་དེད། རཱ་དམག་གིས། རྡོ་ཉད་སི་ཀི་ས་ཁུལ་གྱི་གྲོང་བརྡལ་སེ་ཝེར་སི་ཀི་(Siversk)འཕྲོག་ཅིང་། ཕོ་ཁི་རོ་ཝི་སི་ཀི་གྲོང་ཁྱེར་དང་། དེའི་ཐག་ཉེའེ་མེར་ནེ་གྷི་ར་ཀྲི་གྲོང་བརྡལ་གྱི་བརྒྱ་ཆ་ཕལ་ཆེ་བ་འཕྲོག་ཐུབ་པར་གྱུར། གཞན་ཡང་གཡུལ་སའི་ཕྱོགས་དུ་མ་ནས་གྲོང་གསེབ་ཆུང་ངུ་མང་པོ་འཕྲོག རྒྱལ་ཁ་འདི་དག་གིས་ལོ་རྗེས་མའི་དམག་ཐབས་ལ་ཁྱད་པར་བཟོ་རྒྱུ་ཕུ་ཀྲན་གྱིས་རེ་བ་རྒྱག་བཞིན་པ་གསལ།
སྤྱིའི་ཆ་ནས་ད་ལོར་རཱ་དམག་ཚུར་རྒོལ་མཁན་དང་། ཡུ་དམག་འགོག་སྲུང་མཁན་དུ་གྱུར་བས། རཱ་དམག་གི་ཤི་རྨས་ཚད་དེ་འཇིགས་སུ་རུང་བ་ཞིག་ཏུ་གྱུར་ཅིང་། ལྷག་པར་ཉེ་བའི་ཟླ་བ་འགའི་ནང་ཡུ་དམག་ལས་རཱ་དམག་གི་ཤི་རྨས་ཚད་སྡབ་བརྒྱད་ཀྱིས་མཐོ་བ་བཤད་ཅིང་། གོ་ལག་ཕོན་ཆེན་གཡུལ་སར་ཤོར་བཞིན་པ་དང་། ཟླ་འགའི་ནང་གཡུལ་ས་གཅིག་ཁོ་ན་རུ། ལྕགས་ཁྲབ་འཁོར་ལོ་གྲངས་ 90 ཡས་མས་གཏོར་ཟིན་པའི་གནས་ཚུལ་ཐོན། དེ་དང་ལྷན་ཡུ་ཁུ་རན་གྱི་དམག་མི་མང་པོས་གཡུལ་སའི་འགོག་སྲུང་གཡུག་ནས་འབྲོ་བཞིན་པའི་གྲངས་འཕར་ཅིང་། ཡུ་དམག་གི་ཤི་རྨས་དང་། གོ་ལག་གཏོར་བའི་གྲངས་ཀྱང་ཉུང་ངུ་ཞིག་ཡིན་པ་དབྱེ་ཞིབ་པ་ཚོས་མི་འདོད། ཆབ་སྲིད་ཀྱི་ཐད་ནས་ཛེ་ལན་སི་ཀེའི་མཐའ་འཁོར་དུ་ལྐོག་ཟའི་གནད་དོན་ཆེན་པོ་ཞིག་བྱུང་ཞིང་། དེས་ཁོའི་སྣང་བརྙན་ལ་གནོད་པ་ཚབས་ཆེན་བསྐྱལ།
ཨ་རིའི་སྲིད་གཞུང་ལ་འགྱུར་བ་ཕྱིན་པ་དེ་ནི། ཡུ་ཁུ་རན་ལ་མཚོན་ན་དཀར་པོ་དམར་པོར་འགྱུར་བ་ལྟ་བུ་ཞིག་ཏུ་གྱུར། ཕྱི་ཟླ་ 2 ཚེས་ 28 ཉིན། ཨ་རིའི་སྲིད་འཛིན་རྒན་གཞོན་གཉིས་ཀྱིས་རྒྱལ་སྤྱིའི་མཐོང་ལམ་དུ་ཛེ་ལན་སི་ཀེའི་སྟེང་ཁ་རུབ་བརྒྱབས་པ་དེས། ཡོང་རྒྱུའི་སྲིད་བྱུས་དག་གང་འདྲ་ཞིག་ཡིན་པ་གསལ་བོར་བསྟན། དུས་དེ་ནས་བཟུང་ཨ་རི་ནི་ཡུ་རོབ་བརྒྱུད་ཡུ་ཁུ་རན་ལ་གོ་ལག་འཚོང་མཁན་ཞིག་ལས། ཡུ་ཁུ་རན་ལ་སྤྲོད་མཁན་ཞིག་ཏུ་མ་གྱུར་ཅིང་། ཆབ་སྲིད་ཀྱི་ཐད་ནས་རྒྱལ་ཚོགས་སུ་རཱ་ཤི་ཡར་རྒྱབ་སྐྱོར་ལས། ཡུ་ཁུ་རན་ལ་རྒྱབ་སྐྱོར་མི་བྱ་རྒྱུའི་རྣམ་འགྱུར་ཐེངས་མང་བསྟན་ཅིང་། སྐབས་འགར་ཨ་རི་དེ་བྱང་ཀོ་རེ་ཡ་དང་ཨེ་རན་བཅས་དང་ལྷན། རཱ་ཤི་ཡར་སྐྱོན་བརྗོད་བྱ་རྒྱུར་དགག་པའང་བརྒྱབས་པ་སོགས། སྔར་ཨ་རིའི་ལོ་རྒྱུས་ནང་མ་བྱུང་བའི་གནས་ཚུལ་དེ་འདྲ་བྱུང་།
སྔོན་དཔག་མི་ཐུབ་ཅིང་བརྟན་ལྷིང་མིན་པའི་སྒྲོ་ནལ་ཁྲི་རམ་ཕུའི་སྲིད་བྱུས་ཀྱི་རྐྱེན་པས། དུས་ཐུང་ནང་ནུབ་ཆིངས་ཀྱི་མཉམ་འབྲེལ་སྟོབས་ཤུགས་ལ་ཉམ་རྒུད་བཏང་བ་འདི་འདྲ། འདས་པའི་ལོ་རབས་འགའི་རིང་། སྤྱི་ཚོགས་རིང་ལུགས་ཀྱི་རྒྱལ་ཁབ་ཚོས་མཉམ་འབྲེལ་གྱིས་གཏོང་མ་ཐུབ་པ་ཤོད་མཁན་བྱུང་། གནས་སྟངས་འདིས་ཡུ་རོབ་དམག་དོན་གྱི་ལམ་ཀར་ཕྱིར་དེད་ཅིང་། ནུབ་ཆིངས་ཀྱི་རྩ་འཛིན་དོན་ཚན་ལྔ་བར་ཡིད་ཆེས་ངོ་མ་བྱེད་མཁན་ཞིག་ཡོད་མཐའ་ཙམ་དུ་གྱུར། ཡོང་རྒྱུའི་ལོ་འགའི་ནང་ཡུ་རོབ་དེ་སྔར་བཞིན་དམག་སྟོབས་དང་། གོ་ལག་གིས་ཕྱུག་པ་ཞིག་ཏུ་འགྱུར་རྒྱུ་གཏན་འཁེལ་ཟིན་པ་དང་། མ་མཐའ་ཡང་སྒྲོ་ནལ་ཁྲི་རམ་ཕུའི་ཆབ་སྲིད་སྐྱོང་རིང་། ཡུ་རོབ་དང་ཨ་རི་གཉིས་ཀྱི་འབྲེལ་བར་ཡར་རྒྱས་སྔོན་དཔག་མི་ཐུབ་པ་ཞིག་འབྱུང་རྒྱུའི་རྟགས་གང་ཡང་མ་ཐོན།
🔘 གྷ་ཛ་ས་ཁུལ་གྱི་དམག་འཁྲུག
ཕྱི་ལོ་ 2023 ཟླ་ 10 ཚེས་ 7 ཉིན་ཧཱ་མ་སི་དྲག་དཔུང་གིས་ཨེ་ཛི་རལ་ལ་ཚུར་རྒོལ་གྱིས་བསླངས་པའི་གྷ་ཛ་ས་ཁུལ་གྱི་དམག་འཁྲུག་ཁྲོད། པཱ་ལི་སི་ཐན་གྱི་མི་ཁྲི་ 7 ལས་མང་བ་བསད་ཅིང་། གྲོང་ཁྱེར་དག་ཐལ་བའི་རྡུལ་དུ་བརླགས། དམག་འཁྲུག་འདིའི་ཁྲོད་བྱུང་བའི་ཤི་རྨས་ཀྱི་གྲངས་ཀའི་རྐྱེན་པས། རྒྱལ་སྤྱིས་ཨེ་ཛི་རལ་ལ་གནོན་ཤུགས་ཆེན་པོ་སྤྲད་ཅིང་། པཱ་ལི་སི་ཐན་གྱི་མི་དག་ལ་རྒྱབ་སྐྱོར་མཚོན་ཆེད་ཨོ་སི་ཁྲོ་ལི་ཡ་དང་ཧྥ་རན་སི། དབྱིན་ཇི་སོགས་ནུབ་ཕྱོགས་རྒྱལ་ཁབ་ 8 ཀྱིས། གསར་དུ་པཱ་ལི་སི་ཐན་དེ་རྒྱལ་ཁབ་ཅིག་ཡིན་པ་ངོས་འཛིན་བྱས། འདི་ནི་ཆབ་སྲིད་ཀྱི་ཐད་ནས་མཚོན་དོན་ཙམ་ལས། ས་ཐོག་གི་དོན་དངོས་ལ་འགྱུར་བ་ཆེན་པོ་གཏོང་མ་ཐུབ་ཅིང་། ཨེ་ཛི་རལ་གྱིས་མུ་མཐུད་དུ་རྗོར་རྡན་གཙང་པོའི་ནུབ་རྒྱུད་ས་ཁུལ་དུ་གཞིས་ཆགས་རྒྱ་བསྐྱེད་དང་། གྷ་ཛ་ས་ཁུལ་གྱི་འབྱུང་འགྱུར་ཡང་ད་དུང་བར་སྣང་དུ་དཔྱང་ཡོད་པའི་མཚམས།
ད་ལོའི་ཕྱི་ཟླ་ 10 ནང་ཨ་རི་དང་དཀྱིལ་ཤར་གྱི་རྒྱལ་ཁབ་འགའི་བར་འདུམ་བརྒྱུད། གྷ་ཛ་ས་ཁུལ་དུ་མེ་མཚམས་བཞག་ཅིང་། ཧཱ་མ་སི་དྲག་དཔུང་གིས། ཁོ་ཚོས་ཕྱི་ལོ་ 2023 ལོའི་ཚུར་རྒོལ་སྐབས་བཟུང་ཟིན་པའི་མི་གསོན་པོ་དག་དང་། འདས་པོ་དག་གི་ཕུང་པོ་ཕྱིར་སྤྲད། འདི་ནི་སྲིད་འཛིན་སྒྲོ་ནལ་ཁྲི་རམ་ཕུ་ལ་ཕྱི་སྲིད་ཀྱི་རྒྱལ་ཁ་གལ་ཆེན་ཞིག་ཏུ་གྱུར། དེ་དང་ལྷན་ཕྱི་ཟླ་ 6 ནང་ཨེ་ཛི་རལ་དང་ཨེ་རན་བར་མཁའ་ཐོག་ནས་ཕན་ཚུལ་ལ་གཏོར་རྒོལ་དྲག་པོ་བྱས་ཤིང་། ཨེ་རན་གྱི་ཉིང་རྡུལ་ཚན་རིག་པ་དང་། ཆེས་མཐོའི་ལས་བྱེད་མང་པོ་བསད་པ་སོགས་གྱོང་གུན་ཆེན་པོ་བཟོས། ཨ་རིའི་མཁའ་དམག་གིས་ཀྱང་ཨེ་རན་གྱི་ཉིང་རྡུལ་བསྟི་གནས་ 3 ལ་གཏོར་རྒོལ་བྱས། ཨེ་ཛི་རལ་གྱི་གཏོར་རྒོལ་འདི་ལ་ལང་བཞིན་པའི་སེང་གེ་བྱ་འགུལ་ཞེས་འབོད་པ་དང་མཐར་མེ་མཚམས་བཞག་ཅིང་། འདི་ལ་ཉིན་ 12 ཀྱི་དམག་འཁྲུག་ཅེས་འབོད།
🔘 རྒྱ་གར་དང་པཱ་ཀི་སི་ཐན་གྱི་དམག་འཁྲུག
ད་ལོའི་ཕྱི་ཟླ་ 4 ཚེས་ 22 ཉིན་རྒྱ་གར་གྱི་མཇལ་མུ་དང་ཀ་ཤི་མར་ས་ཁུལ་གྱི་པཱ་ཧལ་གྷམ་ཞེས་པ། ཡུལ་སྐོར་བའི་བསྟི་གནས་ཤིག་ཏུ་དྲག་སྤྱོད་པས་གཏོར་རྒོལ་གྱིས། གཙོ་བོ་ཧིན་རྡུའི་སྐྱེས་པ་ཡིན་པའི་མི་ 26 བསད། རྒྱ་གར་གྱིས་དྲག་རྒོལ་འདི་དང་པཱ་ཀི་ཐན་གྱི་དྲག་སྤྱོད་པ་ཚོའི་བར་འབྲེལ་བ་ཡོད་པ་བཤད་ཅིང་། ཕྱི་ཟླ་ 5 ཚེས་ 7 ནས་ཚེས་ 10 བར་སིན་དྷུར་བྱ་འགུལ་ཞེས་པའི་མིང་གི་འོག རྒྱ་གར་མཁའ་དམག་གིས་པཱ་ཀི་སི་ཐན་གྱི་རྒྱལ་ནང་ལ་གཏོར་རྒོལ་དང་། པཱ་ཀི་སི་ཐན་གྱིས་ཕྱིར་ལན་བསློགས་ཤིང་། མཁའ་དབྱིངས་སུ་ཕན་ཚུན་གྱི་འཐབ་འཛིང་གནམ་གྲུའི་བར་ཐད་ཀར་འཛིང་། ས་མཚམས་སུ་དམག་མིས་ཕར་ཚུར་མེ་སྒྱོགས་འཕེན་རེས་བྱས།
མཐར་ཨ་རིའི་སྲིད་འཛིན་སྒྲོ་ནལ་ཁྲི་རམ་ཕུས། ཨ་རིས་བར་འདུམ་བྱས་པ་ཡིན་ཞེས་བསྒྲགས་པ་ལྟར། རྒྱལ་ཁབ་གཉིས་བར་མེ་མཚམས་འཇོག་ཐུབ་པར་གྱུར། ཡིན་ན་ཡང་། རྒྱ་གར་གྱིས་པཱ་ཀི་སི་ཐན་གྱིས་ང་ཚོར་ཚུར་འབྲེལ་བ་བྱས་པ་ལ་བརྟེན་ནས། རྒྱལ་ཁབ་གཉིས་བར་མེ་མཚམས་བཞག་པ་ལས། སྒྲོ་ནལ་ཁྲི་རམ་ཕུས་བར་འདུམ་བྱས་ནས་བྱུང་བ་མིན་ཞེས།གཞུང་འབྲེལ་གྱིས་བསྒྲགས་ཤིང་རྗེས་སུ་ལས་བྱེད་ཚོས་ཡང་དང་བསྐྱར་དུ་བཤད། ཡིན་ན་ཡང། སྒྲོ་ནལ་ཁྲི་རམ་ཕུས། རྡུལ་མཚོན་ཐོགས་པའི་རྒྱལ་ཁབ་འདི་གཉིས་བར་འདུམ་གྱིས། མི་གྲངས་ས་ཡ་མང་པོའི་སྲོག་བསྐྱབས་ཟིན་ཅེས། ཁོས་དམག་འཁྲུག་བརྒྱད་མཚམས་འཇོག་ཏུ་བཅུག་ཟིན་ཅེས་ཤོད་བཞིན་པའི་ཁྲོད་དུ་ད་ལྟའང་འདི་རྩི་བཞིན་ཡོད།
◾གནས་ཚུལ་ཆེན་པོ་གཞན་དག
🔘 ད་ལོའི་ཕྱི་ཟླ་ 6 ནང་ཡེ་ཤུ་བླ་ཆེན་པོབ་ཧྥི་རན་སེ་སི་སྐུ་བཤེགས་ཤིང་། འཛམ་གླིང་གང་ས་ནས་འདུས་པའི་ཡེ་ཤུ་ཆོས་དཔོན་ཚོས་འོས་བསྡུ་བརྒྱུད་ཡེ་ཤུ་བླ་ཆེན་གསར་བ་བསྐོས། ཡེ་ཤུ་བླ་ཆེན་གསར་བ་ཁོང་ནི་ཨ་རི་བ་ཞིག་དང་། ཁོང་གིས་རང་གི་མཚན་ལ་པོབ་ལེའོ་ཞེས་བཏགས།འདི་ནི་ལོ་རྒྱུས་ནང་ཨ་རིའི་མི་སེར་ཞིག་གིས་ཡེ་ཤུ་གདན་ས་བཟུང་བ་ཐོག་མ་དེ་གྱུར། ཡེ་ཤུ་བླ་ཆེན་གསར་བས་གུ་ཡངས་ལྟ་ཚུལ་ཞིག་བཟུང་ཡོད་རྐྱེན། སྒྲོ་ནལ་ཁྲི་རམ་ཕུ་སྲིད་གཞུང་གཙོས་ནུབ་ཕྱོགས་ཀྱི་རྙིང་ཞེན་སྲིད་གཞུང་དག་གིས། ཤུགས་རྐྱེན་ཆེ་བའི་མི་སྣ་འདིར་རྒྱང་ལྟའི་ཚུལ་དུ་བསྡད་ཡོད་པ་ལས། ད་ལྟ་བར་འབྲེལ་བ་ཉེ་བོ་འཛིན་འདོད་ཀྱི་རྣམ་འགྱུར་མ་བསྟན། བླ་ཆེན་མཆོག་གིས་ཀྱང་ད་ལྟའི་ཨ་རིའི་སྐྱབས་བཅོལ་སྲིད་བྱུས་ལ་སྐྱོན་བརྗོད་གནང་།
🔘 ད་ལོའི་ཕྱི་ཟླ་ 9 ནང་བལ་ཡུལ་དུ། ན་གཞོན་ཚོས་འགོ་འཁྲིད་པའི་འོག་ལྐོག་ཟར་རྒོལ་བའི་ལས་འགུལ་ཆེན་པོ་ཞིག་སྤེལ། ངོ་རྒོལ་འདིའི་ཁྲོད་མི་ 77 རྐྱེན་འདས་སུ་ཕྱིན་པས། ངོ་རྒོལ་གཞི་རྒྱ་ཆེ་རུ་ཕྱིན་ཅིང་མཐར་བལ་བོའི་སྲིད་བློན་གྱིས་དགོངས་པ་ཞུས་པ་སོགས། དུས་ཐུང་རིང་རྒྱལ་ནང་དུ་སྔོན་དཔག་མ་ཐུབ་པའི་སྲིད་འགྱུར་ཆེན་པོ་བྱུང་ཞིང་། བལ་བོའི་སྟོབས་ཤུགས་རྙིང་པ་དག་མཇུག་བསྡུ་རྒྱུའི་མཚམས་སུ་བསྐྱལ། ན་གཞོན་ཚོའི་རེ་བ་ལྟར། ཁྲིམས་དཔོན་ཟུར་བ་བུད་མེད་སུ་ཤི་ལ་ ཁར་ཁེ། བར་བརྒལ་སྲིད་བློན་དུ་བསྐོས་ཤིང་། མོས་ལོ་རྗེས་མའི་ཕྱི་ཟླ་ 3 ནང་རྒྱལ་ཡོངས་སུ། གྲོས་ཚོགས་འོས་བསྡུ་གསར་བ་སྤེལ་རྒྱུ་ཡིན་པ་ཐག་བཅད། ན་གཞོན་ཚོའི་རེ་བ་འགྲུབ་རྒྱུ་ཡིན་ནམ། ཡང་ན་སྔར་བཞིན་སྟོབས་ཤུགས་རྙིང་པ་དག པགས་པ་གསར་བ་ཞིག་གི་འོག་ནས་ཕྱིར་ཡོང་རྒྱུ་ཡིན་ལོ་རྗེས་མར་མཐོང་རྒྱུ།
🔘 ད་ལོའི་ཕྱི་ཟླ་ 6 ཚེས་ 12 ཉིན། རྒྱ་གར་གྱི་གྷུ་ཇི་ར་ཐེ་མངའ་སྡེའི་ཨ་མེ་རྡ་བྷ་ཐི་གྲོང་ཁྱེར་ནས། དབྱིན་ཇིའི་རྒྱལ་ས་ལོན་ཀྲོན་དུ་འཕུར་མཁན། འགྲུལ་སྐྱེལ་གནམ་གྲུ་ཞིག་ཡར་འཕུར་བ་དང་ཕྱིར་ཐང་ལ་བརྡབས་ཤིང་། ནང་གི་མི་གཅིག་ཁོ་ན་ལས་ལྷག་མ་ཚང་མ་དང་། ཐང་གི་མི་ 19 བཅས་ཁྱོན་ 241 རྐྱེན་འདས་སུ་ཕྱིན། དོན་རྐྱེན་ཆེན་པོ་འདིའི་འབྱུང་རྐྱེན་ཐད་ཞིབ་འཇུག་བྱེད་འབྲས་རིམ་པ་དང་པོ་ལྟར་ན། གནམ་གྲུའི་འཕྲུལ་ཆས་ནང་སྣུམ་མ་རྒྱུགས་པ་དང་། དེའང་སྣུམ་སྒོ་བརྒྱབས་ཟིན་པས་ཡིན་སྲིད་པ་བཤད་ཅིང་། དོགས་པ་དེ་སྐྱེད་བྱེད་གལ་ཆེན་ཞིག་ནི་ཁ་ལོ་བ་ཞིག་གིས་གཞན་དེར། ཁྱོད་ཀྱིས་ཅིའི་ཕྱིར་སྣུམ་སྒོ་བརྒྱབས་པ་ཡིན་ཞེས་དྲིས་པར། གཞན་དེས་ངས་བརྒྱབས་མེད་ཅེས་ཤོད་བཞིན་པའི་སྒྲ་གོ་ཐུབ་པར་གྱུར། ཞིབ་མཇུག་གི་མཐའ་མའི་གྲུབ་འབྲས་ད་དུང་ཕྱིར་ཐོན་མེད།
🔘 ད་ལོའི་ཕྱི་ཟླ་ 11 ཚེས་ 26 ཉིན་ཧོང་ཀོང་གི་མི་སེར་སྡོད་གནས་ཁང་བརྩེགས་བདུན་ལ་མེ་སྐྱོན་གྱིས་མི་ 161 རྐྱེན་འདའ་སུ་ཕྱིན་ཅིང་། ཡ་ང་བའི་ཆག་སྒོ་འདིའི་རྒྱུ་རྐྱེན་དངོས་གང་ཡིན། ད་དུང་ཡང་ཧོང་ཀོང་གཞུང་ལ་གསལ་བོ་ཞིག་བཤད་རྒྱུ་མེད་པར་གྱུར། འདི་དང་འབྲེལ་འཛུགས་སྐྲུན་ཁེ་གཉེར་གྱི་སྤྱི་ཁྱབ་སོགས་བཟུང་། ཧོང་ཀོང་མི་དམངས་ཁྲོད་དོན་རྐྱེན་འདིའི་ཐད་ཁོང་ཁྲོའི་ཚོར་བ་ཤུགས་ཆེན་ཡོད་ཀྱང་། ཧོང་ཀོང་ས་གནས་གཞུང་དང་རྒྱ་དམར་པེ་ཅིང་གཞུང་གཉིས་ཀྱིས། འདི་ལ་ཁག་བཞག་ནས་སླར་ཡང་ཧོང་ཀོང་གི་བརྟན་ལྷིང་དང་། བདེ་འཇགས་ལ་གནོད་སྐྱེལ་མཁན་ཡོད་ཚེ། རྗེས་འདེད་དང་ཉེས་ཁྲིམས་དྲག་པོ་གཅོད་རྒྱུ་ཡིན་ཞེས་ཉེན་བརྡ་བཏང་། དེ་ནི་ཆག་སྒོ་འདིས་སླར་ཡང་གྲོང་ཁྱེར་འདིར་མང་གཙོའི་ལས་འགུལ་ཞིག་གི་སྣེ་འདྲེན་སྲིད་པར་འཇིགས་ཡོད་པ་གསལ།
🔘 དཔལ་འབྱོར་གྱི་ཐད་ལོ་འདི་ནི་བཅོས་མའི་རིག་པ་ཡར་རྒྱས་ཆེད།འབྱོར་ལྡན་དང་ཁེ་གཉེར་མང་པོས་ཨ་སྒོར་ཐེར་འབུམ་བརྒྱ་ཕྲག་གི་མ་རྐང་བཞག འདི་ཉིད་བཟང་ཕྱོགས་ཀྱི་ཡར་རྒྱས་ཤིག་ཡིན་པ་དང་ལྷན། གྲུབ་འབྲས་མ་ཐོན་སྔོན་གྲུབ་འབྲས་ཆེན་པོ་ཞིག་ལ་རེ་བ་རྒྱག་བཞིན། ཚད་ལས་བརྒལ་བའི་མ་རྐང་བཞག་པ་འདིས་གློ་བུར་དུ་རྒྱལ་སྤྱིའི་དཔལ་འབྱོར་ལ་ཆག་སྒོ་ཆེན་པོ་ཞིག་གི་སྣའང་འདྲེན་སྲིད་པ། དབྱིན་ཇིའི་དབུས་དངུལ་ཁང་གཙོས་དཔལ་འབྱོར་ཆེས་མཁས་པ་ཚོས་ཉེན་བརྡ་བཏང་། གནས་ཚུལ་འདིའི་སྐོར་ཕྱི་ལོ་གསར་བའི་ནང་མང་དུ་འགྲོ་རྒྱུ་ཚོད་དཔག་བྱེད་བཞིན་པ་ལགས། གཞན་ཡང་ལོ་འདིར་རྒྱ་གར་གྱི་དཔལ་འབྱོར་བོང་ཚད་དེ། ཉི་ཧོང་ལས་བརྒལ་ཅིང་བོང་ཚད་ཀྱི་ཆ་ནས་འཛམ་གླིང་གི་དཔལ་འབྱོར་ཆེ་ཤོས་བཞི་བ་དེ་གྱུར།
