ཨེ་ཛི་རལ་གྱིས་ཨ་ཧྥེ་རི་ཀའི་སོ་མ་ལི་ལན་ཀྲི་དེ། རྒྱལ་ཁབ་ཅིག་ཡིན་པ་གཞུང་འབྲེལ་ངང་ངོས་འཛིན་བྱས་ཟིན་པ་བསྒྲགས། དེ་ལྟར་ན་ཨེ་ཛི་རལ་ནི་སོ་མ་ལི་ལན་ཀྲི་དེ་རྒྱལ་ཁབ་ཅིག་ཏུ་ངོས་འཛིན་མཁན་ཐོག་མ་དེ་གྱུར། དེ་མ་ཐག་རྒྱལ་སྤྱིའི་ཁ་ཆེ་རྒྱལ་ཁབ་ཚོས་ཨེ་ཛི་རལ་གྱི་ཐག་གཅོད་ལ་འདི་ལ་སྐྱོན་བརྗོད་དྲག་པོ་བྱས། ཏུར་ཀེ་གཞུང་གིས། ཨེ་ཛི་རལ་གྱི་ཐག་གཅོད་འདིས། ས་ཁུལ་སྤྱི་དང་རྒྱལ་སྤྱིའི་སྟེང་བརྟན་ལྷིང་མེད་པ་བཟོ་ངེས་རེད་ཅེས་བསྒྲགས། ཨ་ཧྥེ་རི་ཀ་མཉམ་འབྲེལ་ཁོངས་ཀྱི་རྒྱལ་ཁབ་ 55 ཡིས། ཨེ་ཛི་རལ་གྱི་ཐག་གཅོད་འདི་ངོས་ལེན་བྱ་རྒྱུ་མིན་པ་བསྒྲགས།
སོ་མ་ལི་ལན་ཀྲི་(Somaliland)ཞེས་པ་འདི་ནི། སོ་མ་ལི་ཡ་རྒྱལ་ཁབ་ཀྱི་བྱང་ཕྱོགས་དང་། ཡེ་མན་གྱི་ལྷོ་ཕྱོགས་སུ་ཡོད་པའི་ས་ཁུལ་ཞིག་དང་། དོན་དངོས་སུ་སོ་མ་ལི་ཡ་དང་གཅིག་གྱུར་ཡིན་པ་ལ། མི་སེར་སྤེལ་ཡུལ་གྱི་དུས་སྐབས་སུ། ད་ལྟའི་སོ་མ་ལི་ཡ་རྒྱལ་ཁབ་འདི་ཨི་ཀྲ་ལིའི་དབང་སྒྱུར་དང་། བྱང་ཕྱོགས་ཀྱི་ས་ཁུལ་ད་ལྟའི་སོ་མ་ལི་ལན་ཀྲི་ཞེས་པ་འདི་དབྱིན་ཇིའི་དབང་སྒྱུར་འོག་ཏུ་གནས། ཕྱི་ལོ་ 1960 ལོར་ས་ཁུལ་འདི་གཉིས་ཟླ་བསྒྲིལ་གྱིས་སོ་མ་ལི་ཡ་རྒྱལ་ཁབ་བཙུགས།
ཡིན་ན་ཡང་། ནང་ཁུལ་སྲིད་དོན་རྙོག་ཟིང་གི་རྐྱེན་པས། ཕྱི་ལོ་ 1991 ལོར་སོ་མ་ལི་ཡའི་དབུས་གཞུང་ནུས་མེད་དུ་གྱུར་ཅིང་། དེ་དང་ལྷན་ནང་ཁུལ་དམག་འཁྲུག་བྱུང་བས། བྱང་ཕྱོགས་ཀྱི་ས་ཁུལ་སོ་མ་ལི་ལན་ཀྲི་ཡིས་རང་ཉིད་རང་བཙན་ཡིན་པ་ཁྱབ་བསྒྲགས་བྱས། ད་ལྟ་བར་རྒྱལ་ཁབ་གང་གིས་ཀྱང་ཁོ་ཚོའི་རང་བཙན་ཡིན་པ་ངོས་འཛིན་མ་བྱས་ཀྱང་། འཛིན་སྐྱོང་དང་བདེ་འཇགས། ཁྲིམས་ལུགས་སོགས་ཀྱི་ཐད་ནས་སོ་མ་ལི་ཡ་རྒྱལ་ཁབ་ལས་ཧ་ཅང་ཡག་པོ་གྱུར་ཅིང་། ཁོ་ཚོར་མི་གྲངས་ས་ཡ་ 6 ཡས་མས་ཡོད་པ་མ་ཟད། གཞུང་དང་གྲོས་ཚོགས། དངུལ་སྒོར་སོགས་ཡོད་པ་གསལ།