ཁ་སང་ཕྱི་དྲོ་ཧོང་ཀོང་གི་ནུབ་ཕྱོགས་ཀྱི་ཐའེ་པོ་ཞེས་པའི་ས་ཁུལ་དུ། ཁང་བརྩེགས་སྐོར་ཞིག་མེ་འབར། ཁང་བརྩེགས་འདི་དག་ཏུ་མི་གྲངས་ 4,600 གནས་སྡོད་བྱས་ཡོད་པ་དང་། ཉེ་འཁོར་གྱི་ཁང་པ་དག་ཏུའང་མི་ 2,000 མ་ཟིན་ཙམ་གནས་སྡོད་བྱེད་ཡོད་པའི་གནས་ཚུལ་ཐོན། འདི་ནི་མེ་སྐྱོན་ཚད་གཞི་མཐོ་ཤོས་ཀྱི་གྲས་སུ་བརྩིས་ཤིང་། འདིའི་ཁྲོད་ད་ལྟ་བར་མི་ 44 རྐྱེན་འདས་སུ་ཕྱིན་ཟིན་པ་གཏན་འཁེལ།
གཞན་ཡང་མི་ 45 ལ་རྨས་སྐྱོན་ཚབས་ཆེན་འཕོག་ཡོད་པ་བསྒྲགས། དེ་བཞིན་ད་དུང་ཡང་མི་ 279 ཤི་གསོན་མ་ངེས་པའི་མཚམས། རྐྱེན་འདས་སུ་ཕྱིན་ཟིན་པ་དག་གི་ཁྲོད། མེ་གསོད་རུ་ཁག་གི་ལས་བྱེད་ཅིག་ཀྱང་ཚུད་ཟིན་པ། ཧོང་ཀོང་གཞུང་གིས་བསྒྲགས།
མེ་སྐྱོན་འདིའི་རྒྱུ་རྐྱེན་གང་ཡིན་ད་དུང་ཡང་མི་གསལ་ལ། དེར་ཞིབ་འཇུག་བྱེད་བཞིན་པའི་སྒང་ཡིན་པ་བསྒྲགས། དེ་རིང་ཞོགས་པར་ཁང་བརྩེགས་ 8 ནས་ཁང་བརྩེགས་ 4 ཡི་སྟེང་ནས་དུ་བ་ཐོན་བཞིན་པ་དང་། རྩ་བའི་མེ་མགོ་མནན་ཟིན་པ་གསལ། འདི་ནི་འདས་པའི་ལོ་ངོ་ 60 རིང་ཧོང་ཀོང་དུ་བྱུང་བའི་མེ་སྐྱོན་སྡུག་ཤོས་དེ་གྱུར།