ཁ་སང་ཡུ་ཁུ་རན་གྱི་སྲིད་འཛིན་ཛེ་ལན་སི་ཀེ་ཨ་རིར་འགྲོ་བའི་ལམ་ཀར། ཁེ་ན་ཀྲར་ཕྱིན་ཅིང་ཁེ་ན་ཀྲའི་སྲིད་བློན་མར་ཁི་ཀར་ནེ་དང་ལྷན་ཐུག་ཅིང་། ཁེ་ན་ཀྲའི་ངོས་ནས་ཡུ་ཁུ་རན་ལ་རོགས་སྐྱོར་ཨ་སྒོར་ཐེར་འབུམ་ $2.5 སྤྲད་རྒྱུ་ཡིན་པ་བསྒྲགས།
•. རཱ་ཤི་ཡའི་སྲིད་འཛིན་ཕུ་ཀྲན་གྱིས་དམག་ཆས་ཤིག་གྱོན་ནས།དམག་སྤྱི་ཆེན་མོ་གྷེ་ར་སེ་མོ་ལ་ཐུག་བཞིན་པའི་བརྙན་ཞིག་ཁ་སང་ཕྱིར་བཀྲམས། དོན་དངོས་སུ་བརྙན་འདི་ནམ་ཞིག་ལ་ས་ཆ་གང་ཞིག་ནས་འཕབ་ཡིན་མི་གསལ་ཡང་། དུས་ཚོད་ཀྱི་ཆ་ནས་སྒྲོ་ནལ་ཁྲི་རམ་ཕུ་དང་། ཛེ་ལན་སི་ཀེ་གཉིས་མ་ཐུག་སྔོན་ཏག་ཏག་ཕྱིར་བཀྲམས་ཤིང་།ནམ་རྒྱུན་སེམས་ཁམས་གནོན་ཤུགས་ཀྱི་ཐབས་བྱུས་འདི་འདྲ། རཱ་ཡུ་ཕྱོགས་གཉིས་ཀས་དུས་ཚོད་གལ་ཆེན་གྱི་སྐབས་སུ་སྦྱོད་བཞིན་པ་གསལ་བོར་གྱུར།
རཱ་ཤི་ཡའི་དམག་སྤྱི་ཆེན་མོ་གྷེ་ར་སེ་མོ་ཡིས་ཕུ་ཀྲན་ལ། རཱ་དམག་གིས་ཡུ་ཁུ་རན་གྱི་རྫ་པུ་རི་ཆི་ས་ཁུལ་གྱི་ཁོ་སོ་ཝི་ཚེ་ཝོ་(Kosovtsevo)
ཞེས་པ་དང་། ཧུ་ལ་ཕོ་ལེ་གྲོང་བརྡལ་(Huliaipole)། རྡོ་ཉད་སི་ཀི་ས་ཁུལ་གྱི་མེར་ནེ་གྷི་ར་ཀྲི་གྲོང་བརྡལ་(Myrnohrad)བཅས་བཅིངས་གྲོལ་བཏང་ཟིན་ཟེར། ཕུ་ཀྲན་གྱིས། གཡུལ་སའི་ཕྱོགས་ཀུན་དུ་རཱ་དམག་གིས་མདུན་བསྐྱོད་བྱེད་ཐུབ་བཞིན་པ་བཤད།
•. ད་དུང་ཁོས། རྫ་པུ་རི་ཆི་ས་ཁུལ་གྱི་ཧུ་ལ་ཕོ་ལེ་གྲོང་བརྡལ་འཕྲོག་ཐུབ་པ་དེས། རཱ་དམག་མུ་མཐུད་དུ་མདུན་བསྐྱོད་ཐུབ་པའི་ལམ་ཀ་ཕྱེ་ཟིན་པ་དང་། རཱ་དམག་གིས་སུ་མེ་མངའ་སྡེ་དང་ཁར་ཁེ་ཝུ་མངའ་སྡེ། སྒྲི་ནེ་པུར་བཅས་སུ་ས་ཆ་རྒྱ་བསྐྱེད་ཀྱིས། རཱ་ཡུ་གཉིས་བར་བདེ་སྲུང་ས་སྟོང་ཞིག་འཇོག་རྒྱུར་འབད་པ་བྱེད་བཞིན་པ་བཤད། ས་སྟོང་ཞེས་པ་ནི་ས་ཆ་སྟོང་པའི་དོན་མ་ཡིན་པར། རཱ་དམག་གིས་ཡུ་ཁུ་རན་གྱི་མངའ་སྡེ་གཞན་དག་གི་ས་འཕྲོག་རྒྱུ་ཡིན་ཞེས་པ་དེ་རེད། ཁོས། གལ་སྲིད་དམིགས་བསལ་དམག་དོན་བྱ་འགུལ་གྱི་དམིགས་ཡུལ། གྲོས་མོལ་གྱི་ལམ་ནས་སྒྲུབ་མ་ཐུབ་ཚེ། དྲག་པོའི་ལམ་ནས་བསྒྲུབ་རྒྱུ་ཡིན་ཞེས་ཡང་བསྐྱར་བཤད།
•. ཡིན་ན་ཡང་ཡུ་ཁུ་རན་གྱི་དམག་དཔུང་གིས། རཱ་དམག་གིས་རྫ་པུ་རི་ཆི་ས་ཁུལ་གྱི་ཧུ་ལ་ཕོ་ལེ་གྲོང་བརྡལ་དང་། རྡོ་ཉད་སི་ཀི་ས་ཁུལ་གྱི་མེར་ནེ་གྷི་ར་ཀྲི་གྲོང་བརྡལ་འཕྲོག་ཟིན་པ་བཤད་པ་ནི་རྫུན་རེད། ཡུ་དམག་གིས་མུ་མཐུད་དུ་འདིར་འཐབ་བཞིན་ཡོད་ཅེས་བསྒྲགས། ཧེ་ལ་ཕོ་ལེ་ཞེས་པ་ནི་ཉེ་དུས་རཱ་དམག་གིས། ཡུ་དམག་གི་གཡུལ་སའི་བཀོད་འདོམ་ཁང་འཛིན་ས་དེ་རེད། དེ་བཞིན་ཕོ་ཁི་རོ་ཝི་སི་ཀི་གྲོང་བརྡལ་གྱི་བྱང་ཕྱོགས་སྔར་བཞིན་ཡུ་དམག་གིས་བཟུང་ཡོད་པ་བསྒྲགས།
•. ཡུ་དམག་གིས། རྡོ་ཉད་སི་ཀི་ས་ཁུལ་དུ་རཱ་དམག་མང་པོ་མཉམ་དུ་འདུས་ཡོད་པ་ཞིག་གི་སྟེང་མཁའ་ཐོག་ནས་གཏོར་རྒོལ་ཁྲོད། རཱ་དམག་ 51 སྡེབ་གསོད་དང་རཱ་དམག་གཞན་ 74 རྨས་ཟིན་པ་བཤད། གཞན་ཡང་ཡུ་དམག་གིས། རཱ་ཤི་ཡའི་སེ་ཛི་རན་ས་ཁུལ་གྱི་རྡོ་སྣུམ་བཟོ་གྲྭ་ཞིག་(Snpz Rosneft)དང་། ཁི་རཱ་མེ་ཡར་ཡོད་པའི་རཱ་དམག་གི་གནམ་སྲུང་འོད་རླབས་མ་ལག་བཅས། དམག་དོན་ཡོ་ཆས་གལ་ཆེན་འགའི་སྟེང་གཏོར་རྒོལ་བྱས་ཟིན་པ་བཤད།
•. བདུན་ཕྲག་སྔོན་མར་རཱ་དམག་གིས། ཡུ་ཁུ་རན་གྱི་རྒྱལ་ས་ཁེ་ཝུ་ལ་སྒྲི་རོན་དང་འཕུར་མདས་གཏོར་རྒོལ་གྱིས། རྒྱལ་སའི་ཆ་ཤས་ཆེན་པོ་ཞིག་གློག་བཅད་ཟིན་པ་ལྟར། ད་ལྟ་རྒྱལ་སའི་མངའ་ཁུལ་གྱི་གློག་ཡོངས་སུ་བསྐྱར་གསོ་ཐུབ་ཡོད་ཅེས་ཡུ་ཁུ་རན་གྱིས་བསྒྲགས། མི་སེར་གྱི་སྡོད་གནས་ལ་ཆེད་དུ་གཏོར་རྒོལ་བྱས་ཤིང་། ཕུ་ཀྲན་གྱིས་ཡུ་ཁུ་རན་གྱི་མི་སེར་དག་ལ། དགུན་དུས་དང་བསྟུན་ཆེད་དུ་འཇིགས་སྐུལ་གྱིས།ཁོའི་ཆ་རྐྱེན་འོག་དམག་འཁྲུག་མཚམས་འཇོག་རྒྱུར། ཡུ་ཁུ་རན་གྱི་གཞུང་ལ་མི་དམངས་ཀྱིས་གནོན་ཤུགས་ཆེ་རུ་འགྲོ་རྒྱུའི་ཐབས་བྱུས་བཟུང་ཡོད་པ་དབྱེ་ཞིབ་པ་ཚོས་ཚོད་དཔག་བྱེད།
•. སླར་ཡང་ཡུ་ཁུ་རན་གྱི་ལྐོག་ཟར་ཞིབ་འཇུག་བྱེད་མཁན་གྱི་ཚོགས་པ་ནཱ་བྷུ་(NABU)ཡིས། མཐོ་རིམ་ཆབ་སྲིད་པའི་ཁྲོད་ཀྱི་ལྐོག་ཟའི་བརྒྱུད་ལམ་ཞིག་ཕྱིར་བཏོན། དེའི་ཁྲོད་ཛེ་ལན་སི་ཀེ་ཡི་གྲོགས་པོ་རྙིང་པ་ཞིག་གཙོས། ལས་ཐོག་གྲོས་ཚོགས་འཐུས་མི་འགའ་ཚུད་ཡོད་པའི་གནས་ཚུལ་ཐོན། ཞིབ་འཇུག་ཚོགས་པ་འདིས། ཁོ་ཚོའི་རང་དབང་ཞིབ་འཇུག་ལ་གཞུང་གིས་འགལ་རྐྱེན་བཟོ་བཞིན་པ་བསྒྲགས། ཉེ་དུས་ཛེ་ལན་སི་ཀེའི་མཐའ་འཁོར་དུ་ལྐོག་ཟའི་གནད་དོན་ཆེན་པོ་ཞིག་ལྷག་ཅིང་། དེས་ཆབ་སྲིད་ཀྱི་ཆ་ནས་ཁོ་ལ་གནོད་པ་ཚབས་ཆེན་བསྐྱལ་ཅིང་།སྒྲོ་ནལ་ཁྲི་རམ་ཕུ་དང་ཕུ་ཀྲན་གཉིས་ཀྱིས་ཀྱང་གནད་དོན་འདི་གང་ཐུབ་བེད་སྤྱོད་བྱས།
•. ཁ་སང་ཡུ་ཁུ་རན་གྱི་སྲིད་འཛིན་ཛེ་ལན་སི་ཀེ་ཨ་རིར་འགྲོ་བའི་ལམ་ཀར། ཁེ་ན་ཀྲར་ཕྱིན་ཅིང་ཁེ་ན་ཀྲའི་སྲིད་བློན་མར་ཁི་ཀར་ནེ་དང་ལྷན་ཐུག་ཅིང་། ཁེ་ན་ཀྲའི་ངོས་ནས་ཡུ་ཁུ་རན་ལ་རོགས་སྐྱོར་ཨ་སྒོར་ཐེར་འབུམ་ $2.5 སྤྲད་རྒྱུ་ཡིན་པ་བསྒྲགས། འདི་ནི་ཁེ་ན་ཀྲས་ཡུ་ཁུ་རན་ལ་རོགས་སྐྱོར་སྤྲད་པ་ཆེ་ཤོས་ཤིག་ཏུ་གྱུར།
•. རཱ་ཤི་ཡའི་ཕྱི་སྲིད་བློན་ཆེན་སར་གྷེ་ལ་ཝོ་རོ་ཡིས། སྒྲོ་ནལ་ཁྲི་རམ་ཕུའི་འབད་བརྩོན་ལ་ཐུགས་རྗེ་ཆེ་ཞུ། ཡིན་ན་ཡང་། ཡུ་རོབ་དང་ཡུ་ཁུ་རན་གྱི་ངོས་ནས། དམག་འཁྲུག་འདི་མཚམས་འཇོག་ཐབས་ཐད་ཨ་རི་དང་། རཱ་ཤི་ཡས་འབད་པ་བྱེད་བཞིན་པ་ཚང་མ་འགོག་ཐབས་བྱེད་བཞིན་འདུག་ཅེས། ཡུ་རོབ་ཀྱིས་ཡུ་ཁུ་རན་ལ་གོ་ལག་དང་དངུལ་སྒོར་བཏང་བར་སྐྱོན་བརྗོད་དྲག་པོ་བྱས། དོན་དངོས་སུ་དངུལ་སྒོར་ཡུ་རོབ་ཀྱིས་གཏོང་བཞིན་ནའང་། གོ་ལག་ཨ་རིའི་ཡིན་པས་རཱ་དམག་གསོད་བྱེད་ཀྱི་གོ་ལག་དག་ནི་ཨ་རིའི་གོ་ལག་རེད།