ལོ་སྔོན་མར་རྒྱ་ནག་གི་དམག་དོན་བཟོ་གྲྭ་དག་གི་ཡོང་སྒོ་བརྒྱ་ཆ་ 10% མར་ཆག་ཟིན་པ་བཤད། དེ་ནི་རྒྱ་ནག་གི་དམག་དཔུང་ཁྲོད། ལྐོག་ཟའི་གནད་དོན་ཡོད་པར་གཞུང་གིས་ཞིབ་འཇུག་བྱས་རྐྱེན་ཡིན་པ་བཤད།
གཟའ་ཟླ་བའི་ཉིན་ཞིབ་འཇུག་ཚོགས་པ་(SIPRI)ཞིག་གིས་སྙན་ཐོ་བཏོན་པ་ལྟར་ན། ལོ་སྔོན་མར་རྒྱ་ནག་གི་དམག་དོན་བཟོ་གྲྭ་དག་གི་ཡོང་སྒོ་བརྒྱ་ཆ་ 10% མར་ཆག་ཟིན་པ་བཤད། དེ་ནི་རྒྱ་ནག་གི་དམག་དཔུང་ཁྲོད། ལྐོག་ཟའི་གནད་དོན་ཡོད་པར་གཞུང་གིས་ཞིབ་འཇུག་བྱས་རྐྱེན་ཡིན་པ་དང་། ཕྱི་ལོ་ 2023 ནས་ཕྱི་ལོ་ 2024 བར་ཆེས་མཐོའི་དམག་དོན་ལས་བྱེད་ 8 ལྐོག་ཟ་དང་འབྲེལ། གོ་ས་ནས་འཕབ་ཟིན་པ་དང་འབྲེལ་བ་ཡོད་པ་བཤད།
དམག་དཔུང་གི་ཁྲོད་གནས་ཚུལ་འདི་དག་ལྷག་རྐྱེན། རྒྱ་ནག་གི་གོ་ལག་ཉོ་མཁན་མང་པོས་གན་རྒྱ་ཕྱིར་འཐེན་དང་། ཕར་འགྱངས་སོགས་བྱས་ཟིན་པ་གསལ། དམག་དོན་བཟོ་གྲྭ་དག་གི་ཡོང་སྒོ་ཉུང་དུ་ཕྱིན་པ་ཙམ་ཞིག་མ་ཡིན་པར། ལྐོག་ཟར་ཞིབ་འཇུག་དང་ལས་བྱེད་གནས་དབྱུང་སོགས་ཀྱི་རྐྱེན་པས། དམག་དཔུང་གི་ཁྲོད་རྙོག་ཟིང་ཆེན་པོ་ཞིག་བསླངས་ཟིན་པ་དང་། དེའི་རྐྱེན་པས་གལ་ཆེན་འཕུར་མདའ་དང་དེང་རབས་གོ་ལག་མང་པོ་ཞིག་དུས་ལྟར་བཟོ་ཐུབ་ཀྱི་མེད་པ་གསལ།
ཞེ་ཅེན་ཕིན་གྱིས་ཕྱི་ལོ་ 2027 བར་རྒྱ་ནག་གི་དམག་དཔུང་དང་། གོ་ལག་ཧྲིལ་བོ་དེང་རབས་ཅན་དུ་བསྒྱུར་འཆར་ཡོད་ཀྱང་། ད་ལྟ་དམག་དོན་ཡར་རྒྱས་དང་འབྲེལ་བའི་དམིགས་འབེན་གལ་ཆེན་འགའ་འགྲུབ་དཀའ་བ་ཚོད་དཔག་བྱེད། ཡིན་ན་ཡང་། རྒྱ་ནག་དམར་གཞུང་གིས་རང་གི་དམག་དཔུང་དེང་རབས་ཅན་དུ་བསྒྱུར་རྒྱུར་ཆོད་སེམས་བརྟན་པོ་ཡོད་པས། ད་ལྟ་རྒྱལ་སྤྱིའི་སྟེང་གི་ཆེ་ཤོས་ཡིན་པའི་མཚོ་དམག་གི་ནུས་པ་མུ་མཐུད་དུ་ཡར་རྒྱས། འཕུར་མདའ་དང་སྒྲི་རོན་གསར་བཟོ། རྡུལ་མཚོན་དེང་རབས་ཅན་དུ་སྒྱུར་རྒྱུ་སོགས་ཀྱི་ལས་གཞི་དག་མུ་མཐུད་དུ་སྤེལ་རྒྱུ་ཡིན་པ་བཤད།
སྤྱིར་ལོ་སྔོན་མར་ཉི་ཧོང་དང་མཇར་མན། ཨ་རི་བཅས་ཀྱི་དམག་དོན་བཟོ་གྲྭའི་ཡོང་སྒོ་ཤུགས་ཆེན་འཕར་ཅིང་། རྒྱལ་སྤྱིའི་གོ་ལག་བཟོ་གྲྭ་གཙོ་བོ་ 100 ཡི་ཡོང་སྒོ་བརྒྱ་ཆ་ 6% ཡར་འཕར་ཟིན་པ་དང་། དེ་ནི་ཨ་སྒོར་ཐེར་འབུམ་ $679 ཡི་རིན་ཐང་ཡིན་པ་ལ། རྒྱུ་རྐྱེན་གཙོ་བོ་ནི་རཱ་ཡུའི་དམག་འཁྲུག་དང་། གྷ་ཛ་ས་ཁུལ་གྱི་དམག་འཁྲུག་གྱུར་ཟིན་པ་བཤད།