(ཨ་རིའི་ལྷན་ཁང་མང་པོ་སྒོ་བརྒྱབས་ནས་ཉིན་ 40 འགྲོ་བཞིན་པ་ལྟར། གཟའ་ཟླ་བའི་ཉིན། རྒྱལ་ནང་དུ་འཕུར་མཁན་གནམ་གྲུ་གྲངས་ 2,400 འཕུར་རྒྱུ་ཕྱིར་འཐེན་དང་། གནམ་གྲུ་གྲངས་ 9,000 འཕུར་རྒྱུའི་དུས་ཚོད་ཕར་བསྒྱངས་ཟིན་པའི་གནས་ཚུལ་ཐོན།)
ཨ་རིའི་གཞུང་གི་འགྲོ་གྲོན་སྔོན་རྩིས་ཁྲིམས་འཆར་ཐད། ཆབ་སྲིད་ཚོགས་པ་གཉིས་གྲོས་མ་འཆམ་རྐྱེན། ཨ་རིའི་ལྷན་ཁང་མང་པོ་སྒོ་བརྒྱབས་ནས་ཉིན་ 40 འགྲོ་བཞིན་པ་ལྟར། གཟའ་ཟླ་བའི་ཉིན། རྒྱལ་ནང་དུ་འཕུར་མཁན་གནམ་གྲུ་གྲངས་ 2,400 འཕུར་རྒྱུ་ཕྱིར་འཐེན་དང་། གནམ་གྲུ་གྲངས་ 9,000 འཕུར་རྒྱུའི་དུས་ཚོད་ཕར་བསྒྱངས་ཟིན་པའི་གནས་ཚུལ་ཐོན། ཁ་སང་གཟའ་ཟླ་བའི་ཉིན་གྲོས་ཚོགས་གོང་མ་རུ་ལོ་རྗེས་མའི་ཕྱི་ཟླ་ 1 ཚེས་ 30 བར་གཞུང་བསྐྱར་དུ་སྒོ་འབྱེད་རྒྱུ་དང་། དེ་དང་ལྷན་དམག་དོན་འཛུགས་སྐྲུན་དང་། ཞིང་ལས་ལྷན་ཁང་བཅས་ལ་འབྱུང་འགྱུར་ལོ་ 1 རིང་ཧྲིལ་བོར་འགྲོ་གྲོན་གཏོང་རྒྱུའི་ཁྲིམས་འཆར་ཞིག་ཕྱིན། ད་ལྟ་ཁྲིམས་འཆར་འདི་གྲོས་ཚོགས་འོག་མ་ནས་འགྲོ་དགོས།
•. གྲོས་ཚོགས་འོག་མའི་གྲོས་འཐུས་མི་ཚོ་གུང་གསེང་ཡིན་པས། བདུན་ཕྲག་འདིར་འཛོམས་རྒྱུ་དང་ཁྲིམས་འཆར་འདིའི་སྟེང་འོས་བླུག་དགོས་ཡིན། གལ་སྲིད་གྲོས་ཚོགས་འོག་མ་ནས་ཕྱིན་ཚེ། བདུན་ཕྲག་རྗེས་མའི་གཟའ་ཟླ་བའི་ཉིན་སྲིད་འཛིན་གྱིས་ཁྲིམས་འཆར་འདི་ལ་མིང་རྟགས་དགོད་རྒྱུ་ཡིན་པ་ཚོད་དཔག་བྱེད། ཐེངས་འདིར་གྲོས་ཚོགས་གོང་མར། མང་གཙོ་ཚོགས་པའི་འཐུས་མི་སྐོར་ཞིག་གིས། སྤྱི་མཐུན་ཚོགས་པའི་ཁྲིམས་འཆར་འདིར་རྒྱབ་སྐྱོར་བྱས་པ་འདིས། མང་གཙོ་ཚོགས་པའི་ནང་ཁུལ་གྱི་འགལ་ཟླ་གཏིང་ཟབ་ཏུ་བཏང་ཞིང་། ལྷག་པར་ཐུན་མོང་གིས་བཀུར་བའི་དབུ་ཁྲིད་ངོ་མ་ཞིག་མེད་པའི་སྟེང་། གང་ཡོད་པ་ནི་ཅེག་ཤུ་མར་(Chuck Schumer)ཡིན་པ་ལ། ཁོ་ཡང་སྔར་ལས་རྩོད་གཞི་ཅན་ཞིག་ཏུ་གྱུར།