སྲིད་འཛིན་ཛེ་ལན་སི་ཀེ་ཡིས། སྲིད་འཛིན་ལས་ཁུངས་ཀྱི་དབུ་ཁྲིད་དུ། ད་ལྟའི་དམག་དོན་གསང་བའི་ལས་ཁུངས་ཀྱི་དབུ་ཁྲིད། དམག་སྤྱི་བྷུ་རྡ་ནོ་ཝི་བསྐོ་རྒྱུ་ཐག་བཅད་ཟིན་པའི་གནས་ཚུལ་ཐོན།
•. རཱ་དམག་གིས། ལོ་སར་གྱི་མཚན་མོར་ཡུ་ཁུ་རན་གྱི་ཨོ་རྡ་ས་གྲོང་ཁྱེར་དང་། སྒྲི་ནེ་པུར་མངའ་ས་ཁུལ་བཅས་ལ་འཕུར་མདའ་དང་། སྒྲི་རོན་གྱིས་གཏོར་རྒོལ་ཁྲོད། ཨོ་རྡ་ས་ཁུལ་གྱི་མི་འབུམ་ 1 ལས་མང་བར་གློག་མེད་པར་གྱུར།
•. ཡུ་དམག་གིས། ད་ལྟ་རཱ་དམག་གིས་བཟུང་ཡོད་པའི་ཡུ་ཁུ་རན་གྱི་ཁར་སོན་ས་ཁུལ་ལ་གཏོར་རྒོལ་ཁྲོད། བྱིས་པ་ཞིག་ཚུད་པའི་མི་ 24 བསད་ཟིན་པའི་གནས་ཚུལ་ཐོན། རཱ་ཤི་ཡ་ལྟར་ན་མི་འདི་དག་ནི་མི་སེར་ཡིན་པ་དང་། དེའི་ཁྲོད་དམག་དོན་ལས་བྱེད་སོགས་མེད་པ་བཤད། ད་དུང་རཱ་ཤི་ཡའི་དམག་སྤྱི་ཞིག་གིས། གཏོར་རྒོལ་འདིའི་རྒྱབ་ཏུ་དབྱིན་ཇི་དང་། ཡུ་རོབ་ཀྱི་གསང་བའི་ལས་ཁུངས་ཡོད་པ་བཤད། ཡིན་ན་ཡང་། ཡུ་ཁུ་རན་གྱི་དམག་སྤྱི་ཞིག་གིས། དེར་འདུས་ཡོད་པའི་མི་དག་ནི་དམག་དོན་ལས་བྱེད་ཡིན་པ་ལས་མི་སེར་མིན་པ་བཤད།
•. ཡུ་དམག་གིས་ཁ་སང་། རཱ་ཤི་ཡའི་ཁི་ར་སི་ནོ་རྡར་ས་ཁུལ་གྱི་རྡོ་སྣུམ་བཟོ་གྲྭ་ཞིག་ལ་གཏོར་རྒོལ་བྱས། འདི་ནི་ལོ་གསར་བ་འདིར་ཡུ་དམག་གིས། རཱ་ཤི་ཡའི་རྡོ་སྣུམ་བཟོ་གྲྭ་ཞིག་ལ་གཏོར་རྒོལ་བྱས་པ་ཐོག་མ་དེ་གྱུར། གཞན་ཡང་སཱ་མ་ར་མངའ་སྡེའི་རྡོ་སྣུམ་བཟོ་གྲྭ་ཆེན་མོ། ནོ་ཝོ་ཀུ་བྷེ་ཤེ་ཝི་སི་ཀི་ལ་གཏོར་རྒོལ་གྱིས། ཉུང་མཐར་གས་འཐོར་ཐེངས་ 10 བྱུང་ཟིན་པ་བཤད། ཐཱ་ཐར་སི་ཐན་ས་ཁུལ་གྱི་རྡོ་སྣུམ་མཛོད་ཁང་ཞིག་དང་། ཀཱ་ལུ་གྷ་ས་ཁུལ་གྱི་རྡོ་སྣུམ་མཛོད་ཁང་ཞིག རྡོ་ཉད་སི་ཀི་ས་ཁུལ་གྱི་སྒྲི་རོན་མཛོད་ཁང་ཞིག་བཅས་ལ་གཏོར་རྒོལ་བྱས།
- དེ་བཞིན་ཡུ་དམག་གིས། རཱ་དམག་གི་གནམ་སྲུང་མ་ལག་ Buk-M3 ཞིག་དང་། གནམ་སྲུང་མ་ལག་ Tor-M2 ཞིག་བཅས་ཀྱི་སྟེང་གཏོར་རྒོལ་བྱས། གཞན་ཡང་ཡུ་དམག་གིས། རཱ་དམག་གི་གོ་ལག་ལྗིད་པོ་མང་པོ་མཉམ་དུ་སྤུངས་ཡོད་པ་ཞིག་གི་སྟེང་གཏོར་རྒོལ་གྱིས། གོ་ལག་ལྗིད་པོ་ཕོན་ཆེན་གཏོར་ཟིན་པའི་བརྙན་ཕྱིར་ཐོན།
•. བདུན་ཕྲག་སྔོན་མར། ཡུ་དམག་གི་ནང་དང་བླང་གིས་ཞུགས་ཡོད་པའི་རཱ་ཤི་ཡའི་དམག་སྡེའི་དམག་སྤྱི། སྒྲེ་ནེ་སི་ ཁཱ་པུ་སི་ཀྲེན་(Denis Kapustin)དང་། ཡོངས་གྲགས་སུ་ཝའེ་ཀྲི་རེག་སི་( White Rex)ཞེས་པ་གཡུལ་སར་བསད་ཟིན་པའི་གནས་ཚུལ་ཞིག་བཀྲམས་ཟིན་པ་ལྟར། གནས་ཚུལ་འདི་ཡུ་ཁུ་རན་གྱིས་ཆེད་དུ་བསྒྲགས་པ་ཞིག་དང་། དོན་དངོས་སུ་ཁོ་བསད་མེད་པའི་བརྙན་ཕྱིར་བཀྲམས། ཕུ་ཀྲན་གྱིས་མི་འདི་གསོད་འདོད་ཡོད་པ་ཡུ་ཁུ་རན་གྱིས་བཤད།
•. ཡུ་ཁུ་རན་གྱི་དམག་དོན་གསང་ལས་ཀྱིས། དོན་དངོས་སུ་རཱ་ཤི་ཡས་མི་འདི་གསོད་ཆེད། དུས་ཡུན་རིང་པོར་འཆར་གཞི་སྒྲིག་བཞིན་པ་དང་།ཡུ་དམག་གིས་གསང་བའི་འཆར་གཞི་འདི་སྒྲིག་མཁན་དང་། དངོས་སུ་གསོད་མཁན་བཅས་ཚང་མ་ངོས་འཛིན་ཐུབ་ཡོད་པ་དང་། གསོད་མཁན་ལ་གླ་ཆ་ཨ་སྒོར་འབུམ་ $5 སྤྲོད་བཞིན་པ་ལ། ལྐོག་གསོད་ཆེད་མངགས་པའི་མི་དང་། ཁོ་ལ་སྤྲོད་རྒྱུའི་གླ་ཆ་བཅས་ཚང་མ་ཡུ་དམག་ལ་ཐོབ་ཟིན་པ་བསྒྲགས། ཕྱི་ལོ་ 2023 ལོར་མི་འདིས་འགོ་འཁྲིད་པའི་རཱ་ཤི་ཡའི་མི་སེར་གྱིས་གྲུབ་པ། ཡུ་ཁུ་རན་གྱི་དམག་སྡེ་ཞིག་གིས་རཱ་ཤི་ཡའི་བྷི་ཡར་སི་ཀི་མངའ་སྡེར་ཕར་རྒོལ་བྱས་ཤིང་། དུས་དེ་ནས་བཟུང་མི་འདིའི་མིང་རྒྱལ་སྤྱིའི་གསར་ལམ་ཁག་ཏུ་ཁྱབ།
•. རཱ་ཤི་ཡའི་གཞུང་གིས། ཟླ་བ་སྔོན་མའི་ཚེས་ 28 དང་ཚེས་ 29 ཉིན་ཡུ་ཁུ་རན་གྱིས། རཱ་ཤི་ཡའི་ནོ་ཝི་གྷོ་རོ་ཀྲི་ས་ཁུལ་དུ་ཡོད་པའི་ཕུ་ཀྲན་གྱི་སྡོད་གནས་(Valday estate)ལ་དམིགས་ནས། སྒྲི་རོན་ 91 བཏང་ཟིན་སོང་ཞེས་བསྒྲགས། ཡིན་ན་ཡང་། ཝོལ་སི་ཀྲི་རི་ཀྲི་གསར་དེབ་ཀྱིས་ཐོག་མར་གནས་ཚུལ་བཀོད་ཟིན་པ་ལྟར། ཨ་རིའི་ཕྱི་རྒྱལ་གསང་ལས་(CIA)ཀྱི་ཞིབ་འཇུག་ལྟར་ན། ཡུ་ཁུ་རན་གྱིས་ཕུ་ཀྲན་གྱི་སྡོད་གནས་སུ་གཏོར་རྒོལ་བྱས་མི་འདུག་ཅེས། གནས་ཚུལ་དངོས་ལ་རྒྱུས་ཡོད་ཀྱི་ལས་བྱེད་ཅིག་གིས་ཨེན་བྷི་སི་གསར་ཁང་ལ་བཤད།
•. ཡིན་ན་ཡང་། རཱ་ཤི་ཡས་ཡུ་ཁུ་རན་གྱིས་གཏོར་རྒོལ་བྱས་སོང་ཞེས་ཤོད་བཞིན་པ་དང་། རཱ་ཤི་ཡའི་དམག་སྤྱི་ཞིག་གིས་ཨ་རིའི་དམག་དོན་ལས་བྱེད་ཅིག་ལ། སྒྲི་རོན་གྱི་གསང་གནས་ཡིན་ཞེས་ཆ་ཤས་འགའ་སྤྲོད་བཞིན་པའི་བརྙན་ཞིག་ཕྱིར་བཀྲམས། ཛེ་ལན་སི་ཀེ་ཡིས། འདི་ནི་ཕུ་ཀྲན་གྱིས་མུ་མཐུད་དུ་དམག་འཁྲུག་རྒྱག་ཆེད་དང་། ཨ་རི་དང་ཡུ་ཁུ་རན་བར་གྱི་ཞི་གྲོས་ལ་བར་ཆད་བཟོ་ཆེད་རེད་ཅེས་བཤད། དེ་རིང་ཡུ་ཁུ་རན་གྱི་ཕྱི་རྒྱལ་གསང་ལས་ཀྱིས། རཱ་ཤི་ཡས་དྲག་རྒོལ་ཆེན་པོ་ཞིག་ལ་གྲ་སྒྲིག་བྱེད་བཞིན་པ་དང་། འདིའི་ཁྲོད་མི་མང་པོ་འཆི་རྒྱུ་དང་ངན་ཁག་ཡུ་ཁུ་རན་གྱི་མགོ་ལ་གཡུག་འཆར་འདུག དམིགས་ཡུལ་ནི་ཨ་རི་དང་ཡུ་ཁུ་རན་བར་གྱི་ཞི་གྲོས་ལ་བར་ཆད་བཟོ་ཆེད་རེད་ཅེས་བསྒྲགས།
•. ཉེ་དུས་ལྐོག་ཟའི་གནད་དོན་དང་འབྲེལ། ཡུ་ཁུ་རན་གྱི་སྲིད་འཛིན་ལས་ཁུངས་ཀྱི་དབུ་ཁྲིད། ཨན་རྡི་རེ་ ཡེར་མག་(Andrey Yermak)གོ་ས་ནས་བབས་ཟིན་པ་ལྟར། ཛེ་ལན་སི་ཀེ་ཡིས། མི་འདིའི་ཚབ་ཏུ་ད་ལྟའི་དམག་དོན་གསང་བའི་ལས་ཁུངས་ཀྱི་དབུ་ཁྲིད། དམག་སྤྱི་བྷུ་རྡ་ནོ་ཝི་བསྐོ་རྒྱུ་ཐག་བཅད་ཟིན་པའི་གནས་ཚུལ་ཐོན། དམག་སྤྱི་ཁེར་ལོ་བྷུ་རྡ་ནོ་ཝི་(Kyrylo Budanov)ནི། གསང་བའི་དམག་དོན་བྱ་འགུལ་སྤེལ་རྒྱུར་ནུས་པ་ལྡན་ཞིང་། རྒྱལ་སྤྱིའི་དམག་དོན་ཁྲོད་སྙན་གྲགས་ཡོད་པའི་མི་ཞིག་ལ་ངོས་འཛིན།