ཨེ་རན་གྱི་ངོ་རྒོལ་ཁྲོད་མི་ 30,000 བསད་ཟིན་པ་བཤད་ཅིང་། གཙོ་བོ་ཟླ་བ་འདིའི་ཚེས་ 8 དང་ཚེས་ 9 གཉིས་ལ་དམར་གསོད་ཆེན་པོ་ཞིག་བྱས་ཟིན་པ་བཤད། སྐབས་དེར་རྒྱལ་ནང་དུ་དྲྭ་རྒྱ་བཀག་ཟིན་པས། ད་དུང་ཡང་གནས་ཚུལ་མང་པོ་ཞིག་ཕྱིར་ཐོན་མེད།
ལོ་སྔོན་མའི་ཕྱི་ཟླ་ 12 ཚེས་ 28 ཉིན་ནས་ཨེ་རན་དུ་བྱུང་བའི་ངོ་རྒོལ་ཁྲོད། ཁྱོན་བདེ་སྲུང་མི་སྣ་དང་ངོ་རྒོལ་བ་བཅས་མི་ 3,117 རྐྱེན་འདས་སུ་ཕྱིན་ཟིན་པ་ཨེ་རན་གཞུང་གིས་བསྒྲགས་ཟིན། ཡིན་ན་ཡང་། ཨ་རིའི་བདུན་རེའི་གསར་ཤོག་(Time Magazine)གིས། ཨེ་རན་གྱི་ལས་བྱེད་ཚོའི་སྐད་ཆ་ལུང་འདྲེན་གྱིས་གནས་ཚུལ་བཀོད་པ་ལྟར་ན། དོན་དངོས་སུ་ངོ་རྒོལ་འདིའི་ཁྲོད་མི་ 30,000 (གྲངས་ཀ་གཞན་ཞིག་ལ་ 36,000)བསད་ཟིན་པ་བཤད་ཅིང་། གཙོ་བོ་ཟླ་བ་འདིའི་ཚེས་ 8 དང་ཚེས་ 9 གཉིས་ལ་དམར་གསོད་ཆེན་པོ་ཞིག་བྱས་ཟིན་པ་བཤད། (སྐབས་དེར་རྒྱལ་ནང་དུ་དྲྭ་རྒྱ་བཀག་ཟིན་པས། ད་དུང་ཡང་གནས་ཚུལ་མང་པོ་ཞིག་ཕྱིར་ཐོན་མེད།)
ཨེ་རན་གྱི་སྨན་པ་སོགས་འཕྲོད་བསྟེན་ལས་བྱེད་དག་ལྟར་ན། ཉིན་འདི་གཉིས་ཀྱི་རིང་ཕུང་པོ་འཇུག་སའི་འགྱིག་ཁུག་གིས་མ་འདང་བ་དང་། སྨན་ཁང་གི་མྱུར་སྐྱོབ་རླངས་འཁོར་གྱིས་མ་འདང་བར་སྤྱིར་བཏང་གི་རླངས་འཁོར་བེད་སྤྱོད་བྱེད་དགོས་པ་གྱུར་ཟིན་པ་བཤད། སྐབས་དེར་ཨེ་རན་གྱི་གཞུང་དམག ཁ་ཆེ་གསར་བརྗེ་དམག་དཔུག་གིས་ནུས་པ་གང་ཡོད་བཏོན་ནས། ངོ་རྒོལ་འདི་བཙན་གྱིས་མནན་ཟིན་པ་གསལ། ཨེ་རན་ཕྱི་སྲིད་ལྷན་ཁང་གི་མགྲིན་ཚབ་པས། ཁོ་ཚོས་ངོ་རྒོལ་ལ་སྐུལ་སློང་གིས་ཨེ་རན་ལ་གནོད་པ་སྐྱེལ་མ་ཐུབ་པས། ད་ལྟ་ཁོ་ཚོས་གསར་ཁང་བེད་སྤྱོད་ཀྱིས་ཨེ་རན་ལ་ཚུར་རྒོལ་བྱེད་ཀྱི་ཡོད་པ་རེད། འདི་ནི་མཇར་མན་ནཱ་ཙེའི་བྱེད་སྟངས་རེད་ཅེས་བཤད།
ཨ་རིའི་སྲིད་འཛིན་སྒྲོ་ནལ་ཁྲི་རམ་ཕུས། ཨེ་རན་གཞུང་གིས་ངོ་རྒོལ་བ་ཚོ་བསད་ཚེ། ཨེ་རན་གྱི་སྟེང་ཕར་རྒོལ་བྱ་རྒྱུའི་བརྡ་བཏང་ཟིན་ནའང་། དེའི་རྗེས་སུ་ཁོས་ཨེ་རན་གཞུང་གིས་ངོ་རྒོལ་བ་གྲངས་ 800 སྲོག་ཁྲིམས་གཅོད་རྒྱུ་བྱས་ཟིན་ནའང་། ད་ལྟ་འཆར་གཞི་(དོན་དངོས་འཆར་གཞི་དེ་འདྲ་ཡོད་མེད་ཁ་གསལ་མེད་པར་གྱུར།)དེ་ཕྱིར་འཐེན་འདུག་པས། དེ་ཡག་པོ་རེད་ཅེས་བཤད། ཨེ་རན་གྱི་སྟེང་ཨ་རིས་ཚུར་རྒོལ་བྱ་རྒྱུར། ཨེ་ཛི་རལ་དང་ཨ་རིའི་སྲིད་འཛིན་གཞོན་པ། རྒྱལ་སྲིད་དྲུང་ཆེ། དམག་འཁྲུག་དྲུང་ཆེ། དབྱིན་ཇི་དང་ཨ་རབ་རྒྱལ་ཕྲན་མཉམ་འབྲེལ་བཅས་ཀྱིས་རྒྱབ་སྐྱོར་བྱེད་བཞིན་པ་བཤད།
དེ་བཞིན་སྒྲོ་ནལ་ཁྲི་རམ་ཕུའི་བུ་མོའི་ཁྱོ་ག་ཁུ་ཤི་ནེར་དང་། དམིགས་བསལ་སྐུ་ཚབ་ཝེ་ཀྲི་ཀོ་ཧྥི། སེ་ཐེ་ཨ་རབ་བྷེ་ཡ། ཏུར་ཀེ་བཅས་ཀྱིས་ཕྱི་འབྲེལ་གྱི་ལམ་ནས་དཀའ་ངལ་འདི་སེལ་རྒྱུའི་རེ་བ་བཏོན་ཡོད་པའི་གནས་ཚུལ་ཐོན། དེ་བཞིན་ཁ་སང་ཨ་རིའི་གཏོར་རྒོལ་གྲུ་གཟིངས་རུ་ཁག་(USS Abraham Lincoln)ལྷོ་རྒྱ་ནག་རྒྱ་མཚོའི་ནང་ནས་དཀྱིལ་ཤར་དུ་སླེབས། གལ་སྲིད་སྒྲོ་ནལ་ཁྲི་རམ་ཕུས་ཨེ་རན་གྱི་སྟེང་ཕར་རྒོལ་བྱ་རྒྱུ་ཐག་བཅད་ཚེ། ད་དུང་ཡང་ཨ་རིའི་འཐབ་འཛིང་གནམ་གྲུ་སོགས། མུ་མཐུད་དུ་དཀྱིལ་ཤར་དུ་གཏོང་དགོས་པ་དང་། དེ་ལ་ཉི་འགའ་འགོར་རྒྱུ་ཡིན་པ་བཤད།