གལ་སྲིད་རཱ་དམག་གིས་ཡུ་ཁུ་རན་དུ་རྒྱལ་ཁ་ལེན་ཚེ། འབྱུང་འགྱུར་ཡུ་རོབ་ཀྱིས། རང་གི་ཤར་ཕྱོགས་ས་མཚམས་བདེ་འཇགས་ཆེད་ཨ་སྒོར་ཁྲག་ཁྲིག་ཆེན་མོ་ $1.4 ནས་ཨ་སྒོར་ཁྲག་ཁྲིག་ཆེན་མོ་ $1.8 བར་གཏོང་དགོས་འགྱུར་རྒྱུ་ཡིན་པ་བཤད།
•. ད་ལོའི་ཕྱི་ཟླ་ 11 ནང་རཱ་དམག་གིས། ཡུ་ཁུ་རན་གྱི་ས་ཆ་སྤྱི་ལེ་གྲུ་གཞི་མ་ 505 བཟུང་ཟིན་པ་དང་། དེ་ནི་ཉིན་རེར་སྤྱི་ལེ་གྲུ་གཞི་མ་ 16.8 བཟུང་ཟིན་པ་གསལ། འདི་ནི་ཕྱི་ཟླ་ 9 དང་ཕྱི་ཟླ་ 10 དང་བསྡུར་ན་ས་ཆ་འཕྲོག་པ་ལྡབ་གཅིག་ཡར་འཕར་ཟིན་པ་གསལ། བྱེ་བྲག་ཏུ་ཕྱིན་ན་རྫ་པུ་རི་ཆི་ས་ཁུལ་དུ་ས་སྤྱི་ལེ་གྲུ་གཞི་མ་ 205 དང་། རྡོ་ཉད་སི་ཀི་ས་ཁུལ་དུ་ས་སྤྱི་ལེ་གྲུ་གཞི་མ་ 169 ། ལུ་ཧན་སི་ཀི་ས་ཁུལ་དུ་ 0 ། ཁར་ཁེ་ཝུ་ས་ཁུལ་དུ་ 118 ། སྒྲི་ནེ་པུར་ས་ཁུལ་དུ་ 13 ། སུ་མེ་ས་ཁུལ་དུ་ 0 བཅས་ཡིན་པ་གསལ།
•. རཱ་ཤི་ཡའི་སྲིད་འཛིན་ཕུ་ཀྲན་གཡུལ་སར་འགྲོ་བཞིན་པ་ཡིན་པར་བཤད་པའི་བརྙན་ཞིག་ཕྱིར་བཀྲམས། དེའི་ནང་དུ་ཕུ་ཀྲན་གྱིས་དམག་ཆས་ཤིག་གྱོན་ཡོད་པ་དང་། ཁོས། ད་ལྟ་རཱ་དམག་གིས་རྡོ་ཉད་སི་ཀི་ས་ཁུལ་གྱི་ཕོ་ཁི་རོ་ཝི་སི་ཀི་གྲོང་ཁྱེར་དང་། ཁར་ཁེ་ཝུ་ས་ཁུལ་གྱི་ཀུ་པན་སི་ཀི་གྲོང་བརྡལ་གཉིས་ཡོངས་སུ་འཕྲོག་ཟིན་པ་ཡང་བསྐྱར་བཤད། ཡིན་ན་ཡང་། གཡུལ་སའི་ས་ཁྲ་ལྟར་ན་གྲོང་དང་གྲོང་བརྡལ་འདི་གཉིས་ཧྲིལ་བོ་སྔར་བཞིན་རཱ་དམག་གིས་འཕྲོག་མ་ཐུབ་ཅིང་། མཐའ་ན་རཱ་ཤི་ཡའི་དམག་དོན་དབྱེ་ཞིབ་པ་ཚོས་ཀྱང་། ཕུ་ཀྲན་གྱི་སྐད་ཆ་འདི་བདེན་པ་ཡིན་པ་ཁས་ལེན་གྱི་མེད་པ་གསལ།
•. ཡུ་དམག་གིས། ད་ལོའི་ཕྱི་ཟླ་ 11 ནང་སྒྲི་རོན་སོགས་སྤྱད་ནས་རཱ་དམག་གྲངས་ 8,449 ཤི་རྨས་བཟོས་ཟིན་པ་བཤད། འདི་ནི་ཕྱི་ཟླ་ 10 དང་བསྡུར་ན། སྒྲི་རོན་སོགས་ཀྱིས་ཤི་རྨས་བཟོས་ཟིན་པའི་རཱ་དམག་གི་གྲངས་དེ་བརྒྱ་ཆ་ 5% ཡར་འཕར་ཟིན་པ་བཤད། ཡུ་དམག་གིས། རཱ་ཤི་ཡའི་ཅད་ཅི་ནེ་ཡ་ཁ་ཆེ་རང་སྐྱོང་ས་ཁུལ་གྱི་དམག་དོན་བསྟི་གནས་ཤིག་ལ་གཏོར་རྒོལ་བྱས། རཱ་ཤི་ཡ་ནས་མཚོ་ནག་བརྒྱུད་རྗོར་ཇི་ཡ་རྒྱལ་ཁབ་ཀྱི་གྲུ་ཁར་འགྲོ་མཁན་གྱི་གྲུ་གཟིངས་ཤིག་ལ་གཏོར་རྒོལ་བྱས། ཡིན་ན་ཡང་། གྲུ་གཟིངས་ལ་གཏོར་སྐྱོན་དང་མི་ལ་ཤི་རྨས་སོགས་མ་བྱུང་བ་བཤད།
•. སླར་ཡང་སྒྲོ་ནལ་ཁྲི་རམ་ཕུའི་སྐུ་ཚབ་ཝེ་ཀྲི་ཀོ་ཧྥི་དེ་རིང་རཱ་ཤི་ཡའི་རྒྱལ་སར་འགྲོ་བཞིན་པ་ལྟར། འདིས་ཡུ་ཁུ་རན་དང་དེའི་མཐུན་ཕྱོགས་ཡུ་རོབ་རྒྱལ་ཁབ་ཚོར་བློ་ཚབས་སྐྱེ་རུ་བཅུག་ཅིང་། ཁ་སང་ཡུ་ཁུ་རན་གྱི་སྲིད་འཛིན་ཛེ་ལན་སི་ཀེ་ཧྥ་རན་སིར་སླེབས། ཁོས། ཀུ་པན་སི་ཀི་གྲོང་བརྡལ་སྔར་བཞིན་ཡུ་དམག་གིས་བཟུང་ཡོད་ཅེས་བསྒྲགས། ཧྥ་རན་སིའི་སྲིད་འཛིན་མཱ་ཁི་རོན་གྱིས། ཡུ་ཁུ་རན་གྱི་བདེ་སྲུང་ཁག་ཐེག་ཐད་ང་ཚོས་མཐའ་མའི་འཆར་གཞི་དེ་བཟོ་བཞིན་ཡོད་ཅེས་དང་།འབྱུང་འགྱུར་གྲོས་མོལ་ཁྲོད་ཡུ་ཁུ་རན་འཇུག་དགོས་པ་བཤད།
•. ད་དུང་མཱ་ཁི་རོན་གྱིས། ཡུ་རོབ་ཀྱི་དངུལ་ཁང་དག་ཏུ་བཀག་ཡོད་པའི་རཱ་ཤི་ཡའི་དངུལ་སྒོར་བེད་སྤྱོད་ཀྱིས་ཡུ་ཁུ་རན་ལ་རོགས་སྐྱོར་གཏོང་ཕྱོགས་ཐད། ད་ལོའི་ཡེ་ཤུ་འཁྲུངས་སྐར་བར་དུ་ཐག་གཅོད་ཅིག་བྱ་རྒྱུའི་དམིགས་ཡུལ་བཟུག་ཡོད་པ་དང་། ཡུ་རོབ་ཀྱིས་རཱ་ཤི་ཡའི་སྟེང་དཔལ་འབྱོར་ཉེས་ཆད་ཐེངས་ཉི་ཤུ་བ་དེ་གྲ་སྒྲིག་བྱེད་བཞིན་པ་བཤད།
དེ་བཞིན་བདུན་ཕྲག་འདིའི་གཟའ་ལྷག་པའི་ཉིན་མཱ་ཁི་རོན་རྒྱ་ནག་ཏུ་འགྲོ་རྒྱུ་དང་། སྐབས་དེར་ཁོས་ཞེ་ཅེན་ཕིན་ལ་དམག་འཁྲུག་འདི་མཚམས་འཇོག་རྒྱུའི་ཐད་རོགས་རམ་གྱི་འབོད་སྐུལ་ཞུ་རྒྱུ་ཡིན་པ་བཤད།
•. ནེ་རྡར་ལན་ཀྲི་གཞུང་གིས། ཡུ་ཁུ་རན་ལ་ཨ་རིའི་གོ་ལག་ཉོ་ཆེད་ཡུ་སྒོར་ས་ཡ་ €250 གཏོང་རྒྱུ་ཡིན་པ་བསྒྲགས། ནེའུ་ཡོག་དུས་བབ་སྟེང་དཔྱད་བརྗོད་ཅིག་སྤེལ་བ་ལྟར་ན། འབྱུང་འགྱུར་ལོ་ 4 ཡི་རིང་ཡུ་རོབ་ཀྱིས་ཡུ་ཁུ་རན་ལ། རོགས་སྐྱོར་ཨ་སྒོར་ཐེར་འབུམ་ $606 ནས་ཨ་སྒོར་ཐེར་འབུམ་ $972 གཏོང་དགོས་པ་དང་། གལ་སྲིད་དེ་ལས་ལྡོག་ཏེ་རཱ་དམག་ལ་ཡུ་ཁུ་རན་དུ་རྒྱལ་ཁ་ཐོབ་ཚེ། འབྱུང་འགྱུར་ཡུ་རོབ་ཀྱིས། རང་གི་ཤར་ཕྱོགས་ས་མཚམས་བདེ་འཇགས་ཆེད་ཨ་སྒོར་ཁྲག་ཁྲིག་ཆེན་མོ་ $1.4 ནས་ཨ་སྒོར་ཁྲག་ཁྲིག་ཆེན་མོ་ $1.8 བར་གཏོང་དགོས་འགྱུར་རྒྱུ་ཡིན་པ་བཤད།
•. ཨ་རིའི་སྲིད་འཛིན་སྒྲོ་ནལ་ཁྲི་རམ་ཕུས། ཡུ་ཁུ་རན་ནི་ཨ་རི་དང་རཱ་ཤི་ཡའི་བར་ཚོང་འབྲེལ་བཟང་པོ་ཞིག་འཛུགས་མི་ཐུབ་པའི་འགོག་རྐྱེན་ལྟ་བུ་ཞིག་ཏུ་མཐོང་བཞིན་པ་མངོན་གསལ་ཡིན་པ་ལྟར། ཝོལ་ སི་ཀྲི་རི་ཀྲི་གསར་དེབ་སྟེང་དཔྱད་རྩོམ་ཞིག་སྤེལ་བ་ལྟར་ན། སྒྲོ་ནལ་ཁྲི་རམ་ཕུ་ཁྱིམ་ཚང་གི་ཁེ་གཉེར་དང་། ཁོ་ཚོ་དང་འབྲེལ་ཡོད་ཁེ་གཉེར།ཁོའི་སྐུ་ཚབ་ཝེ་ཀྲི་ཀོ་ཧྥི་སོགས་ཀྱིས་རཱ་ཤི་ཡ་དང་ལྷན་ཚོང་འབྲེལ་གྱིས།དངུལ་སྒོར་གསོག་རྒྱུའི་འཆར་གཞི་ཡོད་པ་བཤད་ཅིང་། དོན་དངོས་སུ་ཁོ་ཚོས་འདི་དག་གལ་ཆེན་ཞིག་ཏུ་མཐོང་བཞིན་པའི་གནས་ཚུལ་བཀོད།
•. ཡིན་ན་ཡང་ཕུ་ཀྲན་གྱིས་ཐེངས་འདིར། ཡུ་ཁུ་རན་དང་རཱ་ཤི་ཡའི་བར་བདེ་འཇགས་ཆེད་ས་སྟོང་ཞིག་འཇོག་དགོས་པ་བཤད། དེའི་དོན་ནི་ཡུ་ཁུ་རན་གྱི་སུ་མེ་མངའ་སྡེ་དང་། ཁར་ཁེ་ཝུ་མངའ་སྡེ། སྒྲི་ནེ་པུར་མངའ་སྡེ་བཅས། ཁོས་རྩ་ཁྲིམས་ཀྱི་ཁོངས་སུ་མ་བཅུག་པའི་མངའ་སྡེ་དག་གི་ནང་ལ་མུ་མཐུད་དུ་ཕར་རྒོལ་བྱ་རྒྱུ་ཡིན་ཞེས་པའི་དོན་ཡིན་པས། ཁོ་ལ་དམག་འཁྲུག་འདི་མཚམས་འདོད་ཡོད་པའི་རྣམ་པ་རེ་ཞིག་གང་ཡང་མ་མངོན། ཡུ་ཁུ་རན་གྱི་སྤྱི་ཁྱབ་དམག་སྤྱི་ཆེན་མོ་ཟུར་བ་རྫ་ལུ་ཆི་ནི་ཡིས། ཕུ་ཀྲན་ལ་མཚོན་ན་དམག་འཁྲུག་མཚམས་འཇོག་ཅེས་པ་ནི། ཡུ་ཁུ་རན་ཧྲིལ་བོ་མེད་པ་བཟོ་རྒྱུ་དེ་རེད་ཅེས་བཤད།