བདུན་ཕྲག་འདིའི་འགོར་རྒྱ་ནག་གིས་དམག་གྲུ་ 100 ལས་མང་བ་ཤར་ཨེ་ཤ་ཡའི་རྒྱ་མཚོའི་ནང་དུ་བཀྲམས་ཡོད་པ་ལ། ཁ་སང་ཞོགས་པའང་ཉུང་མཐར་གྲུ་གཟིངས་ 90 ལས་མང་བ་སྔར་བཞིན་རྒྱ་མཚོའི་སྟེང་དུ་བཀྲམས་ཡོད་པ་བཤད་ཅིང་།
རྒྱ་ནག་གིས་སླར་ཡང་ཤར་ཨེ་ཤི་ཡའི་རྒྱ་མཚོ་དག་གི་ནང་དུ་དམག་མི་དང་། དམག་གྲུ་ཕོན་ཆེན་སྤུང་བཞིན་པ་རོའུ་ཀྲར་གསར་ཤོག་གིས་གནས་ཚུལ་བཀོད། སྔར་གྱི་སྲོལ་ལྟར་ན་དུས་ཚིགས་འདི་ནི་རྒྱ་ནག་གིས་དམག་སྦྱོང་ཆེན་པོ་དག་བྱེད་པའི་དུས་ཚོད་ཡིན་པ་གསལ། བདུན་ཕྲག་འདིའི་འགོར་དམག་གྲུ་ 100 ལས་མང་བ་རྒྱ་མཚོ་འདི་དག་གི་ནང་དུ་བཀྲམས་ཡོད་པ་ལ། ཁ་སང་ཞོགས་པའང་ཉུང་མཐར་གྲུ་གཟིངས་ 90 ལས་མང་བ་སྔར་བཞིན་རྒྱ་མཚོའི་སྟེང་དུ་བཀྲམས་ཡོད་པ་བཤད།
འདི་ནི་ད་ལྟ་བར་རྒྱ་ནག་གིས་དུས་མཉམ་དུ་མཚོ་ཐོག་ཏུ་སྤུངས་བའི་གྲུ་གཟིངས་གྲངས་མང་ཤོས་དེ་ཡིན་པ་གསལ། ད་ལོའི་ཕྱི་ཟླ་ 11 ཚེས་ 14 ཉིན་ཏེ་རྒྱ་ནག་དང་ཉི་ཧོང་བར་གྱི་ཕྱི་འབྲེལ་སྡུག་ཏུ་ཕྱིན་པ་ནས་བཟུང་། རྒྱ་ནག་གིས་རྒྱུན་ལྡན་གྱི་གྲངས་ཚད་ལས་བརྒལ་བའི་དམག་གྲུ་མང་པོ་རྒྱ་མཚོའི་ནང་གཏོང་འགོ་བཙུགས་ཟིན་པ་བཤད། གནས་ཚུལ་འདི་ནི་རྒྱ་ནག་གི་བདེ་སྲུང་དགོས་མཁོ་ཙམ་ལས་བརྒལ་ཡོད་པ་དང་། འདིས་ཕྱོགས་ཚང་མར་ཉེན་ཁ་བཟོ་བཞིན་པ་བཤད།
རྒྱ་ནག་གི་ཉེ་འཁོར་གྱི་རྒྱལ་ཁབ་ཚོས་འདིར་ཐག་ཉེ་ནས་ལྟ་བཞིན་པ་དང་། རྒྱལ་ཁབ་འདི་དག་གང་རུང་གི་ལས་བྱེད་ཅིག་གིས། གནས་ཚུལ་ཞིག་འབྱུང་རྒྱུའི་རྟགས་ད་ལྟ་བར་མ་ཐོན་ཞེས་བཤད། ཉེ་དུས་ཐེ་ཝན་དང་འབྲེལ་བའི་ཉི་ཧོང་སྲིད་བློན་གྱི་སྐད་ཆ་དང་། ཐེ་ཝན་གྱིས་རང་གི་བདེ་སྲུང་འགྲོ་གྲོན་སྔོན་རྩིས་ཐོལ་བ་ཨ་སྒོར་ཐེར་འབུམ་ $40 གཏོང་འཆར་ཡོད་པར་བཤད་པ་དེས་རྒྱ་ནག་ལ་ཁོང་ཁྲོ་བསླངས་ཟིན།