ཨ་རི་དང་རཱ་ཤི་ཡ་གཉིས་ཀྱིས། ཡུ་རོབ་དང་ཡུ་ཁུ་རན་ཟུར་དུ་བཞག་ནས། དམག་འཁྲུག་འདི་མཚམས་འཇོག་ཐབས་དང་འབྲེལ་ཡིག་ཆ་དོན་ཚན་ 28 ཅན་ཞིག་བཟོས་ཟིན་པའི་གནས་ཚུལ་ཐོན་པ་ལྟར། ཁ་སང་ཡིག་ཆ་འདིའི་རག་ཟིན། ཛེ་ལན་སི་ཀེའི་ལག་ཏུ་གཞུང་འབྲེལ་ངང་འབྱོར་ཟིན་པ་གསལ་བོར་གྱུར།
•. དེ་རིང་རཱ་དམག་གིས། ཡུ་ཁུ་རན་གྱི་རྫ་པུ་རི་ཆི་ས་ཁུལ་དུ་མཁའ་ཐོག་ནས་གཏོར་རྒོལ་ཁྲོད། མི་སེར་ 4 བསད་ཅིང་གཞན་ཡང་སྒྲི་ནེ་པུར་གྲོང་ཁྱེར་དུ་གཏོར་རྒོལ་ཁྲོད། བཟའ་ཆས་ཀྱི་མཛོད་ཁང་ཆེན་པོ་ཞིག་ལ་གཏོར་རྒོལ་ཐེབས། རཱ་ཤི་ཡའི་སྤྱི་ཁྱབ་དམག་སྤྱི་ཆེན་མོ་གྷེ་ར་སེ་མོ་ཡིས་སྲིད་འཛིན་ཕུ་ཀྲན་ལ། ད་ལྟ་རཱ་དམག་གིས་ཡུ་ཁུ་རན་གྱི་ཁར་ཁེ་ཝུ་མངའ་སྡེའི་ཀུ་པན་སི་ཀི་གྲོང་བརྡལ་ཡོངས་སུ་འཕྲོག་ཟིན་ཅེས་ཞུས། གནས་ཚུལ་འདི་བདེན་མིན་ཐད་ཡུ་ཁུ་རན་གྱིས་ད་ལྟ་བར་གང་ཡང་མ་བཤད། དེ་སྔ་རཱ་དམག་གིས་ཡུ་དམག་ཁྲི་ 1 ལྷག་བསྐོར་ཟིན་ཟེར་མཁན་ཡང་ཁོ་རེད།
•. སླར་ཡང་རཱ་ཤི་ཡས། ཡུ་ཁུ་རན་གྱི་དམག་མི་འདས་པོ་ཆིག་སྟོང་གི་ཕུང་པོ་ཕྱིར་སྤྲད་ཟིན་པའི་གནས་ཚུལ་ཐོན། ལོ་འདིར་རྒྱལ་ཁབ་གཉིས་ཀྱི་སྐུ་ཚབ་ཏུར་ཀེ་རུ་འཛོམས་སྐབས། ཕན་ཚུན་བར་བཟུང་དམག་བརྗེ་རེས་དང་། དམག་མིའི་ཕུང་པོ་སྤྲོད་རེས་བྱ་རྒྱུ་བྱས། ད་ལྟ་བར་རཱ་ཤི་ཡས་ཡུ་དམག་སྟོང་ཕྲག་འགའི་ཕུང་པོ་ཕྱིར་བསློགས།
•. ཡུ་དམག་གིས་སླར་ཡང་། རཱ་ཤི་ཡའི་རེ་ཛན་ས་ཁུལ་དུ་ཡོད་པའི་རྡོ་སྣུམ་བཟོ་གྲྭ་ཆེན་པོ་ཞིག་ལ་གཏོར་རྒོལ་བྱས། རྡོ་སྣུམ་བཟོ་གྲྭ་འདིར་གཏོར་རྒོལ་ཐེངས་འགར་ཐེབས་ཤིང་། ཡུ་ཁུ་རན་ལྟར་ན་བཟོ་གྲྭ་འདི་ནས། ལོ་རེར་གནམ་གྲུར་མཁོ་བའི་རྡོ་སྣུམ་ཏུན་ 840,000 རེ་མཁོ་སྤྲོད་བྱེད་བཞིན་པ་བཤད། དེ་བཞིན་ཡུ་ཁུ་རན་གྱིས། རཱ་ཤི་ཡའི་ཤཱ་ཧེ་སྒྲི་རོན་འགོག་བྱེད། མིང་ལ་ P1-SUN ཞེས་པའི་སྒྲི་རོན་ཞིག་བཟོས་ཟིན་པ་དང་། ད་ལྟ་སྒྲི་རོན་འདི་དངོས་སུ་བེད་སྤྱོད་བྱེད་བཞིན་པ་བཤད། ཡུ་དམག་གིས། ནུབ་ཕྱོགས་ཀྱི་འཐབ་འཛིང་གནམ་གྲུ་ F-16 བེད་སྤྱོད་ཀྱིས། དམིགས་འབེན་གྲངས་ 300 ཡི་སྟེང་གཏོར་རྒོལ་བྱས་ཟིན་པ་བཤད།
•. སི་ཝེ་སྒྲན་གྱི་ཕྱི་སྲིད་བློན་ཆེན་གྱིས། རཱ་ཤི་ཡས་ཡུ་ཁུ་རན་རྒྱལ་ཡོངས་ལ་བཙན་འཛུལ་འགོ་བཙུགས་པ་ནས་ད་ལྟ་བར། ཡུ་རོབ་ཀྱིས་རཱ་ཤི་ཡའི་རྡོ་སྣུམ་དང་། རླངས་རྫས་སོགས་ཡུ་སྒོར་ཐེར་འབུམ་ €311 གི་རིན་ཐང་ཉོས་ཟིན་པ་ལ། ཡུ་རོབ་ཀྱིས་ཡུ་ཁུ་རན་ལ་རོགས་སྐྱོར་ཡུ་སྒོར་ཐེར་འབུམ་ €187 ལས་སྤྲད་མི་འདུག འདི་ནི་ཐབས་སྐྱོ་བོ་ཞིག་དང་ཡུ་རོབ་ཀྱིས་ཡུ་ཁུ་རན་ལ་རོགས་སྐྱོར་ཤུགས་ཆེ་རུ་དང་། རཱ་ཤི་ཡའི་སྟེང་གནོན་ཤུགས་ཆེ་རུ་མ་བཏང་ཚེ། སྐད་ཆ་ངོ་མ་ཞིག་བཤད་ས་ལྷག་མི་འདུག་ཅེས་བཤད། ཕོ་ལན་ཀྲིས་ཡུ་ཁུ་རན་ལ་ཨ་སྒོར་ཡ་ས་ $100 ཡི་རིན་ཐང་སྤྲད་རྒྱུ་ཡིན་པ་བསྒྲགས། མཇར་མན་གྱིས་ཡུ་ཁུ་རན་ལ་ཐག་རིང་སྙོབས་པའི་འཕུར་མདའ་སྤྲད་རྒྱུ་ཡིན་པ་བསྒྲགས། ཡིན་ན་ཡང་། འཕུར་མདའ་རིགས་གང་ཞིག་ཡིན་པ་མི་གསལ།
•. དམག་འཁྲུག་གི་རྐྱེན་པས། ཡུ་ཁུ་རན་གྱི་རྒྱུ་དངོས་ཨ་སྒོར་ཐེར་འབུམ་བརྒྱ་ཕྲག་འགའི་རིན་ཐང་གཏོར་ཟིན་པ་ལྟར། རོའུ་ཀྲར་གསར་ཤོག་སྟེང་གནས་ཚུལ་བཀོད་པ་ལྟར་ན། དམག་འཁྲུག་གི་ཁྲོད་རྡོ་སྣུམ་ཤུགས་ཆེན་སྤྱད་པ། བཟོ་གྲྭར་གཏོར་རྒོལ་གྱིས་མེ་འབར་བ་སོགས་ཀྱིས་ཡུ་ཁུ་རན་གྱི་ཁ་དབུགས་ལ་འབོག་བཙོག་ཆེན་པོ་བཟོས་ཟིན་པ་དང་། རང་བྱུང་ཁོར་ཡུག་ལ་ཐེབས་པའི་ཆག་སྒོར་གུན་གསབ་ཆེད། རཱ་ཤི་ཡས་ཨ་སྒོར་ཐེར་འབུམ་ $44 སྤྲད་དགོས་ཞེས། ཡུ་ཁུ་རན་གྱིས་དགོས་འདུན་འདོན་བཞིན་པ་བཤད།
•. ཨ་རི་དང་རཱ་ཤི་ཡ་གཉིས་ཀྱིས། ཡུ་རོབ་དང་ཡུ་ཁུ་རན་ཟུར་དུ་བཞག་ནས། དམག་འཁྲུག་འདི་མཚམས་འཇོག་ཐབས་དང་འབྲེལ་ཡིག་ཆ་དོན་ཚན་ 28 ཅན་ཞིག་བཟོས་ཟིན་པའི་གནས་ཚུལ་ཐོན་པ་ལྟར། ཁ་སང་ཡིག་ཆ་འདིའི་རག་ཟིན། ཛེ་ལན་སི་ཀེའི་ལག་ཏུ་གཞུང་འབྲེལ་ངང་འབྱོར་ཟིན་པ་གསལ་བོར་གྱུར། ཛེ་ལན་སི་ཀེ་ཡིས། ཨ་རི་དང་ཡུ་ཁུ་རན་གཉིས་ཀྱིས་འདིའི་ཐད་ལས་ཀ་བྱ་རྒྱུ་དང་། གྲུབ་འབྲས་ལྡན་པའི་གྲོས་མོལ་བྱ་རྒྱུར་གྲ་སྒྲིག་ཡོད་ཅེས་སྐད་ཆ་འཇམ་པོ་ཞིག་བཤད་པ་ལས། ཨ་རིའི་འཆར་གཞི་འདི་ཁས་ལེན་མིན་ཐད་གང་ཡང་མ་བཤད། དེ་དང་ལྷན་སྒྲོ་ནལ་ཁྲི་རམ་ཕུ་སྲིད་གཞུང་གིས། ཧ་ཅང་བྲེལ་ཚུབས་དང་བཅས་ཡིག་ཆ་འདི་ཁས་ལེན་དགོས་ཞེས་ཡུ་ཁུ་རན་ལ་གནོན་ཤུགས་སྤྲོད་བཞིན་པའི་གནས་ཚུལ་ཐོན།
•. ཡིག་ཆ་འདིའི་ནང་དོན་གཙོ་བོ་ཁ་སང་བཀོད་ཡོད་པ་དེ་འདྲ་ཞིག་ཡིན་པ་ལ། ཡུ་ཁུ་རན་ནུབ་ཆིངས་ནང་འཛུལ་མི་ཆོག་པ་དང་དེ་དང་འབྲེལ། ཡུ་ཁུ་རན་གྱི་རྩ་ཁྲིམས་འགྱུར་བ་གཏོང་དགོས་པའི་དོན་ཚན་ཞིག་ཚུད་ཡོད་པ་དོན་དངོས་ཡིན་པའི་རྣམ་པ་མངོན། དེ་དང་ལྷན་ཨ་རིས་ཡུ་ཁུ་རན་ལ། ནུབ་ཆིངས་ཀྱི་དོན་ཚན་ལྔ་བ་ལྟ་བུའི་བདེ་སྲུང་ཁག་ཐེག་ཅིག་སྤྲད་རྒྱུ་དང་། རཱ་ཤི་ཡས་འབྱུང་འགྱུར་ཚུར་རྒོལ་མི་བྱ་རྒྱུ་ཁས་ལེན་རྒྱུ་སོགས་ཚུད་ཡོད་པ་བཤད། རྒྱལ་ཚོགས་སུ་ཡོད་པའི་ཡུ་ཁུ་རན་གྱི་སྐུ་ཚབ་ཀྱིས། ཡུ་ཁུ་རན་གྱི་ངོས་ནས་སྐད་ཆ་ངོ་མ་བཤད་འདོད་ཡོད། ཡིན་ན་ཡང་། མངའ་ཁོངས་བདག་དབང་གཞན་ལ་སྤྲོད་རྒྱུ་དང་། དམག་དཔུང་གི་གྲངས་སྙུང་རྒྱུ། ཡུ་ཁུ་རན་མཐུན་གྲོགས་གང་དང་ལྷན་འགྲོ་མིན་ཚོད་འཛིན་བྱ་རྒྱུ་ནི་ཁས་ལེན་རྒྱུ་མིན་ཞེས་བཤད།
•. ཝོལ་ སི་ཀྲི་རི་ཀྲི་གསར་དེབ་སྟེང་གནས་ཚུལ་བཀོད་པ་ལྟར་ན། ཡུ་རོབ་དང་ཡུ་ཁུ་རན་གྱི་དབུ་ཁྲིད་ཚོས། དོན་ཚན་ 28 ཅན་གྱི་ཡིག་ཆ་འདི་ཁས་ལེན་གྱི་མེད་པ་དང་། ཡུ་རོབ་ཀྱི་དབུ་ཁྲིད་ཚོས་ཁོ་ཚོ་རང་གི་མངོན་འདོད་མཚོན་པའི་ཡིག་ཆ་གཞན་ཞིག་བཟོ་བཞིན་པ་དང་། ཡིག་ཆ་འདི་ཉིད་ཡོང་རྒྱུའི་ཉི་མ་དག་གི་ནང་ཕྱིར་ཐོན་རྒྱུ་ཡིན་པ་བཤད། གཙོ་བོ་སྒྲོ་ནལ་ཁྲི་རམ་ཕུའི་སྐུ་ཚབ་ཝེ་ཀྲི་ཀོ་ཧྥི་དང་། ཕུ་ཀྲན་གྱི་སྐུ་ཚབ་གཉིས་ཀྱིས་བཟོས་པའི་ཡིག་ཆ་འདི་བཟོ་བའི་བརྒྱུད་རིམ་ཁྲོད། ཡུ་རོབ་དང་ཡུ་ཁུ་རན་ལ་སྐད་ཆ་མ་དྲིས་པ་ཙམ་དུ་མ་ཟད། སྒྲོ་ནལ་ཁྲི་རམ་ཕུའི་གྲོགས་པོ་ཡིན་པར་བཤད་པ། ལིན་ཛེ་གྷི་རམ་སོགས་ཨ་རིའི་གྲོས་འཐུས་ཚོས་ཀྱང་། འདིའི་སྐོར་གང་ཡང་མ་ཤེས་པ་དང་། ཁོ་ཚོས་གང་ཤེས་པ་ནི་གསར་འགྱུར་ནས་ཐོག་མར་གོ་བ་ཡིན་པའི་གནས་ཚུལ་ཐོན།
•. ཨ་རིས་ཡིག་ཆ་འདི་ཛེ་ལན་སི་ཀེར་ཆབ་སྲིད་ཀྱི་ཆ་ནས་དཀའ་ངལ་འཕྲད་ཡོད་པའི་སྐབས་དང་བསྟུན་ནས་ཕྱིར་བཏོན་ཡིན་པ། ཡུ་ཁུ་རན་གྱི་ལས་བྱེད་ཚོས་ཡིད་ཆེས་བྱེད་བཞིན་པ་དང་། དོན་དངོས་སུ་འདིའི་རྒྱབ་ཏུ་རཱ་ཤི་ཡའི་གཡོ་བྱུས་འདུག་ཅེས་ཤོད་བཞིན་པ། ཨེན་བྷི་སི་གསར་ཁང་གིས་གནས་ཚུལ་བཀོད། ཡིན་ན་ཡང་། ཕུ་ཀྲན་གྱི་སྐད་ཆ་སྔར་ལས་སྡུག་ཏུ་ཕྱིན། ཁོས། ད་ལྟ་ཡུ་ཁུ་རན་དུ་ཆབ་སྲིད་ཀྱི་གཞུང་ཟེར་བ་ཞིག་མེད། གང་ཡོད་པ་ནི་ཉེས་ཅན་ནག་ཚོགས་ཤིག་རེད། དམིགས་བསལ་དམག་དོན་བྱ་འགུལ་(དམག་འཁྲུག)གྱི་དམིགས་ཡུལ་དག་འགྲུབ་དགོས་པ་ཐེ་ཚོམ་མེད། ཡུ་ཁུ་རན་གྱི་དབང་འཛིན་པ་ཚོས། རང་གི་དམག་མི་ཚོར་རཱ་དམག་ལ་མགོ་སྒུར་དུ་འཇུག་འོས་ཞེས་བཤད། སྔར་ཁོས་ཛེ་ལན་སི་ཀེ་ཁྲིམས་མཐུན་གྱི་སྲིད་འཛིན་མ་རེད་ཟེར་བ་ལས། ཡུ་ཁུ་རན་གྱི་དབང་འཛིན་པ་ཚོ་ནི་{ཉེས་ཅན་ནག་ཚོགས་ཤིག་}ཡིན་པ་ལྟ་བུ་ཞིག་བཤད་མེད།
ཨ་རིའི་སྲིད་འཛིན་སྒྲོ་ནལ་ཁྲི་རམ་ཕུ་སྲིད་གཞུང་གིས། རཱ་ཤི་ཡའི་རྡོ་སྣུམ་ཁེ་གཉེར་ཆེན་མོ། ལུ་ཀལ་(Lukoil)དང་རོ་སི་ནེ་ཧྥི་ཀྲི་(Rosneft)
སྟེང་ཉེས་ཆད་བཀལ་ཟིན་པ་ལྟར། བྷི་ལུམ་བྷར་གྷི་ལྟར་ན། ད་ལྟ་ཉེས་ཆད་འདི་དངོས་སུ་ལག་བསྟར་འགོ་འཛུགས་བཞིན་པ་དང་། རཱ་ཤི་ཡའི་རྡོ་སྣུམ་ཉོ་མཁན་ཆེ་ཤོས་རྒྱ་གར་གྱི་རྡོ་སྣུམ་བཟོ་གྲྭ་དག་གིས། ད་ལྟ་དཀྱིལ་ཤར་ནས་རྡོ་སྣུམ་ཉོ་རྒྱུར་འབད་པ་བྱེད་བཞིན་པ་བཤད། དེ་བཞིན་རྒྱ་གར་གྱི་འབྱོར་ལྡན། ཨམ་བྷ་ནེ་ལ་བདག་པའི་(Reliance Industries)ཡིས། བཙག་མེད་པའི་རཱ་ཤི་ཡའི་རྡོ་སྣུམ་ཉོ་མཚམས་བཞག་ཟིན་པའི་གནས་ཚུལ་ཐོན།