རྒྱ་གར་འཕྲོད་བསྟེན་ལྷན་ཁང་གིས། ཟླ་བ་སྔོན་མའི་མཇུག་ཏུ་རྒྱ་གར་གྱི་ནུབ་སྦང་གྷལ་མངའ་སྡེ་རུ། ནེ་པཱ་ནད་འབུ་(Nipah Virus)འགོས་པའི་མི་ 2 བྱུང་ཟིན་པ་བསྒྲགས།
ཁ་སང་རྒྱ་གར་འཕྲོད་བསྟེན་ལྷན་ཁང་གིས། ཟླ་བ་སྔོན་མའི་མཇུག་ཏུ་རྒྱ་གར་གྱི་ནུབ་སྦང་གྷལ་མངའ་སྡེ་རུ། ནེ་པཱ་ནད་འབུ་(Nipah Virus)འགོས་པའི་མི་ 2 བྱུང་ཟིན་པ་དང་། མི་དེ་གཉིས་གསོ་རིག་ལས་བྱེད་ཡིན་པ་ལ་ད་ལྟ་ས་གནས་ཀྱི་སྨན་ཁང་དུ་ཡོད་པ་དང་། དེའི་རྗེས་སུ་མི་འདི་གཉིས་དང་འབྲེལ་བ་བྱུང་བའི་མི་ 196 ལ་གཞུང་གིས་བརྟག་དཔྱད་བྱས་པར་ནད་རྟགས་གང་ཡང་མ་ཐོན་པ་དང་། དེ་དག་ལ་ནད་ཚ་འདི་མེད་པ་བཤད། གསལ་བཤད་འདི་བྱེད་དགོས་དོན་ནི། ནད་འབུ་འདི་དང་འབྲེལ་གནས་ཚུལ་བདེན་པ་མ་ཡིན་པ་དང་། དོགས་པ་མང་པོ་དྲྭ་ལམ་དུ་ཁྱབ་བཞིན་པས་ཡིན་པ་དང་། གཞུང་གིས་དུས་ལྟར་ནད་འབུ་འདི་ངོས་འཛིན་གྱིས་སྟངས་འཛིན་བྱས་ཟིན་པ་བསྒྲགས།
ཡིན་ན་ཡང་། དེ་རིང་སིང་གྷ་པུར་གྱི་གནམ་ཐང་དུ་ཚ་བ་བརྟག་བྱེད་བཞག་ཅིང་། ནད་འབུ་འདི་འགོས་པའི་རྒྱ་གར་ས་གནས་ནས་ཡོང་བའི་མི་དག་གི་ཚ་བ་བརྟག་དཔྱད་བྱ་རྒྱུ་ཡིན་པའི་གནས་ཚུལ་ཐོན། དེ་བཞིན་ལྷོ་ཤར་ཨེ་ཤ་ཡའི་རྒྱལ་ཁབ་དག་ནས་ཡོང་མཁན་ཚོར་བརྟག་དཔྱད་བྱ་རྒྱུ་ཡིན་པ་སིང་གྷ་པུར་གྱིས་བསྒྲགས། ཧོང་ཀོང་གནམ་ཐང་ཞིག་གིས་ཀྱང་དེ་ལྟར་བརྟག་དཔྱད་འཕྲུལ་ཆས་འཇོག་བཞིན་པ་བཤད། གཞན་ཡང་ཐེ་ལན་དང་མཱ་ལེ་ཤི་ཡ་གཉིས་ཀྱིས་ཀྱང་ཕྱི་ནས་ཡོང་མཁན་དག་ལ་བརྟག་དཔྱད་བྱེད་འགོ་བཙུགས་ཟིན་པའི་གནས་ཚུལ་ཐོན། རྒྱ་ནག་གཞུང་གིས་ཁ་སང་། ད་ལྟ་བར་རྒྱལ་ནང་དུ་ནད་འབུ་འདི་འགོས་ཡོད་པའི་གནས་ཚུལ་མ་བྱུང་ཞེས་བསྒྲགས།
ནེ་པཱ་ནད་འབུ་ཞེས་པ་འདི་ཐོག་མར། ཕྱི་ལོ་ 1998 ལོར་མཱ་ལེ་ཤི་ཡ་དང་། སིང་གྷ་པུར་སོགས་སུ་ཁྱབ་བཞིན་པ་ངོས་འཛིན་ཐུབ་ཟིན་པ་དང་། ཚན་རིག་པ་ཚོས་ནད་འབུ་འདི་ཕ་ཝང་རིགས་(Fruit bat)ཀྱི་ལུས་སྟེང་དུ། ལོ་ངོ་སྟོང་ཕྲག་གི་སྔོན་ནས་ཡོད་པ་ཞིག་ཡིན་པ་ལ། དེའི་རྗེས་སུ་མི་དང་ཕག་སོགས་ཀྱི་ལུས་སྟེང་ལ་འགོས་ཡིན་པ་ཡིད་ཆེས་བྱེད། རྒྱ་གར་དུ་ནད་འབུ་འདི་མི་ལ་འགོས་པའི་གནས་ཚུལ་སྐབས་རེར་འབྱུང་བཞིན་པ་དང་། ལྷག་པར་ཕྱི་ལོ་ 2018 ལོར་ལྷོ་ཕྱོགས་ཀྱི་ཀེ་ར་ལ་མངའ་སྡེར་མི་འགའ་རྐྱེན་འདས་སུ་ཕྱིན་པས། ནད་འབུ་འདི་དང་འབྲེལ་མངའ་སྡེ་འདི་ནི་ཉེན་ཁ་ཆེ་ཤོས་སུ་བརྩི།
ད་ལྟ་ནད་འབུ་འདིར་ཏོག་ནད་ལྟར་དུས་ཐུང་ནང་ཤུགས་ཆེན་ཁྱབ་ཐུབ་པའི་ནུས་པ་མེད་ཀྱང་། ནད་འབུའི་ངོ་བོར་འགྱུར་ལྡོག་གིས་མགྱོགས་པོར་ཁྱབ་སྲིད་པར་གསོ་རིག་མཁས་པ་ཚོས་སེམས་ཁྲལ་བྱེད་བཞིན་པ་བཤད་ཅིང་། ནད་འབུ་འདི་འགོས་ཟིན་པའི་ནད་པའི་འཆི་གྲངས་དེ་བརྒྱ་ཆ་ 40% ནས་ 70% བར་ཡིན་པས། ཉེན་ཁ་ཧ་ཅང་ཆེ་བའི་ནད་འབུའི་ཁོངས་སུ་རྩི་བཞིན་པ་དང་། ད་ལྟ་བར་ནད་འབུ་འདིའི་ཆེད་བཟོ་བཞིན་པའི་སྔོན་འགོག་ཁབ་དག་ནི་ཚོད་ལྟའི་རིམ་པར་ཡོད་པས། དོན་དངོས་སུ་ནད་འབུ་འདི་ལ་བཅོས་ཐབས་དངོས་ཤིག་ད་ལྟ་མེད་པ་གསལ།
གཙོ་བོ་མཆིལ་མ་སོགས་གཟུགས་པོའི་གཤེར་ཁུ་དང་། གློད་རྒྱག་པ། ནད་འབུ་འདི་ཡོད་མཁན་དག་གི་ཐག་ཉེར་བཅར་བ་སོགས་ནས་འགོ་བཞིན་པ་གསལ།