ཨ་རིའི་སྲིད་འཛིན་སྒྲོ་ནལ་ཁྲི་རམ་ཕུ་སྲིད་གཞུང་གིས། ཐེ་ཝན་ལ་ཨ་རིའི་གོ་ལག་ཨ་སྒོར་ཐེར་འབུམ་ $11.1 གི་རིན་ཐང་འཚོང་རྒྱུའི་ཆོག་མཆན་སྤྲད། འདི་ནི་ཨ་རིས་ཐེ་ཝན་ལ་གོ་ལག་འཚོང་བ་གཞི་རྒྱ་ཆེ་ཤོས་ཤིག་ཏུ་གྱུར།
བདུན་ཕྲག་འདིའི་གཟའ་ལྷག་པའི་ཉིན། ཨ་རིའི་སྲིད་འཛིན་སྒྲོ་ནལ་ཁྲི་རམ་ཕུ་སྲིད་གཞུང་གིས། ཐེ་ཝན་ལ་ཨ་རིའི་གོ་ལག་ཨ་སྒོར་ཐེར་འབུམ་ $11.1 གི་རིན་ཐང་འཚོང་རྒྱུའི་ཆོག་མཆན་སྤྲད། འདི་ནི་ཨ་རིས་ཐེ་ཝན་ལ་གོ་ལག་འཚོང་བ་གཞི་རྒྱ་ཆེ་ཤོས་ཤིག་ཏུ་གྱུར་ཅིང་། འདིའི་ཁྲོད་ཧེ་མར་སི་འཕུར་མདའི་མ་ལག་དང་མེ་སྒྱོགས། ལྕགས་ཁྲབ་འཁོར་ལོ་གཏོར་བྱེད་རྗ་ཝེ་ལེན་སོགས། གོ་ལག་རིགས་འདྲ་མིན་གྲངས་ 8 འཚོང་བཞིན་པ་གསལ།
ཨ་རིའི་ལས་བྱེད་ཅིག་གིས་ཐེ་ཝན་གྱི་རང་སྲུང་ནུས་པ་ཡར་རྒྱས་གཏོང་རྒྱུ་ནི། ཨ་རིའི་རྒྱལ་སྲུང་དང་ཁེ་ཕན་ལ་ཤིན་ཏུ་གལ་ཆེན་ཡིན་པ་བཤད།
ཟླ་བ་སྔོན་མར་ཐེ་ཝན་གྱི་སྲིད་འཛིན་ལའེ་ཆིན་ཏི་ཡིས། ཕྱི་ལོ་ 2026 ནས་ཕྱི་ལོ་ 2033 བར་ཐེ་ཝན་གྱི་བདེ་སྲུང་ཆེད། ཨ་སྒོར་ཐེར་འབུམ་ $40 གཏོང་འཆར་ཡོད་པ་བསྒྲགས། ལའེ་ཆིན་ཏི་ཡིས། {རྒྱལ་སྲུང་ལ་ཐུག་དུས་བསྟུན་མཁས་ཟེར་བ་ཞིག་མེད་}ཅེས་མཐའ་ཚིག་བསྒྲགས།
ཨ་རིས་ཐེ་ཝན་ལ་གོ་ལག་འཚོང་རྒྱུའི་ཐག་གཅོད་ཀྱི་ཐད། རྒྱ་ནག་ཕྱི་སྲིད་ལྷན་ཁང་གིས། འདིས་ཐེ་ཝན་མཚོ་འགག་གི་ཞི་བདེ་དང་བརྟན་ལྷིང་ལ་གནོད་པ་ཚབས་ཆེན་བསྐྱལ་རྒྱུ་དང་། གོ་ལག་བཙོང་ནས་ཐེ་ཝན་གྱི་རང་བཙན་ལ་རྒྱབ་སྐྱོར་བྱས་པ་དེས། ཨ་རིས་རང་གི་སྟེང་ལ་མེ་བླུག་བཞིན་པ་རེད། ཐེ་ཝན་བེད་སྤྱོད་ཀྱིས་ཀྲུང་གོའི་ནུས་པ་ཚོད་འཛིན་བྱ་རྒྱུ་ཡིན་ཟེར་ན་ཕམ་རྒྱུ་ཉག་གཅིག་རེད་ཅེས་བཤད།