རྒྱ་ནག་གི་བརྙན་བཟོ་ཉེན་ཆས་ཀྲིག་ཀྲོག་གི་ཁེ་གཉེར་མ་ཡིས། ཉེན་ཆས་འདིའི་མ་ཤེར་བརྒྱ་ཆ་ 19.9% ཁོ་ཚོ་རང་གིས་འཛིན་རྒྱུ་དང་། མ་ཤེར་ལྷག་མ་བརྒྱ་ཆ་ 80.1% ཨ་རི་སོགས་རྒྱལ་སྤྱིའི་ཁེ་གཉེར་དག་ལ་འཚོང་རྒྱུ་མོས་མཐུན་བྱས།
རྒྱ་ནག་གི་བརྙན་བཟོ་ཉེན་ཆས་ཀྲིག་ཀྲོག་གི་ཁེ་གཉེར་མ་(ByteDance)ཡིས། ཉེན་ཆས་འདིའི་མ་ཤེར་བརྒྱ་ཆ་ 19.9% ཁོ་ཚོ་རང་གིས་འཛིན་རྒྱུ་དང་། མ་ཤེར་ལྷག་མ་བརྒྱ་ཆ་ 80.1% དེ་ཨ་རིའི་འཕྲུལ་རིག་ཁེ་གཉེར་ཆེན་མོ། ཨོ་རི་ཀལ་(Oracle)སོགས་ཨ་རི་དང་རྒྱལ་སྤྱིའི་ཁེ་གཉེར་མཉམ་འབྲེལ་ཞིག་ལ་འཚོང་རྒྱུ་ཡིན་པ་མོས་མཐུན་བྱས། ཐག་གཅོད་འདི་དང་འབྲེལ་བའི་མཐའ་མའི་ཡིག་ཆ་དེ་ཕྱིར་མ་བཀྲམས། དེ་ལྟར་ན་ཉེན་ཆས་འདི་མུ་མཐུད་ཨ་རིའི་རྒྱལ་ནང་དུ་བེད་སྤྱོད་བྱེད་ཆོག་པར་གྱུར་ཟིན་པ་ཡིན།
གནས་ཚུལ་འདིའི་བྱུང་རིམ་ནི། རྒྱ་ནག་གིས་ཨ་རིའི་མི་སེར་ཚོའི་ལག་ཏུ་ཡོད་པའི་ཁ་པར་ནང་གི་ཉེན་ཆས་སོགས་བརྒྱུད་ནས། གསང་བའི་གནས་ཚུལ་སྡུད་བཞིན་པའི་གནས་ཚུལ་ཞིག་སྔར་ནས་ཡོད་པ་དང་། ཉེན་ཆས་དེ་དག་གི་ཁྲོད་བརྙན་བཟོ་ཉེན་ཆས་ཀྲིག་ཀྲོག་(TikTok)
ཀྱང་ཚུད། ཕྱི་ལོ་ 2019 ལོར་སྲིད་འཛིན་སྒྲོ་ནལ་ཁྲི་རམ་ཕུས་ཉེན་ཆས་འདི་འགོག་ཐབས་བྱས་པར་ལམ་ལྷོང་མ་བྱུང་། དེའི་རྗེས་སུ་གྲོས་ཚོགས་སུ་འོས་བསྡུ་བརྒྱུད། ཉེན་ཆས་འདི་འགོག་རྒྱུ་ཐག་བཅད་ཅིང་སྲིད་འཛིན་སྔོན་མ་བྷ་ཀྲན་གྱིས་མིང་རྟགས་བཀོད།
ད་ལོར་སྒྲོ་ནལ་ཁྲི་རམ་ཕུ་སྲིད་སྟེགས་སུ་སླེབས་པ་དང་། བྷ་ཀྲན་གྱི་ཐག་གཅོད་འདི་རེ་ཞིག་ཕར་འགྱངས་བྱས་ཤིང་། ཉེན་ཆས་འདི་གཏན་དུ་བཀག་པ་ལས། ཨ་རིའི་ཁེ་གཉེར་ཞིག་གིས་ཉོས་ན་ཡག་པོ་ཡོད་པ་བཤད། ད་དུང་ཁོས། ཉེན་ཆས་འདི་བརྒྱུད་ནས་འོས་བསྡུའི་སྐབས་སུ་ང་ལ་ན་གཞོན་མང་པོའི་རྒྱབ་སྐྱོར་ཐོབ་སོང་ཞེས་ཀྱང་བཤད། ཨ་རིའི་རྒྱལ་ནང་དུ་ཉེན་ཆས་འདི་བེད་སྤྱོད་བྱེད་མཁན་ས་ཡ་ 170 ལས་མང་བ་ཡོད་པ་ཚོད་དཔག་བྱས་ཤིང་། ཉེན་ཆས་འདི་ནི་ཨ་རིའི་ནང་སྲིད་མ་ཟད། ཨ་རྒྱའི་བར་གྱི་གནད་དོན་ཞིག་ཏུ་གྱུར་ཅིང་། ད་ལོར་སྒྲོ་ནལ་ཁྲི་རམ་ཕུ་དང་ཞེ་ཅེན་ཕིན་གཉིས་ཐུག་སྐབས་ཀྱང་འདིའི་སྐོར་གླེང་།