ཧྥ་རན་སི་དང་མཇར་མན་གཉིས་ཀྱིས། དམག་སྟོབས་རྒྱ་བསྐྱེད་ལ་འབད་བཞིན་པ་ལྟར། ཁ་སང་མཇར་མན་གྲོས་ཚོགས་སུ་སྐྱེས་པ་ན་གཞོན་དག་དམག་སྐུལ་རྒྱག་ཕྱོགས་དང་འབྲེལ་བའི་ཁྲིམས་འཆར་ཞིག་ཕྱིན།
•. དེ་རིང་ཞོགས་པར་རཱ་དམག་གིས། སླར་ཡང་ཡུ་ཁུ་རན་གྱི་རྒྱལ་ས་ཁེ་ཝུ་དང་པོལ་ཏ་ཝ། རྫ་པུ་རི་ཆི། ཨོ་རྡ་ས། སྒྲི་ནེ་པུར་བཅས་ས་ཁུལ་ 29 ལ་འཕུར་མདའ་དང་། སྒྲི་རོན་གྱིས་གཏོར་རྒོལ་དྲག་པོ་བྱས། ཐེངས་འདིར་གློག་ཁང་དང་མེ་འཁོར་ལྕགས་ལམ། སྐྱེལ་འདྲེན་ས་ཚུགས་སོགས་སུ་གཏོར་རྒོལ་ཐེབས་ཤིང་། ལྷག་པར་གློག་ཁང་དག་ལ་གཏོར་སྐྱོན་ཆེན་པོ་ཐེབས་ཟིན་པའི་གནས་ཚུལ་ཐོན། རྒྱལ་ས་ཁེ་ཝུའི་མེ་འཁོར་འབབ་ཚུགས་ཤིག་ཡོངས་སུ་གཏོར་ཟིན་པ་བཤད།
•. གཞན་ཡང་རྫ་པུ་རི་ཆི་ས་ཁུལ་གྱི་ཉིང་རྡུལ་གློག་ཁང་ལ་འཐེན་པའི་གློག་ཚུགས་ཤིག་ལ་གཏོར་རྒོལ་ཐེབས། ཐེངས་འདིར་རཱ་དམག་གིས་སྒྲི་རོན་ 653 དང་། ཁི་རུ་སི་འཕུར་མདའ་ 36 ། བྷ་ལི་སི་ཀྲི་ཁི་འཕུར་མདའ་ 17 བཅས་འཕངས་ཟིན་པ། ཡུ་ཁུ་རན་གྱི་མཁའ་དམག་གིས་བཤད། འདི་ནི་རཱ་དམག་གིས་ཉིན་རེར་ཚུར་རྒོལ་བྱེད་པ་གཞི་རྒྱ་ཆེ་ཤོས་ཤིག་ཏུ་གྱུར་ཅིང་། རཱ་ཤི་ཡའི་སྲིད་འཛིན་ཕུ་ཀྲན་རྒྱ་གར་ནས་ཐོན་མ་ཐག་བྱུང་།
•. ཡུ་དམག་གིས། སླར་ཡང་རཱ་ཤི་ཡའི་རེ་ཛན་ས་ཁུལ་གྱི་རྡོ་སྣུམ་བཟོ་གྲྭ་ཞིག་ལ་གཏོར་རྒོལ་བྱས། ཁ་སང་ཡུ་དམག་གིས་རཱ་ཤི་ཡའི་ཁ་ཆེ་རང་སྐྱོང་ས་ཁུལ། ཅད་ཅི་ནེ་ཡའི་ལྟེ་བའི་གྲོང་ཁྱེར་གྷི་རོ་ཛི་ནེར་ཡོད་པ། ས་ཁུལ་འདིའི་ལྟེ་བའི་ལས་ཁུངས་དག་ཡོད་སའི་ཁང་བརྩེགས་ཤིག་ལ་གཏོར་རྒོལ་བྱས་ཟིན་པ་ལྟར། ཁ་ཆེ་ཁཱ་རྡི་རོ་ཝི་ཡིས། གཏོར་རྒོལ་འདིའི་རྒྱབ་ཏུ་ནུབ་ཆིངས་ཀྱིས་སྦྱོང་བརྡར་སྤྲད་པའི་དྲག་སྤྱོད་པ་དག་ཡོད། ང་ཚོས་འཁོན་ལན་བསློགས་ནས་སང་ཞོགས་བར་ཛེ་ལན་སི་ཀེ་མེད་པ་བཟོ་རྒྱུ་ཡིན་ཟེར།
•. རཱ་ཤི་ཡས་བཙན་འཁྲིད་བྱས་ཟིན་པའི་ཡུ་ཁུ་རན་གྱི་བྱིས་པ་དག་ལས།བྱིས་པ་གྲངས་ 7 ཕྱིར་ནང་མི་ལ་བསློགས་ཟིན་པའི་གནས་ཚུལ་ཐོན། རཱ་དམག་གིས་འཁྲིད་ཟིན་པའི་བྱིས་པ་དག་དང་འབྲེལ། ཨ་རིའི་སྲིད་འཛིན་སྒྲོ་ནལ་ཁྲི་རམ་ཕུའི་བཟའ་ཟླ། ལྕམ་མི་ལ་ནེ་ཡ་ཡིས་སྲིད་འཛིན་ཕུ་ཀྲན་སྒེར་ལ་ཡི་གེ་བཏང་ཟིན་པ་ལྟར། ཐེངས་འདིར་བྱིས་པ་དག་ཕྱིར་ཡོང་ཐུབ་པ་ནི་མོ་དང་འབྲེལ་བ་ཡོད་པའི་གནས་ཚུལ་ཐོན། བྱིས་པ་བཙན་འཁྲིད་བྱས་པ་དང་འབྲེལ་རྒྱལ་སྤྱིའི་ཉེས་དོན་ཁྲིམས་ཁང་གིས། ཕུ་ཀྲན་འཛིན་དགོས་པའི་བཀའ་རྒྱ་བསྒྲགས་ཟིན།
•. བདུན་ཕྲག་འདིའི་ནང་ཨ་རིའི་སྲིད་འཛིན་སྒྲོ་ནལ་ཁྲི་རམ་ཕུ་སྲིད་གཞུང་གིས། ཨ་རིའི་རྒྱལ་སྲུང་ཐབས་བྱུས་གསར་བ་ཤོག་གྲངས་ 33 ཅན་ཞིག་ཕྱིར་བཀྲམས། དེའི་ནང་དུ་ཡུ་རོབ་དང་འབྲེལ། རཱ་ཡུའི་དམག་འཁྲུག་མཚམས་འཇོག་རྒྱུ་ནི་སྙིང་པོ་དང་། རཱ་ཤི་ཡ་དང་ཐབས་བྱུས་འབྲེལ་བ་བརྟན་པོ་ཞིག་འཛུགས་རྒྱུ། ཡུ་རོབ་ཀྱི་དཔལ་འབྱོར་བརྟན་སྲུང་། ཡུ་ཁུ་རན་རང་བཙན་རྒྱལ་ཁབ་ཅིག་གི་ངོ་བོར་གནས་རྒྱུ་སོགས་འབུར་དུ་བཏོན། དེ་དང་ལྷན་ནུབ་ཆིངས་རྒྱ་བསྐྱེད་ཚོད་འཛིན་དང་། ལྷག་པར་འབྱུང་འགྱུར་ཡུ་རོབ་ཀྱིས་རང་གི་བདེ་སྲུང་ལ་གཙོ་བོ་འགན་འཁུར་དགོས་པ་དང་། དུས་ལྟར་བདེ་སྲུང་འགྲོ་གྲོན་ཡར་སྤར་དགོས་པ་བཅས་བཀོད།
•. རཱ་ཡུའི་དམག་འཁྲུག་གི་ཁ་ཕྱོགས་ལ་ངེས་གཏན་མེད་ཅིང་། ལྷག་པར་སྒྲོ་ནལ་ཁྲི་རམ་ཕུ་སྲིད་གཞུང་གིས། ཡུ་རོབ་ནས་ཨ་རིའི་དམག་སྟོབས་ཕྱིར་འཐེན་རྒྱུའི་སྲིད་བྱུས་ཤིག་གི་འགོ་འཛུགས་བཞིན་པ་འདིས། ཕུ་ཀྲན་ལ་བློ་སྤོབས་ཆེན་པོ་སྩལ་ཅིང་། ཡུ་རོབ་དང་རཱ་ཤི་ཡ་ཐད་ཀར་གདོང་ཐུག་རྒྱག་རྒྱུའི་ཉེན་ཁ་ཆེ་རུ་འགྲོ་བཞིན་པ་ཤོད་མཁན་ཡོད་པ་ལྟར། ཧྥ་རན་སི་དང་མཇར་མན་གཉིས་ཀྱིས། དམག་སྟོབས་རྒྱ་བསྐྱེད་ལ་འབད་བཞིན་པའི་མཚམས། ཁ་སང་མཇར་མན་གྲོས་ཚོགས་སུ་སྐྱེས་པ་ན་གཞོན་དག་དམག་སྐུལ་རྒྱག་ཕྱོགས་དང་འབྲེལ་བའི་ཁྲིམས་འཆར་ཞིག་ཕྱིན།
•. ཁྲིམས་འཆར་འདི་ལྟར་ན་ལོ་རྗེས་མ་ནས། མཇར་མན་གྱི་སྐྱེས་པ་ན་གཞོན་ལོ་ན་ 18 ཅན་ཚང་མར་གཞུང་གིས་དྲི་བ་འདྲི་རྒྱུ་དང་། ལུས་པོར་བརྟག་དཔྱད་བྱ་རྒྱུ། ན་གཞོན་དག་དམག་དཔུང་གི་ནང་ཞུགས་རྒྱུར་སྐུལ་མ་གཏོང་ཆེད། ཟླ་རེར་གླ་ཆ་ཡུ་སྒོར་ €2,600 ནས་འགོ་འཛུགས་ཀྱིས་གླ་ཆ་སྤྲོད་རྒྱུ་ཡིན་པ་དེ་རེད། ད་ལྟའི་མཇར་མན་དམག་མིའི་གྲངས་ 180,000 ཡིན་པ་ལ། ཕྱི་ལོ་ 2030 བར་དམག་མིའི་གྲངས་ 260,000 ལ་ཡར་སྤར་ཐུབ་པའི་དམིགས་ཡུལ་བཟུང་ཡོད་པ་གསལ། གལ་སྲིད་གྲངས་ཀ་འདི་དང་བླང་དམག་མིས་སྐོང་མ་ཐུབ་ཚེ། དམག་སྐུལ་རྒྱག་རྒྱུའི་ཁྲིམས་དངོས་སུ་བཟོ་རྒྱུའི་འཆར་གཞི་ཡོད་པ་གསལ།
•. མཇར་མན་གྲོས་ཚོགས་ཀྱི་ཐག་གཅོད་འདི་དང་འབྲེལ། རྒྱལ་ས་བྷར་ལིན་དང་ཁཱ་སེལ་སོགས། གྲོང་ཁྱེར་ 80 ཡས་མས་སུ་ན་གཞོན་ཚོས་ངོ་རྒོལ་བྱས་ཤིང་། རྒྱལ་ས་བྷར་ལིན་གཅིག་བུར་ན་གཞོན་ 3,000 ཡས་མས་ཀྱིས་ངོ་རྒོལ་བྱས། ཧྥ་རན་སི་གཞུང་གིས་ཀྱང་ལོ་རྗེས་མའི་དབྱར་ཀ་ནས། ན་གཞོན་ལོ་ན་ 18 དང་ 19 ཅན་དག་དང་བླང་གིས་དམག་སྦྱོང་ནང་ཞུགས་ཆོག་པའི་འཆར་གཞི་གསར་བ་ཞིག་ཕྱིར་བཏོན། སྒྲེ་མག་རྒྱལ་ཁབ་ཀྱིས་བུད་མེད་དམག་མི་བསྡུ་འགོ་བཙུགས་ཤིང་། ལ་ཏི་ཝེ་ཡ་རྒྱལ་ཁབ་ཀྱིས་ཀྱང་ལོ་སྔོན་མ་ནས་བུད་མེད་དམག་མི་བསྡུ་འགོ་བཙུགས་ཟིན།
•. རཱ་ཤི་ཡས། ཨ་རུ་སུ་དམར་པོ་དང་ནུབ་ཕྱོགས་རྒྱལ་ཁབ་དག་བར་བཞག་པའི་དམག་དོན་ཡིག་ཆ་ཚུད། རཱ་ཤི་ཡ་དང་ཁེ་ན་ཀྲའི་བར། རཱ་ཤི་ཡ་དང་ཧྥ་རན་སིའི་བར། རཱ་ཤི་ཡ་དང་ཕོར་ཅི་གྷལ་གྱི་བར་བཞག་པའི་དམག་དོན་གྲོས་མཐུན་ཡིག་ཆ་མང་པོ་ཞིག་ཕྱིར་འཐེན་ཟིན་པའི་གནས་ཚུལ་ཐོན་ཅིང་། ཡིག་ཆ་ཁ་ཤས་ཤིག་ནི་ཕྱི་ལོ་ 1989 དང་ཕྱི་ལོ་ 1994 ། ཕྱི་ལོ་ 2000 ལོར་བཅས་སུ་བཞག་ཡིན་པ་གསལ།