རྒྱ་ནག་གཞུང་གིས། མེ་སྐྱོན་ཆག་སྒོ་འདི་གོ་སྐབས་སུ་བཟུང་ནས་རྒྱ་ནག་ལ་རྒོལ་བའི་ལས་འགུལ་བརྩམས་ཚེ། ཐབས་བྱུས་གང་འདྲ་ཞིག་ལག་བསྟར་བྱས་ཀྱང་། ང་ཚོས་ངེས་པར་དུ་རྗེས་འདེད་གཏོང་རྒྱུ་ཡིན་ཞེས་ཉེན་བརྡ་བཏང་།
བདུན་ཕྲག་སྔོན་མའི་གཟའ་ལྷག་པའི་ཕྱི་དྲོ། ཧོང་ཀོང་གི་ནུབ་ཕྱོགས་ཀྱི་ཐའེ་པོ་ཞེས་པའི་ས་ཁུལ་དུ། ཁང་བརྩེགས་སྐོར་ཞིག་མེ་འབར་ཟིན་པ་ལྟར། ཁ་སང་གཟའ་ཉི་མ་བར་དོན་རྐྱེན་འདིའི་ཁྲོད། མི་ 147 རྐྱེན་འདས་སུ་ཕྱིན་ཟིན་པ་གཏན་འཁེལ། ཕུང་ཕོ་ཁ་ཤས་ཤིག་སྐས་འཛེགས་བར་དང་། ཁང་པའི་སྒང་སོགས་ནས་བརྙེད་ཅིང་དེ་དག་གིས་ཕྱི་ལ་ཐར་རྒྱུར་འབད་པ་བྱས་ཡོད་པ་གསལ།
ད་དུང་ཡང་མི་ 40 ཡི་འཆི་གསོན་གནས་སྟངས་མ་ངེས་པ་དང་། ལྷག་པར་དོན་རྐྱེན་འདིའི་རྒྱུ་རྐྱེན་དངོས་ད་དུང་ཡང་མ་ཤེས་པས། ཧོང་ཀོང་མི་དམངས་ཁྲོད་ཁོང་ཁྲོ་དང་སྐྱོ་བ་ཤུགས་ཆེ་རུ་འགྲོ་བཞིན་པའི་གནས་ཚུལ་ཐོན། མེ་སྐྱོན་འདིའི་ཁྲོད་ཁྱི་དང་ཞི་མི། བྱ་རིགས་སོགས་ཁྱིམ་དུ་གསོས་པའི་སེམས་ཅན་ 340 ལ་ཤུགས་རྐྱེན་ཐེབས་ཤིང་། ཉུང་མཐར་སེམས་ཅན་གྲངས་ 45 བསད་ཟིན་པ་ཤེས།
གཞན་ཡང་དོན་རྐྱེན་འདི་ལ་རང་དབང་གིས་ཞིབ་འཇུག་དགོས་པ་ཤོད་མཁན། ཚོགས་པ་ཞིག་གི་མི་ཞིག་ཉེན་རྟོག་པས་བཟུང་ཟིན་པ་རོའུ་ཀྲར་གསར་ཤོག་གིས་གནས་ཚུལ་བཀོད། ཚོགས་པ་འདིས་རྒྱབ་སྐྱོར་མིང་རྟགས་ཁྲི་ 1 བསྡུས་ཤིང་། རང་དབང་གིས་ཞིབ་འཇུག་དགོས་པའི་རེ་སྐུལ་མང་དུ་ཕྱིན།
དེ་དང་ལྷན་རྒྱ་ནག་གཞུང་གིས། ཆག་སྒོ་འདི་གོ་སྐབས་སུ་བཟུང་ནས་རྒྱ་ནག་ལ་རྒོལ་བའི་ལས་འགུལ་བརྩམས་ཚེ། ཐབས་བྱུས་གང་འདྲ་ཞིག་ལག་བསྟར་བྱས་ཀྱང་། ང་ཚོས་ངེས་པར་དུ་རྗེས་འདེད་གཏོང་རྒྱུ་ཡིན་ཞེས་ཉེན་བརྡ་བཏང་། ཕྱི་ལོ་ 2019 ལོར་ཧོང་ཀོང་དུ་མང་གཙོའི་ལས་འགུལ་ཤུགས་ཆེན་བྱུང་ཞིང་། རྒྱ་ནག་གཞུང་གིས་ཐེངས་འདིར་དོགས་ཟོན་ཤུགས་ཆེན་བྱེད་བཞིན་པ་གསལ།