ཨ་རིས་ཝེ་ནེ་ཛོ་ལ་རྒྱལ་ཁབ་ལ་རྒོལ་བའི་དམག་དོན་བྱ་འགུལ་རིམ་པ་གསར་བ་ཞིག་ཡོང་རྒྱུའི་ཉི་མ་དག་གི་ནང་འགོ་གཟུག་རྒྱུ་ཡིན་པ། བདུན་ཕྲག་སྔོན་མར་རོའུ་ཀྲར་གསར་ཤོག་གིས་ཨ་རིའི་ལས་བྱེད་ཅིག་གི་སྐད་ཆ་ལུང་འདྲེན་གྱིས་གནས་ཚུལ་བཀོད།
ལྷོ་ཨ་མེ་རི་ཀའི་རྒྱལ་ཁབ་ཝེ་ནེ་ཛོ་ལ་དང་དེའི་ཐག་ཉེའི་ཁཱ་རེ་བྷེ་ཡན་མཚོ་རྒྱུད་དུ། ཨ་རིའི་དམག་དཔུང་དང་གོ་ལག་ཕོན་ཆེན་སྤུངས་ཡོད་པ་ལྟར། ཨ་རིས་ཝེ་ནེ་ཛོ་ལ་རྒྱལ་ཁབ་ལ་རྒོལ་བའི་དམག་དོན་བྱ་འགུལ་རིམ་པ་གསར་བ་ཞིག་ཡོང་རྒྱུའི་ཉི་མ་དག་གི་ནང་འགོ་གཟུག་རྒྱུ་ཡིན་པ། བདུན་ཕྲག་སྔོན་མར་རོའུ་ཀྲར་གསར་ཤོག་གིས་ཨ་རིའི་ལས་བྱེད་ཅིག་གི་སྐད་ཆ་ལུང་འདྲེན་གྱིས་གནས་ཚུལ་བཀོད། འཆར་གཞི་འདིའི་སྐོར་ཞིབ་ཕྲ་མི་གསལ་ནའང་། དེའི་ཁྲོད་སྲིད་འཛིན་མཱ་རྡུ་རོ་ཡི་སྲིད་དབང་མགོ་གཏིང་བསློག་རྒྱུའང་ཚུད་ཡོད་སྲིད་པ་བཤད།
ཝེ་ནེ་ཛོ་ལའི་སྲིད་འཛིན་དང་། ཆེས་མཐོའི་དཔོན་རིགས་ཚོས་གྲུབ་ཡོད་པར་བཤད་པའི་ནག་ཚོགས་(Cartel de los Soles)ཞེས་པ། ཨ་རིས་ཕྱི་རྒྱལ་དྲག་སྤྱོད་པའི་མིང་ཐོའི་ནང་བཅུག་ཅིང་། དེའི་དོན་ནི་ཝེ་ནེ་ཛོ་ལ་རྒྱལ་ཁབ་ཀྱི་སྲིད་འཛིན་མཱ་རྡུ་རོ་ཁྲིམས་མ་ཡིན་པ་ཙམ་དུ་མ་ཟད། ནག་ཚོགས་ཀྱི་མི་ཡིན་པ་བསྒྲགས་ཟིན་པ་ཡིན། མང་པོ་ཞིག་གིས། འདི་ནི་ཨ་རིས་ཡུལ་འདིར་དམག་དོན་བྱ་འགུལ་ཞིག་སྤེལ་རྒྱུའི་ལམ་ཀ་བཟོ་བཞིན་པ་ཞིག་ཡིན་པ་བཤད།
ད་ལྟ་ཨ་རིས་ཉེན་བརྡ་བཏང་རྐྱེན། ཝེ་ནེ་ཛོ་ལའི་མཁའ་དབྱིངས་སུ་ གནམ་གྲུ་དག་འཕུར་རྒྱུར་འཛེམས་བཞིན་པའི་གནས་ཚུལ་ཐོན། ཡུ་ཁུ་རན་གྱི་དམག་དོན་གསང་བའི་ལས་ཁུངས་ཀྱི་དབུ་ཁྲིད་དམག་སྤྱི་བྷུ་རྡ་ནོ་ཝི་ལྟར་ན། ད་ལྟ་ཝེ་ནེ་ཛོ་ལ་རྒྱལ་ཁབ་ཏུ་རཱ་ཤི་ཡའི་དམག་མི་གྲངས་ 120 ཡོད་པ་དང་། དེ་དག་གི་འགོ་འཁྲིད་མཁན་ནི་ཡུ་ཁུ་རན་ལ་བཙན་འཛུལ་སྐབས། རཱ་དམག་གི་འགོ་འཁྲིད་མཁན་དམག་སྤྱི་མཱ་ཀ་རེ་ཝེ་ཆི་(Oleg Makarevich)ཟེར་བ་ཡིན་པ་བཤད།