སོ་ཐེ་ཨ་རབ་བྷེ་ཡའི་རྒྱལ་སྲས་ཀྱིས། འབྱུང་འགྱུར་རྒྱལ་ཁབ་འདིས་བཅོས་མའི་རིག་པ་དང་འཕྲུལ་རིགས་སོགས་དང་འབྲེལ། ཨ་རིའི་རྒྱལ་ནང་ལ་ཨ་སྒོར་ཁྲག་ཁྲིག་ཆེན་མོ་ $1 མ་ཟིན་ཙམ་གྱི་མ་རྐང་འཇོག་རྒྱུ་ཡིན་པ་བཤད།
ཁ་སང་སོ་ཐེ་ཨ་རབ་བྷེ་ཡ་རྒྱལ་ཁབ་ཀྱི་རྒྱལ་སྲས། མོ་ཧམ་མེ་རྡི་ བྷེན་ སལ་མན་ཨ་རིའི་རྒྱལ་ས་ཝ་ཤིན་ཀྲོན་དུ་འབྱོར་ཞིང་། སྲིད་འཛིན་སྒྲོ་ནལ་ཁྲི་རམ་ཕུ་དང་ལྷན་ཕོ་བྲང་དཀར་པོའི་ནང་དུ་ཐུག དགོང་དྲོའི་གསོལ་ཚིགས་སྐབས། འབྱོར་ལྡན་ཨེ་ལོན་མ་སི་ཁིའང་དེར་ཞུགས། འདི་ནི་ད་ལོར་སྒྲོ་ནལ་ཁྲི་རམ་ཕུ་དང་ཨེ་ལོན་མ་སི་ཁིའི་བར་འགལ་ཟླ་ཤོར་རྗེས། ཁོ་གཉིས་སྟེགས་བུ་གཅིག་གི་སྟེང་དུ་འཛོམས་པ་ཐེངས་གཉིས་པ་དེ་གྱུར། གཞན་ཡང་འཛམ་གླིང་གི་རྐང་རྩེད་སྤོ་ལོ་རྩེད་མཁན་གྲགས་ཅན་རོ་ནལ་སྒྲོ་(Ronaldo)ཡང་ཞུགས། སྒྲོ་ནལ་ཁྲི་རམ་ཕུས། ཁོའི་བུ་ཆུང་བ་རོ་ནལ་སྒྲོ་ལ་དགའ་བོ་ཡོད་པ་བཤད།
ད་ལོར་སྒྲོ་ནལ་ཁྲི་རམ་ཕུ་དཀྱིལ་ཤར་དུ་སྐོར་བསྐྱོད་སྐབས། ཐོག་མར་སོ་ཐེ་ཨ་རབ་བྷེ་ཡར་ཕྱིན་ཅིང་། སྐབས་དེར་སོ་ཐེ་ཨ་རབ་བྷེ་ཡ་རྒྱལ་ཁབ་ཀྱིས། ཨ་རིའི་རྒྱལ་ནང་ལ་འབྱུང་འགྱུར་ཨ་སྒོར་ཐེར་འབུམ་ $600 ཡིས་མ་རྐང་འཇོག་རྒྱུ་བྱས། ཐེངས་འདིར་རྒྱལ་སྲས་ཀྱིས།འབྱུང་འགྱུར་རྒྱལ་ཁབ་འདིས་བཅོས་མའི་རིག་པ་དང་འཕྲུལ་རིགས་སོགས་དང་འབྲེལ། ཨ་རིའི་རྒྱལ་ནང་ལ་ཨ་སྒོར་ཁྲག་ཁྲིག་ཆེན་མོ་ $1 མ་ཟིན་ཙམ་གྱིས་མ་རྐང་འཇོག་རྒྱུ་ཡིན་པ་བཤད། དེ་བཞིན་ཨ་རིས་རྒྱལ་ཁབ་འདི་ལ་དེང་རབས་འཐབ་འཛིང་གནམ་གྲུ་ F-35 འཚོང་འཆར་ཡོད་པ་མ་ཟད། ལྕགས་ཁྲབ་འཁོར་ལོ་གྲངས་ 300 མ་ཟིན་ཙམ་འཚོང་རྒྱུ་ཡིན་པ་ཕོ་བྲང་དཀར་པོས་བཤད།
སོ་ཐེ་ཨ་རབ་བྷེ་ཡ་རྒྱལ་ཁབ་ནི་རྡོ་སྣུམ་གྱིས་ཕྱུག་པའི་རྒྱལ་ཁབ་ཅིག་ཡིན་ནའང་། རྒྱལ་སྤྱིའི་རྡོ་སྣུམ་གྱི་ཁྲོམ་རར་ངེས་གཏན་མེད་པས། རྒྱལ་ཁབ་ཀྱི་དཔལ་འབྱོར་ཐོན་ཁུངས་དེ་འཕྲུལ་རིག་དང་། རྩེད་རིགས། ཡུལ་སྐོར་སོགས་སྣ་མང་ཅན་དུ་བསྒྱུར་རྒྱུ་དེ་རྒྱལ་སྲས་ཁོའི་འཆར་གཞི་གཙོ་བོ་ཞིག་ཡིན་པ་གསལ། ཨ་རི་དང་སོ་ཐེ་ཨ་རབ་བྷེ་ཡ་གཉིས་ཀྱི་འབྲེལ་བའི་ཁྲོད་ཀྱི་དཀའ་ངལ་གཙོ་བོ་ཞིག་ནི། སོ་ཐེ་ཨ་རབ་བྷེ་ཡའི་རྒྱལ་ནང་གི་འགྲོ་བ་མིའི་ཐོབ་ཐང་སྐོར་གྱུར་ཡོད་ཅིང་། ལྷག་པར་ཕྱི་ལོ་ 2018 ལོར་ཏུར་ཀེའི་གྲོང་ཁྱེར་ཨེ་སི་ཏམ་བྷུལ་དུ་ལྐོག་གསོད་ཐེབས་ཟིན་པ། སོ་ཐེ་ཨ་རབ་བྷེ་ཡའི་གསར་འགོད་པ་གྲགས་ཅན་ཇ་མལ་ཁཱ་ཤོ་གྷེ་(Jamal Khashoggi)ཡི་གནད་དོན་དེ་གྱུར།
འདིའི་རྒྱབ་ཏུ་སོ་ཐེ་ཨ་རབ་བྷེ་ཡའི་རྒྱལ་སྲས་རང་ཉིད་ཡོད་པ། ཨ་རིའི་གསང་ལས་ཀྱིས་སྔར་བཤད་ཟིན་པ་དང་། ཐེངས་འདིར་འདིའི་སྐོར་དྲི་བ་སླེབས་པར། སྒྲོ་ནལ་ཁྲི་རམ་ཕུས་གསར་ཁང་ལ་ཁ་རྡུང་དང་བཅས། མི་མང་པོ་ཁོ་(ལྐོག་གསོད་ཐེབས་ཟིན་པའི་གསར་འགོད་པ།)ལ་དགའ་ཡོད་པ་མ་རེད་ཅེས་བཤད་ནས་ཁ་བཀག སོ་ཐེ་ཨ་རབ་བྷེ་ཡ་ནི་དཀྱིལ་ཤར་གྱི་ཨ་རིའི་མཐུན་གྲོགས་གལ་ཆེན་ཞིག་ཡིན་པ་དང་། ལྷག་པར་ཨེ་ཛི་རལ་དང་ཁ་ཆེ་རྒྱལ་ཁབ་གཞན་དག་བར་འབྲེལ་བ་རྒྱུན་ལྡན་ཅན་དུ་བཟོ་འདོད་མཁན་སྒྲོ་ནལ་ཁྲི་རམ་ཕུ་ལ། སོ་ཐེ་ཨ་རབ་བྷེ་ཡ་ནི་ཧ་ཅང་གལ་ཆེ་བའི་རྒྱལ་ཁབ་ཅིག་ཏུ་གྱུར། དེ་བཞིན་ཨེ་རན་དང་དགྲ་ཁ་གཏད་དུ་ལངས་ཡོད་པའི་སོ་ཐེ་ཨ་རབ་བྷེ་ཡ་ནི། ཚོང་ལས་མ་ཟད་དེང་རབས་གོ་ལག་གི་ཐད་ནས་ཨ་རིར་ཤུགས་ཆེན་བརྟེན་ཡོད་པ་གསལ།