ཉེན་ཁ་ཆེ་ཤོས་ནི་སེམས་ཅན་གྱི་ལུས་སྟེང་ནས་མིའི་ལུས་སྟེང་ལ་འགོས་པ་ཙམ་གྱིས་འབྱུང་རྒྱུ་མ་ཡིན་པར། དེ་ནི་མིའི་ལུས་སྟེང་ནས་མི་གཞན་གྱི་ལུས་སྟེང་ལ་འཕོས་དུས། གཞི་ནས་ནད་འབུའི་ངོ་བོར་འགྱུར་ལྡོག་འབྱུང་རྒྱུའི་ཉེན་ཁ་ཆེ་བ་བཤད།
ལྷོ་ཨེ་ཤ་ཡ་དང་ལྷོ་ཤར་ཨེ་ཤ་ཡའི་རྒྱལ་ཁབ་དག་ཏུ། བྱ་ཡི་ཆམ་ནད་ཚབས་ཆེན་ཞིག་(H5N1)ཁྱབ་ཅིང་། ཕྱི་ལོ་ 1990 ཡི་སྨད་ནས་བཟུང་། རྒྱ་ནག་ཏུ་ཆམས་ནད་འདི་མིའི་ལུས་སྟེང་ལ་འགོས་པའི་གནས་ཚུལ་བྱུང་འགོ་བཙུགས། རྒྱལ་སྤྱིའི་འཕྲོད་བསྟེན་ལྷན་ཁང་ལྟར་ན། ཕྱི་ལོ་ 2003 ནས་ཕྱི་ལོ་ 2025 ཟླ་ 8 བར། འགོས་ནད་འདི་རྒྱལ་ཁབ་ 25 ཡི་ནང་དུ་མི་ 475 ལ་འཕོག་ནས་རྐྱེན་འདས་སུ་ཕྱིན་ཟིན་པ་དང་། འཕོག་མཁན་གྱི་ཁྲོད་ནས་བརྒྱ་ཆ་ 48% རྐྱེན་འདས་སུ་ཕྱིན་ཟིན་པ་བསྒྲགས།
ཨ་རིའི་རྒྱལ་ནང་གཅིག་བུར་བྱ་རིགས་ས་ཡ་ 180 ལས་མང་བ་དང་། སྒོ་ཟོག་སེམས་ཅན་གྲངས་ 1,000 ལས་བརྒལ་བ། མི་ 70 བཅས་ལ་འཕོག་ཟིན་པ་གསལ། ད་ལོའི་ཕྱི་ཟླ་ 1 ནང་རྒྱ་གར་གྱི་མཱ་ཧ་ར་ཤི་ཀྲར་མངའ་སྡེའི་ནག་པུར་གྲོང་ཁྱེར་དུ། བྱ་ཡི་ལུས་སྟེང་དུ་འགོས་པའི་ནད་ཚ་ཞིག་གི་རྐྱེན་པས་སྟག་ 3 དང་གཟིག་ཅིག་བཅས་ཤི་ཟིན་པ་བཤད། མིའི་ལུས་སྟེང་དུ་འགོས་དུས་ནད་རྟགས་ནི་ཚ་བ་རྒྱས་པ་དང་མིད་པ་ན་བ་སོགས་ཡིན་པ་དང་། མི་ཁ་ཤས་ལ་ནད་རྟགས་མི་ཐོན་པ་བཤད།
ད་དུང་མིའི་ལུས་སྟེང་དུ་འགོས་རྒྱུའི་ཉེན་ཁ་ཆུང་ནའང་། ནད་འབུ་འདིའི་ངོ་བོའི་འགྱུར་ལྡོག་ལ་གཞུང་དང་ཞིབ་འཇུག་པ་ཚོས་ཐག་ཉེ་ནས་ལྟ་ཞིབ་བྱེད་བཞིན་པའི་གནས་ཚུལ་ཐོན། ད་ལྟ་རྒྱ་གར་གྱི་ཞིབ་འཇུག་པ་ཚོས། ནད་འབུ་འདི་ག་ལེར་དང་ཁུ་སིམ་པོའི་ངང་། རྒྱལ་སྤྱིའི་རང་བཞིན་ཅན་གྱི་ནད་ཡམས་ཤིག་ཏུ་འགྱུར་ཆོག་བཤད།
ཁོ་ཚོས། ཉེན་ཁ་ཆེ་ཤོས་ནི་སེམས་ཅན་གྱི་ལུས་སྟེང་ནས་མིའི་ལུས་སྟེང་ལ་འགོས་པ་ཙམ་གྱིས་འབྱུང་རྒྱུ་མ་ཡིན་པར། དེ་ནི་མིའི་ལུས་སྟེང་ནས་མི་གཞན་གྱི་ལུས་སྟེང་ལ་འཕོས་དུས། གཞི་ནས་ནད་འབུའི་ངོ་བོར་འགྱུར་ལྡོག་འབྱུང་རྒྱུའི་ཉེན་ཁ་ཆེ་བ་བཤད། ཐོག་མར་ཞིང་པ་དང་ཁྲོམ་རར་ལས་ཀ་བྱེད་མཁན་སོགས་ལ་འགོས་སྲིད་པ་ཚོད་དཔག་བྱེད་ཅིང་།གནས་ཚུལ་སྡུག་ཏུ་མ་ཕྱིན་སྔོན་ནད་འབུ་འདི་ཚོད་འཛིན་དང་། སྔོན་འགོག་ཐུབ་པའམ་ཉེན་ཁ་ཆུང་དུ་གཏོང་རྒྱུ་གལ་ཆེ་བ་བཤད།