ཐེ་ཝན་དང་འབྲེལ་ཉི་ཧོང་གིས་ཚད་ལས་བརྒལ་བའི་སྦྱོར་བ་བརྩམས་ཚེ། དེ་ལ་གུན་གསབ་ན་ཟུག་ཅན་ཞིག་སྤྲོད་དགོས་ཐུག་ངེས་ཡིན།
ཉི་ཧོང་གི་སྲིད་བློན་གྱིས་གྲོས་ཚོགས་སུ་ཐེ་ཝན་དང་འབྲེལ་གཏམ་བཤད་ཅིག་སྤེལ་བ་ལ་བརྟེན་ནས། རྒྱ་ནག་དང་ཉི་ཧོང་བར་གྱི་འབྲེལ་བ་སྡུག་ཏུ་འགྲོ་བཞིན་པ་དང་ལྷན། ཉི་ཧོང་གིས། ཐེ་ཝན་ནས་སྤྱི་ལེ་ 112 ཡས་མས་ཀྱི་མཚམས་སུ་ཡོད་པ། ཡཱ་ན་གྷུ་ནེ་ཞེས་པའི་མཚོ་གླིང་སྟེང་། སྙོབས་ཚད་འབྲིང་ཅན་གྱི་འཕུར་མདའི་མ་ལག་ཅིག་འཇོག་རྒྱུ་ཡིན་པ་བསྒྲགས་ཟིན་པ་ལྟར། ཁ་སང་ཞོགས་པར་རྒྱ་ནག་བདེ་སྲུང་ལྷན་ཁང་གིས། ཐེ་ཝན་དང་འབྲེལ་ཉི་ཧོང་གིས་ཚད་ལས་བརྒལ་བའི་སྦྱོར་བ་བརྩམས་ཚེ། དེ་ལ་གུན་གསབ་ན་ཟུག་ཅན་ཞིག་སྤྲོད་དགོས་ཐུག་ངེས་ཡིན་ཞེས་ཉེན་བརྡ་བཏང་།
ད་དུང་རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་བུད་མེད་མའོ་ཡེ་ཡིས། ཉི་ཧོང་གི་ངོས་ནས་ཀྲུང་གོ་གཅིག་གི་སྲིད་བྱུས་ལ་བརྩི་བཀུར་བྱེད་ཀྱི་ཡོད་དམ་ཞེས་དང་། ཉི་ཧོང་གིས་དཀའ་ངལ་ཞིག་བཟོས་རྗེས་དཀའ་ངལ་དེ་རང་ངོས་ནས་མེད་པ་འགྱུར་རྒྱུ་རེ་བ་རྒྱག་མི་རུང་བའི་ཉེན་བརྡ་བཏང་། དེ་དང་ལྷན་ཨ་རིའི་སྲིད་འཛིན་སྒྲོ་ནལ་ཁྲི་རམ་ཕུས་ཉི་ཧོང་གཞུང་ལ། གནས་ཚུལ་འདི་ཞི་འཇམ་དུ་གཏོང་ཐབས་བྱ་དགོས་ཞེས་ཤོད་བཞིན་པའི་གནས་ཚུལ་ཐོན།
རྒྱ་ནག་དང་ཉི་ཧོང་བར་ལོ་རྒྱུས་ཀྱི་འགལ་འདུ་ཡོད་པས། རྒྱ་ནག་དམར་གཞུང་གིས་འདི་བེད་སྤྱོད་ཀྱིས། སླར་ཡང་རྒྱལ་ནང་དུ་རྒྱལ་ཞེན་སློང་བཞིན་པའི་མཚམས། རྒྱ་ནག་གཅིག་གི་སྲིད་བྱུས་ཟེར་བ་ནི། རྒྱ་ནག་ལྟར་ན་འཛམ་གླིང་འདིར་ཁྲིམས་མཐུན་གྱི་རྒྱ་ནག་གཞུང་གཅིག་ལས་མེད་ཅིང་། དེ་ནི་པེ་ཅིང་དུ་ཡོད་པའི་གཞུང་འདི་ཡིན་པ་འདོད། ཡིན་ན་ཡང་། ཐེ་ཝན་གྱིས་ཚིག་འདི་ལ་འགྲེལ་བཤད་གཞན་ཞིག་རྒྱག་བཞིན་ཡོད།