ཉི་ཧོང་གཞུང་གིས་རང་གི་ཉ་བ་ཚོར་མཚོ་ཐོག་ཏུ་རྒྱ་ནག་གི་གྲུ་གཟིངས་དག་དང་གདོང་ཐུག་རྒྱག་རྒྱུར་འཛེམས་དགོས་ཞེས་ཉེན་བརྡ་བཏང་ཡོད་པའི་གནས་ཚུལ་ཐོན།
ཉེ་དུས་ཉི་ཧོང་གི་སྲིད་བློན་གྱིས། ཐེ་ཝན་མཚོ་འགག་ཏུ་དམག་འཁྲུག་བྱུང་ཚེ། ཉི་ཧོང་གི་དམག་དཔུང་ཡང་དེའི་ཁྲོད་ཚུད་སྲིད་པའི་སྔོན་བརྡ་བཏང་རྐྱེན། ཉི་ཧོང་དང་རྒྱ་ནག་བར་གྱི་ཕྱི་འབྲེལ་ཧ་ཅང་སྡུག་ཏུ་ཕྱིན་ཅིང་། ཉི་ཧོང་གཞུང་གིས་རང་གི་ཉ་བ་ཚོར་མཚོ་ཐོག་ཏུ་རྒྱ་ནག་གི་གྲུ་གཟིངས་དག་དང་གདོང་ཐུག་རྒྱག་རྒྱུར་འཛེམས་དགོས་ཞེས་ཉེན་བརྡ་བཏང་ཡོད་པ་གསལ། དེ་བཞིན་ཁ་སང་གཟའ་མིག་དམར་ཉིན་ཉི་ཧོང་དུ་ཡོད་པའི་དོམ་ཕྲ་གཉིས་རྒྱ་ནག་ལ་ཕྱིར་བསློགས་ཤིང་། ཕྱི་ལོ་ 1972 ལོ་ནས་ཉི་ཧོང་ལ་དོམ་ཕྲ་མེད་པ་ཐོག་མ་དེ་གྱུར། དོམ་ཕྲ་འདི་གཉིས་ཀྱི་མིང་ལ་ལེ་ལེ་དང་ཞེའོ་ཞེའོ་ཞེས་འབོད་པ་དང་། ཕྱི་ལོ་ 2021 ལོར་ཉི་ཧོང་གི་རྒྱལ་ས་ཀྲོ་ཁེའོ་ཡི་གཅན་གཟིགས་ཁང་ཞིག་ཏུ་སྐྱེས།
དོམ་ཕྲ་ནི་རྒྱ་ནག་གི་ཧྲན་ཞི་ཞིང་ཆེན་དང་བོད་དང་རྒྱ་ནག་གི་ས་མཚམས། ཀན་སུ་དང་སི་ཁྲོན་ཞིང་ཆེན་གྱི་ས་ཁུལ་དུ་བཅས་བགོས་བྱས་པའི་ཤར་རྒྱལ་མོ་རོང་དང་། མུ་ལི། འབྲུག་ཆུ། ཟུང་ཆུའི་ཤར་དུང་རིའི་རྒྱུད་ཀྱི་སྦང་བཟང་། གཟི་ཚྭ་སྡེ་དགུ་སོགས་སུ་ཡོད་པའི་སེམས་ཅན་ཞིག་ཡིན་པ་ལ། རྒྱ་ནག་དམར་ཤོག་གཞུང་གིས་འདི་ཉིད་རྒྱལ་ཁབ་ཀྱི་མཚོན་དོན་ལྟ་བུར་བེད་སྤྱོད་བྱེད་བཞིན་པ་དང་། ལྷག་པར་ཕྱི་སྲིད་ཁྲོད་བེད་སྤྱོད་བྱེད་བཞིན་ཡོད། ཁོ་ཚོས་རྒྱལ་ཁབ་གཞན་ལ་མཛའ་བརྩེ་མཚོན་ཆེད་གཡོར་བཞིན་པ་དང་། དོམ་ཕྲ་ཞིག་གི་གཡོར་གླ་དེ་ལོ་རེར་ཨ་སྒོར་ས་ཡ་ $1 རེ་སྤྲོད་དགོས་པ་ལ། དོམ་ཕྲ་དེ་དང་ཕྱི་རྒྱལ་དུ་སྐྱེས་པའི་དེའི་ཕྲུ་གུ་བཅས་ཀྱི་བདག་དབང་སྔར་བཞིན་རྒྱ་ནག་གིས་མཉར་ཡོད་པ་གསལ།
ཝོལ་སི་ཀྲི་རི་ཀྲི་གསར་དེབ་སྟེང་གནས་ཚུལ་བཀོད་པ་ལྟར་ན། ཨ་རིའི་མང་གཙོ་ཚོགས་པའི་ངོས་ནས། གཞུང་གི་འགྲོ་གྲོན་སྔོན་རྩིས་ཀྱི་ཁྲིམས་འཆར་ཁྲོད། ནང་སྲིད་ལྷན་ཁང་འགྱུར་བ་གཏོང་རྒྱུའི་ཁྲིམས་འཆར་ཞིག་ཀྱང་འཁྱེར་ནས་ཡོང་འཆར་ཡོད་པ་དང་། སྤྱི་མཐུན་ཚོགས་པས་ཁྲིམས་འཆར་འདི་ངོས་ལེན་བྱ་རྒྱུའི་རྣམ་པ་མེད་པས། བདུན་ཕྲག་འདིའི་མཇུག་ཏུ་སླར་ཡང་ཨ་རིའི་གཞུང་ཕྱེ་ཀ་སྒོ་རྒྱག་དགོས་ཐུག་སྲིད་པ་བཤད། དེ་བཞིན་སྒྲོ་ནལ་ཁྲི་རམ་ཕུ་སྲིད་གཞུང་གིས། རྒྱལ་ནང་དུ་ཡིག་ཆ་མེད་པར་འཛུལ་མཁན་དང་། ནག་ཉེས་ཀྱི་རྒྱབ་ལྗོངས་ཡོད་མཁན་འཛིན་བཞིན་ཡོད།