རྒྱ་ནག་གི་དཔལ་འབྱོར་སྙན་ཐོ་གསར་བ་ཕྱིར་ཐོན་པ་ལྟར་ན། ད་ལོའི་ཕྱི་ཟླ་ 10 ནང་རྒྱ་ནག་གི་བཟོ་གྲྭ་དག་གིས་བཟོས་པའི་ཐོན་རྫས་ཚད་དང་། ཐོན་ཟོག་དང་ཞབས་ཞུ་ཁྲོམ་རར་བཙོང་བའི་ཚད་དེ་སླར་ཡང་འདས་པའི་ལོ་ 1 རིང་གི་ཚད་གཞི་དམའ་ཤོས་དེར་ལྷུང་།
བདུན་ཕྲག་སྔོན་མའི་གཟའ་པ་སངས་ཉིན། རྒྱ་ནག་གི་དཔལ་འབྱོར་སྙན་ཐོ་གསར་བ་ཕྱིར་ཐོན་པ་ལྟར་ན། ད་ལོའི་ཕྱི་ཟླ་ 10 ནང་རྒྱ་ནག་གི་བཟོ་གྲྭ་དག་གིས་བཟོས་པའི་ཐོན་རྫས་ཚད་དང་། ཐོན་ཟོག་དང་ཞབས་ཞུ་ཁྲོམ་རར་བཙོང་བའི་ཚད་དེ་སླར་ཡང་འདས་པའི་ལོ་ 1 རིང་གི་ཚད་གཞི་དམའ་ཤོས་དེར་ལྷུང་། དེའི་དོན་ནི་རྒྱལ་ནང་གི་འཛད་སྤྱོད་པས། མུ་མཐུད་དུ་ཁྲོམ་རར་དངུལ་སྒོར་གཏོང་རྒྱུའི་ཚད་དེ་དམའ་བས། རྒྱ་ནག་གི་དཔལ་འབྱོར་ཡར་རྒྱས་སྤྱི་ལ་ཤུགས་རྐྱེན་ངན་པ་ཐེབས་བཞིན་པ་དེ་རེད། ཚོང་ཟོག་ཕྱིར་འཚོང་ལ་ཤུགས་ཆེན་བརྟེན་ཡོད་པའི་རྒྱ་ནག་གི་དཔལ་འབྱོར་གྱི་ཚད་དེ། ཨ་སྒོར་ཁྲག་ཁྲིག་ཆེན་མོ་ $19 སྟེ་འཛམ་གླིང་གི་དཔལ་འབྱོར་ཆེ་ཤོས་གཉིས་པ་དེ་ཡིན།
ཡིན་ན་ཡང་། ལོ་འདིར་ཨ་རི་དང་ལྷན་བྱུང་བའི་ཚོང་འབྲེལ་འཐབ་རྩོད་དང་། རྒྱལ་སྤྱིའི་གནས་སྟངས་བརྟན་པོ་མེད་པའི་རྐྱེན་གྱིས། རྒྱ་ནག་གི་མི་མང་པོས་ཁྲོམ་རར་དངུལ་སྒོར་གཏོང་རྒྱུ་ཧ་ཅང་འཛེམས་བཞིན་པ་གསལ། ཞེ་ཅེན་ཕིན་གྱིས། རྒྱ་ནག་གི་དཔལ་འབྱོར་དེ་ཕྱི་རྒྱལ་གྱི་ཁྲོམ་རར་ཤུགས་ཆེན་བརྟེན་ཡོད་པའི་སྣང་ཚུལ་དེར་བསྒྱུར་བཅོས་ཀྱིས གཙོ་བོ་རྒྱལ་ནང་གི་འཛད་སྤྱོད་ལ་བརྟེན་རྒྱུའི་སྲིད་བྱུས་གསར་བ་ཞིག་བཟུང་ཞིང་། དེའི་ཆེད་དབུས་དངུལ་ཁང་གིས་བུན་སྐྱེད་མར་བཅག་པ་དང་། ཚོང་ལས་དག་ལ་རོགས་སྐྱོར་སོགས་ཅ་དངོས་ཀྱི་གོང་ཚད་བདེ་བོ་དང་། ཉོ་མཁན་ཚོས་ཉོ་བདེ་བ་བཟོ་རྒྱུར་འབད་པ་བྱས།
ཡིན་ན་ཡང་། འབྱུང་སྲིད་པའི་དཀའ་ངལ་ལ་བློ་དོགས་དང་། དེར་གྲ་སྒྲིག་ཆེད་དངུལ་སྒོར་གསོག་འཇོག་ལས། ཁྲོམ་རར་མི་གཏོང་རྒྱུ་ནི་རྒྱ་ནག་གི་མི་ཚོའི་ཁྲོད་རིག་གཞུང་ལྟ་བུ་གྱུར་ཡོད་པས། གཞུང་གི་སྲིད་བྱུས་མང་པོར་གྲུབ་འབྲས་ཆེན་པོ་མ་ཐོན། དཀའ་ངལ་གཙོ་བོ་དག་བྱེ་བྲག་ཏུ་ཕྱེས་ན། སྔར་བཞིན་བཟོ་གྲྭའི་ཐོན་སྐྲུན་ཚད་དང་། ཁྲོམ་རའི་དགོས་མཁོ་གཉིས་དོད་མ་མཉམ་པ། ས་ཁང་ཁེ་གཉེར་གྱི་དཀའ་ངལ་སྔར་བཞིན་ཡོད་པའི་སྟེང་། སྡོད་ཁང་ཉོ་བའི་ཚད་མུ་མཐུད་དུ་མར་ལྷུང་བཞིན་པ།
ས་གནས་གཞུང་དག་གིས་དབུས་གཞུང་གི་སྲིད་བྱུས་ལག་བསྟར་གཙོ་འཛིན་གྱི་འོག ས་གནས་དག་ཏུ་འཛུགས་སྐྲུན་དང་། ས་གནས་ཁེ་གཉེར་དག་ལ་མཐུན་འགྱུར་ཆེད་བུ་ལོན་མང་པོ་བསགས་པས། ས་གནས་གཞུང་དག་བུ་ལོན་གྱི་ཁྲོད་ནས་ཐར་གྱི་མེད་པ་བཅས་ཡིན་པ་དང་། དེ་བཞིན་རླངས་འཁོར་འཚོང་བའི་ཚད་ཀྱང་མར་ཟག་ཡོད་པ་གསལ། དབུས་གཞུང་གིས་གཏིང་ཟབ་པའི་དཀའ་ངལ་འདི་དག་སེལ་བར། བཅོས་སྒྱུར་ཆེན་པོ་ཞིག་བྱ་དགོས་པ་ལ་དེར་ཆབ་སྲིད་ཀྱི་ཉེན་ཁ་ཆེ་བ་དབྱེ་ཞིབ་པ་ཚོས་བཤད། དེ་བཞིན་ལོ་རྗེས་མར་དམར་ཤོག་ཚོགས་པས། འབྱུང་འགྱུར་ལོ་ལྔའི་དཔལ་འབྱོར་འཆར་གཞིའང་བཟོས་ནས་ཆོག་མཆན་སྤྲོད་དགོས་པ་ཡིན།