ཧོང་ཀོང་གཞུང་གིས་དོན་རྐྱེན་འདི་ལ་ཞིབ་འཇུག་ཆེད། རང་དབང་ལྡན་པའི་ཚོགས་ཆུང་ཞིག་འཛུགས་རྒྱུའི་བཀའ་བཏང་། ཧོང་ཀོང་སྤྱི་ཁྱབ་ཀྱིས། ང་ཚོས་ནོར་འཁྲུལ་ངོས་འཛིན་གྱིས། མ་འོངས་པར་འདི་འདྲ་བསྐྱར་དུ་མི་འབྱུང་རྒྱུ་ཁག་ཐེག་བྱ་དགོས་པ་བཤད།
བདུན་ཕྲག་སྔོན་མའི་གཟའ་ལྷག་པའི་ཕྱི་དྲོ། ཧོང་ཀོང་གི་ནུབ་ཕྱོགས་ཀྱི་ཐའེ་པོ་ཞེས་པའི་ས་ཁུལ་དུ། ཁང་བརྩེགས་སྐོར་ཞིག་མེ་འབར་ཟིན་པ་ལྟར། ད་ལྟ་བར་དོན་རྐྱེན་འདིའི་ཁྲོད་མིའི་འཆི་གྲངས་ 151 ལ་འཕར་བ་དང་། ད་དུང་མུ་མཐུད་དུ་འཚོལ་ཞིབ་བྱེད་བཞིན་པས་འཆི་གྲངས་འཕར་རྒྱུ་ཡིན་པ་ཚོད་དཔག་བྱེད། ཧོང་ཀོང་གཞུང་གིས་དོན་རྐྱེན་འདི་ལ་ཞིབ་འཇུག་ཆེད། རང་དབང་ལྡན་པའི་ཚོགས་ཆུང་ཞིག་འཛུགས་རྒྱུའི་བཀའ་བཏང་།
ཧོང་ཀོང་སྤྱི་ཁྱབ་ཀྱིས། ང་ཚོས་ནོར་འཁྲུལ་ངོས་འཛིན་གྱིས། མ་འོངས་པར་འདི་འདྲ་བསྐྱར་དུ་མི་འབྱུང་རྒྱུ་ཁག་ཐེག་བྱ་དགོས་པ་བཤད། ད་ལྟ་བར་དོན་རྐྱེན་འདི་དང་འབྲེལ་འཛུགས་སྐྲུན་ཁེ་གཉེར་ཞིག་གི་ལས་བྱེད་ 3 བཅས་ཁྱོན་མི་ 13 བཟུང་། དེ་དང་ལྷན་རང་དབང་གིས་ཞིབ་འཇུག་དགོས་ཞེས། མི་དམངས་ཁྲོད་མིང་རྟགས་བསྡུ་རུབ་བྱེད་མཁན་ན་གཞོན་ལོ་ན་ 24 ཅན་ཞིག་དང་། མི་གཞན་ 2 བཅས་བཟུང་ཞིང་། དོན་རྐྱེན་འདི་ཆབ་སྲིད་ཀྱི་ངོ་བོར་འགྱུར་རྒྱུར་རྒྱ་ནག་གཞུང་དང་། དེའི་ཁ་བཀོད་འོག་ཡོད་པའི་ཧོང་ཀོང་ས་གནས་གཞུང་གཉིས་སྐྲག་བཞིན་པ་གསལ།
མེ་སྐྱོན་འདི་ཆུ་ཚོད་ 40 རིང་དེ། གཟའ་པ་སངས་ཉིན་གྱི་ཞོགས་པ་བར་མགོ་ཡོངས་སུ་གནོན་མ་ཐུབ་ཅིང་། ཐེངས་འདིར་མེ་གསོད་རུ་ཁག་གི་མི་ 2,000 ལས་མང་བ་ཞུགས་ཟིན་པ་གསལ། ཕྱི་ལོ་ 1948 ལོར་ཧོང་ཀོང་དུ་མེ་སྐྱོན་ཞིག་གི་རྐྱེན་པས་མི་ 176 བསད་ཟིན་པ་དང་། དེའི་རྗེས་སུ་ཐེངས་འདིའི་ཆག་སྒོ་ནི་ཆེ་ཤོས་དེ་གྱུར།