ཨ་རི་དང་ཡུ་ཁུ་རན་གྱི་སྐུ་ཚབ་སུད་སིར་འཛོམས་སྐབས། སྔར་གྱི་ཡིག་ཆ་དོན་ཚན་ 28 ཅན་དེར་འགྱུར་བ་ཆེན་པོ་བཏང་ཟིན་པ་དང་། ད་ལྟ་ཡིག་ཆ་དེ་དོན་ཚན་ 19 ཅན་ཞིག་ཏུ་བསྒྱུར་ཟིན་པ་ལ། གནད་དོན་གཙོ་བོ་དག་གི་ཐད། སྲིད་འཛིན་ཚོས་ཐད་ཀར་གླེང་མོལ་བྱ་རྒྱུ་ཡིན་པའི་གནས་ཚུལ་ཐོན།
•. མདང་དགོང་རཱ་དམག་གིས། ཡུ་ཁུ་རན་གྱི་རྒྱལ་ས་ཁེ་ཝུ་གཙོས་ས་ཁུལ་མང་པོར། ཀིན་ཤལ་འཕུར་མདའ་དང་ཨི་སི་ཀན་ཀྲར་འཕུར་མདའ། ཁཱ་ལེ་བྷར་འཕུར་མདའ། སྒྲི་རོན་གྱིས་གཏོར་རྒོལ་དྲག་པོ་བྱས་ཤིང་། དེའི་ཁྲོད་མི་སེར་གྱི་སྡོད་གནས་དང་གློག་ཁང་། རྡོ་སྣུམ། མེ་འཁོར་ལྕགས་ལམ་སོགས་ལ་གཏོར་རྒོལ་ཐེབས། འདིའི་ཁྲོད་ཉུང་མཐར་མི་ 7 བསད་ཅིང་མི་གཞན་ 14 རྨས་ཟིན་པ་ཡུ་ཁུ་རན་གྱིས་བཤད། ཛེ་ལན་སི་ཀེ་ཡིས། ཐེངས་འདིར་རཱ་དམག་གིས་ཁྱོན་འཕུར་མདའ་ 22 དང་། སྒྲི་རོན་ 460 ཡས་མས་བཏང་ཟིན་པ་བསྒྲགས།
•. དེ་བཞིན་གཡུལ་སའི་ཕྱོགས་མང་པོ་རུ། རཱ་དམག་གིས་ཉིན་རེར་མདུན་བསྐྱོད་ཅུང་རེ་ཐུབ་བཞིན་པ་དང་། ཡུ་ཁུ་རན་གྱི་དམག་སྤྱི་ཞིག་གིས། མི་ཚང་མས་ཨ་རི་དང་ཡུ་ཁུ་རན་བར་གྱི་གྲོས་མོལ་གྱི་སྐོར་གླེང་ནས་དེའི་ཁྲོད་མགོ་འཁོར་འདུག ཡིན་ན་ཡང་། དེ་དང་ལྷན་དུ་གཡུལ་སའི་གནས་སྟངས་ཧ་ཅང་མགྱོགས་པོར་སྡུག་ཏུ་འགྲོ་བཞིན་འདུག་ལ། ཛ་དྲག་གི་དཀའ་ངལ་སེལ་ཐབས་ཤིག་མ་བཙལ་ཚེ། གནས་སྟངས་ཚབས་ཆེན་ཏུ་འགྱུར་རྒྱུ་རེད། འདི་ནི་གྲོང་གསེབ་ཅིག་ཤོར་དང་མི་ཤོར་གྱི་སྐད་ཆ་ཞིག་མ་རེད། དགྲ་བོའི་ཐབས་བྱུས་ཀྱི་དམིགས་འབེན་དག་འགྲུབ་རྒྱུའི་ཕྱོགས་སུ་འགྲོ་བཞིན་འདུག་ཅེས་ཉེན་བརྡ་བཏང་།
•. ཡུ་དམག་གིས་མདང་དགོང་། རཱ་ཤི་ཡའི་ཏཱ་གྷན་རོག་ས་ཁུལ་ལ་མཁའ་ཐོག་ནས་གཏོར་རྒོལ་ཁྲོད། གནམ་གྲུའི་བཟོ་གྲྭ་ཞིག་ལ་གཏོར་རྒོལ་ཐེབས་ཟིན་པའི་གནས་ཚུལ་ཐོན། ཐེངས་འདིའི་གཏོར་རྒོལ་ཁྲོད་རཱ་ཤི་ཡའི་འོད་རླབས་མཚོན་ཆ་ཐོགས་པའི་གནམ་གྲུ་ A-60 1A2 ཞིག་གཏོར་ཟིན་པ་ཚོད་དཔག་བྱེད། གཞན་ཡང་རཱ་ཤི་ཡའི་སྒྲི་རོན་བཟོ་གྲྭ་ཞིག་དང་རྡོ་སྣུམ་ས་ཚུགས་ཤིག གནམ་སྲུང་མ་ལག་ S-400 ཞིག་བཅས་ལ་གཏོར་རྒོལ་བྱས་ཟིན་པ་ཡུ་ཁུ་རན་གྱིས་བཤད།
•. ཨ་རིའི་སྲིད་འཛིན་སྒྲོ་ནལ་ཁྲི་རམ་ཕུའི་སྐུ་ཚབ་ཝེ་ཀྲི་ཀོ་ཧྥི་དང་། རཱ་ཤི་ཡའི་སྲིད་འཛིན་ཕུ་ཀྲན་གྱི་སྐུ་ཚབ་སྒྲི་མེ་ཀྲི་ཝི་གཉིས་ཀྱིས། དམག་འཁྲུག་འདི་མཚམས་འཇོག་ཐབས་དང་འབྲེལ། ཡིག་ཆ་དོན་ཚན་ 28 ཀྱི་བདག་ཉིད་ཅན་ཞིག་བཟོས་ཟིན་པ་ལྟར། ཝ་ཤིན་ཀྲོན་གསར་ཤོག་གིས་འདིའི་ཐད་གནས་ཚུལ་བཀོད་པ་ལྟར་ན། དོན་དངོས་སུ་ཡིག་ཆ་འདི་བཟོ་བའི་བརྒྱུད་རིམ་ཁྲོད། སྒྲོ་ནལ་ཁྲི་རམ་ཕུ་ཁོ་རང་ཡང་མ་ཞུགས་པ་དང་། ཁོས་ཀྱང་འདིའི་སྐོར་ཞིབ་ཕྲ་མ་བལྟས་པར་ཡིག་ཆ་འདིར་ཆོག་མཆན་སྤྲད་ཟིན་པ་བཤད། སྒྲོ་ནལ་ཁྲི་རམ་ཕུས་ཡིག་ཆ་འདིའི་ནང་དོན་ཞིབ་ཕྲ་མ་ཤེས་སྔོན། ཁོས་ཛེ་ལན་སི་ཀེ་ལ་ཡིག་ཆ་འདི་ཁས་ལེན་དགོས་ཞེས་གནོན་ཤུགས་སྤྲོད་འགོ་བཙུགས་ཟིན་པའི་རྣམ་པ་ཐོན།
•. དེའི་སྟེང་ཡིག་ཆ་ངོ་མ་ཕྱིར་མ་ཐོན་སྔོན་དེའི་ནང་དོན་དག་གསར་ལམ་ཁག་ཏུ་ཁྱབ་ཟིན་པས། ཡིག་ཆ་འདིས་ཨ་རིའི་ཆབ་སྲིད་པ་དག་གི་བར་མགོ་རྙོག་ཆེན་པོ་ཞིག་བཟོས་ཟིན་པ་བཤད། ཡིག་ཆ་འདི་དང་འབྲེལ་གཟའ་ཉི་མའི་ཉིན། ཡུ་ཁུ་རན་དང་ཨ་རི་གཉིས་ཀྱི་སྐུ་ཚབ་སུད་སིའི་རྗེ་ནེ་ཝ་གྲོང་ཁྱེར་དུ་འཛོམས་ཟིན་པ་ལྟར། ཁ་སང་རཱ་ཤི་ཡའི་སྲིད་འཛིན་ལས་ཁུངས་ཀྱིས། ཡུ་ཁུ་རན་དང་ཨ་རི་གཉིས་ཀྱིས་སུད་སིར་སྐད་ཆ་ཅི་ཞིག་བཤད་ཟིན་པ་ང་ཚོས་ད་ལྟ་བར་མ་ཤེས་ཞེས་ཟེར། ཡིན་ན་ཡང་། སི་བྷི་ཨེ་སི་གསར་ཁང་ལྟར་ན། ཁ་སང་ཨ་རི་དང་རཱ་ཤི་ཡའི་སྐུ་ཚབ་གཉིས། གསང་བའི་ངང་ཨ་རབ་རྒྱལ་ཕྲན་མཉམ་འབྲེལ་གྱི་རྒྱལ་ས། ཨ་བྷུ་རྡ་བྷེ་རུ་འཛོམས་ཟིན་པ་དང་དེ་རིང་ཡང་ཁོ་ཚོ་འཛོམས་བཞིན་པ་བཤད།
•. རཱ་ཤི་ཡའི་སྲིད་འཛིན་དང་ཨ་རིའི་སྲིད་འཛིན་གྱི་སྐུ་ཚབ་གཉིས་ཀྱིས་བཟོས་པའི་ཡིག་ཆ་དོན་ཚན་ 28 ཅན་འདིའི་ཟླར། ཡུ་རོབ་ཀྱིས་ཀྱང་ཡིག་ཆ་དོན་ཚན་ 28 ཅན་ཞིག་བཟོས་ཟིན་པ་ལྟར། ཕུ་ཀྲན་གྱི་ཕྱི་སྲིད་སློབ་སྟོན་པ་ཡུ་རེ་ཨུ་ཤ་ཁོ་ཝི་ཡིས། ཡུ་རོབ་ཀྱི་ཡིག་ཆ་འདིའི་སྐོར་ང་ཚོས་ཤེས་ཡོད། འདི་ནི་གྲུབ་འབྲས་མེད་པ་ཞིག་དང་ང་ཚོས་ཁས་ལེན་མི་ཐུབ་པ་ཞིག་རེད་ཅེས་བཤད། ཡུ་རོབ་ཀྱི་ཕྱི་སྲིད་དབུ་ཁྲིད་ལྕམ་ཁཱ་ཇ་ཁ་ལ་སི་ཡིས། སང་ཉིན་གཟའ་ལྷག་པའི་ཉིན་ཡུ་རོབ་ཀྱི་ཕྱི་སྲིད་ལས་བྱེད་དག་གིས། དྲྭ་ལམ་བརྒྱུད་ཛ་དྲག་ཚོགས་འདུ་ཞིག་ཚོགས་དགོས་པ་བསྒྲགས།
•. ཨ་རི་དང་ཡུ་ཁུ་རན་གྱི་སྐུ་ཚབ་སུད་སིར་འཛོམས་སྐབས། སྔར་གྱི་ཡིག་ཆ་དོན་ཚན་ 28 ཅན་དེར་འགྱུར་བ་ཆེན་པོ་བཏང་ཟིན་པ་དང་། ད་ལྟ་ཡིག་ཆ་དེ་དོན་ཚན་ 19 ཅན་ཞིག་ཏུ་བསྒྱུར་ཟིན་པ་ལ། གནད་དོན་གཙོ་བོ་དག་གི་ཐད། སྲིད་འཛིན་ཚོས་ཐད་ཀར་གླེང་མོལ་བྱ་རྒྱུ་ཡིན་པའི་གནས་ཚུལ་ཐོན། ཐེངས་འདིར་རྒྱལ་སྲིད་དྲུང་ཆེ་མར་ཀོ་རུ་བྷེའོ་ཞུགས་ཡོད་པ་དེས་ཁྱད་པར་ཆེན་པོ་བཟོས་ཡོད་པ་ཚོད་དཔག་བྱེད། མར་ཀོ་རུ་བྷེའོ་ནི་ཆབ་སྲིད་ཀྱི་ཆ་ནས་རྒྱ་ནག་དང་རཱ་ཤི་ཡ་འདྲ་མཉམ་ངང་ཨ་རིའི་དགྲ་ཕྱོགས་སུ་བརྩི་མཁན་ཞིག་ཡིན་པས། ཁོ་རང་སྒེར་ངོས་ནས་སྒྲོ་ནལ་ཁྲི་རམ་ཕུའི་སྐུ་ཚབ། ཝེ་ཀྲི་ཀོ་ཧྥི་ལ་གཏིང་ནས་མི་དགའ་མཁན་ཞིག་ཡིན་པ་ཤོད་མཁན་ཡང་བྱུང་།
•. ཁ་སང་ཨ་རིའི་སྲིད་འཛིན་སྒྲོ་ནལ་ཁྲི་རམ་ཕུ་དང་། རྒྱ་ནག་གི་སྲིད་འཛིན་ཞེ་ཅེན་ཕིན་གཉིས་ཀྱིས་ཁ་པར་བརྒྱུད་གླེང་མོལ་བྱས། སྐབས་དེར་ཞེ་ཅེན་ཕིན་གྱིས། {དཀའ་ངལ་འདིའི་རྩ་བ་མེད་པ་བཟོ་དགོས་}ཞེས་སྒྲོ་ནལ་ཁྲི་རམ་ཕུ་ལ་མནན་བཤད་བྱས་ཡོད་པ། རྒྱ་ནག་རང་གི་གཞུང་འབྲེལ་བརྒྱུད་ལམ་ཁག་ཏུ་གནས་ཚུལ་བཀོད་ཅིང་། རྒྱ་ནག་ཕྱི་སྲིད་ལྷན་ཁང་གིས་ཀྱང་དེ་ལྟར་བསྒྲགས། དེ་ནི་རཱ་ཤི་ཡ་རང་གིས་ཤོད་བཞིན་པའི་སྐད་ཆ་དག་སྟེ། སྙིང་པོ་ནི་ཡིག་ཆ་དོན་ཚན་ 28 ཅན་གྱི་ནང་དུ་བཀོད་པ་དེ་དག་རེད་ལ། མདོར་བསྡུས་ན་རྒྱ་ནག་གིས་རཱ་ཤི་ཡའི་དགོས་འདུན་དག་ལ་རྒྱབ་སྐྱོར་ཡོད་ཅེས། ཞེ་ཅེན་ཕིན་གྱིས་བཤད་པ་ཞིག་ཏུ་གྱུར།
•. སྒྲོ་ནལ་ཁྲི་རམ་ཕུའི་རྒྱབ་སྐྱོར་བྱེད་མཁན་ཨ་རིའི་མི་སེར་ཁྲོད་བསམ་ཤོག་བསྡུས་པ་ལྟར་ན། ལན་རྒྱག་མཁན་བརྒྱ་ཆ་ 72% གྱིས་ཨ་རིས་ཡུ་ཁུ་རན་ལ་མུ་མཐུད་དུ་རྒྱབ་སྐྱོར་དང་། རཱ་ཤི་ཡའི་བྱ་སྤྱོད་ལ་ཉེས་ཆད་གཅོད་རྒྱུར་རྒྱབ་སྐྱོར་བྱེད་བཞིན་པ་བཤད། དེ་བཞིན་བརྒྱ་ཆ་ 83% གྱིས་ཨ་རིས་མུ་མཐུད་དུ། ནུབ་ཆིངས་དང་ཡུ་ཁུ་རན་ལྷན་མཉམ་འབྲེལ་བྱ་དགོས་ཞེས་བཤད་ཡོད་པ་གསལ། དེ་དང་ལྷན་བརྒྱ་ཆ་ 16% གིས་རཱ་ཤི་ཡའི་དགོས་འདུན་དག་ལ་རྒྱབ་སྐྱོར་བྱེད་བཞིན་པ་བཤད། འདི་ནི་སྒྲོ་ནལ་ཁྲི་རམ་ཕུ་ལ་ཆབ་སྲིད་ཀྱི་ཉེན་བརྡ་ཞིག་ཏུ་གྱུར་ཅིང་། ཉེ་དུས་ནས་ཁོའི་རྒྱབ་སྐྱོར་བའི་གྲངས་ཤུགས་ཆེན་རྒུད་ཅིང་། ཚད་དམའ་ཤོས་སུ་ལྷུང་ཡོད་པ་རོའུ་ཀྲར་གསར་ཤོག་གིས་གནས་ཚུལ་བཀོད།