(རྒྱ་ནག་ཧྲིན་ཀྲིན་དུ་རྟེན་གཞི་བྱས་པའི་སྐྱེ་ཁམས་བརྟག་དཔྱད་དང་ཞིབ་འཇུག་ཁང་ཞིག་གིས། ན་ཚོད་རྒས་རྒྱུ་སྔོན་འགོག་གི་སྨན་ཞིག་བཟོ་བཞིན་པའི་གནས་ཚུལ་ཐོན།)
ད་ལོའི་ཕྱི་ཟླ་ 9 བའི་ནང་རཱ་ཤི་ཡའི་སྲིད་འཛིན་ཕུ་ཀྲན་དང་། བྱང་ཀོ་རེ་ཡའི་དབུ་ཁྲིད་ཀེམ་ཇོང་ཨུན། རྒྱ་ནག་གི་སྲིད་འཛིན་ཞེ་ཅེན་ཕིན་གསུམ་དཔུང་བ་མཉམ་གཤིབ་ཀྱིས་འགྲོ་བཞིན་པའི་སྐབས། ཞེ་ཅེན་ཕིན་དང་ཕུ་ཀྲན་གཉིད་ཀྱིས། གཏན་ནས་འཆི་རྒྱུ་མེད་པའམ་མིའི་ཚེ་རིང་དུ་གཏོང་རྒྱུའི་སྐོར་ལ་གླེང་མོལ་བྱེད་བཞིན་པ་བརྙན་ལམ་དུ་ཐེབས་ཟིན་པ་ལྟར། ནེའུ་ཡོག་དུས་བབ་སྟེང་གནས་ཚུལ་བཀོད་པ་ལྟར་ན། དོན་དངོས་སུ་ཉེ་དུས་ནས་རྒྱ་ནག་ཧྲང་ཧེ་དང་ཧྲིན་ཀྲིན་སོགས་སུ་འདིའི་སྐོར་ལ་དམིགས་བསལ་དོ་སྣང་དང་། ཆེད་མཁས་པ་ཚོས་ཚོགས་འདུ་སོགས་ཚོགས་ཀྱང་ཚོགས་ཡོད་པའི་གནས་ཚུལ་ཐོན། ཧྲིན་ཀྲིན་དུ་རྟེན་གཞི་བྱས་པའི་སྐྱེ་ཁམས་བརྟག་དཔྱད་དང་ཞིབ་འཇུག་ཁང་ཞིག་གིས། ན་ཚོད་རྒས་རྒྱུ་སྔོན་འགོག་གི་སྨན་ཞིག་བཟོ་བཞིན་པའི་གནས་ཚུལ་ཐོན།
རྒུན་འབྲུམ་གྱི་རྫས་ནས་བཟོས་པའི་སྨན་འདི་ཚོད་ལྟ་ལྟར་ན། མིའི་གཟུགས་པོ་རྒས་བྱེད་ཀྱི་ཕྲ་ཕུང་འདིས་འཇོམས་ཐུབ་པ་བཤད། ཞིབ་འཇུག་ཁང་འདིའི་ཚན་རིག་པ་གཙོ་བོས། ལོ་ངོ་ 150 བར་འཚོ་ཐུབ་པ་བཟོ་རྒྱུ་ནི། མངོན་གྱུར་འབྱུང་ཆོག་པ་ཞིག་ཡིན་པ་དོན་དངོས་རེད་ཅེས་བཤད། སྐབས་དེར་ཞེ་ཅེན་ཕིན་དང་ཕུ་ཀྲན་གཉིས་ཀྱི་གླེང་མོལ་སྐབས་ཀྱང་། ཕུ་ཀྲན་གྱིས་གཏན་ནས་འཆི་རྒྱུ་མེད་པ་བཟོ་ཐུབ་སྲིད་པ་བཤད་པར། ཞེ་ཅེན་ཕིན་གྱིས་ལོ་ 150 བར་འཚོ་ཐུབ་རྒྱུ་སྲིད་པ་ཡིན་ཚུལ་བཤད། རྒྱ་ནག་གཅིག་གྱུར་བྱེད་མཁན་གྱི་གོང་མ་དང་པོ་ཆིན་ཧྲི་ཧོང་གིས་ཀྱང་། དུས་གཏན་དུ་འཚོ་ཆེད་འཆི་མེད་རིལ་བུ་ཟེར་བ་ཞིག་འཙལ་ཅིང་། གསོལ་དཔྱད་མཁས་པ་འདྲ་མིན་བསྟེན་ཅིང་མཐར་ནང་དུ་དངུལ་ཆུ་སོགས། རྫས་ཉེན་ཁ་ཅན་འདྲེས་པའི་རིལ་བུ་འཐུང་རྐྱེན།ལོ་ན་ 49 ཡི་སྟེང་ཚེ་མ་ཟིན་པའི་ལོ་རྒྱུས་ཡོད་པ་བཤད།