ཁ་སང་གཟའ་ཉི་མའི་ཉིན་ཨ་རི་དང་ཡུ་ཁུ་རན་གྱི་ཆེས་མཐོའི་སྐུ་ཚབ་ཚོ། སུད་སིའི་གྲོང་ཁྱེར་རྗེ་ནེ་ཝར་འཛོམས་ཤིང་། ཡིག་ཆ་འདིའི་ཐད་ནང་ཁུལ་གྲོས་མོལ་རིམ་པ་ 2 བྱས། ཐེངས་འདིར་ཨ་རིའི་ཕྱོགས་ནས་རྒྱལ་སྲིད་དྲུང་ཆེ་མར་ཀོ་རུ་བྷེའོ་དང་། ཝི་ཀྲི་ཀོ་ཧྥི་སོགས་ཞུགས་ཡོད་པ་དང་། ཡུ་ཁུ་རན་གྱི་ཕྱོགས་ནས་བདེ་སྲུང་བློན་ཆེན་ཨུ་མེ་རོ་ཝི་དང་། སྲིད་འཛིན་ལས་ཁུངས་ཀྱི་ལས་བྱེད་ཡེར་མག་བཅས་ཞུགས་ཡོད་པ་གསལ།
•. རཱ་ཤི་ཡའི་བདེ་སྲུང་ལྷན་ཁང་གིས། རཱ་དམག་གིས་ཡུ་ཁུ་རན་གྱི་རྫ་པུ་རི་ཆི་ས་ཁུལ་གྱི་གྲོང་གསེབ་ཅིག་འཕྲོག་ཟིན་པ་དང་། འདི་ནི་ཡུ་དམག་གི་བཙན་ས་ཞིག་ཡིན་པ་ལ་དམག་འཐབ་འདིའི་ཁྲོད་ཡུ་དམག་ལ་ཤི་རྨས་ཚབས་ཆེན་བཟོས་ཟིན་པ་བཤད། དེ་བཞིན་རཱ་དམག་གིས། ཡུ་ཁུ་རན་གྱི་སྒྲི་ནེ་པུར་མངའ་སྡེའི་གྲོང་གསེབ་(Tikhoye)ཅིག་འཕྲོག་ནས། མུ་མཐུད་དུ་ནུབ་ཕྱོགས་སུ་མདུན་བསྐྱོད་ཐུབ་བཞིན་པ་བསྒྲགས། ད་དུང་ཡུ་དམག་གིས་ཁར་ཁེ་ཝུ་ས་ཁུལ་གྱི་ཀུ་པན་སི་ཀི་གྲོང་བརྡལ་གྱི་གཡུལ་ས་ནས་རཱ་དམག་ཕྱིར་འདེད་ཆེད་འཐབ་པའི་ཁྲོད། ཡུ་དམག་ 3,000 ཤི་རྨས་ཐེབས་ཟིན་པ་རཱ་ཤི་ཡའི་ཏཱ་སི་གསར་ཁང་གིས་གནས་ཚུལ་བཀོད།
•. ཡུ་དམག་གིས། རྡོ་ཉད་སི་ཀི་ས་ཁུལ་གྱི་ཕོ་ཁི་རོ་ཝི་སི་ཀི་གྲོང་ཁྱེར་གྱི་དབུས་སུ་ཡོད་པའི་རཱ་དམག་གཙང་མ་བཟོ་བཞིན་ཡོད་ཅེས་དང་། ཟླ་བ་འདིའི་འགོ་ནས་གྲོང་ཁྱེར་འདིའི་ནང་དུ། རཱ་དམག་ 388 བསད་ཟིན་པ་བཤད། ཡིན་ན་ཡང་། གཡུལ་སའི་ས་ཁྲ་ལྟར་ན་ཡུ་དམག་གིས་རཱ་དམག་ཕྱིར་འདེད་ཐུབ་བཞིན་པའི་རྟགས་གང་ཡང་མ་ཐོན་ལ། དེ་བཞིན་རཱ་དམག་གིས་ཡུ་དམག་བསྐོར་ཡང་ཐུབ་པ་མཐོང་མི་ཐུབ། ཡུ་དམག་གིས། རཱ་ཤི་ཡའི་རྒྱལ་ས་མོ་སི་ཁོའི་ས་ཁུལ་གྱི་གློག་ཁང་ཆེན་པོ་ཞིག་ལ་གཏོར་རྒོལ་བྱས། གློག་ཁང་ཆེན་པོ་འདིར་མེ་འབར་བཞིན་པའི་བརྙན་དང་པར་མང་པོ་ཕྱིར་ཐོན།
•. ཡུ་ཁུ་རན་གྱིས། ད་ལྟ་བར་རཱ་ཤི་ཡའི་དམག་ནང་དུ་ཕྱི་རྒྱལ་གྱི་དམག་མི་ 18,000 ཞུགས་ནས་འཐབ་ཟིན་པ་དང་། དེ་དག་ནི་རྒྱལ་ཁབ་འདྲ་མིན་གྲངས་ 128 ནས་ཡོང་ཡོད་པ་དང་། ད་ལྟ་བར་ཡུ་དམག་གིས་འདི་དག་ལས་དམག་མི་གྲངས་ 3,388 བསད་ཟིན་པ་དང་། ཡུ་དམག་གིས་འདི་དག་ལས་རྒྱལ་ཁབ་ 37 གྱི་མི་གཡུལ་སར་གསོན་བཟུང་བྱས་ཟིན་པ་བསྒྲགས། ཡུ་ཁུ་རན་ལྟར་ན་འདི་དག་མང་ཆེ་བ་དངུལ་གྱི་ཆེད་རཱ་དམག་གི་ནང་ཞུགས་ཟིན་པ་དང་། མང་པོ་ཞིག་མགོ་སྐོར་འོག་ཏུའང་ཚུད་ཡོད་པ་བཤད།
•. བདུན་ཕྲག་སྔོན་མའི་གཟའ་སྤེན་པའི་ཉིན། སླར་ཡང་ངོས་འཛིན་མ་ཐུབ་པའི་སྒྲི་རོན་ཞིག ནེ་རྡར་ལན་ཀྲིའི་ལྷོ་ཕྱོགས་ཀྱི་གནམ་ཐང་ཞིག་གི་ཐག་ཉེའི་མཁའ་དབྱིངས་སུ་འཕུར་རྐྱེན། ཆུ་ཚོད་འགའི་རིང་གནམ་གྲུ་དག་འཕུར་མཚམས་བཞག་ཟིན་པའི་གནས་ཚུལ་ཐོན། དེ་བཞིན་གཟའ་པ་སངས་ཉིན། རྒྱལ་ཁབ་འདིའི་མཁའ་དམག་གི་བསྟི་གནས་(Volkel air force base)ཤིག་གི་ཐག་ཉེར་སྒྲི་རོན་ཞིག་འཕུར། སྒྲི་རོན་དེ་དག་ཐང་ལ་གཡུག་ཐབས་བྱས་ཀྱང་། དེ་མ་ཐག་འཕུར་ཟིན་པའི་གནས་ཚུལ་ཐོན། འདས་པའི་ཟླ་བ་འགའི་ནང་ཡུ་རོབ་རྒྱལ་ཁབ་དག་ཏུ་གནས་ཚུལ་འདི་འདྲ་ཐེངས་མང་བྱུང་ཞིང་། རཱ་ཤི་ཡས་ཁོ་ཚ་མིན་ཞེས་བསྒྲགས།
•. ཨ་རིའི་སྲིད་འཛིན་སྒྲོ་ནལ་ཁྲི་རམ་ཕུའི་སྐུ་ཚབ་ཝེ་ཀྲི་ཀོ་ཧྥི་དང་། རཱ་ཤི་ཡའི་སྲིད་འཛིན་ཕུ་ཀྲན་གྱི་སྐུ་ཚབ་སྒྲི་མེ་ཀྲི་ཝི་གཉིས་ཀྱིས། དམག་འཁྲུག་འདི་མཚམས་འཇོག་ཐབས་དང་འབྲེལ། ཡིག་ཆ་དོན་ཚན་ 28 ཀྱི་བདག་ཉིད་ཅན་ཞིག་བཟོས་པ། བདུན་ཕྲག་སྔོན་མར་རྒྱལ་སྤྱིའི་གསར་ལམ་དུ་ཤོར་ཟིན་པ་ལྟར། ཁ་སང་གཟའ་ཉི་མའི་ཉིན་ཨ་རི་དང་ཡུ་ཁུ་རན་གྱི་ཆེས་མཐོའི་སྐུ་ཚབ་ཚོ། སུད་སིའི་གྲོང་ཁྱེར་རྗེ་ནེ་ཝར་འཛོམས་ཤིང་། ཡིག་ཆ་འདིའི་ཐད་ནང་ཁུལ་གྲོས་མོལ་རིམ་པ་ 2 བྱས། ཐེངས་འདིར་ཨ་རིའི་ཕྱོགས་ནས་རྒྱལ་སྲིད་དྲུང་ཆེ་མར་ཀོ་རུ་བྷེའོ་དང་། ཝི་ཀྲི་ཀོ་ཧྥི་སོགས་ཞུགས་ཡོད་པ་དང་། ཡུ་ཁུ་རན་གྱི་ཕྱོགས་ནས་བདེ་སྲུང་བློན་ཆེན་ཨུ་མེ་རོ་ཝི་དང་། སྲིད་འཛིན་ལས་ཁུངས་ཀྱི་ལས་བྱེད་ཡེར་མག་བཅས་ཞུགས་ཡོད་པ་གསལ།
•. རིམ་པ་གཉིས་པའི་སྐབས་སུ། ཡུ་རོབ་ཀྱི་སྐུ་ཚབ་དག་ཀྱང་ཞུགས་ཡོད་པ་གསལ། ཚོགས་འདུའི་རྗེས་སུ་མར་ཀོ་རུ་བྷེའོ་ཡིས། དེ་རིང་གྲོས་མོལ་ཧ་ཅང་གྲུབ་འབྲས་ལྡན་བྱུང་སོང་ཞེས་བཤད། ཐེངས་འདིར་སྐད་ཆ་ཅི་ཞིག་བཤད་ཡོད་མེད་དང་། ཡིག་ཆ་འདིར་འགྱུར་བ་གང་ཞིག་བཏང་ཡོད་མེད་ཕྱིར་མ་བསྒྲགས་ནའང་། ཕྱོགས་གཉིས་ཀྱི་སྐུ་ཚབ་ཀྱིས། དེ་རིང་གི་གྲོས་མོལ་ཧ་ཅང་གྲུབ་འབྲས་ལྡན་པ་བྱུང་ཡོད་པ་དང་། ཡིག་ཆ་ལ་བསྒྱུར་བཅོས་བྱས་ཟིན། མཐའ་མའི་ཐག་གཅོད་ནི་སྲིད་འཛིན་དག་གིས་བྱ་རྒྱུ་རེད་ཅེས་བསྒྲགས། ནེའུ་ཡོག་དུས་བབ་ལྟར་ནའང་། སྔར་གྱི་ཡིག་ཆའི་གནད་དོན་གཙོ་བོ་དག་ལ་འགྱུར་བ་བཏང་ཟིན་པ་བཤད།
•. ཡུ་ཁུ་རན་གྱི་གསར་ཤོག་ཅིག་ལྟར་ན། ཡུ་ཁུ་རན་གྱི་མངའ་ཁོངས་བདག་དབང་གི་གནད་དོན་དང་། ཡུ་ཁུ་རན་ནུབ་ཆིངས་ནང་འཇུག་མིན་གྱི་སྐོར་དེ། སྒྲོ་ནལ་ཁྲི་རམ་ཕུ་དང་ཛེ་ལན་སི་ཀེ་གཉིས་ཀྱིས་གླེང་མོལ་བྱ་རྒྱུར་བཞག་ཟིན་པ་བཤད། ཡིག་ཆར་འགྱུར་བ་འདི་དང་འབྲེལ། ཨ་རིས་སླར་ཡང་ཛེ་ལན་སི་ཀེ་ཝ་ཤིན་ཀྲོན་དུ་ཡོང་རྒྱུར་སྐད་གཏོང་འདོད་ཡོད་པ། སི་བྷི་ཨེ་སི་གསར་ཁང་གིས་གནས་ཚུལ་བཀོད། གོང་གི་གནད་དོན་གཉིས་ཀྱི་ཐད་གྲོས་མོལ་ཆེད། ཛེ་ལན་སི་ཀེ་མགྱོགས་ན་བདུན་ཕྲག་འདིའི་ནང་། ཨ་རིའི་རྒྱལ་ས་ཝ་ཤིན་ཀྲོན་དུ་འགྲོ་རྒྱུ་ཡིན་པ་རོའུ་ཀྲར་གསར་ཤོག་གིས་གནས་ཚུལ་བཀོད།
•. གཞན་ཡང་ཡུ་རོབ་ཀྱི་དབུ་ཁྲིད་ཚོས་ཀྱང་། ཁོ་ཚོ་རང་གི་ངོས་ནས་དམག་མཚམས་འཇོག་རྒྱུ་དང་འབྲེལ། ཡིག་ཆ་དོན་ཚན་ 28 ཅན་ཞིག་བཟོས། དེའི་ནང་གི་གནས་ཚུལ་གཙོ་བོ་དག་ནི། ༡ ཡུ་ཁུ་རན་གྱི་རང་བཙན་དང་། མངའ་ཁོངས་བདག་དབང་ལ་བསྐྱར་དུ་ཁག་ཐེག་དགོས་པ། ༢ དམག་འཁྲུག་མེད་པའི་སྐབས་སུ། ཡུ་དམག་གི་གྲངས་དེ་འབུམ་ 8 ལས་བརྒལ་མི་ཆོག་པ། ༣ ཡུ་ཁུ་རན་ལ་བདེ་སྲུང་ཁག་ཐེག་ཡག་པོ་ཞིག་དགོས་པ་དང་། ཨ་རིས་ཡུ་ཁུ་རན་ལ་ནུབ་ཆིངས་ཀྱི་རྩ་འཛིན་དོན་ཚན་ལྔ་བ་ལྟ་བུའི་བདེ་སྲུང་ཁག་ཐེག་ཅིག་སྤྲོད་རྒྱུ། གལ་སྲིད་སླར་ཡང་རཱ་དམག་གིས། ཡུ་ཁུ་རན་ལ་ཚུར་རྒོལ་བྱས་ཚེ། མཉམ་འབྲེལ་དམག་དཔུང་གིས་རྒོལ་ལན་བསློག་རྒྱུ།
•. ༤ ཡུ་ཁུ་རན་ནུབ་ཆིངས་ཀྱི་ནང་འཇུག་རྒྱུར། ནུབ་ཆིངས་རྒྱལ་ཁབ་ཚང་མས་རྒྱབ་སྐྱོར་ཆ་ཚང་དགོས་པ། ༥ ནུབ་ཆིངས་དང་རཱ་ཤི་ཡ། ཡུ་ཁུ་རན་གསུམ་གྱི་བར་ཕན་ཚུན་ལ་བཙན་འཛུལ་མི་བྱ་རྒྱུ་གྲོས་མཐུན་ཞིག་བཞག་ནས། འདས་པའི་ལོ་ངོ་ 30 ཡི་རིང་གི་ཐེ་ཚོམ་དང་དོགས་པ་ཚང་མ་གཙང་སེལ་དགོས་པ། ༦ ཞི་བདེའི་སྐབས་སུ་ནུབ་ཆིངས་ཀྱི་དམག་དཔུང་ཡུ་ཁུ་རན་དུ་འཇོག་རྒྱུ་མིན་པ། ༧ ནུབ་ཆིངས་ཀྱི་འཐབ་འཛིང་གནམ་གྲུ་དག་ཕོ་ལན་ཀྲིར་འཇོག་རྒྱུ། ༨ སྐད་ཆ་ཚང་མ་ད་ལྟའི་གཡུལ་སའི་ས་ཁྲར་གཞི་བཞག་ནས་འགོ་གཟུག་རྒྱུ་དང་། རཱ་དམག་གིས་བཟུང་ཟིན་པའི་ས་ཆ་དག ཡུ་དམག་གིས་དྲག་པོའི་ལམ་ནས་ཕྱིར་ལེན་རྒྱུ་མིན་པར། དེའི་ཐད་འབྱུང་འགྱུར་ཞི་བའི་གྲོས་མོལ་བྱ་དགོས་པ་བཅས་རེད།
•. ཡུ་རོབ་ཀྱི་ཡིག་ཆའི་ནང་དོན་གཞན་དག་ནི་ཨ་རི་དང་རཱ་ཤི་ཡས་བཟོས་པའི་ཡིག་ཆ་དང་ཁྱད་པར་ཆེན་པོ་མེད་པས་མ་བཀོད་པ་ལགས།གནས་ཚུལ་གཞན་ཞིག་ལ་ཁ་སང་ཨ་རི་དང་ཡུ་ཁུ་རན་གྱི་སྐུ་ཚབ་གཉིས་མཉམ་འཛོམས་སྐབས། ཨ་རིའི་སྲིད་འཛིན་གྱི་སྐུ་ཚབ་དང་ཕུ་ཀྲན་གྱི་སྐུ་ཚབ་གཉིས་ཀྱིས་བཟོས་པའི་ཡིག་ཆ་འདི། གཞུང་འབྲེལ་ངང་ཕྱིར་མ་བཀྲམས་སྔོན། ཕྱིར་ཤོར་དུ་འཇུག་མཁན་ནི་ཡུ་ཁུ་རན་རེད་ཅེས། ཨ་རིའི་སྐུ་ཚབ་ཚོས་ཡུ་ཁུ་རན་གྱི་སྐུ་ཚབ་ཚོའི་སྟེང་ཁོང་ཁྲོའི་རྣམ་འགྱུར་དང་། ཐེངས་འདིར་ཕན་ཚུན་བར་ཁ་རྩོད་ཀྱང་ཤོར་ཡོད་པའི་གནས་ཚུལ་ཐོན། དེ་དང་ལྷན་ཚོགས་ཐོག་ཏུ་ཡུ་ཁུ་རན་གྱི་བདེ་སྲུང་བློན་ཆེན་གྱི་སྨྱུ་གུའང་བཅག་ཟིན་པའི་པར་ཞིག་ཕྱིར་ཐོན། འགའ་ཤས་ཀྱིས་དེ་ནི་ཁོང་ཁྲོའི་དབང་གིས་བཅག་ཟིན་པ་རེད་ཅེས་ཟེར།
•. དོན་དངོས་སུ་ཡིག་ཆ་འདི་ཕྱི་ལ་ཐོན་པའི་རིམ་པ་ནི་འདི་ལྟར་དེ། ཡིག་ཆ་འདིའི་སྐོར་ཐོག་མར་ཟླ་བ་འདིའི་ཚེས་ 19 ཉིན་ཨེག་སོ་སིའི་(Axios)གསར་འགོད་པ་ལྟ་བུའི་ལས་ཀ་བྱེད་བཞིན་པ། མིང་ལ་བྷ་རག་རཱ་ཝེ་ཀྲི་(Barak Ravid)ཞེས་པའི་ཨེ་ཛི་རལ་གྱི་མི་ཞིག་གིས་བཀོད་ཅིང་། བཀོད་སའང་ཨེག་སོ་སི་སྟེང་ལ་རེད། ཁོ་ལ་ཡིག་ཆ་འདི་གང་ནས་རག་མིན་སུས་ཀྱང་མི་ཤེས། དེའི་རྗེ་སུ་ཁོས་གནས་ཚུལ་འདི་རང་གི་ཨེག་སི་(X)སྟེང་བཀོད། ཡ་མཚན་པ་ཞིག་ལ་ཁོས་གནས་ཚུལ་འདི་བཀོད་ནས་སྐར་མ་ 11 གྱི་མཚམས་སུ། སྒྲོ་ནལ་ཁྲི་རམ་ཕུའི་སྐུ་ཚབ་ཝེ་ཀྲི་ཀོ་ཧྥི་རང་གིས་དེའི་འོག་ཏུ། ཁོ་ལ་འདི་ཁེ་(K)ནས་ཐོབ་ཟིན་ཟིན་པ་ངེས་གཏན་རེད་ཅེས་མཆན་ཞིག་བྲིས།
•. ཁེ་(K)ཞེས་པ་ནི་རཱ་ཤི་ཡའི་སྲིད་འཛིན་ཕུ་ཀྲན་གྱི་སྐུ་ཚབ། ཁེ་རེལ་ སྒྲི་མེ་ཀྲི་རེ་ཝི་(Kirill Dmitriev)རེད། ཝེ་ཀྲི་ཀོ་ཧྥི་ཡིས་ཡི་གེ་འདི་བྲིས་རྗེས་བསུབས་ཟིན་ནའང་། མི་མང་པོས་པར་བརྒྱབས་ཟིན་པས་མེད་པ་བཟོ་མ་ཐུབ། ཁ་སང་ཡུ་ཁུ་རན་དང་ཨ་རིའི་སྐུ་ཚབ་མ་འཛོམས་སྔོན་ཏག་ཏག་ལ། ཕུ་ཀྲན་གྱི་སྐུ་ཚབ་སྒྲི་མེ་ཀྲི་རེ་ཝི་ཡིས། ཨ་རི་དང་རཱ་ཤི་ཡའི་ཡིག་ཆ་དེ་ཡུ་ཁུ་རན་གྱིས་ཕྱིར་བཀྲམས་པ་རེད་ཅེས་བྲིས། དོན་དངོས་སུ་ཡིག་ཆ་འདི་ཕྱོགས་གང་ཞིག་གིས་ཐོག་མར་བཀྲམས་ཟིན་ནའང་། ཡིག་ཆ་འདི་འདྲ་ཞིག་ཕྱིར་ཐོན་རྒྱུའི་རྟགས་མང་པོ་སྔར་ནས་ཐོན་ཟིན་པ་ཡིན།
•. ཉེ་དུས་བྷི་ལུམ་བྷར་གྷི་སྟེང་། ད་ལོར་སྒྲོ་ནལ་ཁྲི་རམ་ཕུ་དང་ཕུ་ཀྲན་གཉིས་ཨ་རིའི་ཨ་ལ་སི་ཀ་མངའ་སྡེར་འཛོམས་རྗེས་སུ། སྒྲོ་ནལ་ཁྲི་རམ་ཕུས་ཡུ་ཁུ་རན་ལ་རྒྱབ་སྐྱོར་བྱེད་འདོད་མེད་པ། ཕུ་ཀྲན་ལ་ངོས་ཟིན་གསལ་བོར་ཐོབ་ཟིན་པ། རཱ་ཤི་ཡའི་ཆེས་མཐོའི་ལས་བྱེད་ཀྱི་སྐད་ཆ་ལུང་འདྲེན་གྱིས་གནས་ཚུལ་བཀོད་ཟིན། དེའི་རྗེས་སུ་རཱ་ཤི་ཡའི་ཕྱི་སྲིད་བློན་ཆེན་གྱིས་ཀྱང་། ཨ་རི་དང་རཱ་ཤི་ཡའི་བར་ལྐོག་ནས་འབྲེལ་བ་བྱེད་བཞིན་པ་དང་། མགྱོགས་པོར་གོ་རྒྱུ་ཞིག་ཡོད་ཚུལ་ཐེངས་འགར་བཤད་ཟིན། དེ་མ་ཟད་བདུན་ཕྲག་སྔོན་མར་ཕུ་ཀྲན་རང་གིས། ཡིག་ཆ་གསར་བ་འདི་ནི་ཨ་ལ་སི་ཀ་མངའ་སྡེ་རུ། ཨ་རི་དང་རཱ་ཤི་ཡའི་བར་བྱུང་བའི་གྲོས་མཐུན་དག་ལ་བཟོ་བཅོས་བརྒྱབས་པ་ཞིག་རེད་ཅེས་དངོས་སུ་བཤད།
•. ཁ་སང་སྒྲོ་ནལ་ཁྲི་རམ་ཕུས་སླར་ཡང་། ང་ཚོས་དམག་མཚམས་འཇོག་རྒྱུར་འབད་པ་བྱེད་བཞིན་པར། ཡུ་ཁུ་རན་གྱི་དབུ་ཁྲིད་ཚོས་ཐུགས་རྗེ་ཆེ་ཞུ་རྒྱུ་ནི་ཀླད་ཀོར་རེད་ཅེས་བཤད། ཡུ་ཁུ་རན་གྱིས། ཐེངས་འདིའི་སྒྲོག་གཏམ་ནང་དུ་ཨ་རིར་ཐུགས་རྗེ་ཆེ་ཞུས་ཟིན། ཡིན་ན་ཡང་སྒྲོ་ནལ་ཁྲི་རམ་ཕུས། ཡུ་ཁུ་རན་ལ་སྤྲད་པའི་ཡིག་ཆ་འདི་ནི་མཐའ་མའི་གདམ་ཀ་དེ་མིན་ཟེར། བདུན་ཕྲག་སྔོན་མར་ཁོས། བདུན་ཕྲག་འདིའི་གཟའ་ཕུར་བུའི་ཉིན་བར་ཡུ་ཁུ་རན་གྱིས་ཡིག་ཆ་འདི་ཁས་མ་བླངས་ཚེ། ཨ་རིས་ཡུ་ཁུ་རན་ལ་གོ་ལག་དང་། དམག་དོན་གསང་གནས་གཏོང་མཚམས་འཇོག་རྒྱུ་ཞེས་ཉེན་བརྡ་བཏང་ཟིན་པའི་གནས་ཚུལ་ཐོན།