བདུན་ཕྲག་སྔོན་མའི་གཟའ་སྤེན་པའི་མཚན་མོར། རྒྱ་གར་ལྷོ་ཕྱོགས་ཀྱི་གྷོ་ཝ་ས་ཁུལ་གྱི་ཨར་པོ་ར་(Arpora)ཞེས་པའི་གྲོང་གསེབ་ཏུ་ཡོད་པ། མཚན་ཚོགས་ཁང་ཞིག་ཏུ་མེ་སྐྱོན་ཆེན་པོ་བྱུང་ཞིང་མི་ 25 རྐྱེན་འདས་སུ་ཕྱིན།
བདུན་ཕྲག་སྔོན་མའི་གཟའ་སྤེན་པའི་མཚན་མོར། རྒྱ་གར་ལྷོ་ཕྱོགས་ཀྱི་གྷོ་ཝ་ས་ཁུལ་གྱི་ཨར་པོ་ར་(Arpora)ཞེས་པའི་གྲོང་གསེབ་ཏུ་ཡོད་པ། མཚན་ཚོགས་ཁང་ཞིག་ཏུ་མེ་སྐྱོན་ཆེན་པོ་བྱུང་ཞིང་། དེའི་ཁྲོད་ལས་བྱེད་ 14 དང་ཡུལ་སྐོར་བ་ 4 བཅས་ཚུད་པའི་ཁྱོན་མི་ 25 རྐྱེན་འདས་སུ་ཕྱིན་ཟིན་པ་ལྟར། དོན་རྐྱེན་འདི་བྱུང་ནས་ཆུ་ཚོད་འགའི་རྗེས་སུ། མཚན་ཚོགས་ཁང་འདིའི་བདག་པོ་སུ་ར་བྷི་(Saurabh)
ཞེས་པ་དང་། གྷའོ་ར་ཝི་(Gaurav Luthra)ཞེས་སྤུན་གཉིས་ཡོད་པ་ཐེ་ལན་དུ་བྲོས་ཟིན་པའི་གནས་ཚུལ་ཐོན། གནས་ཚུལ་འདི་བདེན་པ་ཡིན་པ་རྒྱ་གར་གཞུང་གིས་ཀྱང་གཏན་འཁེལ།
རྒྱ་གར་ཉེན་རྟོག་པས་རྒྱལ་སྤྱིའི་ཉེས་དོན་ཉེན་རྟོག་ལྷན་ཚོགས་(Interpol)ལ། མི་འདི་གཉིས་འཛིན་རྒྱུར་རོགས་རམ་བྱ་དགོས་པའི་སྙན་ཞུ་ཕུལ་ཟིན་པ་གསལ། མཚན་ཚོགས་ཁང་འདིའི་སྤྱི་གཉེར་གཙོ་བོ་ཡིན་པ་སུ་ར་བྷི་ཞེས་པ་འདིས། རང་གི་སྤྱི་ཚོགས་དྲྭ་རྒྱའི་སྟེང་ཐེངས་འདིའི་ཆག་སྒོ་ཁྲོད་ཚུད་པ་དག་གི་འབྲེལ་ཡོད་ཚོར་མྱ་ངན་ཞུ་ཚིག་ཅིག་སྤེལ། ཡིན་ན་ཡང་ཁོ་རང་ཉིད་གང་དུ་ཡོད་པ་མ་བྲིས།
ཐོག་མར་ས་གནས་ཀྱི་ཉེན་རྟོག་དཔོན་ལྟར་ན། ཆག་སྒོ་འདིའི་རྒྱུ་རྐྱེན་གཙོ་བོ་ནི་རླངས་རྫས་ལྕགས་ཟོ་ཞིག་གས་འཐོར་བྱུང་ནས་ཡིན་པ་བཤད་ཀྱང་། ད་ལྟ་ཞིབ་འཇུག་ཚོགས་པ་ཞིག་ལྟར་ན། དེ་ནི་ཁང་པའི་ནང་དུ་ཤོག་སྦག་སྤར་ལ་བརྟེན་ནས་ཡིན་པ་ཡིད་ཆེས་བྱེད་བཞིན་ཡོད་ཅེས་བཤད།