དེ་རིང་ཐེ་ལན་དང་ཀམ་བྷོ་ཀྲི་ཡའི་བར་གྲོས་མོལ་དང་། དེའི་སྟེང་ཐེ་ལན་གྱི་བདེ་སྲུང་བློན་ཆེན་ཡང་ཞུགས་རྒྱུ་ཡིན་པའི་གནས་ཚུལ་ཐོན། དེ་ལྟར་ན་རྒྱལ་ཁབ་གཉིས་བར་རེ་ཞིག་མེ་མཚམས་འཇོག་ཐུབ་པའི་རེ་བ་ཆེ་བ་བཤད།
ལྷོ་ཤར་ཨེ་ཤ་ཡའི་རྒྱལ་ཁབ་ཀམ་བྷོ་ཀྲི་ཡ་དང་། ཐེ་ལན་གཉིས་ཀྱི་ས་མཚམས་སུ། རྒྱལ་ཁབ་གཉིས་ཀྱི་དམག་མིས་ཕན་ཚུན་གྱི་སྟེང་གཏོར་རྒོལ་འགོ་བཙུགས་ནས་བདུན་ཕྲག་ 3 འགྲོ་བཞིན་པ་ལྟར། དེ་རིང་རྒྱལ་ཁབ་གཉིས་བར་གྲོས་མོལ་དང་། དེའི་སྟེང་ཐེ་ལན་གྱི་བདེ་སྲུང་བློན་ཆེན་ཡང་ཞུགས་རྒྱུ་ཡིན་པའི་གནས་ཚུལ་ཐོན། དེ་ལྟར་ན་རྒྱལ་ཁབ་གཉིས་བར་རེ་ཞིག་མེ་མཚམས་འཇོག་ཐུབ་པའི་རེ་བ་ཆེ་བ་བཤད།
ཨ་རིའི་སྲིད་འཛིན་སྒྲོ་ནལ་ཁྲི་རམ་ཕུས། ཁོས་དམག་འཁྲུག་ 8 མཚམས་བཞག་ནས། མི་སྲོག་ས་ཡ་མང་པོ་བསྐྱབས་ཟིན་ཞེས་ཤོད་ཀྱིན་པའི་དམག་འཁྲུག་གཅིག་ནི། ཐེ་ལན་དང་ཀམ་བྷོ་ཀྲི་ཡའི་བར་མེ་མཚམས་བཞག་པ་དེ་གྱུར། དོན་དངོས་སུ་ད་ལོའི་ཕྱི་ཟླ་ 7 ནང་རྒྱལ་ཁབ་གཉིས་བར་ས་མཚམས་སུ་གདོང་ཐུག་བྱུང་སྐབས། མཱ་ལེ་ཤི་ཡ་སོགས་ལྷོ་ཤར་ཨེ་ཤ་ཡའི་རྒྱལ་ཁབ་གཞན་དག་གིས་གཙོ་བོ་བར་འདུམ་དང་། དེ་ལ་སྒྲོ་ནལ་ཁྲི་རམ་ཕུས་རམ་འདེམས་བྱས་པ་བརྒྱུད་ཕན་ཚུན་བར་མེ་མཚམས་འཇོག་ཐུབ་པ་གྱུར།
ཡིན་ན་ཡང་། ཟླ་བ་འདིའི་ནང་སླར་ཡང་འཁྲུག་འགོ་བཙུགས་ཤིང་། ཕན་གཉིས་ཀྱིས་ཕར་ཚུན་ངན་ཁོག་གཡོག་རེས་བྱེད། གཞན་ཡང་ཀམ་བྷོ་ཀྲི་ཡའི་དམག་མིས། རྒྱ་ནག་གིས་བཟོས་པའི་འཕུར་མདའི་མ་ལག་ MLRS ཅིག་བེད་སྤྱོད་ཀྱིས། ཐེ་ལན་གྱི་ཕྱོགས་སུ་འཕུར་མདའ་འཕེན་བཞིན་པའི་སྐབས་སུ། མ་ལག་དེ་གས་འཐོར་གྱིས་ཀམ་བྷོ་ཀྲི་ཡའི་དམག་མི་ 8 བསད་ཟིན་པའི་གནས་ཚུལ་ཞིག་དྲྭ་ལམ་དུ་ཁྱབ། བདེན་མིན་རེ་ཞིག་ཞུ་མ་ཤེས།