ཁ་སང་མཚོ་ནག་གི་ནང་དུ་གྷི་རེ་སིའི་སྟངས་འཛིན་འོག་ཡོད་པའི་གྲུ་གཟིངས་ 4 རཱ་ཤི་ཡའི་གྲུ་ཁ་ནས་ལམ་ལ་ཆས་པ་དང་། ངོས་འཛིན་མ་ཐུབ་པའི་སྒྲི་རོན་གྱིས་གཏོར་རྒོལ་ཐེབས།
•. མདང་དགོང་ཡུ་དམག་གིས། རཱ་ཤི་ཡའི་རོ་སི་ཏོ་ཝི་ས་ཁུལ་གྱི་བཟོ་གྲྭ་ཆེན་པོ་ཞིག་ལ་གཏོར་རྒོལ་བྱས། བཟོ་གྲྭའི་ཉེ་འཁོར་གྱི་སྣུམ་མཛོད་ཀྱང་མེ་འབར། ཁ་སང་མཚོ་ནག་གི་ནང་དུ་གྷི་རེ་སིའི་སྟངས་འཛིན་འོག་ཡོད་པའི་གྲུ་གཟིངས་ 4 རཱ་ཤི་ཡའི་གྲུ་ཁ་ནས་ལམ་ལ་ཆས་པ་དང་། ངོས་འཛིན་མ་ཐུབ་པའི་སྒྲི་རོན་གྱིས་གཏོར་རྒོལ་ཐེབས། གྲུ་གཟིངས་སྟེང་གི་མི་ལ་ཤི་རྨས་མ་བྱུང་ཞིང་། གྲུ་གཟིངས་ལ་གཏོར་སྐྱོན་ཅུང་ཐེབས་ཟིན་པའི་གནས་ཚུལ་ཐོན། རཱ་ཤི་ཡས། འདི་ནི་ཡུ་ཁུ་རན་གྱིས་གཏོར་རྒོལ་བྱས་ཡིན་པ་བཤད། ཡུ་ཁུ་རན་གྱིས་ཁོ་ཚོ་ཡིན་མིན་གང་ཡང་མ་བཤད།
•. ཡུ་ཁུ་རན་གྱི་ལྐོག་ཟར་ཞིབ་འཇུག་བྱེད་མཁན་ཚོགས་པ། ནཱ་བྷུ་ཡིས་སྲིད་འཛིན་ཛེ་ལན་སི་ཀེའི་ཆབ་སྲིད་ཚོགས་པའི་དབུ་ཁྲིད། སྒྲ་ཝེ་སྒྲི་ཨ་ར་ཁ་མེ་ཡ་(David Arakhamia)ཞེས་པའི་སྡོད་ཤོག་ཏུ་སྔོག་བཤེར་དང་། ཡུ་ཁུ་རན་གྱི་སྲིད་བློན་ཟུར་བ་བུད་མེད་ཡུ་ལེ་ཡ་ ཏེ་མོ་ཤན་ཁོ་(Yulia Timoshenko)ལ་ཞིབ་འཇུག་བྱེད་བཞིན་པའི་གནས་ཚུལ་ཐོན་ཅིང་། མི་འདི་གཉིས་ཀྱིས་གྲོས་འཐུས་ཚོར་ལྐོག་རྔན་སྤྲད་ཟིན་པའི་དོགས་པ་བྱེད་བཞིན་པ་གསལ། ཉེ་དུས་ཡུ་ཁུ་རན་དུ་ལྐོག་ཟའི་གནད་དོན་ཆེན་པོ་ཞིག་ཕྱིར་བཏོན་ཅིང་། དེས་ཆེས་མཐོའི་ཆབ་སྲིད་པའི་ཁྲོད་གཡོ་འཁྱོམ་ཆེན་པོ་ཐེབས་སུ་བཅུག
•. ཟླ་བ་འདིའི་ཚེས་ 18 ཉིན་ནས་ཉིན་ 5 ཡི་རིང་སུད་སི་རྒྱལ་ཁབ་ཀྱི་སྒྲ་ཝོ་སི་གྲོང་བརྡལ་དུ། ད་ལོའི་རྒྱལ་སྤྱིའི་དཔལ་འབྱོར་གླེང་སྟེགས་ཀྱི་ཚོགས་ཆེན་དེ་ཚོགས་རྒྱུ་དང་། འདིའི་སྟེང་ཨ་རིའི་སྲིད་འཛིན་སྒྲོ་ནལ་ཁྲི་རམ་ཕུ་གཙོས། འཛམ་གླིང་གི་དབུ་ཁྲིད་ཉུང་མཐར་ 64 ཞུགས་རྒྱུ་ཡིན་པ་སྔོན་དཔག་བྱེད། སྐབས་དེར་ཡུ་རོབ་ཀྱི་དབུ་ཁྲིད་ཚོས་སྒྲོ་ནལ་ཁྲི་རམ་ཕུ་ལ། ཨ་རིས་ཡུ་ཁུ་རན་ལ་བདེ་སྲུང་ཁག་ཐེག་སྤྲོད་རྒྱུར་སྐུལ་མ་ཤུགས་ཆེན་གཏོང་འཆར་ཡོད་པ། དབྱིན་ཇིའི་ནོར་སྲིད་དུས་བབ་སྟེང་གནས་ཚུལ་བཀོད། སྐབས་དེར་ཛེ་ལན་སི་ཀེའང་དེར་ཡོང་རྒྱུ་ཡིན་པ་གསལ།
•. ད་ལྟ་ཨ་རི་དང་ཡུ་ཁུ་རན་གཉིས་བར། མུ་མཐུད་དུ་དམག་འཁྲུག་མཚམས་འཇོག་ཐབས་དང་འབྲེལ། གྲོས་མོལ་བྱེད་བཞིན་པ་དང་ཨ་རིའི་ལས་བྱེད་ཚོ་དང་། ཡུ་ཁུ་རན་ལྟར་ན་གྲོས་མོལ་ལ་གྲུབ་འབྲས་ཆེན་པོ་ཐོན་བཞིན་པ་བཤད། བྷི་ལུམ་བྷར་གྷི་སྟེང་གནས་ཚུལ་བཀོད་པ་ལྟར་ན། སྒྲོ་ནལ་ཁྲི་རམ་ཕུའི་སྐུ་ཚབ་ཝེ་ཀྲི་ཀོ་ཧྥི་དང་། ཁུ་ཤི་ནེ་གཉིས་མགྱོགས་པོར་རཱ་ཤི་ཡའི་རྒྱལ་ས་མོ་སི་ཁོར་འགྲོ་རྒྱུ་དང་། སྲིད་འཛིན་ཕུ་ཀྲན་དང་ལྷན་ཐུག་རྒྱུའི་དུས་ཚོད་བཟོ་ཐབས་བྱེད་བཞིན་པའི་གནས་ཚུལ་བཀོད།
•. ཡུ་རོབ་མཉམ་འབྲེལ་གྱི་ཕྱི་འབྲེལ་དབུ་ཁྲིད་ལྕམ་ཁཱ་ཅ་ཁ་ལ་སི་ཡིས། རཱ་ཤི་ཡའི་སྟེང་འགེལ་རྒྱུའི་ཡུ་རོབ་ཀྱི་ཉེས་ཆད། ཐེངས་ཉི་ཤུ་བ་ཅི་ཞིག་དགལ་རྒྱུ་ཟླ་བ་རྗེས་མར་ཐག་གཅོད་རྒྱུ་ཡིན་པ་བསྒྲགས། ནུབ་ཆིངས་དྲུང་ཆེ་མར་ཀི་རུ་ཀྲད་ཀྱིས། གལ་སྲིད་རྒྱ་ནག་གིས་ཐེ་ཝན་ལ་བཙན་འཛུལ་བྱས་ཚེ། ཁོ་ཚོ་གཅིག་བུས་ལག་འགུལ་མི་སྲིད་པ་དང་། རྒྱ་ནག་གིས་ཕུ་ཀྲན་ལ་ཡུ་རོབ་ལ་དམག་འཁྲུག་སློང་རྒྱུར་བཙན་སྐུལ་བྱ་རྒྱུ་ཡིན་པས། ང་ཚོས་ངེས་པར་དུ་དེ་ལ་གྲ་སྒྲིག་བྱ་དགོས་ཞེས་བཤད། ད་དུང་ཁོས། ང་ཚོའི་བདེ་སྲུང་གི་ཁུར་བོ་དེ་ཨ་རིས་འཁུར་རྒྱུར་ཡིད་ཆེས་བྱེད་པའི་དུས་ཚོད་དེ་ཡོལ་ཟིན་པ་རེད་ཅེས་བསྒྲགས།