རྒྱ་ནག་གིས་དབྱིན་ཇིའི་མི་སེར་ཚོ་ཉིན་ 30 རིང་ཐོངས་མཆན་མི་དགོས་པར་རྒྱ་ནག་ཏུ་ཡོང་ཆོག་པ་བཟོས་ཤིང་། དབྱིན་ཇིའི་ཁེ་གཉེར་དག་གིས་རྒྱ་ནག་ཏུ་མ་རྐང་ཆེན་པོ་འཇོག་རྒྱུ་ཡིན་པ་བཤད།
དབྱིན་ཇིའི་སྲིད་བློན་ཁེར་ སི་ཀྲར་མེར་རྒྱ་ནག་གི་རྒྱལ་ས་པེ་ཅིང་དུ་སླེབས་ཤིང་། ཁོ་དང་རྒྱ་ནག་གི་སྲིད་འཛིན་ཞེ་ཅེན་ཕིན་གཉིས་ཐུག
ཐེངས་འདིར་ཁོ་རྒྱ་ནག་ཏུ་ཉིན་ 3 རིང་སྐོར་བསྐྱོད་བྱ་རྒྱུ་དང་། འདི་ནི་འདས་པའི་ལོ་ངོ་ 8 རིང་དབྱིན་ཇིའི་སྲིད་བློན་ཞིག་རྒྱ་ནག་ཏུ་སླེབས་པ་ཐོག་མ་དེ་གྱུར།
ཞེ་ཅེན་ཕིན་གྱིས། རྒྱལ་ཁབ་གཉིས་ཀྱི་འབྲེལ་བར་ཡར་འགྱུར་མར་འགྱུར་དང་། དཀའ་ངལ་ཡོད་ནའང་ཕན་ཚུན་ལ་འབྲེལ་བ་བྱེད་དགོས་པ་ནི་གཡོལ་ཐབས་མེད་ཅེས་བཤད། དབྱིན་ཇི་སྲིད་བློན་གྱིས། ཐེངས་འདིར་འགྲོ་བ་མིའི་ཐོབ་ཐང་སོགས་ཀྱི་གནད་དོན་གླེང་སློང་བྱས་ཡོད་པ་བཤད། ཐེངས་འདིར་རྒྱ་ནག་གཞུང་གིས། ཉིན་ 30 རིང་དབྱིན་ཇིའི་མི་སེར་ཚོ་ཐོངས་མཆན་མི་དགོས་པར། རྒྱ་ནག་ཏུ་འགྲུལ་བསྐྱོད་བྱེད་ཆོག་པ་བཟོས།
དབྱིན་ཇིའི་སྨན་རྫས་བཟོ་གྲྭ་དང་ཁེ་གཉེར་ཆེན་མོ་ཨ་སི་ཀྲི་ར་ཛེ་ན་ཀ་(AstraZeneca)ཡིས། རྒྱ་ནག་ཏུ་ཨ་སྒོར་ཐེར་འབུམ་ $15 ཡི་མ་རྐང་འཇོག་རྒྱུ་ཡིན་པ་བསྒྲགས། དབྱིན་ཇི་སྲིད་བློན་གྱིས། ཁོ་དང་ཞེ་གཉིས་ཀྱིས་སྐད་ཆ་བཤད་རྗེས་དབྱིན་ཇི་དང་། རྒྱ་ནག་གི་འབྲེལ་བ་དེ་ཡག་པོ་དང་བརྟན་པོ་གྱུར་ཡོད་པ་དང་། དབྱིན་ཇིའི་ཚོང་པ་དག་གིས་རྒྱ་ནག་ལ་མ་རྐང་འཇོག་རྒྱུར་སྒུག་ཡོད་པ་བཤད།