ཨ་རིའི་སྲིད་འཛིན་སྒྲོ་ནལ་ཁྲི་རམ་ཕུས། ཨེ་རན་གྱི་རྒྱལ་གཅེས་པ་ཚོ། མུ་མཐུད་དུ་ངོ་རྒོལ་བྱོས། སྒྲིག་འཛུགས་དག་འཛིན་རོགས། བརྙས་བཅོས་བྱེད་མཁན་དང་ལག་དམར་ཚོའི་མིང་ཐོ་མཉར་རོགས། ཁོ་ཚོས་འདི་ལ་སྐྱིན་ཚབ་སྤྲོད་ངེས་ཡིན། རོགས་རམ་ཡོང་བཞིན་ཡོད་ཅེས་བྲིས།
ཨེ་རན་གྱི་ངོ་རྒོལ་ཁྲོད་འཆི་གྲངས་ 2,000 ལ་བུད་ཡོད་སྲིད་པ། ཨེ་རན་གྱི་ལས་བྱེད་ཅིག་གིས་རོའུ་ཀྲར་གསར་ཤོག་ལ་བཤད། ལས་བྱེད་འདིས།སྟབས་མ་ལེགས་པ་ཞིག་ལ་དྲག་སྤྱོད་པ་ཚོའི་རྐྱེན་གྱིས། ཚེ་སྲོག་ 2,000 ཡས་མས་ཤོར་ཡོད་སྲིད་ཅེས་བཤད། ཡིན་ན་ཡང་། དོན་དངོས་ཀྱི་འཆི་གྲངས་ནི།་འདི་ལས་ཀྱང་ཧ་ཅང་མཐོ་བའི་གནས་ཚུལ་འདྲ་མིན་ཞིག་ཐོན་བཞིན་པ་དང་། དེ་དང་ལྷན་ཕུང་པོ་མང་པོ་མཉམ་དུ་སྤུངས་ཡོད་པའི་པར་འགའ་ཕྱིར་ཐོན།
བདུན་ཕྲག་སྔོན་མའི་གཟའ་ཕུར་བུའི་ཉིན་ནས། ངོ་རྒོལ་བ་ཕན་ཚུན་བར་དང་། ངོ་རྒོལ་བ་ཚོ་དང་རྒྱལ་སྤྱིའི་བར་གྱི་འབྲེལ་བ་གཅོད་ཆེད། གཞུང་གིས་རྒྱལ་ཡོངས་སུ་དྲྭ་ལ་ཕལ་ཆེར་ཡོངས་སུ་བཀག་ཟིན་པས། གནས་ཚུལ་མང་པོ་ཞིག་ད་དུང་ཡང་ཕྱིར་ཐོན་མེད་པ་དང་། དེ་རིང་གཞི་ནས་ཁ་པར་གཏོང་ཐུབ་པའི་དྲྭ་རྒྱ་ཙམ་བསྐྱར་གསོ་བྱས་ཤིང་། གཞུང་གི་བྱང་བུ་བརྒྱུད་ཕྱི་རྒྱལ་ལ་ཕར་ཁ་པར་ཕར་གཏོང་ཐུབ་པ་ལས། ཕྱི་རྒྱལ་ནས་ཨེ་རན་ལ་ཁ་པར་གཏོང་མི་ཐུབ་པ་བཤད།
ཨ་རིའི་སྲིད་འཛིན་སྒྲོ་ནལ་ཁྲི་རམ་ཕུས་སྐར་མ་ 30 ཡི་སྔོན་དུ། ཨེ་རན་གྱི་རྒྱལ་གཅེས་པ་ཚོ། མུ་མཐུད་དུ་ངོ་རྒོལ་བྱོས། སྒྲིག་འཛུགས་དག་འཛིན་རོགས། བརྙས་བཅོས་བྱེད་མཁན་དང་ལག་དམར་ཚོའི་མིང་ཐོ་མཉར་རོགས། ཁོ་ཚོས་འདི་ལ་སྐྱིན་ཚབ་སྤྲོད་ངེས་ཡིན། དམར་གསོད་འདི་མཚམས་མ་བཞག་པར། ངས་ཨེ་རན་གྱི་ལས་བྱེད་ཚོར་ཐུག་རྒྱུ་མེད་པ་བཟོས་ཟིན། རོགས་རམ་ཡོང་བཞིན་ཡོད། ཨེ་རན་ཡང་བསྐྱར་རླབས་ཆེན་བཟོ་ཞེས་བྲིས།