སྒྲོ་ནལ་ཁྲི་རམ་ཕུས། ཡུ་ཁུ་རན་གྱིས་ཕུ་ཀྲན་གྱི་སྡོད་གནས་སུ་གཏོར་རྒོལ་བྱས་ཟིན་པར་ཡིད་ཆེས་ཀྱི་མི་འདུག་ཅེས་དངོས་སུ་བཤད། ཨ་རིའི་གསང་ལས་ཀྱིས། ཡུ་ཁུ་རན་གྱིས་དེ་ལྟར་བྱས་མེད་པའི་བསྡོམས་ཚིག་བཀོད།
•. རཱ་དམག་གིས། ཡུ་ཁུ་རན་གྱི་ཤར་ཕྱོགས་སུ་མེ་མངའ་སྡེའི་ཧེ་ར་བྷོ་ཝི་སི་ཀེ་(Hrabovske)ཞེས་པའི་གྲོང་གསེབ་ཅིག་འཕྲོག་ཟིན་པ་བསྒྲགས། གཡུལ་སའི་ས་ཁྲ་ལྟར་ན་གྲོང་འདི་རཱ་དམག་གིས་བཟུང་ཟིན་པ་གསལ། གཡུལ་ས་གལ་ཆེན་དག་ནས་ཉེ་དུས་ནས་རཱ་དམག་གི་མདུན་བསྐྱོད་སྤྱིའི་ཆ་ནས་ཡུ་དམག་གིས་བཀག་ཅིང་། རེ་ཞིག་འགྱུར་བ་ཆེན་པོ་མེད་པར་གྱུར།
•. རཱ་དམག་གིས། ཡུ་ཁུ་རན་གྱི་ས་ཁུལ་དག་ལ་འཕུར་མདའ་དང་སྒྲི་རོན་གྱིས་གཏོར་རྒོལ་ཁྲོད། སྒྲི་ནེ་པུར་ས་ཁུལ་དུ་ཡོད་པའི་རྡོ་སྣུམ་བཟོ་གྲྭ་ཞིག་ལ་གཏོར་རྒོལ་ཐེབས་ཟིན་པ་དང་། ཡུ་ཁུ་རན་ལྟར་ན་རྡོ་སྣུམ་བཟོ་གྲྭ་འདི་ནི་ཨ་རིའི་ཁེ་གཉེར་ཞིག་ལ་བདག་པ་བཤད། རཱ་ཤི་ཡའི་ཅད་ཅི་ནེ་ཡ་ཁ་ཆེ་རང་སྐྱོང་ས་ཁུལ་གྱི་དབུ་ཁྲིད། ཁཱ་རྡི་རོ་ཝི་ཡིས། གལ་སྲིད་ཁོ་ལ་ཕུ་ཀྲན་གྱིས་བཀའ་བབས་ཚེ། ཛེ་ལན་སི་ཀེ་འཁོར་དང་བཅས་པ་མཱ་རྡུ་རོ་ལས་ཀྱང་མགྱོགས་པོར་མེད་པ་བཟོ་ཐུབ་ཅེས་ཟེར།
•. ཡུ་དམག་གིས། རཱ་ཤི་ཡའི་ལེ་པེ་སི་ཀི་མངའ་སྡེའི་རྡོ་སྣུམ་བཟོ་གྲྭ་ཞིག་ལ་གཏོར་རྒོལ་བྱས། དེ་བཞིན་ཡུ་དམག་གིས་རཱ་ཤི་ཡའི་ཡ་རོ་སི་ལ་ཝེལ་མངའ་སྡེར་གཏོར་རྒོལ་ཁྲོད། མངའ་སྡེ་འདིའི་རྡོ་སྣུམ་བཟོ་གྲྭ་ཞིག་གི་ཐག་ཉེར་གས་འཐོར་གྱི་སྒྲ་གྲགས་བཞིན་པའི་གནས་ཚུལ་ཐོན། མཇུག་འབྲས་ཞིབ་ཕྲ་མི་གསལ། རྡོ་ཉད་སི་ཀི་ས་ཁུལ་དུ་རཱ་དམག་སྐོར་ཁག་ཅིག་ལམ་ཀར་ཡོད་པའི་སྟེང་། ཡུ་དམག་གིས་ཧེ་མར་སི་འཕུར་མདའ་སྤྱད་ནས་གཏོར་རྒོལ་བྱས། དེ་དང་འབྲེལ་བའི་བརྙན་ཡང་ཕྱིར་བཀྲམས།
•. ཧྥ་རན་སིའི་རྒྱལ་ས་ཕེ་རི་སིར། དབྱིན་ཇི་དང་ཧྥ་རན་སི། ཡུ་ཁུ་རན། ཨ་རི་བཅས་ཀྱི་དམག་སྤྱི་དག་འཛོམས་ཤིང་། འབྱུང་འགྱུར་ཡུ་ཁུ་རན་ལ་བདེ་སྲུང་ཁག་ཐེག་སྤྲོད་ཐབས་དང་། མཐུན་ཕྱོགས་ཚོ་མཉམ་འབྲེལ་གྱིས། ཕུགས་རྒྱང་གི་ཆ་ནས་ཡུ་ཁུ་རན་ལ་བདེ་སྲུང་གི་ཐད་ནས་རོགས་བྱ་རྒྱུའི་ཐད་གྲོས་བྱས་ཡོད་པ་བཤད། དེ་བཞིན་དེ་རིང་འབྱུང་འགྱུར་ཡུ་ཁུ་རན་ལ་བདེ་སྲུང་ཁག་ཐེག་སྤྲོད་འདོད་མཁན་གྱི་རྒྱལ་ཁབ་དག་གི་སྐུ་ཚབ་ཚོའི་ཚོགས་འདུའི་སྟེང་། ཨ་རིའི་སྲིད་འཛིན་གྱི་སྐུ་ཚབ་ཝེ་ཀྲི་ཀོ་ཧྥི་དང་། ཁུ་ཤེ་ནེ་གཉིས་ཀྱང་ཞུགས་བཞིན་པ་གསལ།
•. ཕོ་ལན་ཀྲིའི་སྲིད་བློན་སྒྲོ་ནལ་ཀྲ་སི་ཁི་ཡིས། ཐེངས་འདིར་ཡུ་ཁུ་རན་དང་འབྲེལ། ཨ་རི་དང་ཡུ་རོབ་གཉིས་མཉམ་འབྲེལ་གྱིས་བཟོས་པའི་ཡིག་ཆ་ཞིག་ལ། ཡོང་རྒྱུའི་ཉི་མ་དག་གི་ནང་ཝ་ཤིན་ཀྲོན་དུ་མིང་རྟགས་འགོད་ཐུབ་སྲིད་པ་བཤད། ཁོས། འདི་ནི་མཐའ་མའི་ཐག་གཅོད་ཅིག་མིན་ཆོག་ཀྱང་། ནུབ་ཕྱོགས་ཀྱི་ནུས་པ་གཅིག་ཏུ་སྤུང་རྒྱུར་ཕན་པ་དང་། རཱ་ཤི་ཡ་ལ་གནོན་ཤུགས་སྤྲོད་ཐབས་ནི་འདི་ཁོ་ན་ཡིན་པ་བཤད།
•. ཛེ་ལན་སི་ཀེ་དང་སྒྲོ་ནལ་ཁྲི་རམ་ཕུ་གཉིས་ཐུག་རྗེས་སུ། རཱ་ཤི་ཡའི་སྲིད་འཛིན་ཕུ་ཀྲན་གྱིས་སྒྲོ་ནལ་ཁྲི་རམ་ཕུ་ལ། ཚེས་ 28 དང་ཚེས་ 29 ཉིན་ཡུ་ཁུ་རན་གྱིས། རཱ་ཤི་ཡའི་ནོ་ཝི་གྷོ་རོ་ཀྲི་ས་ཁུལ་དུ་ཡོད་པའི་ཕུ་ཀྲན་གྱི་སྡོད་གནས་(Valday estate)ལ་དམིགས་ནས། སྒྲི་རོན་ 91 བཏང་སོང་ཞེས་བཤད་ཟིན་པ་ལྟར། ཁ་སང་སྒྲོ་ནལ་ཁྲི་རམ་ཕུས། ང་སྐད་ཆ་འདི་ལ་ཡིད་ཆེས་ཀྱི་མི་འདུག་ཅེས་དངོས་སུ་བཤད། ཨ་རིའི་གསང་ལས་ཀྱིས། ཡུ་ཁུ་རན་གྱིས་དེ་ལྟར་བྱས་མེད་པའི་བསྡོམས་ཚིག་བཀོད་ཅིང་། ཕུ་ཀྲན་གྱི་སྐད་ཆ་འདིས་སྒྲོ་ནལ་ཁྲི་རམ་ཕུ་ལ་ཁོང་ཁྲོ་བསླངས་ཟིན་པ་གསལ།
•. སྒྲོ་ནལ་ཁྲི་རམ་ཕུས་ཡང་བསྐྱར། རྒྱ་གར་གྱིས་མུ་མཐུད་དུ་རཱ་ཤི་ཡའི་རྡོ་སྣུམ་ཉོ་བཞིན་པས། སྒོ་ཁྲལ་ལྷག་མ་ཞིག་མགྱོགས་པོར་འགེལ་སྲིད་པའི་ཉེན་བརྡ་བཏང་ཟིན་པ་ལྟར། རོའུ་ཀྲར་གསར་ཤོག་ལྟར་ན། རྒྱ་གར་གྱི་རྡོ་སྣུམ་ཁེ་གཉེར་ཆེ་ཤོས་(Reliance Industries)ཀྱིས། འདས་པའི་བདུན་ཕྲག་ 3 རིང་རཱ་ཤི་ཡ་ནས་རྡོ་སྣུམ་མ་ཉོས་པ་དང་། ཕྱི་ཟླ་ 1 ནང་ལའང་རཱ་ཤི་ཡ་ནས་རྡོ་སྣུམ་འབྱོར་རྒྱུར་སྔོན་དཔག་བྱེད་ཀྱི་མེད་པ་བཤད། དེའི་མཇུག་འབྲས་སུ་ད་ལྟ་རྒྱ་གར་གྱིས་རཱ་ཤི་ཡ་ནས་རྡོ་སྣུམ་ཉོ་བའི་ཚད་དེ། འདས་པའི་ལོ་ངོ་ 3 རིང་གི་དམའ་ཤོས་སུ་ལྷུང་ཟིན་པ་དང་། ད་ལྟ་རྒྱ་ནག་གཅིག་བུ་རཱ་ཤི་ཡའི་རྡོ་སྣུམ་ཉོ་མཁན་ཆེ་ཤོས་སུ་གྱུར་ཟིན་པ་བཤད།
•. རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་བུད་མེད་མའོ་ནེག་གིས། ཨ་རིའི་དམག་དཔུང་གིས་ཝེ་ནེ་ཛོ་ལའི་རྒྱལ་སར་གཏོར་རྒོལ་དང་། སྲིད་འཛིན་མཱ་རྡུ་རོ་བཟུང་བར་སྐྱོན་བརྗོད་དང་། རྒྱལ་ཁབ་གཞན་གྱི་མངའ་ཁོངས་བདག་དབང་ལ་བརྩི་བཀུར་དགོས་པ་བཤད། དེ་དང་འབྲེལ་གསར་འགོད་པས། རཱ་ཤི་ཡས་ཡུ་ཁུ་རན་ལ་བཙན་འཛུལ་བྱེད་པའི་ཐད་སྐད་ཆ་དྲིས་པར། མོས་ཐད་ཀར་ལན་མ་བཏབས་པར། ཡུ་ཁུ་རན་གྱི་རྙོག་གྲ་(དམག་འཁྲུག)དང་འབྲེལ། ཀྲུང་གོའི་ལངས་ཕྱོགས་གསལ་བོར་བཟོས་ཟིན་ཅེས་བཤད།