◾མཱ་རྡུ་རོ་ལ་ཁྲིམས་བཤེར།◾ཝེ་ནེ་ཛོ་ལའི་ཆབ་སྲིད།
◾མཐའ་འཁོར་གྱི་གནས་ཚུལ་གཞན་དག ◾རྡོ་སྣུམ།
🔘 མཱ་རྡུ་རོ་ལ་ཁྲིམས་བཤེར།
རྒྱ་གར་གྱི་ཆུ་ཚོད་དབང་དུ་བྱས་ནས། བདུན་ཕྲག་སྔོན་མའི་གཟའ་སྤེན་པའི་ཉིན། ཨ་རིའི་དམག་དཔུང་ལྷོ་ཨ་མེ་རི་ཀའི་ཝེ་ནེ་ཛོ་ལ་རྒྱལ་ཁབ་ཀྱི་རྒྱལ་ས་ཀཱ་ར་ཀ་སིར་འཛུལ་ཅིང་། དུས་ཐུང་ནང་སྲིད་འཛིན་མ་རྡུ་རོ་བཟུང་ཞིང་ཨ་རིར་འཁྲིད་ནས་སླེབས། ཨེག་སོ་སི་ལྟར་ན། ད་ལོའི་ཕྱི་ཟླ་ 8 ནང་ཨ་རིའི་ཕྱི་རྒྱལ་གསང་ལས་ཀྱིས། ཝེ་ནེ་ཛོ་ལ་རྒྱལ་ཁབ་ཏུ་གསང་བའི་ལས་བྱེད་རུ་ཁག་ཅིག་བཙུགས་ཟིན་པ་དང་། མ་རྡུ་རོ་འཛིན་རྒྱུའི་གྲ་སྒྲིག་ཆེད་ཁོའི་འགྲོ་འདུག་དང་། ཟ་མ་ཅི་ཞིག་ཟ་བཞིན་པ་ཚུན་ལ་ཞིབ་འཇུག་བྱས་ཤིང་། ཁོའི་སྡོད་གནས་ཀྱི་འདྲ་མཚུངས་ཤིག་བཟོས་ནས་དེར་སྦྱོང་བརྡར་བྱས་ཟིན་པ་བཤད།
ཐེངས་འདིའི་ཨ་རིའི་གཏོར་རྒོལ་ཁྲོད། ཝེ་ནེ་ཛོ་ལའི་དམག་མི་གཙོས་མི་ 80 བསད་ཟིན་པ་ནེའུ་ཡོག་དུས་བབ་ཀྱིས། ཝེ་ནེ་ཛོ་ལའི་གཞུང་གི་ལས་བྱེད་མིང་བརྗོད་འདོད་མེད་པ་ཞིག་གི་སྐད་ཆ་ལུང་འདྲེན་གྱིས་གནས་ཚུལ་བཀོད། ཐེངས་འདིའི་གཏོར་རྒོལ་ཁྲོད། ཉུང་མཐར་མི་ 40 བསད་ཟིན་པ་ནེའུ་ཡོག་དུས་བབ་ཀྱིས་ཐོག་མར་གནས་ཚུལ་བཀོད། མཱ་རྡུ་རོ་བཟུང་རྗེས་ཆེས་མཐོའི་ཁྲིམས་ཁང་གིས། སྲིད་འཛིན་གཞོན་པ་ལྕམ་རྡེལ་སེ་ རོ་རྡི་རེ་གྷེ་ཛི་བར་བརྒལ་སྲིད་འཛིན་དུ་བསྐོས། མོས་ཆེས་མཐོའི་ལས་བྱེད་དག་དང་དམག་སྤྱི་དག་བསྐུངས། རྒྱལ་ཡོངས་སུ་ཛ་དྲག་བཀའ་རྒྱ་བསྒྲགས་ཤིང་། དམག་དཔུང་གི་དབང་ཆ་ཆེ་རུ་བཏང་།
མཱ་རྡུ་རོ་ད་ལྟ་ནེའུ་ཡོག་གི་བཀག་མཉར་ཁང་ཞིག་ཏུ་ཡོད་པ་དང་། ཁོ་དང་ཁོའི་བཟའ་ཟླ་གཉིས། དེ་རིང་གཟའ་ཟླ་བའི་ཉིན་ནེའུ་ཡོག་གྲོང་ཁྱེར་གྱི་མན་ཧ་ཀྲན་དབུས་གཞུང་གི་ཁྲིམས་ཁང་དུ་འཁྲིད་ནས་ཡོང་རྒྱུ་ཡིན་པ་སྔོན་དཔག་བྱེད། ཨ་རིས་མཱ་རྡུ་རོ་ནི་ཝེ་ནེ་ཛོ་ལའི་ཁྲིམས་མཐུན་སྲིད་འཛིན་ཡིན་པ་ཁས་མི་ལེན་པའི་སྟེང་། ཐེངས་འདིར་ཁོ་ལ་བཙུགས་པའི་ནག་ཉེས་གཙོ་བོ་དག་ནི། ཉལ་ཐ་ཚོང་སྒྱུར་བྱེད་མཁན་གྱི་ནག་ཚོགས་དང་མཉམ་ལས་བྱས་པ། འཆར་གཞི་ལྡན་པའི་ངང་ཉལ་ཐ་ཕྱིར་འདྲེན་བྱས་པ། གཞན་ཡང་མེ་མདའ་སོགས་མཚོན་ཆ་དང་འབྲེལ་ནག་ཉེས་རིགས་ 2 བཙུགས། མཱ་རྡུ་རོ་ཡིས་ད་ལྟ་བར་ཁོ་ལ་བཙུགས་པའི་ནག་ཉེས་འདི་དག་ཁས་ལེན་གྱི་མེད།
◾ ཝེ་ནེ་ཛོ་ལའི་ཆབ་སྲིད།
མཱ་རྡུ་རོ་ཨ་རིས་བཟུང་རྗེས་ལོ་སྔོན་མར་ནོ་བྷེ་ཞི་བདེ་གཟེངས་རྟགས་ཐོབ་མཁན། ཝེ་ནེ་ཛོ་ལའི་ཕྱོགས་འགལ་ཚོའི་དབུ་ཁྲིད་ལྕམ་མཱ་ཅ་རྡོ་ཡིས། ཝེ་ནེ་ཛོ་ལའི་རྒྱལ་ནང་གི་མི་སེར་ཚོས་ལས་འགུལ་སྤེལ་རྒྱུར་གྲ་སྒྲིག་དགོས་པ་དང་། ཕྱི་རྒྱལ་དུ་ཡོད་མཁན་ཚོས་རྒྱལ་སྤྱིའི་རྒྱབ་སྐྱོར་འཚོལ་རྒྱུ་བཅས། ཝེ་ནེ་ཛོ་ལ་དེ་མང་གཙོའི་ལམ་དུ་འཁྲིད་པའི་གོ་སྐབས་ཤར་ཟིན་པ་བསྒྲགས། ད་དུང་མོས། ཕྱོགས་འགལ་ཚོའི་ངོས་ནས་རྒྱལ་ཁབ་ཀྱི་ཆབ་སྲིད་སྐྱོང་རྒྱུར་གྲ་སྒྲིག་ཡོད་ལ། ཝེ་ནེ་ཛོ་ལར་རང་དབང་ཐོབ་ངེས་ཡིན་ཞེས་བཤད། ཡིན་ན་ཡང་། སྒྲོ་ནལ་ཁྲི་རམ་ཕུས་མོ་ལ་རྒྱབ་སྐྱོར་བྱ་རྒྱུ་མིན་པའི་རྣམ་འགྱུར་བསྟན།
ད་ལྟའི་ཝེ་ནེ་ཛོ་ལའི་བར་བརྒལ་སྲིད་འཛིན་གྱིས། ཝེ་ནེ་ཛོ་ལ་དེ་ནམ་ཡང་མི་སེར་སྤེལ་ཡུལ་དུ་མི་འགྱུར་ལ། ཝེ་ནེ་ཛོ་ལའི་ཁྲིམས་མཐུན་སྲིད་འཛིན་ནི་མཱ་རྡུ་རོ་གཅིག་བུ་ཡིན་པ་བསྒྲགས། དེ་དང་ལྷན་མོས། ཨ་རི་དང་ལྷན་མཉམ་ལས་ཀྱིས། ས་ཁུལ་གྱི་བརྟན་ལྷིང་དང་ཞི་བདེར་སྲུང་སྐྱོབ་བྱ་འདོད་ཡོད་པའང་བཤད། ཨ་ཀྲི་ལན་ཀྲི་ཁི་གསར་ཤོག་ལ་ཨ་རིའི་སྲིད་འཛིན་སྒྲོ་ནལ་ཁྲི་རམ་ཕུས། གལ་སྲིད་མོས་ལས་ཀ་འགྲིག་ཡོད་པ་དེ་མ་བྱས་ཚེ། མོས་གུན་གསབ་ཆེན་པོ་ཞིག་སྤྲོད་དགོས་ངེས་རེད་ལ། གཅིག་བྱས་ན་མཱ་རྡུ་རོ་ཡིས་སྤྲད་པ་ལས་ཀྱང་ལྷག་ཅིག་སྤྲོད་དགོས་ངེས་རེད་ཅེས། བར་བརྒལ་སྲིད་འཛིན་ལ་ཉེན་བརྡ་བཏང་།
ད་དུང་སྒྲོ་ནལ་ཁྲི་རམ་ཕུས། གཞུང་འགྱུར་བ་གཏོང་བ་སོགས་ཁྱོད་ཚོས་ཚིག་ཅི་ཞིག་བེད་སྤྱོད་བྱས་ཀྱང་ཆོག ད་ལྟའི་གཞུང་འདི་ལས་སྡུག་ཏུ་འགྲོ་རྒྱུ་ཞིག་ཡོད་རྒྱུ་མ་རེད་ཅེས་བཤད། སྒྲོ་ནལ་ཁྲི་རམ་ཕུ་ལྟར་ན་ཁྲིམས་མཐུན་ངང་། གཞུང་གསར་བ་མ་བཙུགས་བར་དུ་ཝེ་ནེ་ཛོ་ལའི་གཞུང་ཨ་རིས་སྟངས་འཛིན་བྱ་རྒྱུ་དང་། ཡང་བསྐྱར་མཱ་རྡུ་རོ་ལྟ་བུ་ཞིག་སྲིད་སྟེགས་སུ་ཡོང་དུ་མི་འཇོག་རྒྱུ་ཁག་ཐེག་བྱ་རྒྱུ་ཡིན་པ། འབྱུང་འགྱུར་ཨ་རིའི་ཁེ་གཉེར་དག ཝེ་ནེ་ཛོ་ལར་འགྲོ་རྒྱུ་དང་ཡུལ་དེར་ཡོད་པའི་རྡོ་སྣུམ་བཟོ་གྲྭ་དག་བཟོ་བཅོས་ཀྱིས། ཝེ་ནེ་ཛོ་ལ་དང་ཨ་རི་གཉིས་ཀར་ཕན་པའི་ཚོང་ལས་འཛུགས་རྒྱུ་ཡིན་པ་བཤད། ཝེ་ནེ་ཛོ་ལ་དང་འབྲེལ་ཨ་རིའི་གཞུང་གི་ལས་དོན་གྱི་གཙོ་འགན་འཁུར་མཁན་ནི། རྒྱལ་སྲིད་དྲུང་ཆེ་མར་ཀོ་རུ་བྷེའོ་འགྱུར་རྒྱུ་ཡིན་པ། བྷི་ལུམ་བྷར་གྷིའི་སྟེང་གནས་ཚུལ་བཀོད།
ཁ་སང་ཨེན་བྷི་སི་གསར་ཁང་གིས་མར་ཀོ་རུ་བྷེའོ་ལ་བཅར་འདྲི་བྱས།ཁོས། ཨ་རིའི་ངོས་ནས་ཝེ་ནེ་ཛོ་ལའི་སྲིད་བྱུས་བཟོ་རྒྱུའི་ཐད་ཐེ་བྱུས་བྱ་རྒྱུ་ལས། ཐད་ཀར་འཛིན་སྐྱོང་གི་ནང་ཞུགས་རྒྱུ་མིན། ང་ཚོར་ཝེ་ནེ་ཛོ་ལའི་རྡོ་སྣུམ་དགོས་དོན་མེད། ཡིན་ན་ཡང་། དེ་དང་ལྷན་ཝེ་ནེ་ཛོ་ལ་དེ་རྒྱ་ནག་དང་རཱ་ཤི་ཡ། ཨེ་རན་སོགས་ཨ་རིའི་དགྲ་བོ་དག་གི་གཞི་རྟེན་དུ་འགྱུར་དུ་འཇུག་རྒྱུ་མིན་ཞེས་བཤད། ཝ་ཤིན་ཀྲོན་གསར་ཤོག་ལྟར་ན་ཨ་རིས། མར་ཀོ་རུ་བྷེའོ་ལ་རོགས་བྱེད་མཁན། དམིགས་བསལ་སྐུ་ཚབ་ཅིག་ཀྱང་བསྐོ་སྲིད་པ་བཤད། ད་དུང་མར་ཀོ་རུ་བྷེའོ་ཡིས། ཉེས་ཆད་བཀལ་ཟིན་པའི་རྡོ་སྣུམ་སྐྱེལ་མཁན་གྱི་གྲུ་གཟིངས་དག ཝེ་ནེ་ཛོ་ལ་ནས་ཕར་འགྲོ་ཚུར་ཡོང་བྱ་རུ་འཇུག་རྒྱུ་མིན་ལ། སྔར་བཞིན་ལམ་ཀ་ནས་འཛིན་རྒྱུ་ཡིན་པ་བཤད།
◾ མཐའ་འཁོར་གྱི་གནས་ཚུལ་གཞན་དག
སྲིད་འཛིན་མཱ་རྡུ་རོ་ཨ་རིས་བཟུང་རྗེས། ཝེ་ནེ་ཛོ་ལའི་རྒྱལ་ནང་གཙོས་འཛམ་གླིང་གང་སར། ངོ་རྒོལ་གྱི་གནས་ཚུལ་རེའང་འབྱུང་བཞིན་ནའང་། དོན་དངོས་སུ་ངོ་རྒོལ་བྱེད་མཁན་ལས། དགའ་བསུ་བྱེད་མཁན་གྱི་གྲངས་མང་བ་ནི་གསལ་བོར་གྱུར། མཱ་རྡུ་རོ་བཟུང་ཟིན་པར་དགའ་བསུ་བྱེད་མཁན་ཝེ་ནེ་ཛོ་ལའི་མི་སེར་ཞིག་གིས། མི་མང་པོས་ཨ་རིའི་འདོད་པ་ནི་ང་ཚོའི་རྡོ་སྣུམ་དང་རྒྱུ་ནོར་གཅིག་བུ་རེད་ཟེར། འོ་ན་ད་ལྟ་བར་རྒྱ་ནག་དང་རཱ་ཤི་ཡ་གཉིས་ཀྱིས། ང་ཚོའི་ལག་ནས་ཅི་ཞིག་ཐོབ་འདོད་བྱེད་ཀྱི་ཡོད་པ་རེད་དམ་ཞེས་བཤད། རྒྱ་ནག་ཕྱི་སྲིད་བློན་ཆེན་ཝང་ཡེ་ཡིས། ཀྲུང་གོའི་ངོས་ནས་རྒྱལ་ཁབ་གང་གིས་ཀྱང་། འཛམ་གླིང་གི་ཁྲིམས་དཔོན་ལྟར་བྱ་རྒྱུར་ངོས་ལེན་མེད་ཅེས། ཨ་རིས་མཱ་རྡུ་རོ་བཟུང་བར་སྐྱོན་བརྗོད་བྱས།
ཨ་རིས་ཝེ་ནེ་ཛོ་ལའི་སྲིད་བྱུས་ལ་དབང་སྒྱུར་བྱ་རྒྱུ་ཡིན་པ་བསྒྲགས་རྗེས། ཝེ་ནེ་ཛོ་ལའི་ཁྱིམ་མཚེས་རྒྱལ་ཁབ། ཀོ་ལིམ་བྷི་ཡའི་གཞུང་གིས། རྒྱལ་མཚམས་སུ་དམག་མི་བཏང་ཞིང་། ཁྲབ་ལྡན་རླངས་འཁོར་སོགས་འགྲེམས་འཇོག་བྱས། ཀུ་པའི་སྲིད་འཛིན་གྱིས། ང་ཚོས་རྒྱ་བསྐྱེད་རིང་ལུགས་ལ་ངོ་རྒོལ་དང་། ཀུ་པ་དང་ཝེ་ནེ་ཛོ་ལའི་ཆེད་དུ་ཟུངས་ཁྲག་གཏོང་རྒྱུར་གྲ་སྒྲིག་ཡོད་ཅེས་བསྒྲགས། གསར་འགོད་པས་སྒྲོ་ནལ་ཁྲི་རམ་ཕུ་ལ། ཁྱེད་ཀྱིས་ཀུ་པའི་སྟེང་བྱ་འགུལ་བརྩམ་རྒྱུ་ཡིན་ནམ་ཞེས་དྲིས་པར། ཁོས། ངས་བསམས་ན་ང་ཚོས་གང་ཡང་བྱ་དགོས་མི་འདུག ཁོ་ཚོ་ཉམ་རྒུད་དུ་འགྲོ་རྒྱུའི་རྣམ་པ་འདུག་ཅེས་བཤད།
ཨ་རིའི་ལས་བྱེད་ཚོས། ཀུ་པའི་བདེ་སྲུང་དམག་སྡེ་ནི་ད་ལྟ་བར་མཱ་རྡུ་རོ་སྲིད་སྟེགས་སུ་འདུག་ཐུབ་པའི་རྒྱུ་མཚན་གཙོ་བོ་ཞིག་ཡིན་པ་བཤད། རྒྱལ་སྲིད་དྲུང་ཆེ་མར་ཀོ་རུ་བྷེའོ་ཡིས། ཀུ་པ་གཞུང་གིས་ཝེ་ནེ་ཛོ་ལའི་ནང་ཁུལ་གསང་བའི་ལས་དོན་དང་། བདེ་སྲུང་བྱ་འགུལ། མཱ་རྡུ་རོ་སྒེར་གྱི་བདེ་སྲུང་སོགས་ཀྱི་ནུས་པ་ཆེན་པོའི་ངང་དབང་སྒྱུར་བྱས་ཡོད་པ་བཤད། ཐེངས་འདིར་ཝེ་ནེ་ཛོ་ལའི་དམག་དོན་བསྟི་གནས་དག་ལ་གཏོར་རྒོལ་ཁྲོད། ཀུ་པ་རྒྱལ་ཁབ་ཀྱི་ལས་བྱེད་ 32 བསད་ཟིན་པ་ཀུ་པ་གཞུང་གིས་བསྒྲགས། གཞན་ཡང་རཱ་ཤི་ཡའི་གནམ་སྲུང་མ་ལག་ Buk-M2E ཅིག་ཀྱང་གཏོར་ཟིན་པའི་གནས་ཚུལ་ཐོན།
◾ རྡོ་སྣུམ།
ཝེ་ནེ་ཛོ་ལ་ནི་འཛམ་གླིང་གི་རྡོ་སྣུམ་གཏེར་ཁ་ཆེ་ཤོས་ཀྱི་རྒྱལ་ཁབ་ཅིག་ཡིན་པ་དང་། ཕྱི་ལོ་ 1920 ནང་ནས་ཕྱི་ལོ་ 1970 ནང་བར་རྒྱལ་ཁབ་འདི་ནི་དབུས་དང་། ལྷོ་ཨ་མེ་རི་ཀའི་རྒྱལ་ཁབ་ཕྱུག་ཤོས་ཤིག་ཡིན་པ་དང་། ཡུ་རོབ་ནས་ཀྱང་ཡུལ་འདིར་མི་མང་པོ་གནས་སྤོས་ཟིན་པ་གསལ། ཕྱི་ལོ་ 1976 ལོར་རྡོ་སྣུམ་ཐོན་ཁུངས་དག་སྒེར་བ་དག་གི་ལག་ནས་བླངས་ཏེ་གཞུང་གིས་འཛིན་རྒྱུ་ཐག་བཅད། དེས་ཡུལ་དེར་ཡོད་པའི་ཨ་རིའི་བཟོ་གྲྭ་དག་གཙོས། ཕྱི་རྒྱལ་གྱི་བཟོ་གྲྭ་དག་གི་ཚོང་ལས་ལ་ཚོད་འཛིན་ཐེབས་ཤིང་། ཁོ་ཚོའི་བཟོ་གྲྭ་དག་གཞུང་བཞེས་དང་དེ་ལ་གུན་གསབ་སྤྲད་ཟིན་པ་གསལ།
ཡིན་ན་ཡང་། ཡུལ་དེར་ཡོད་པའི་ཨ་རིའི་རྡོ་སྣུམ་བཟོ་གྲྭ་དང་། ཁེ་གཉེར་དག་གིས་གཞུང་དང་མཉམ་འབྲེལ་གྱིས་མུ་མཐུད་དུ་ཚོང་ལས་གཉེར་ཆོག་པ་བཟོས། རྡོ་སྣུམ་གཞུང་འབྲེལ་ཅན་དུ་བསྒྱུར་བ་དང་། ལྷག་པར་རྒྱལ་ཁབ་ཀྱི་དཔལ་འབྱོར་རྡོ་སྣུམ་རྐྱང་བར་བརྟེན་པའི་ནོར་འཁྲུལ་ཅན་གྱི་སྲིད་བྱུས་འོག ཕྱི་ལོ་ 1980 ནང་རྡོ་སྣུམ་གྱི་རིན་གོང་མར་ཆག་པ་དང་། གནས་སྐབས་འགྲིག་ཡོད་པའི་རྒྱལ་ཁབ་ཀྱི་དཔལ་འབྱོར་ལ་ཉམ་རྒུད་ཆེན་པོ་ཐེབས་ཤིང་། གཞུང་བུ་ལོན་གྱི་ཁྲོད་ཚུད་ཅིང་སྤྱི་ཚོགས་ཁྲོད་རྙོག་ཟིང་བྱུང་། ཕྱི་ལོ་ 1999 ལོར་མིང་ལ་ཅཱ་ཝེ་སི་(Hugo Chavez)ཞེས་པའི་སྤྱི་ཚོགས་རིང་ལུགས་ཀྱི་ལྟ་བ་འཛིན་མཁན་ཞིག་སྲིད་སྟེགས་སུ་སླེབས།
ཁོས་རྡོ་སྣུམ་ལས་ཐོབ་པའི་དངུལ་སྒོར་དག་སྤྱད་ནས། ཤེས་ཡོན་དང་འཕྲོད་བསྟེན་རིན་མེད་སོགས། སྤྱི་ཚོགས་རིང་ལུགས་ཀྱི་ཚུལ་ལག་བསྟར་བྱས། དེའི་སྟེང་ལྐོག་ཟ་ཆེ་ཞིང་བཟོ་གྲྭ་དག་གི་ལས་བྱེད་ནི་མིའི་ཤེས་ཡོན་ལ་མ་ལྟོས་པར། རང་གི་འབྲེལ་ཡོད་མི་སོགས་བཞག དཔལ་འབྱོར་གཞུང་བདག་བྱེད་པའི་སྲིད་བྱུས་འདིས། རྒྱལ་ཁབ་འདིའི་དཔལ་འབྱོར་ཉམ་རྒུད་ནས་ལངས་རྒྱུ་མེད་པའི་གནས་སུ་བརྫངས་ཤིང་། སྤྱི་ཚོགས་རིང་ལུགས་ཀྱི་ལྟ་བ་འཛིན་མཁན་འདི་དང་། ཨ་རི་བར་གྱི་འབྲེལ་བ་ཧ་ཅང་ཉམ་རྒུད་ཕྱིན། ཕྱི་ལོ་ 2013 ལོར་སྲིད་འཛིན་སྒེར་གཅོད་པ་ཅཱ་ཝེ་སི་སྐྲན་གྱིས་འདས་གྲོངས་སུ་ཕྱིན་ཅིང་། ནེ་ཀོ་ལ་སི་ མཱ་རྡུ་རོ་ཐོག་མར་སྲིད་སྟེགས་སུ་སླེབས། རྒྱལ་ཁབ་ཀྱི་དཔལ་འབྱོར་མུ་མཐུད་དུ་རྒུད་ནས་རྒུད་པར་ཕྱིན་ཅིང་། མཐའ་ན་རྒྱལ་ནང་དུ་སྨན་དང་བཟའ་ཆས་ལྟ་བུའི་རྩ་བའི་དགོས་མཁོ་དག་གིས་མི་འདང་བའི་ཚད་དུ་ལྷུང་།
དེའི་སྟེང་མཱ་རྡུ་རོ་གཞུང་ལ་མི་དམངས་ཀྱིས་ངོ་རྒོལ་དང་། ཁོས་ཕྱོགས་འགལ་ཚོར་བཙན་གནོན་སོགས་ཀྱི་རྐྱེན་པས། ཝེ་ནེ་ཛོ་ལའི་མི་སེར་ས་ཡ་ 7 ལས་མང་བ་རྒྱལ་ཁབ་གཞན་ལ་བྲོས་ཤིང་། ལྷག་པར་ཨ་རིའི་རྒྱལ་ནང་དུ་སྐྱབས་བཅོལ་བའི་དཀའ་ངལ་ཆེན་པོ་བཟོས། ད་ལྟ་སྒྲོ་ནལ་ཁྲི་རམ་ཕུས། ཝེ་ནེ་ཛོ་ལ་རུ་ཨ་རིའི་རྡོ་སྣུམ་ཡོད་པས་དེ་དག་ཕྱིར་ལེན་རྒྱུ་ཡིན་ཞེས་བཤད་པ་ནི། ཆབ་སྲིད་ཀྱི་བསྒྲགས་གཏམ་ཙམ་ལས། ལོ་རྒྱུས་ཀྱི་ཆ་ནས་ཝེ་ནེ་ཛོ་ལའི་གཞུང་གིས་སྐབས་ཐོག་ཏུ། ཨ་རིའི་ཁེ་གཉེར་དང་བཟོ་གྲྭ་དག་ལ་གུན་གསབ་སྤྲད་ཅིང་། ཁེ་གཉེར་དག་གིས་ཀྱང་དེ་ངོས་ལེན་གྱིས་བླངས་ཟིན་པས། ཁོའི་སྐད་ཆ་འདི་ཁྲིམས་ཐོག་ནས་དོན་དངོས་དང་མཐུན་དཀའ།
ཡིན་ན་ཡང་། ཝེ་ནེ་ཛོ་ལའི་རྡོ་སྣུམ་དེ། ཨ་རིས་མ་བཟུང་ཡང་རྒྱ་ནག་གིས་ཤུགས་ཆེན་བཟུང་ཡོད་པ་དང་། དེ་དང་ལྷན་རྒྱལ་ཁབ་ཀྱི་ཐོན་ཁུངས་ཕྱུག་པོ་དེ། དབང་སྒྱུར་ཤོག་ཁག་ལ་ཞབས་འདེགས་ཙམ་ལས། མི་དམངས་ལ་ཕན་ཐོགས་ཆེན་པོ་མེད་པའི་སྟེང་། རྒྱལ་ཁབ་ཀྱི་དཔལ་འབྱོར་ཡང་མུ་མཐུད་དུ་ལངས་མ་ཐུབ་པར་ལྷག དེ་བཞིན་རཱ་ཤི་ཡས་ཀྱང་རྒྱལ་ཁབ་འདིའི་རྡོ་སྣུམ་བེད་སྤྱོད་ཀྱིས། རྒྱལ་སྤྱིའི་རྡོ་སྣུམ་ཁྲོམ་རར་དངོས་བརྒྱུད་ནས་སྟངས་འཛིན་བྱེད་བཞིན་པ་གསལ། འདི་ནི་ཐབས་བྱུས་ཀྱི་ཆ་ནས། ཨ་རིས་རྒྱ་ནག་དང་རཱ་ཤི་ཡ་ནུབ་ཕྱོགས་སྐམ་ས་ནས་ཕྱིར་ཕུད་རྒྱུའི་ཆ་ཤས་ཤིག་ཡིན་པ་གསལ།