ཨིན་རྡུ་ནེ་ཤི་ཡར་ཆུ་ལོག་སོགས་ཀྱི་རྐྱེན་པས། མིའི་འཆི་གྲངས་ 502 ལ་འཕར་ཅིང་ད་དུང་ཡང་མི་ 508 འཆི་གསོན་མ་ངེས་པ་བཤད། ཤི་རི་ལངྒར་མི་ 334 དང་ཐེ་ལན་དུ་མི་ 170 རྐྱེན་འདས་སུ་ཕྱིན་ཟིན་པའི་གནས་ཚུལ་ཐོན།
བདུན་ཕྲག་སྔོན་མར་ལྷོ་ཤར་ཨེ་ཤ་ཡའི་རྒྱལ་ཁབ་ཐེ་ལན་དང་། མཱ་ལི་ཤི་ཡ། ཤི་རི་ལངྒ། ཨིན་རྡུ་ནེ་ཤི་སོགས་སུ་ཆར་བ་ཤུགས་ཆེན་བབས་ཟིན་པ་ལྟར། ཨིན་རྡུ་ནེ་ཤི་ཡའི་ས་ཁུལ་ཆེན་པོ་ 3 གྱི་མི་ས་ཡ་ 1.4 ལ་ཤུགས་རྐྱེན་ཐེབས་ཤིང་། ད་ལྟ་བར་རྒྱལ་ཁབ་འདིར་ཆུ་ལོག་སོགས་ཀྱི་རྐྱེན་པས། མིའི་འཆི་གྲངས་ 502 ལ་འཕར་ཅིང་ད་དུང་ཡང་མི་ 508 འཆི་གསོན་མ་ངེས་པ་བཤད། ཤི་རི་ལངྒར་མིན་ 334 དང་ཐེ་ལན་དུ་མི་ 170 རྐྱེན་འདས་སུ་ཕྱིན་ཟིན་པའི་གནས་ཚུལ་ཐོན། ད་དུང་ཡང་ཨིན་རྡུ་ནེ་ཤི་ཡའི་ས་ཁུལ་ཁ་ཤས་སུ་མྱུར་སྐྱོབ་རུ་ཁག་སླེབས་མ་ཐུབ་པ་བཤད།
ཤི་རི་ལངྒའི་ཡུལ་དུ་ད་དུང་ཡང་མི་ 370 མ་རྙེད་པ་དང་། མི་གྲངས་ 148,000 གནས་སྐབས་སྡོད་གནས་སུ་སྤོས་ཟིན་པ་བཤད། དེ་བཞིན་ཤི་རི་ལངྒའི་གཞུང་གིས། ཡུལ་འདིར་རོགས་སྐྱོར་དགོས་པ་རྒྱལ་སྤྱིའི་སྤྱི་ཚོགས་སུ་འབོད་སྐུལ་ཞུས། ཐེ་ལན་གྱི་མི་ས་ཡ་མང་པོའི་སྡོད་གནས་ལ་གཏོར་སྐྱོན་འདྲ་མིན་ཐེབས།
སྤྱིར་དུས་ཚིགས་དང་བསྟུན། རྒྱལ་ཁབ་འདི་དག་ཏུ་ཆར་ཆུའི་དཀའ་ངལ་ཆེ་ནའང་། ད་ལྟ་གོ་ལའི་ཚ་དྲོད་ཀྱི་རྐྱེན་པས། མཚོ་རླུང་གི་ནུས་པ་ཤུགས་ཆེ་རུ་འགྲོ་བཞིན་པ་ཆེད་མཁས་པ་ཚོས་བཤད། དེ་ལ་བརྟེན་ནས་རྒྱལ་ཁབ་དག་གི་དཔལ་འབྱོར་ལའང་ཤུགས་རྐྱེན་ངན་པ་ཐེབས་བཞིན་པ་བཤད།