ཨ་རིའི་གྲོས་ཚོགས་གོང་འོག་གཉིས་ཀྱི་གཞུང་གྲོན་སྟངས་འཛིན་ཚོགས་ཆུང་གིས། ཨ་རིའི་རྒྱལ་སྤྱིའི་གསར་འགྱུར་(USAGM)ལ་འགྲོ་གྲོན་ཨ་སྒོར་ས་ཡ་ $653 ཟུར་འཇོག་བྱ་རྒྱུ་ཐག་བཅད་ཟིན་པ་བཤད།
མདང་དགོང་ཝ་ཤིན་ཀྲོན་ཆ་འཕྲིན་སྟེང་ཐོག་མར་གནས་ཚུལ་བཀོད་པ་ལྟར་ན། ཨ་རིའི་གྲོས་ཚོགས་གོང་འོག་གཉིས་ཀྱི་གཞུང་གྲོན་སྟངས་འཛིན་ཚོགས་ཆུང་གིས། ཨ་རིའི་རྒྱལ་སྤྱིའི་གསར་འགྱུར་(USAGM)ལ་འགྲོ་གྲོན་ཨ་སྒོར་ས་ཡ་ $653 ཟུར་འཇོག་བྱ་རྒྱུ་ཐག་བཅད་ཟིན་པ་བཤད།
ཁྲིམས་འཆར་འདི་ལ་གྲོས་ཚོགས་གོང་འོག་གཉིས་དང་། སྲིད་འཛིན་གྱིས་ཆོག་མཆན་སྤྲད་ཚེ། ལོ་སྔོན་མར་སྒོ་བརྒྱབས་ཟིན་པའི་ཨ་རིའི་རླུང་འཕྲིན་ཁང་དང་། ཨེ་ཤ་ཡ་རང་དབང་རླུང་འཕྲིན་ཁང་སོགས་ཀྱི་སྐད་ཡིག་སྡེ་ཁག་མང་པོ་བསྐྱར་དུ་འགོ་འཛུགས་ཐུབ་རྒྱུ།
སྔོན་རྩིས་ཀྱི་འཆར་གཞི་ཞིབ་ཕྲ་ནི། ལོ་སྔོན་མ་གཉིས་ལ་ཁྱོན་ཨ་སྒོར་ས་ཡ་ $867 ལོ་རེར་སྤྲད་ཟིན་པ་ལ། ཐེངས་འདིར་ $653 སྤྲད་རྒྱུའི་ཁྲིམས་འཆར་བཏོན། བྱེ་བྲག་ཏུ་བཀར་ན་ལས་ཁུངས་ཨ་མའི་(USAGM)བྱ་འགུལ་གྱི་འགྲོ་གྲོན་ཆེད་ཨ་སྒོར་ས་ཡ་$138 དང་། ཨ་རིའི་རླུང་འཕྲིན་ཁང་ལ་ཨ་སྒོར་ས་ཡ་ $199.5 སྤྲད་རྒྱུ།
གསར་འགྱུར་སྡེ་ཁག་གཞན། ཡུ་རོབ་རང་དབང་རླུང་འཕྲིན་ཁང་ལ་ཨ་སྒོར་ས་ཡ་ $112.5 ། ཨེ་ཤ་ཡ་རང་དབང་རླུང་འཕྲིན་ཁང་ལ་ཨ་སྒོར་ས་ཡ་ $53.5 ། སྒེར་གཅོད་རྒྱལ་ཁབ་དག་ལ་ཐད་གཏོང་ཐུབ་པ་དང་། དྲྭ་རྒྱའི་བདེ་སྲུང་མཐུན་རྐྱེན་སོགས། འཕྲུལ་རིགས་ཀྱི་ཆེད་ཨ་སྒོར་ས་ཡ་ $40.5 སྤྲད་རྒྱུ་ཚུད་ཡོད་པ་གསལ།
སྒྲོ་ནལ་ཁྲི་རམ་ཕུ་སྲིད་སྟེགས་སུ་སླེབས་རྗེས་ཏེ། ལོ་སྔོན་མའི་ཕྱི་ཟླ་ 3 ཚེས་ 14 ཉིན། ཨ་རིའི་རྒྱལ་སྤྱིའི་གསར་འགྱུར་ལས་ཁུངས་གཏོར་རྒྱུ་དང་། བྱ་འགུལ་ཉུང་དུ་གཏོང་དགོས་པའི་བཀའ་བཏང་ཞིང་། ཞོར་དུ་ཨ་རིའི་རླུང་འཕྲིན་ཁང་དང་། ཨེ་ཤ་ཡ་རང་དབང་རླུང་འཕྲིན་ཁང་སོགས་ཀྱི་བྱ་འགུལ་ལ་ཚོད་འཛིན་ཤུགས་ཆེན་ཐེབས།
འདི་ནི་ཕྱི་ལོ་ 1942 ལོར་མཇར་མན་ནཱ་ཙེའི་ཆབ་སྲིད་ཁྱབ་སྒྲོག་ལ་འཐབ་ཆེད་བཙུགས་པ། ཨ་རིའི་རླུང་འཕྲིན་ཁང་སྒོ་བརྒྱབས་པ་ཐོག་མ་དང་། དེ་བཞིན་རྗེས་སུ་ཨུ་རུ་སུ་དམར་པོ་དང་། རྒྱ་དམར་སོགས་ལ་འཐབ་ཆེད་བཙུགས་པ་ཨེ་ཤ་ཡ་དང་། ཡུ་རོབ་རླུང་འཕྲིན་ཁང་སོགས་སྒོ་བརྒྱབས་པའམ། ཁྱབ་རྒྱར་ཚོད་འཛིན་ཤུགས་ཆེན་ཐེབས་པ་ཐོག་མ་དེའང་གྱུར།