བདུན་ཕྲག་འདིའི་ནང་ཨ་རིའི་སྲིད་འཛིན་སྒྲོ་ནལ་ཁྲི་རམ་ཕུ་སྲིད་གཞུང་གིས། ཨ་རིའི་རྒྱལ་སྲུང་ཐབས་བྱུས་གསར་བ་ཤོག་གྲངས་ 33 ཅན་ཞིག་ཕྱིར་བཏོན།
བདུན་ཕྲག་འདིའི་ནང་ཨ་རིའི་སྲིད་འཛིན་སྒྲོ་ནལ་ཁྲི་རམ་ཕུ་སྲིད་གཞུང་གིས། ཨ་རིའི་རྒྱལ་སྲུང་ཐབས་བྱུས་གསར་བ་ཤོག་གྲངས་ 33 ཅན་ཞིག་ཕྱིར་བཏོན། ཨ་རིའི་སྲིད་གཞུང་གསར་བ་རེ་རེའི་སྐབས་སུ་རྒྱལ་སྲུང་གཙོས། ཐབས་བྱུས་དང་འབྲེལ་བའི་ཡིག་ཆ་གསར་བ་རེ་ཕྱིར་འགྲེམས་སྲོལ་ཡོད་པ་དང་། ཡིག་ཆ་འདི་ནི་རྒྱལ་སྤྱིའི་སྟེང་ཨ་རིའི་ཕྱི་སྲིད་དང་། དམག་དཔུང་དང་འབྲེལ་བའི་ཡིག་ཆ་གལ་ཆེན་ཞིག་ཏུ་ངོས་འཛིན། ཐེངས་འདིར་བཏོན་པའི་ཡིག་ཆའི་ནང་དུ། ཡིག་ཆ་འདི་ནི་ཨ་རི་སྔར་བཞིན་མིའི་ལོ་རྒྱུས་ཀྱི་ནང་དུ། ཆེས་རླབས་ཆེན་དང་ཆེས་ལེགས་འགྲུབ་ཅན་དེ་ཡིན་པའི་ངོ་བོར་གནས་བྱེད་ཀྱི་ལམ་ཡིག་དེ་ཡིན་ཞེས་བྲིས།
ཐབས་བྱུས་དང་དམག་དོན་གཉིས་ཐད་ནས་རྒྱ་ནག་ནི། ཨ་རིའི་འགྲན་ཡ་གཙོ་བོར་འཛིན་རྒྱུའི་སྲིད་བྱུས་ནི། སྔོན་གྱི་སྲིད་གཞུང་ 2 དང་འདྲ་བོ་ཡིན་པ་ལ། ཡུ་རོབ་དང་འབྲེལ་གནས་ཚུལ་གལ་ཆེན་འགའ་བཀོད་ཡོད་པ་ནི། ཡུ་རོབ་ཀྱིས་ཕྱི་ལོགས་ནས་སྐྱབས་བཅོལ་བ་མང་པོ་ནང་དུ་ཡོང་བཅུག་པའི་མཇུག་འབྲས་སུ། ད་ལྟ་ནུབ་ཕྱོགས་ཀྱི་དཔལ་ཡོན་སྤྱི་འཇིག་རྒྱུའི་ཉེན་ཁར་ཐུག་ཡོད་པ་བཀོད། ད་ལོར་སྲིད་འཛིན་གཞོན་པ་རྗེ་སྒྲེ་ཝན་སི་ཡུ་རོབ་ཏུ་འགྲོ་སྐབས་ཀྱང་། ཡུ་རོབ་ཀྱིས་ཕྱི་མི་མང་པོ་ནང་དུ་ཡོང་བཅུག་པར་སྐྱོན་བརྗོད་རིང་པོ་ཞིག་བྱས། སྒྲོ་ནལ་ཁྲི་རམ་ཕུས་ཀྱང་། རྒྱལ་ཚོགས་སུ་གཏམ་བཤད་སྐབས་གནས་ཚུལ་འདི་ཤུགས་ཆེན་གླེང་།
ཡིག་ཆ་འདིའི་ནང་དུ་ཡུ་རོབ་མུ་མཐུད་དུ་ལམ་ཀ་འདིར་ཕྱིན་ཚེ།འབྱུང་འགྱུར་ལོ་ངོ་ 20 ཡི་ནང་ཡུ་རོབ་ནི་ངོས་འཛིན་མི་ཐུབ་པ་ཞིག་ཏུ་འགྱུར་རྒྱུ་ཡིན་པ་བཀོད། དེ་བཞིན་ཡུ་རོབ་ཀྱི་ད་ལྟའི་གཞུང་དག་གིས། གཏམ་བརྗོད་རང་དབང་སོགས་ལ་ཚོད་འཛིན་གྱིས། མང་གཙོའི་རིན་ཐང་ལ་རྒོལ་བཞིན་པ་བཀོད་ཅིང་། དེ་ནི་ད་ལྟ་ཡུ་རོབ་ཀྱི་རྒྱལ་ཁབ་མང་པོར་དར་བཞིན་པའི་རྙིང་ཞེན་ཆབ་སྲིད་ཚོགས་པ་དང་། རྒྱལ་ཞེན་རིང་ལུགས་ཀྱི་ལྟ་བ་དག་ལ་རྒྱབ་སྐྱོར་བྱེད་པ་ཞིག་ཏུ་གྱུར། མཇར་མན་གྱི་ཕྱི་སྲིད་བློན་ཆེན་གྱིས། ང་ཚོར་ཕྱི་ལོགས་ནས་སློབ་གསོ་རྒྱག་དགོས་དོན་མེད་ཅེས་བཤད། ཡིན་ན་ཡང་། ཡུ་རོབ་ཀྱི་ཆབ་སྲིད་ཁྲོད་སྐྱབས་བཅོལ་བ་ནི་དཀའ་ངལ་ཆེ་ཤོས་ཤིག་དང་། རྒྱལ་ཞེན་དང་རྙིང་ཞེན་གྱི་ལྟ་བ་ཤུགས་ཆེན་དར་བའི་རྒྱུ་རྐྱེན་གཙོ་བོ་དེ་གྱུར།
དེ་བཞིན་ཨ་རིའི་རྒྱལ་སྲུང་གི་ཕྱིར། འཛམ་གླིང་གང་སར་བཀྲམས་པའི་ཨ་རིའི་དམག་དཔུང་གི་རྟེན་གཞི་དག་ལ་བཅོས་བསྒྱུར་དགོས་པ་བཀོད་ཅིང་། འདིའི་ཁྲོད་ཨ་རིའི་དམག་དཔུང་གི་རྟེན་གཞི་གནས་སྤོ་རྒྱུའང་ཚུད་པ་དང་། གོ་ལའི་ནུབ་ཕྱོགས་(Western Hemisphere)ནི་ཨ་རིའི་རྒྱལ་སྲུང་ལ་གལ་ཆེ་བ་བཤད། གོ་ལའི་ནུབ་ཕྱོགས་ཞེས་པ་ནི། ལྷོ་བྱང་ཨ་མེ་རི་ཀ་དང་དབུས་ཨ་མེ་རི་ཀ་བཅས་ཚུད་པའི་སྐམ་ས་དང་། དེའི་ཉེ་འཁོར་གྱི་རྒྱ་མཚོ་བཅས་ལ་གོ་དགོས་པ་དང་། ད་ལྟ་ཨ་རིས་ཉལ་ཐ་དང་ནག་ཚོགས་འགོག་ཆེད་ཡིན་ཞེས། ཁཱ་རེ་བྷེ་ཡན་མཚོ་རྒྱུད་དུ་དམག་མི་མང་པོ་འགྲེམས་འཇོག་བྱས་ཡོད་པའང་དམིགས་ཡུལ་འདིའི་ཆ་ཤས་ཡིན་པ་གསལ།
ཡིག་ཆ་འདིའི་ནང་དུ་བཀོད་པའི་གནས་ཚུལ་གལ་ཆེན་གཞན་ཞིག་ནི། ནུབ་ཞི་བདེ་རྒྱ་མཚོའི་ཁུལ་དེ་གལ་ཆེན་དུ་བརྩི་རྒྱུ་ཡིན་པ་གསལ་བོར་བཀོད་ཅིང་། ཐེ་ཝན་དང་འབྲེལ་དམག་འཁྲུག་འབྱུང་རྒྱུར་སྔོན་འགོག་ཆེད། ཕྱོགས་འདིར་དམག་སྟོབས་ཆེན་པོ་ཞིག་མཉར་རྒྱུ་གལ་ཆེ་ཤོས་ཡིན་པ་བཀོད་ཅིང་། ཕྱོགས་འདིའི་ཨ་རིའི་མཐུན་གྲོགས་ཉི་ཧོང་དང་ལྷོ་ཀོ་རེ་ཡ། ཨོ་སི་ཁྲོ་ལི་ཡ། ཐེ་ཝན་བཅས་ཀྱིས་དམག་དོན་འགྲོ་གྲོན་ཡར་སྤར་དགོས་པ་བཀོད། རྒྱ་གར་དང་ཞི་བདེ་རྒྱ་མཚོའི་ཁུལ་ནི་འབྱུང་འགྱུར་གྱི་ས་ཁམས་ཆབ་སྲིད་དང་། དཔལ་འབྱོར་གྱི་གཡུལ་ས་གཙོ་བོར་ངོས་འཛིན་བཞིན་པ་དང་། ལྷག་པར་ཨ་རིའི་ཚོང་ཟོག་མང་པོ་ཞིག་ཐད་ཀར་ཞི་བདེ་རྒྱུ་མཚོ་བརྒྱུད་ནས་འགྲོ་བཞིན་པས། ཨ་རིའི་དམག་དོན་ནུས་པའང་དཀྱིལ་ཤར་ནས་ཞི་བདེ་རྒྱ་མཚོའི་ཁུལ་དུ་སྤུང་བཞིན་ཡོད།
ཨ་རིའི་དམག་དཔུང་གི་ནུས་པ་དཀྱིལ་ཤར་ནས་ཕྱིར་འཐེན་གྱིས། ཞི་བདེ་རྒྱ་མཚོའི་ཁུལ་དུ་སྤུང་རྒྱུའི་འཆར་གཞི་དང་། སྐད་ཆ་འདི་ཐོག་མར་སྲིད་འཛིན་ཨོ་བྷ་མའི་སྐབས་སུ་བྱུང་ཞིང་། འདི་དང་འབྲེལ་ཕྱི་ལོ་ 2011 ལོར་སྐབས་དེར་རྒྱལ་སྲིད་དྲུང་ཆེ་ཡིན་པ། ལྕམ་ཁི་ལིན་ཀྲོན་གྱིས་གཏམ་བཤད་གལ་ཆེན་ཞིག་སྤེལ། དུས་དེ་ནས་བཟུང་སྲིད་བྱུས་འདི་ལ་ཨེ་ཤ་ཡར་ཕྱོགས་པ་(Pivot to Asia)ཞེས་ཡོངས་སུ་གྲགས། ནང་དོན་ནི་འབྱུང་འགྱུར་དམག་དོན་དང་། དཔལ་འབྱོར་གཉིས་ཐད་ནས་ཨ་རིའི་འགྲན་ཡ་གཙོ་བོ་ནི་རྒྱ་ནག་འགྱུར་རྒྱུ་དང་། རྒྱ་ནག་གི་དབང་ཤུགས་རྒྱ་བསྐྱེད་ལ་ཚོད་འཛིན་དང་། ཨེ་ཤ་ཡ་དང་ཞི་བདེ་རྒྱ་མཚོའི་ཁུལ་གྱི་ཨ་རིའི་ཁེ་ཕན་རྒྱུན་མཉར་ཆེད། ཨ་རིའི་དམག་སྟོབས་ནུས་པ་དཀྱིལ་ཤར་ནས་ཞི་བདེ་རྒྱ་མཚོའི་ཁུལ་དུ་སྤུང་དགོས་ཞེས་པ་དེ་རེད།