ཨ་རི་དང་རཱ་ཤི་ཡས་ལྐོག་ནས་བཟོས་པའི་ཡིག་ཆ་དོན་ཚན་ 28 ཅན་དེ་ཕྱིར་འགྲེམས་མཁན་སུ་ཡིན་ཐད་དོགས་པ་བསླངས། འདི་ནི་ཨ་རིའི་ཕྱི་རྒྱལ་གསང་བའི་ལས་ཁུངས་ཡིན་སྲིད་ལ། རཱ་ཤི་ཡའི་ཕྱི་རྒྱལ་གསང་བའི་ལས་ཁུངས་ཀྱང་ཡིན་སྲིད་པ་བཤད།
ཨ་རིའི་སྲིད་འཛིན་སྒྲོ་ནལ་ཁྲི་རམ་ཕུའི་སྐུ་ཚབ་ཝེ་ཀྲི་ཀོ་ཧྥི་དང་། རཱ་ཤི་ཡའི་སྲིད་འཛིན་ཕུ་ཀྲན་གྱི་སྐུ་ཚབ་སྒྲི་མེ་ཀྲི་རེ་ཝི་གཉིས་ཀྱིས་ལྐོག་ནས་བཟོས་པ། ཡིག་ཆ་དོན་ཚན་ 28 ཅན་དེ་ཕྱིར་འགྲེམས་མཁན་སུ་ཡིན་མིན་ཐད། ད་ལྟ་དོགས་པ་དང་ཐེ་ཚོམ་འདྲ་མིན་ཞིག་སླེབས། དང་པོ། ཡིག་ཆ་འདི་ཕྱིར་འགྲེམས་མཁན་ནི། ཨ་རིའི་ཕྱི་རྒྱལ་གསང་བའི་ལས་ཁུངས་(CIA)ཡིན་སྲིད་པ་བཤད་ལ། དེའི་རྒྱུ་མཚན་ནི་ཡིག་ཆ་འདི་ནི་ཆབ་སྲིད་དང་ཐབས་བྱུས་གཉིས་ཐད་ནས་ཨ་རི་རྒྱལ་ཁབ་ཀྱིས་ངོས་ལེན་ཐུབ་པ་ཞིག་མིན་པས་ཡིན་པ་བཤད།
ཨ་རིའི་གསང་ལས་ཀྱིས་བཀྲམས་ཡིན་སྲིད་པའི་རྒྱུ་མཚན་དག་བྱེ་བྲག་ཏུ་ཕྱིན་ན། ༡ ཡིག་ཆ་འདིས་ཕྱི་སྲིད་དང་ནང་སྲིད་གཉིས་ཐད་ནས་ཨ་རིའི་སྲིད་དོན་ཁེ་ཕན་ལ་གནོད་པ། ༢ ཡིག་ཆ་འདི་ལ་ཨ་རིའི་མི་དམངས་ཁྲོད་མཐོང་ཚུལ་ཡག་པོ་འབྱུང་མི་སྲིད་པ་མ་ཟད། ཨ་རི་ནི་ནུས་མེད་ཅིག་དང་གཞན་བསྟུན་མཁན་ཞིག་ཡིན་པའི་སྣང་བརྙན་སྐྲུན་རྒྱུ། ༣ རྒྱལ་སྤྱིའི་སྟེང་ཡིག་ཆ་འདིའི་ནང་དོན་གྱིས། ཨ་རི་དེ་ཡིད་ཆེས་ཆོག་པའི་མཐུན་གྲོགས་ཤིག་ཡིན་པའི་སྣང་བརྙན་ལ་གནོད་པ་ཚབས་ཆེན་བསྐྱལ་རྒྱུ།
༤ ཐབས་བྱུས་ཀྱི་ཆ་ནས་ཡིག་ཆ་འདིས་རཱ་ཤི་ཡར་སླར་ཡང་དམག་དོན་ནུས་པ་བསྐྱར་གསོ་དང་། འབྱུང་འགྱུར་གཡུལ་ས་གསར་བ་ཞིག་བཟོ་རྒྱུའི་དུས་ཚོད་དང་གོ་སྐབས་སྤྲོད་རྒྱུའི་ཉེན་ཁ་ཆེ་རྐྱེན། ཡིག་ཆ་འདི་སྒྲོ་ནལ་ཁྲི་རམ་ཕུ་སྲིད་གཞུང་གིས་ལག་བསྟར་མ་བྱས་སྔོན། ཨ་རིའི་གསང་ལས་ཀྱིས་ཕྱིར་བཀྲམས་ནས་ནུས་མེད་དུ་བཏང་ཟིན་པ་ཞིག་ཡིན་པ་བཤད། ཨ་རི་ངོ་མ་ནི་སྒྲོ་ནལ་ཁྲི་རམ་ཕུ་མ་ཡིན་མ་ཟད། སྒྲོ་ནལ་ཁྲི་རམ་ཕུ་སྲིད་གཞུང་ཡང་མ་ཡིན་པར། སྒྲིག་འཛུགས་མང་པོས་གྲུབ་པ་ཞིག་ཡིན་པས། ཕུགས་རྒྱང་གི་ཆ་ནས་ངོ་ཚ་དང་ཕམ་ཁ་འདི་འདྲ་ཨ་རིས་འཁུར་མི་ཐུབ་པ་བཤད།
དོགས་པ་གཉིས་པ་ནི། ཡིག་ཆ་འདི་ཕྱིར་འགྲེམས་མཁན་ནི་རཱ་ཤི་ཡའི་ཕྱི་རྒྱལ་གསང་བའི་ལས་ཁུངས་(SVR)ཡིན་སྲིད་པ་བཤད། དེའི་རྒྱུ་མཚན་བྱེ་བྲག་ཏུ་གྲོལ་ན། ༡ འདས་པའི་ཟླ་བ་མང་པོའི་རིང་མཉམ་ལས་བརྒྱུད། ཝེ་ཀྲི་ཀོ་ཧྥི་ཡིས་འཆར་གཞི་འདྲ་མིན་བཟོས་ཀྱང་དེ་དག་ལམ་དུ་མ་སོང་རྐྱེན། ཐེངས་འདིའི་ཡིག་ཆའང་ལམ་དུ་འགྲོ་རྒྱུའི་རེ་བ་ཆེན་པོ་མེད་པ། ༢ སྒྲོ་ནལ་ཁྲི་རམ་ཕུ་སྲིད་གཞུང་གི་ནང་ཁུལ་ལས་བྱེད་ཚོའི་བར་བསམ་ཚུལ་ཧ་ཅང་ཐ་དད་དུ་ཕྱིན་ཡོད་པ། ༣ རྒྱལ་སྲིད་དྲུང་ཆེ་མར་ཀོ་རུ་བྷེའོ་ཡིས་ཕྱི་ལོགས་ནས་རྣམ་འགྱུར་ཅི་ཞིག་བསྟན་ནའང་། དེའི་རྒྱབ་ཏུ་འཆར་གཞི་འདི་འདྲར་ངོ་རྒོལ་བྱེད་བཞིན་པ།
༤ ཡུ་ཁུ་རན་ལ་ད་ལྟ་ཡར་ཐོན་གྱི་གོ་ལག་ལྡན་ཞིང་སྟོབས་ཤུགས་ཆེ་བའི་དམག་མི་ས་ཡ་ཡོད་པས། ཡིག་ཆ་འདི་ཁས་ལེན་རྒྱུ་མིན་པ་སྔར་ནས་ཚོད་དཔག་ཐུབ་པ། ༥ ཡིག་ཆ་དངོས་ཕྱིར་མ་ཐོན་སྔོན། ཡིག་ཆའི་ནང་དོན་གྱི་ཟུར་ཞིག་ཕྱིར་ཐོན་པ་དང་། ཡུ་ཁུ་རན་གྱིས་ཨ་རི་ལ་བསྟུན་ཤེས་ཀྱི་སྐད་ཆ་བཤད་འགོ་བཙུགས་པ་ལས། དེ་མ་ཐག་ང་ཚོས་ཁས་མི་ལེན་ཞེས་མ་བཤད་རྐྱེན། གསང་བའི་འཆར་གཞི་འདི་ཐབས་བྱུས་ཀྱི་ཆ་ནས་རཱ་ཤི་ཡར་ཕན་ཐོགས་ཅན་ཞིག་ཏུ་མ་གྱུར་བ། ༦ ཡུ་རོབ་དང་ཡུ་ཁུ་རན། མཐའ་ན་ཨ་རིའི་ལས་བྱེད་ཚོའི་མཐོང་ལམ་དུ་སྒྲོ་ནལ་ཁྲི་རམ་ཕུ་སྲིད་གཞུང་གི་ཆེས་མཐོང་བརླག་ཆེད་ཡིན་པ།
༧ སྒྲོ་ནལ་ཁྲི་རམ་ཕུའི་མི་གཤིས་ངོ་མ་ཕྱིར་སྟོན་པ་བརྒྱུད། ཁོ་རང་ཡུ་ཁུ་རན་དང་ཡུ་རོབ་ནས་ཐག་རིང་དུ་གཏོང་ཐབས་དང་། མཐར་སྒྲོ་ནལ་ཁྲི་རམ་ཕུ་སྲིད་གཞུང་ཆབ་སྲིད་ཀྱི་ཆ་ནས་ཁེར་རྐྱང་དུ་འཇོག་རྒྱུ་དེ་ཡིན་པ་བཤད། གཞན་ཡང་ཡིག་ཆ་འདི་ཡུ་རོབ་ཀྱིས་ཕྱིར་བཏོན་ཡིན་སྲིད་པའང་བཤད་ལ། ཡུ་ཁུ་རན་ལ་དོགས་པ་བྱེད་མཁན་ཡང་བྱུང་། ཡིན་ན་ཡང་། ཡུ་ཁུ་རན་གྱིས་འདི་འདྲ་བྱས་ཚེ། ཁོ་ཚོ་དང་སྒྲོ་ནལ་ཁྲི་རམ་ཕུ་བར་གྱི་འབྲེལ་བ་དེ་གཏོར་རྒྱུའི་ཉེན་ཁ་ཆེ་བས། ཡུ་ཁུ་རན་ལ་ཉེན་ཁ་དེ་འདྲ་ཞིག་བརྒྱུད་རྒྱུའི་བློ་སྟོབས་ཡོད་མི་སྲིད་ཅེས། ཡིག་ཆ་འདི་ཕྱིར་འགྲེམས་མཁན། ཡུ་ཁུ་རན་ཡིན་པའི་རྣམ་པ་མི་འདུག་ཅེས་བཤད།
ཡིག་ཆ་འདིས་ཨ་རིའི་མི་དམངས་ཀྱི་མཐོང་ལམ་དུ། སྒྲོ་ནལ་ཁྲི་རམ་ཕུའི་སྣང་བརྙན་ལ་གནོད་པ་བསྐྱལ་བ་མ་ཟད། ཁོས་ཡིག་ཆ་འདི་མཐོང་མ་མཐོང་གི་མཚམས་ནས། ཡིག་ཆ་འདི་ཁས་ལེན་དགོས་ཞེས་ཛེ་ལན་སི་ཀེར་གནོན་ཤུགས་སྤྲད་འགོ་བཙུགས་པ་དེས། དེ་ལས་ཀྱང་གནས་ཚུལ་སྡུག་ཏུ་བཏང་། ད་ལྟ་ཁོས་ཡུ་ཁུ་རན་ལ་བཏང་བའི་ཉེན་བརྡ་དེ་དག་ཀྱང་རེ་ཞིག་ཕྱིར་འཐེན་ཟིན་པའི་རྣམ་པ་ཐོན།