བདུན་ཕྲག་སྔོན་མར་རཱ་ཤི་ཡ་དང་ཡུ་ཁུ་རན། ཨ་རི་བཅས་ཀྱི་སྐུ་ཚབ་དག་ཨ་རབ་རྒྱལ་ཕྲན་མཉམ་འབྲེལ་གྱི་རྒྱལ་ས། ཨ་བྷུ་རྡ་བྷེ་རུ་ཐོག་མར་འཛོམས་ཤིང་། ཁོ་ཚོའི་བར་ཉིན་ 2 རིང་སྐད་ཆ་བཤད། བདུན་ཕྲག་རྗེས་མར་ཁོ་ཚོ་བསྐྱར་དུ་འཛོམས་རྒྱུ་བྱས་ཡོད་པ་གསལ།
བདུན་ཕྲག་སྔོན་མར་རཱ་ཤི་ཡ་དང་ཡུ་ཁུ་རན། ཨ་རི་བཅས་ཀྱི་སྐུ་ཚབ་དག་ཨ་རབ་རྒྱལ་ཕྲན་མཉམ་འབྲེལ་གྱི་རྒྱལ་ས། ཨ་བྷུ་རྡ་བྷེ་རུ་ཐོག་མར་འཛོམས་ཤིང་། ཁོ་ཚོའི་བར་ཉིན་ 2 རིང་སྐད་ཆ་བཤད་མཐར། ཐུན་མོང་གི་བསྒྲགས་གཏམ་གང་ཡང་མེད་པར་གྲོལ། བདུན་ཕྲག་རྗེས་མར་ཁོ་ཚོ་བསྐྱར་དུ་འཛོམས་རྒྱུ་བྱས་ཡོད་པ་གསལ། ཨེག་སོ་སི་སྟེང་གནས་ཚུལ་བཀོད་པ་ལྟར་ན། ཕྱི་ཟླ་ 2 ཚེས་ 1 ཉིན་ནམ་བདུན་ཕྲག་རྗེས་མའི་གཟའ་པ་སངས་ཉིན་འཛོམས་རྒྱུ་ཡིན་པ་བཤད།
ཨ་རིའི་སྲིད་འཛིན་གྱི་སྐུ་ཚབ་ཝེ་ཀྲི་ཀོ་ཧྥི་དང་། ཡུ་ཁུ་རན་གྱི་སྐུ་ཚབ་དག་གིས། ཐེངས་འདིའི་གྲོས་མོལ་ནི་གྲུབ་འབྲས་ལྡན་པ་ཞིག་བྱུང་སོང་བ་བཤད། ཆེས་དཀའ་ངལ་ཆེ་བ་ནི་རྡོན་པ་སི་ས་ཁུལ་ནས་ཡུ་དམག་ཕྱིར་འཐེན་མིན་དེ་གྱུར་ཡོད་པ་ལྟར། ནེའུ་ཡོག་དུས་བབ་ལྟར་ན། རཱ་དམག་གིས་འཛིན་མ་ཐུབ་པའི་རྡོན་པ་སི་ས་ཁུལ་གྱི་བརྒྱ་ཆ་ 20% དེ་ནས་ཡུ་དམག་ཕྱིར་མ་འཐེན་ཚེ། སྐད་ཆ་གཞན་གང་ཡང་ལྷག་མེད་ཅེས་རཱ་ཤི་ཡས་ཤོད་བཞིན་པ་བཤད་ཅིང་། གདམ་ཀ་གཞན་གཞན་གང་ཡང་ཁས་མི་ལེན་རྒྱུའི་རྣམ་འགྱུར་བསྟན་ཟིན་པ་བཤད།
སྒྲོ་ནལ་ཁྲི་རམ་ཕུའི་སྐུ་ཚབ་ཀྱིས་ཀྱང་། ས་ཁུལ་འདིར་རཱ་ཤི་ཡའི་སྐད་ཤོད་མཁན་དག་འཚོ་སྡོད་བྱེད་ཀྱི་ཡོད་པས། ས་ཁུལ་འདི་རཱ་ཤི་ཡར་སྤྲད་རྒྱུའི་གྲོས་ཤུགས་ཆེན་བཏོན། ཡིན་ན་ཡང་། ཡུ་ཁུ་རན་གྱིས་ས་ཁུལ་འདིར་ཡུ་ཁུ་རན་གྱི་མི་སེར་མང་པོ་ལོ་ངོ་བརྒྱ་ཕྲག་རིང་འཚོ་སྡོད་བྱས་ཡོད་པས། དེ་དག་གློ་བུར་དུ་རཱ་ཤི་ཡར་སྤྲད་པ་ནི། ཀུན་སྤྱོད་ཀྱི་ཆ་ནས་མི་རུང་བ་ཞིག་དང་། དམག་དོན་གྱི་ཆ་ནས་ས་ཁུལ་དེ་དག་ཕུ་ཀྲན་ལ་རིན་མེད་ངང་སྤྲོད་རྒྱུ་མིན་ཞེས་ཤོད་བཞིན་པ་ལྟར། སྒྲོ་ནལ་ཁྲི་རམ་ཕུས་གྲོས་འགོ་གཉིས་པ་ཞིག་བཏོན། དེ་ནི་ས་ཁུལ་འདི་ནས་རཱ་ཡུ་གཉིས་ཀྱིས་དམག་མི་ཕྱིར་འཐེན་གྱིས། ས་ཆ་འདི་དམག་མི་མེད་པའི་ཚོང་ལས་ས་ཁུལ་ཞིག་ཏུ་བསྒྱུར་རྒྱུ་དེ་རེད།
ཡུ་ཁུ་རན་གྱིས་སྒྲོ་ནལ་ཁྲི་རམ་ཕུའི་བསམ་ཚུལ་འདི་ཁས་ལེན་རྒྱུའི་རྣམ་འགྱུར་བསྟན་ཅིང་། ཛེ་ལན་སི་ཀེ་ཡིས་ཡུ་ཁུ་རན་གྱི་དམག་མི་ཕྱིར་འཐེན་ཚེ། རཱ་ཤི་ཡས་ཀྱང་དམག་མི་ཕྱིར་འཐེན་དགོས་ཞེས་མནན་པོར་བཤད། དེར་བརྟེན་ཐེངས་འདིར་སྒྲོ་ནལ་ཁྲི་རམ་ཕུའི་སྐུ་ཚབ་ཚོ་དང་། ཡུ་ཁུ་རན་གྱིས་དམིགས་ཡུལ་འདི་འགྲུབ་རྒྱུའི་ཐད་འབད་པ་བྱས་ཡོད་པ་གསལ། ད་དུང་ཨ་རིས་ཐེངས་འདིར་ས་ཁུལ་འདིར་རྒྱལ་སྤྱིའི་བར་གནས་ཀྱི་དམག་མི་གཏོང་རྒྱུ་བཤད་པར། རཱ་ཤི་ཡས་འདི་ཁས་མི་ལེན་ཞེས་བཤད་ཟིན་པ་གསལ།
རཱ་ཤི་ཡས། ཨ་ལ་སི་ཀ་མངའ་སྡེར་ཕུ་ཀྲན་དང་སྒྲོ་ནལ་ཁྲི་རམ་ཕུ་གཉིས་ཀྱི་བར་གྲོས་མཐུན་བྱུང་བ་དེ་ལ་གནས་རྒྱུ་ལས། དེ་ལས་གཞན་འགྱུར་བ་གཏོང་རྒྱུ་མིན་ཞེས་བཤད། ཕུ་ཀྲན་དང་སྒྲོ་ནལ་ཁྲི་རམ་ཕུ་གཉིས་བར་གྲོས་མཐུན་ཅི་ཞིག་བྱུང་ཟིན་པ་ད་ལྟ་བར་ཁ་གསལ་ཞིག་ཕྱིར་མ་ཐོན་ཡང་། ད་ལྟ་གནས་ཚུལ་ཐོན་པ་ལྟར་ན། སྐབས་དེར་ཁོ་གཉིས་བར་རྡོན་པ་སི་ས་ཁུལ་ཧྲིལ་བོ་ནས་ཡུ་དམག་ཕྱིར་འཐེན་དུ་འཇུག་རྒྱུ་དང་། ཡུ་ཁུ་རན་དུ་ཕྱི་རྒྱལ་གྱི་དམག་མི་གཏོང་རྒྱུ་མིན་པ་གྲོས་མཐུན་ཡོད་པ་གསལ་བོར་གྱུར།
དེར་བརྟེན་སྒྲོ་ནལ་ཁྲི་རམ་ཕུས་ཛེ་ལན་སི་ཀེར། རྡོན་པ་སི་ས་ཁུལ་ནས་ཡུ་དམག་ཕྱིར་འཐེན་རྒྱུའི་གནོན་ཤུགས་དྲག་པོ་སྤྲད་ཀྱང་། ཛེ་ལན་སི་ཀེ་ཡིས་ས་ཁུལ་འདི་དག་ཡུ་ཁུ་རན་གྱི་བདེ་སྲུང་ལ་ཇི་ལྟར་གལ་ཆེ་ཚུལ་དང་། ཕུ་ཀྲན་གྱིས་ས་ཁུལ་འདི་ནས་ཡུ་དམག་ཕྱིར་མ་འཐེན་ཚེ། རཱ་དམག་གིས་ཟླ་བ་འགའི་ནང་འཕྲོག་ཐུབ་ཚུལ་བཤད་པ་ནི་རྫུན་རེད། ཅེས་སྒྲོ་ནལ་ཁྲི་རམ་ཕུ་ལ་ཨུ་ཚུགས་ཀྱིས་བཤད་མཐར། སྒྲོ་ནལ་ཁྲི་རམ་ཕུས་ས་ཁུལ་འདི་ནས་རྒྱལ་ཁབ་གཉིས་ཀྱི་དམག་མི་ཕྱིར་འཐེན་གྱིས། ཐུན་མོང་ཚོང་ལས་ས་ཁུལ་ཞིག་ཏུ་བསྒྱུར་རྒྱུའི་གྲོས་འདི་བཏོན་ཡིན་པ་གསལ།
ཡིན་ན་ཡང་། འོ་ན་ས་ཁུལ་འདིའི་ཆབ་སྲིད་འཛིན་སྐྱོང་ཇི་ལྟར་བྱ་རྒྱུ་ཡིན་ནམ། ཁྲིམས་ཐོག་ནས་ས་ཆ་འདི་གང་ཞིག་གི་ཆ་ཤས་ཡིན་པ་སོགས་གནད་དོན་གཙོ་བོ་དག་ཁ་གསལ་མ་ཆགས། དེ་བཞིན་ཛེ་ལན་སི་ཀེ་ཡིས་ཀྱང་། མངའ་ཁོངས་དང་འབྲེལ་བའི་ང་ཚོའི་ལངས་ཕྱོགས་ལ་འགྱུར་བ་མེད་ཅེས་བསྐྱར་དུ་བསྒྲགས། ད་དུང་ཁོས། ཡུ་ཁུ་རན་ལ་བདེ་སྲུང་ཁག་ཐེག་སྤྲོད་རྒྱུའི་ཡིག་ཆ་བརྒྱ་ཆ་ 100% གྲུབ་ཟིན་ལ། ད་ལྟ་ཨ་རིས་འདི་ལ་མིང་རྟགས་འགོད་རྒྱུ་ལས་ལྷག་མེད་ཅེས་བཤད། ཨེག་སོ་སི་ལྟར་ན། འབྱུང་འགྱུར་མགྱོགས་པོར་ཕུ་ཀྲན་དང་ཛེ་ལན་སི་ཀེ་གཉིས་ཐུག་རྒྱུར་ཨ་རིས་རེ་བ་རྒྱག་བཞིན་པ་བཤད།