ཨ་རིའི་ཕྱི་རྒྱལ་གསང་ལས་(CIA)ཀྱི་ཞིབ་འཇུག་ལ་གཞིར་བཞག་ནས། ཨ་རིའི་རྒྱལ་སྲུང་ལས་བྱེད་དག་གིས། ཡུ་ཁུ་རན་གྱིས་ཕུ་ཀྲན་དང་ཕུ་ཀྲན་གྱི་སྡོད་གནས་ལ་གཏོར་རྒོལ་བྱས་མི་འདུག་ཅེས་ཤོད་བཞིན་པའི་གནས་ཚུལ་ཐོན།
ལོ་སྔོན་མའི་ཕྱི་ཟླ་ 12 ནང་རཱ་དམག་གིས། ཡུ་ཁུ་རན་གྱི་ས་ཆ་སྤྱི་ལེ་གྲུ་གཞི་མ་ 445 འཕྲོག་ཟིན་པ་དང་། ཕྱི་ཟླ་ 11 ནང་དང་བསྡུར་ན་བརྒྱ་ཆ་ 12% ཀྱིས་ཆུང་བ་ཡུ་ཁུ་རན་གྱིས་བཤད། རཱ་དམག་གིས་ག་ལེར་མདུན་བསྐྱོད་ཐུབ་བཞིན་པ་དང་ལྷན། ཡུ་ཁུ་རན་གྱིས། སྒྲི་ནེ་པུར་མངའ་སྡེའི་གྲོང་དང་གྲོང་བརྡལ་ 40 ལས་མང་བ་དང་། ཆེར་ནེ་གྷོ་ཝི་མངའ་སྡེའི་གྲོང་དང་གྲོང་བརྡལ་ 14 ཡི་མི་སེར་དག་ས་ཁུལ་གཞན་དག་ལ་སྤོ་དགོས་འགྱུར་བཞིན་པའི་གནས་ཚུལ་ཐོན།
•. ཚེས་ 30 ཉིན་རཱ་ཤི་ཡའི་རྒྱལ་ས་མོ་སི་ཁོ་གྲོང་ཁྱེར་གྱི་སྡོད་མི་འབུམ་ 6 ལ་གློག་མེད་པར་གྱུར་ཅིང་། གྲོང་ཁྱེར་གྱི་ཆ་ཤས་ཆེན་པོ་ཞིག་མུན་ནག་ཏུ་གྱུར། རྒྱུ་རྐྱེན་དངོས་མི་གསལ་ནའང་ཛེ་ལན་སི་ཀེ་ཡིས། ཡུ་ཁུ་རན་ལ་འབྱུང་བཞིན་པ་དག་རཱ་ཤི་ཡར་འབྱུང་རྒྱུའི་ཉེན་བརྡ་བཏང་། དེ་བཞིན་དེའི་སྔོན་དུ་ཡུ་དམག་གི་སྒྲི་རོན་མོ་སི་ཁོའི་ཕྱོགས་སུ་འཕུར་བཞིན་པའི་གནས་ཚུལ་ཡང་ཐོན། གཞན་ཡང་ཡུ་དམག་གིས། རཱ་ཤི་ཡའི་ཀྲུབ་སེ་(Tuapse)ས་ཁུལ་གྱི་རྡོ་སྣུམ་བཟོ་གྲྭ་ཞིག་དང་། རེ་བྷེན་སི་ཀི་ས་ཁུལ་གྱི་རྡོ་སྣུམ་མཛོད་ཁང་ཞིག་ལ་གཏོར་རྒོལ་བྱས།
•. ཡུ་དམག་གིས། རཱ་དམག་གིས་བཟུང་ཡོད་པའི་ལུ་ཧན་སི་ཀི་མངའ་སྡེའི་རྡོ་སྣུམ་བཟོ་གྲྭ་ཞིག་དང་། ཁི་རཱ་མེ་ཡ་གླིང་ཕྲན་གྱི་མཚོ་ནག་གི་རྒྱུད་དུ་ཡོད་པའི་མཚོ་དམག་གི་བསྟི་གནས་ཤིག གནམ་སྲུང་འོད་རླབས་མ་ལག་དང་། དམག་དོན་བསྟི་གནས་གཞན་དག་བཅས་ལ་གཏོར་རྒོལ་བྱས། ཕྱི་ཟླ་ 12 ནང་ཡུ་དམག་གིས། རཱ་ཤི་ཡའི་རྡོ་སྣུམ་བཟོ་གྲྭ་དང་རྡོ་སྣུམ་མཛོད་ཁང་། རྡོ་སྣུམ་ལྕགས་སྦུག་དང་རྡོ་སྣུམ་སྐྱེལ་འདྲེན་གྲུ་གཟིངས་སོགས། གྲངས་ 24 ཡི་སྟེང་གཏོར་རྒོལ་བྱས་ཟིན་པ་བྷི་ལུམ་བྷར་གྷི་སྟེང་གནས་ཚུལ་བཀོད།
•. དམག་འཁྲུག་འགོ་བཙུགས་པ་ནས་དབྱིན་ཇིའི་སྦི་སྦི་སི་གསར་ཁང་དང་། རཱ་ཤི་ཡའི་རང་དབང་གསར་ཁང་ཞིག་མཉམ་འབྲེལ་གྱིས་རཱ་དམག་གི་འཆི་གྲངས་ལ་ཞིབ་འཇུག་བྱེད་བཞིན་པ་ལྟར། ད་ལྟ་བར་བསད་ཟིན་པ་དག་ལས་གྲངས་ 160,000 ཡི་མིང་དང་བཅས་པ་ངོ་འཕྲོད་ཟིན་པ་བསྒྲགས། བསད་ཟིན་པའི་གྲངས་ཀ་དངོས་ནི་དེ་ལས་ཧ་ཅང་མཐོ་བ་ཚོད་དཔག་བྱེད། ཡུ་དམག་གིས། དམག་འཁྲུག་འགོ་བཙུགས་པ་ནས། རཱ་དམག་ཁྲི་ 1 ལས་མང་བ་གསོན་བཟུང་བྱས་ཟིན་པ་དང་། ད་ལྟ་རཱ་དམག་ 3,500 ནས་ 4,000 བར་གསོན་པོར་བཟུང་ཡོད་ཅེས་བཤད། བཟུང་དམག་དག་ནི་ལོ་ན་ 65 ནས་ 18 བར་ཡིན་པ་གསལ།
•. རཱ་ཤི་ཡའི་གཞུང་གིས། ཟླ་བ་སྔོན་མའི་ཚེས་ 28 དང་ཚེས་ 29 ཉིན་ཡུ་ཁུ་རན་གྱིས། རཱ་ཤི་ཡའི་ནོ་ཝི་གྷོ་རོ་ཀྲི་ས་ཁུལ་དུ་ཡོད་པའི་ཕུ་ཀྲན་གྱི་སྡོད་གནས་(Valday estate)ལ་དམིགས་ནས། སྒྲི་རོན་ 91 བཏང་ཟིན་སོང་ཞེས་བསྒྲགས་ཟིན་པ་ལྟར། གནས་ཚུལ་འདིའི་ཐད་རྒྱ་ནག་གིས། ལྟ་ཚུལ་བཏང་སྙོམས་ཤིག་བཟུང་ཞིང་། ཨ་རིས་ཞིབ་འཇུག་བྱེད་བཞིན་པ་བསྒྲགས། ཡིན་ན་ཡང་། རྒྱ་གར་གྱིས་གནས་ཚུལ་འདིའི་ཐད་བློ་ཚབས་ཡོད་པའི་རྣམ་འགྱུར་བསྟན་ཅིང་། པཱ་ཀི་སི་ཐན་གྱིས་ཡུ་ཁུ་རན་ལ་སྐྱོན་བརྗོད་དྲག་པོ་བྱས་ཤིང་། རཱ་ཤི་ཡའི་གཞུང་དམངས་གཉིས་ལ་གདུང་སེམས་མཉམ་བསྐྱེད་ཡོད་པ་བསྒྲགས།
•. དོན་དངོས་སུ་གནས་ཚུལ་འདི་རཱ་ཤི་ཡས་ཕྱིར་བསྒྲགས་པ་ཞིག་ལས།རང་དབང་གི་ཞིབ་འཇུག་གང་གིས་ཀྱང་བདེན་པ་ཡིན་པའི་མཐའ་བསྡོམས་བཀོད་མེད། ཛེ་ལན་སི་ཀེ་ཡིས། རྒྱ་གར་དང་ཨ་རབ་རྒྱལ་ཕྲན་མཉམ་འབྲེལ་སོགས་ཀྱིས། མ་བྱུང་བའི་གནས་ཚུལ་ཞིག་རྒྱུ་མཚན་དུ་བྱས་ནས་ཡུ་ཁུ་རན་ལ་སྐྱོན་བརྗོད་བྱས་པ་ནི། མགོ་འཐོམ་བྱེད་ཅིག་དང་སྙན་པོ་ཞིག་མ་རེད། ད་ལྟ་བར་ཡུ་ཁུ་རན་གྱི་བྱིས་པ་དག་གི་སྟེང་འགད་རྫས་ཀྱིས་གཏོར་རྒོལ་བྱས་པར། སྐྱོན་བརྗོད་གང་དུ་བྱས་ཡོད། འདིའི་ཐད་རྒྱ་གར་སོགས་ཀྱིས་སྐྱོན་བརྗོད་བྱས་པ་ཞིག་ངས་མ་གོ་ཞེས་བསྒྲགས།
•. ཁ་སང་རཱ་ཤི་ཡའི་སྲིད་འཛིན་ལས་ཁུངས་ཀྱི་མགྲིན་ཚབ་པ་པེ་སི་ཀོ་ཝི་ཡིས། ཡུ་དམག་གིས་ཉིན་ལྟར་རཱ་ཤི་ཡའི་སྟེང་སྒྲི་རོན་གྱིས་ཚུར་རྒོལ་བྱེད་བཞིན་པ་རེད། ང་ཚོས་བདེན་དབང་གཞན་ཅི་ཞིག་སྤྲོད་དགོས་པ་རེད་ཅེས་བཤད། དེ་དང་ལྷན་ཡུ་དམག་གིས་ཕུ་ཀྲན་གྱི་སྡོད་གནས་ལ་དམིགས་ནས་སྒྲི་རོན་གཏོང་སའི་ལམ་ཀ་རེད་ཅེས་ས་ཁྲ་ཞིག་རཱ་ཤི་ཡས་ཕྱིར་བཀྲམས། པེ་སི་ཀོ་ཝི་ཡིས། འདི་ནི་ཕུ་ཀྲན་དང་ཁྲི་རམ་ཕུའི་འབད་བརྩོན་ལ་ཚུར་རྒོལ་བྱས་པ་ཞིག་རེད། རཱ་ཤི་ཡས་འདི་ལ་ལན་བསློག་རྒྱུ་ཡིན་ནའང་། ལན་ཇི་ལྟར་བསློག་མིན་ཕྱིར་བསྒྲག་རྒྱུ་མིན་ཞེས་བཤད།
•. ད་དུང་ཁོས། རཱ་ཤི་ཡས་མུ་མཐུད་དུ་གྲོས་མོལ་བྱ་རྒྱུ་ཡིན་ནའང་། ཨ་རི་དང་ལྷན་གྲོས་མོལ་བྱ་རྒྱུ་ལས། ཡུ་ཁུ་རན་དང་ལྷན་གྲོས་མོལ་བྱ་རྒྱུ་མིན།ང་ཚོས་གྲོས་མོལ་གྱི་ཆ་རྐྱེན་དག་མཁྲེགས་སུ་གཏོང་རྒྱུ་ཡིན་ཞེས་བཤད། ཝོལ་སི་ཀྲི་རི་ཀྲི་གསར་དེབ་ལྟར་ན། ཨ་རིའི་ཕྱི་རྒྱལ་གསང་ལས་(CIA)ཀྱི་ཞིབ་འཇུག་ལ་གཞིར་བཞག་ནས། ཨ་རིའི་རྒྱལ་སྲུང་ལས་བྱེད་དག་གིས།ཡུ་ཁུ་རན་གྱིས་ཕུ་ཀྲན་དང་ཕུ་ཀྲན་གྱི་སྡོད་གནས་ལ་གཏོར་རྒོལ་བྱས་མི་འདུག་ཅེས་ཤོད་བཞིན་པའི་གནས་ཚུལ་བཀོད། ཡུ་རོབ་ཀྱི་ཆེས་མཐོའི་དབུ་ཁྲིད་ཚོས་ཀྱང་། རཱ་ཤི་ཡའི་སྐད་ཆ་འདི་གཞི་མེད་ཡིན་པ་བསྒྲགས།
•. སྒྲོ་ནལ་ཁྲི་རམ་ཕུས་ཀྱང་ཐོག་མ་ནས་ཐེ་ཚོམ་གྱི་སྐད་ཆ་ཞིག་བཤད་པ་ལས། ཚིག་ཐག་ཆོད་པས་ཡུ་ཁུ་རན་གྱིས་དེ་ལྟར་བྱས་པ་རེད་ཅེས་མ་བཤད། ཁ་སང་ནེའུ་ཡོག་ཆ་འཕྲིན་སྟེང་འདི་ནི་ཕུ་ཀྲན་གྱིས་ཡང་བསྐྱར་རྫུན་ཤོད་བཞིན་པ་ཞིག་དང་། དམིགས་ཡུལ་ནི་ཡུ་ཁུ་རན་གྱིས་བློས་གཏོང་ཅི་ཙམ་བྱས་ཀྱང་། ཕུ་ཀྲན་གྱིས་ད་དུང་དམག་འཁྲུག་མཚམས་འཇོག་འདོད་མེད་པར། མུ་མཐུད་དུ་གྲོས་མོལ་གྱི་ལམ་ཀ་འགོག་བཞིན་པ་ཡིན་པར་བཤད་པའི་རྩོམ་ཡིག་ཅིག་སྤེལ། སྒྲོ་ནལ་ཁྲི་རམ་ཕུས་ཀྱང་རྩོམ་ཡིག་འདི་རང་གི་སྤྱི་ཚོགས་དྲྭ་ལམ་དུ་སྤེལ།
•. བདུན་ཕྲག་འདིའི་གཟའ་སྤེན་པའམ་ཚེས་ 3 ཉིན། ཡུ་ཁུ་རན་དང་དེའི་མཐུན་ཕྱོགས་རྒྱལ་ཁབ་ཚོའི་བདེ་སྲུང་བློན་ཆེན་དག་ཡུ་ཁུ་རན་དུ་འཛོམས་རྒྱུ་དང་། ཟླ་བ་འདིའི་ཚེས་ 6 ཉིན་མཐུན་ཕྱོགས་རྒྱལ་ཁབ་དག་གི་དབུ་ཁྲིད་ཚོ། ཧྥ་རན་སིའི་རྒྱལ་ས་ཕེ་རི་སིར་འཛོམས་རྒྱུ་ཡིན་པ་གསལ།
•. རཱ་ཡུའི་དམག་འཁྲུག་མཚམས་འཇོག་རྒྱུ་དང་འབྲེལ། ཨ་རིའི་སྲིད་འཛིན་སྒྲོ་ནལ་ཁྲི་རམ་ཕུས། དམིགས་བསལ་སྐུ་ཚབ་གཉིས་བསྐོས་ཤིང་། གཅིག་ནི་འབྱོར་ལྡན་ཝེ་ཀྲི་ཀོ་ཧྥི་དང་ཁོས་གཙོ་བོ་རཱ་ཤི་ཡ་དང་ལྷན་སྐད་ཆ་བཤད་རྒྱུ་འབད་པ་བྱས། གཞན་དེ་དམག་སྤྱི་ཟུར་བ་ཁེ་ཐི་ཁེ་ལོག་ཡིན་པ་དང་། ཁོས་ཡུ་ཁུ་རན་དང་ལྷན་སྐད་ཆ་བཤད་རྒྱུའི་འགན་འཁུར། ཁེ་ཐི་ཁེ་ལོག་ལ་སྲོལ་རྒྱུན་གྱི་ཨ་རི་བའི་ཁྱད་ཆོས་ལྡན་ཞིང་། ས་ཁམས་ཆབ་སྲིད་ཀྱི་ཐད་ནས་ཕུགས་རྒྱང་ལ་བསམ་བློ་གཏོང་ཐུབ་མཁན་ཞིག་ཏུ་ངོས་འཛིན་ཅིང་། རཱ་ཤི་ཡའི་ཕྱོགས་ནས་མི་འདི་ལ་ཐོག་མ་ནས་མ་དགའ།
•. དེའི་རྗེས་སུ་རིམ་གྱིས་དམག་སྤྱི་ཁོ་གྲོས་མོལ་གྱི་སྐུ་ཚབ་ཁྲོད་ནས་མཐོང་རྒྱུ་མེད་པར་གྱུར་ཅིང་། ཟླ་བ་འདིའི་ནང་ཁོ་དངོས་སུ་ཕྱིར་ཐོན་རྒྱུ་ཡིན་པའི་གནས་ཚུལ་ཐོན་ཟིན། ནེའུ་ཡོག་དུས་བབ་ལྟར་ན་དམག་སྤྱི་ཁོས་སྒྲོ་ནལ་ཁྲི་རམ་ཕུ་ལ། ཛེ་ལན་སི་ཀེ་ནི་རང་གི་རྒྱལ་ཁབ་སྲུང་མཁན་གྱི་མི་བློ་སྟོབས་ཅན་ཞིག་དང་། དཔའ་བོ་ཞིག་ཡིན་པ་བཤད་པར། སྒྲོ་ནལ་ཁྲི་རམ་ཕུས་མི་འདོད་པའི་རྣམ་འགྱུར་དང་བཅས། ཁྱོད་ཀྱིས་ཛེ་ལན་སི་ཀེ་དཔའ་བོ་ཞིག་རེད་ཅེས་ཟེར་བ་ཡིན་ནམ་ཞེས་བཤད་པར། དམག་སྤྱི་ཁོས། ཡིན་ལགས་ཞེས་ལན་བསློགས་ཟིན་པ་བཤད།
•. ད་དུང་དམག་སྤྱི་ཁོས། ཛེ་ལན་སི་ཀེ་དང་ཨ་རིའི་སྲིད་འཛིན་ཨེབ་ར་ཧེམ་ལིན་ཁོན་འདྲ་བ་བཤད་ཟིན་པ་གསལ། སྐད་ཆ་འདི་དག་ལ་སྒྲོ་ནལ་ཁྲི་རམ་ཕུ་གཏིང་ནས་མ་དགའ་ཞིང་། རྗེས་སུ་སྒྲོ་ནལ་ཁྲི་རམ་ཕུས་མི་གཞན་ལ། དམག་སྤྱི་ཁོ་ནི་མི་བླུན་པོ་ཞིག་རེད་ཅེས་བཤད་ཟིན་པའི་གནས་ཚུལ་བཀོད། ད་དུང་སྒྲོ་ནལ་ཁྲི་རམ་ཕུས། རཱ་ཤི་ཡ་ནི་ཕམ་ཐུབ་པའི་རྒྱལ་ཁབ་ཅིག་མ་རེད་ཅེས་བཤད་ཟིན་པ་གསལ། འདི་ནི་ནང་ཁུལ་དུ་གནས་ཚུལ་ཅི་ཞིག་འབྱུང་བཞིན་པ་ཕྱིར་ཐོན་པ་གསལ་ཤོས་དེ་གྱུར།