ཞེ་ཅེན་ཕིན་གྱིས། རྒྱལ་སྤྱིའི་འགྲན་རྩོད་ཁྲོད་ཀྲུང་གོས། ཐབས་བྱུས་ཀྱི་དམིགས་ཡུལ་དག་འགྲུབ་ཆེད་ལག་བསྟར་གསར་བ་འགོ་གཟུག་དགོས་པ་བཤད། ཐེ་ཝན་དང་འབྲེལ་ཁོས། མཚོ་འགག་གཉིས་ཀྱི་མི་དམངས་རྣམས། ཕན་ཚུན་ཁྲག་གིས་སྦྲེལ་ཡོད་པ་དང་། མེས་རྒྱལ་གཅིག་གྱུར་བྱ་རྒྱུའི་ལམ་ཀ་སུས་ཀྱང་འགོག་མི་ཐུབ་ཅེས་བཤད།
ཁ་སང་གཟའ་ལྷག་པའི་ཉིན། རྒྱ་ནག་གི་སྲིད་འཛིན་ཞེ་ཅེན་ཕིན་གྱིས་ལོ་གསར་བའི་གཏམ་བཤད་དེ་སྤེལ་ཅིང་། ཁོས། ལོ་གསར་བའི་ནང་རྒྱལ་དམངས་དཔལ་འབྱོར་ཡར་རྒྱས་དང་། འཕྲུལ་རིག་གསར་གཏོད་ཀྱི་ཐད་དུ་འབད་པ་སྡབ་འགྱུར་གྱིས་བྱ་དགོས་པ་བསྒྲགས་ཤིང་། ང་ཚོའི་རྨི་ལམ་དང་ང་ཚོའི་བདེ་སྐྱིད་ཀྱི་ཆེད་དུ་འཐབ་ཆོག་ཅེས་བཤད། ལོ་འདི་ནི་རྒྱ་ནག་གི་ལོ་ལྔའི་འཆར་གཞི་ཐེངས་བཅོ་ལྔ་བ་ལག་བསྟར་ལོ་དང་པོ་དེ་ཡིན་པ་ལྟར། འདི་ནི་རྒྱ་ནག་གི་དཔལ་འབྱོར་ཡར་རྒྱས་ཀྱི་ཆོམ་འཕྲུལ་ལེའུ་རྗེས་མ་དེ་ཡིན་པ་བཤད། དེ་བཞིན་རྒྱ་ནག་གི་དཔལ་འབྱོར་དེ། གསར་གཏོད་ཀྱི་གོམ་སྟབས་མགྱོགས་ཤོས་ཀྱི་ཁྲོད་དུ་ཡོད་པ་བསྒྲགས།
གཞན་ཡང་ཞེ་ཅེན་ཕིན་གྱིས་རྒྱ་དམར་གྱི་འགོ་ཁྲིད་ཚོར་གཏམ་བཤད་སྐབས། ལོ་འདིར་རྒྱ་ནག་གི་དཔལ་འབྱོར་ཡར་རྒྱས་དམིགས་ཚད་བརྒྱ་ཆ་ 5% ཟིན་རྒྱུ་ཡིན་པ་བསྒྲགས། ཡིན་ན་ཡང་། རང་དབང་ཞིབ་འཇུག་(Rhodium Group)ལྟར་ན། ད་ལོའི་རྒྱ་ནག་གི་དཔལ་འབྱོར་ཡར་རྒྱས་ཀྱི་ཚད་དེ་བརྒྱ་ཆ་ 2.5% ནས་བརྒྱ་ཆ་ 3% བར་ཡིན་པ་སྔོན་དཔག་བྱེད། ཕྱི་སྲིད་ཀྱི་ཐད་ནས་ཞེ་ཅེན་ཕིན་གྱིས། འཛམ་གླིང་འདི་ནི་རྙོག་ཟིང་མང་ཞིང་། འགྱུར་ལྡོག་གི་གོ་རིམ་ཁྲོད་ཡོད་དང་། ཀྲུང་གོ་ནི་ནམ་ཡང་ལོ་རྒྱུས་ཀྱི་དྲང་ཕྱོགས་སུ་ལངས་ནས། རྒྱལ་ཁབ་གཞན་དང་ལྷན། མིའི་རིགས་ཐུན་མོང་ལ་དབང་བའི་ཡར་རྒྱས་དང་། ཞི་བདེ་ལྡན་པའི་འབྱུང་འགྱུར་ཞིག་སྐྲུན་རྒྱུར་སྐུལ་མ་གཏོང་འདོད་ཡོད་ཅེས་བཤད།
དམར་ཤོག་ཚོགས་པའི་གསར་དེབ་བདེན་འཚོལ་(求是)གྱི་སྟེང་།རྩོམ་ཡིག་ཅིག་སྤེལ་བའི་ནང་ཞེ་ཅེན་ཕིན་གྱིས། རྒྱལ་སྤྱིའི་འགྲན་རྩོད་ཁྲོད་ཀྲུང་གོས། ཐབས་བྱུས་ཀྱི་དམིགས་ཡུལ་དག་འགྲུབ་ཆེད་ལག་བསྟར་གསར་བ་འགོ་གཟུག་དགོས་པ་བཤད། དེ་བཞིན་ཐེ་ཝན་དང་འབྲེལ་ཁོས། མཚོ་འགག་གཉིས་ཀྱི་མི་དམངས་རྣམས། ཕན་ཚུན་ཁྲག་གིས་སྦྲེལ་ཡོད་པ་དང་། མེས་རྒྱལ་གཅིག་གྱུར་བྱ་རྒྱུའི་ལམ་ཀ་སུས་ཀྱང་འགོག་མི་ཐུབ་ཅེས་བཤད། བདུན་ཕྲག་འདིའི་ནང་རྒྱ་ནག་དམག་དཔུང་གིས། ཐེ་ཝན་གྱི་མཚོ་རྒྱུད་དུ་དམག་སྦྱོང་ཆེན་པོ་ཞིག་བྱས་ཤིང་། སྔོན་དཔག་མི་ཐུབ་པའི་ཨ་རིའི་སྲིད་གཞུང་འདིའི་སྐབས་སུ། ཞེ་ཅེན་ཕིན་གྱིས་ལག་འགུལ་སྲིད་པའི་ཉེན་ཁ་ཆེ་བ་ཤོད་མཁན་ཡང་བྱུང་།