(རྒྱ་ནག་གི་རྡོ་སྣུམ་ཐོན་སྐྲུན་ཁེ་གཉེར་ཆེ་ཤོས་གྲས་ཡན་ཅང་རྡོ་སྣུམ་(延长石油)གྱིས་ཀྱང་། ད་ལོའི་ཕྱི་ཟླ་ 12 དང་ལོ་རྗེས་མའི་ཕྱི་ཟླ་ 2 དཀྱིལ་བར་རཱ་ཤི་ཡའི་རྡོ་སྣུམ་ཉོ་རྒྱུ་སྙུང་འཆར་ཡོད་པ་དང་། དེ་བཞིན་རྒྱ་ནག་གཞུང་འབྲེལ་གྱི་རྡོ་སྣུམ་ཁེ་གཉེར་ཆེན་པོ། ཀྲུང་གོའི་རྡོ་སྣུམ་དང་རྫས་འགྱུར་(中国石化)ཞེས་པའི་ཡན་ལག་བཟོ་གྲྭ་ 2 ཟླ་བ་འདིའི་མཇུག་བར་དུ་སྒོ་བརྒྱབས་ཟིན་པ། རོའུ་ཀྲར་གསར་ཤོག་སྟེང་གནས་ཚུལ་བཀོད།)
•. རཱ་དམག་གིས། སྨུག་པ་འཐིབས་པའི་གོ་སྐབས་དང་བསྟུན། ཡུ་ཁུ་རན་གྱི་ཕོ་ཁི་རོ་ཝི་སི་ཀི་གྲོང་ཁྱེར་ནང་ལ་འཛུལ་ཐབས་བྱས་ཟིན་པ་ལྟར།དེའི་རྗེས་སུ་གནམ་གཤིས་ལ་འགྱུར་བ་ཕྱིན་རྐྱེན་ཡུ་དམག་གིས། རཱ་དམག་སྐོར་ཞིག་ཤི་རྨས་དང་། གོ་ལག་ལྗིད་པོ་འགའ་ལམ་ཀ་ནས་གཏོར། ཡིན་ན་ཡང་། ཐེངས་འདིར་རཱ་དམག་སྐོར་ཞིག་གྲོང་ཁྱེར་ནང་ལ་འཛུལ་ཟིན་པས། ད་ལྟ་རཱ་དམག་ 300 གྲོང་ཁྱེར་ནང་དུ་ཡོད་པ་དང་། ཁོ་ཚོས་གྲོང་ཁྱེར་བྱང་ཕྱོགས་ཀྱི་ཆ་ཤས་དག་འཛིན་རྒྱུར་འབད་པ་བྱེད་བཞིན་པ་བཤད། ད་དུང་ཕྱོགས་འདི་ནས་ཡུ་དམག་སྐོར་ཞིག་གསོན་བཟུང་བྱས་ཟིན་པའང་བསྒྲགས།
•. དེ་བཞིན་རཱ་དམག་གིས། ཡུ་ཁུ་རན་གྱི་ཁར་ཁེ་ཝུ་ས་ཁུལ་གྱི་ཀུ་པན་སི་ཀི་གྲོང་བརྡལ་གྱི་ནུབ་ཀྱི་ཆ་དང་། ལྷོ་ཡི་ཆ་ཚང་མ་བཟུང་ཟིན་པ་དང་། ད་ལྟ་གྲོང་བརྡལ་འདི་ཧྲིལ་བོ་རཱ་དམག་གི་ལག་ཏུ་ལྷུང་རྒྱུ་ཡིན་པ་ཟློག་ཏུ་མེད་ཅེས། རཱ་ཤི་ཡའི་བདེ་སྲུང་ལྷན་ཁང་གིས་བསྒྲགས། གཞན་ཡང་ཡུ་ཁུ་རན་གྱི་སྤྱི་ཁྱབ་དམག་སྤྱི་སར་སི་ཀེ་ཡིས། རྫ་པུ་རི་ཆི་ས་ཁུལ་དུ་རཱ་དམག་གིས། ཡུ་ཁུ་རན་གྱི་གྲོང་གསེབ་ 3 འཕྲོག་ཟིན་པ་དང་། ད་ལྟ་ཕྱོགས་འདིའི་གཡུལ་སའི་གནས་སྟངས་སྡུག་ཏུ་འགྲོ་བཞིན་འདུག་ཅེས་བཤད།
•. ལོ་འདིར་ཡུ་དམག་གིས་རཱ་ཤི་ཡའི་རྒྱལ་ནང་ལ་མཁའ་ཐོག་ནས་གཏོར་རྒོལ་ཁྲོད། བྱིས་པ་ 22 ཚུད་པའི་མི་སེར་ 392 བསད་ཟིན་པ་དང་། མི་སེར་གཞན་ 3,200 ལས་མང་བ་རྨས་ཟིན་པ་རཱ་ཤི་ཡས་བཤད། མདང་དགོང་ཡུ་དམག་གིས། རཱ་ཤི་ཡའི་ཨོ་རེན་བྷར་གྷི་ས་ཁུལ་གྱི་རྡོ་སྣུམ་བཟོ་གྲྭ་ཞིག་ལ་གཏོར་རྒོལ་བྱས། དེ་བཞིན་ད་ལྟ་རཱ་དམག་གིས་བཟུང་ཡོད་པའི་རྡོ་ཉད་སི་ཀི་ས་ཁུལ་གྱི་གློག་ཁང་ཞིག་ལ་ཡུ་དམག་གིས་གཏོར་རྒོལ་བྱས། གོང་གི་གཏོར་རྒོལ་དང་འབྲེལ་བརྙན་ཤིག་ཀྱང་ཕྱིར་བཀྲམས།
•. དམག་འཁྲུག་འདིའི་ཁྲོད་སྒྲི་རོན་ནི་ཧ་ཅང་སྤྱོད་སྒོ་ཆེ་བའི་གོ་ལག་ཅིག་དང་། གནས་ཚུལ་ལ་ལྟ་ཞིབ། དངོས་ཟོག་སྐྱེལ་བྱེད་གལ་ཆེན་ཞིག་ཏུ་གྱུར་ཟིན་པ་ལྟར། བྷི་ལུམ་བྷར་གྷི་སྟེང་གནས་ཚུལ་བཀོད་པ་ལྟར་ན། ཡུ་ཁུ་རན་དེ་ཁུ་སིམ་པོའི་ངང་། རྒྱལ་སྤྱིའི་སྟེང་སྒྲི་རོན་བཟོ་མཁན་ཆེ་ཤོས་ཤིག་ཏུ་འགྱུར་བཞིན་པ་བཤད། ཐག་རིང་འཕུར་ཐུབ་པའི་སྒྲི་རོན་ནས་རིན་གོང་ཆུང་བའི་སྒྲི་རོན་ FPV བར། ལོ་རེར་སྒྲི་རོན་ས་ཡ་ 4 ཡས་མས་བཟོ་བཞིན་པ་དང་། དེ་ནི་ནུབ་ཆིངས་རྒྱལ་ཁབ་ཚང་མས་བཟོ་བཞིན་པ་ལས་ཀྱང་གྲངས་ཀ་མང་བའི་རྣམ་པ་འདུག་ཅེས་བྲིས།
•. ཨ་རིའི་སྲིད་འཛིན་སྒྲོ་ནལ་ཁྲི་རམ་ཕུས། རཱ་ཤི་ཡའི་རྡོ་སྣུམ་ཁེ་གཉེར་ཆེ་ཤོས་གཉིས་ཀྱི་སྟེང་ཉེས་ཆད་བཀལ་རྗེས། རྒྱ་ནག་དང་གར་གྱི་རྡོ་སྣུམ་ཁེ་གཉེར་འགས་རཱ་ཤི་ཡ་ནས་རྡོ་སྣུམ་ཉོ་རྒྱུ་འཛེམས་བཞིན་པའི་གནས་ཚུལ་ཐོན་པ་ལྟར། རྒྱ་ནག་གི་རྡོ་སྣུམ་ཐོན་སྐྲུན་ཁེ་གཉེར་ཆེ་ཤོས་གྲས་ཡན་ཅང་རྡོ་སྣུམ་(延长石油)གྱིས་ཀྱང་། ད་ལོའི་ཕྱི་ཟླ་ 12 དང་ལོ་རྗེས་མའི་ཕྱི་ཟླ་ 2 དཀྱིལ་བར་རཱ་ཤི་ཡའི་རྡོ་སྣུམ་ཉོ་རྒྱུ་སྙུང་འཆར་ཡོད་པ་དང་། དེ་བཞིན་རྒྱ་ནག་གཞུང་འབྲེལ་གྱི་རྡོ་སྣུམ་ཁེ་གཉེར་ཆེན་པོ། ཀྲུང་གོའི་རྡོ་སྣུམ་དང་རྫས་འགྱུར་(中国石化)ཞེས་པའི་ཡན་ལག་བཟོ་གྲྭ་ 2 ཟླ་བ་འདིའི་མཇུག་བར་དུ་སྒོ་བརྒྱབས་ཟིན་པ། རོའུ་ཀྲར་གསར་ཤོག་སྟེང་གནས་ཚུལ་བཀོད།