ཨ་རིས་ཐེ་ཝན་ལ་གོ་ལག་བཙོང་བའི་ལན་དུ། རྒྱ་ནག་གིས་ཨ་རིའི་གོ་ལག་བཟོ་གྲྭ་ 20 དང་ཁེ་གཉེར་འདི་དག་གི་སྤྱི་གཉེར་གྲངས་ 10 ཡི་སྟེང་ཉེས་ཆད་བཀལ་ཅིང་། རྒྱ་ནག་ཕྱི་སྲིད་ལྷན་ཁང་གིས། ཐེ་ཝན་གྱི་གནད་དོན་ནི་ཀྲུང་གོའི་ཁེ་ཕན་གྱི་དཀྱིལ་སྙིང་ལ་ཐུག་པ་ཞིག་ཡིན་ཞེས་བསྒྲགས།
བདུན་ཕྲག་སྔོན་མར་ཨ་རིས། ཐེ་ཝན་ལ་གོ་ལག་ཨ་སྒོར་ཐེར་འབུམ་ $11.1 གི་རིན་ཐང་འཚོང་རྒྱུ་ཡིན་པ་བསྒྲགས་ཟིན་པ་ལྟར། དེའི་ལན་དུ་དེ་རིང་རྒྱ་ནག་གིས། ཨ་རིའི་གོ་ལག་བཟོ་གྲྭ་ 20 དང་ཁེ་གཉེར་འདི་དག་གི་སྤྱི་གཉེར་གྲངས་ 10 ཡི་སྟེང་ཉེས་ཆད་བཀལ་ཟིན་པ་བསྒྲགས། ཉེས་ཆད་ནི་ཁེ་གཉེར་དང་མི་སྒེར་འདི་དག་གི་དངུལ་སྒོར། རྒྱ་ནག་ཏུ་ཡོད་པ་ཚང་མ་འགུལ་རྒྱུ་མེད་པ་གཏོང་རྒྱུ་མ་ཟད། རྒྱ་ནག་རང་གི་ཁེ་གཉེར་དང་མི་སྒེར་གང་གིས་ཀྱང་། གོང་གི་ཨ་རིའི་ཁེ་གཉེར་དང་མི་སྒེར་འདི་ཚོ་དང་ལྷན་ཚོང་ལས་གཉེར་མི་ཆོག་ཅེས་བསྒྲགས།
ད་དུང་ཉེས་ཆད་འོག་ཚུད་ཟིན་པའི་ཨ་རིའི་ཁེ་གཉེར་འདི་དག་གི་ཆེས་མཐོའི་འཛིན་སྐྱོང་མི་སྣ་དག་རྒྱ་ནག་ཏུ་ཡོང་མི་ཆོག་པ་བཟོས། རྒྱ་ནག་ཕྱི་སྲིད་ལྷན་ཁང་གིས། ཐེ་ཝན་གྱི་གནད་དོན་ནི་ཀྲུང་གོའི་ཁེ་ཕན་གྱི་དཀྱིལ་སྙིང་ལ་ཐུག་པ་ཞིག་དང་། འདི་ནི་ཨ་རི་དང་ཀྲུང་གོའི་འབྲེལ་བའི་ཁྲོད་བརྒལ་མི་རུང་བའི་ས་ཐིག་དང་པོ་དེ་རེད་ཅེས་དང་། ཐིག་དེ་བརྒལ་ཚེ་དེའི་ལན་དྲག་པོ་བསློག་རྒྱུ་ཡིན། ཨ་རིས་ཐེ་ཝན་ལ་གོ་ལག་བཙོང་བའི་ཉེན་ཁ་ཅན་གྱི་བྱ་སྤྱོད་འདི་མཚམས་ཞོག་ཅེས་བསྒྲགས།
རྒྱ་ནག་གིས་ཐེ་ཝན་དེ་རང་གི་ཆ་ཤས་ཤིག་ཏུ་སྒྲོག་བཞིན་པ་ལ། ཨ་རིས་ཐེ་ཝན་ལ་འགོག་སྲུང་གོ་ལག་འཚོང་དགོས་པ་ནི། ཨ་རི་རང་གི་ཁྲིམས་ཀྱིས་ཐག་བཅད་ཟིན་པ་ཡིན་པ་གསལ། དེར་བརྟེན་ཐེ་ཝན་དང་འབྲེལ་བའི་ཨ་རིའི་སྲིད་བྱུས་ནི། ཐེ་ཝན་དེ་རྒྱ་ནག་གིས་བཙན་གྱིས་ལེན་དུ་མི་འཇུག་རྒྱུ་དང་། དེ་དང་ལྷན་ཐེ་ཝན་དེ་རང་བཙན་རྒྱལ་ཁབ་ཅིག་ཡིན་པ་ཁས་ཀྱང་མི་ལེན་པས། འདི་ལ་ཁ་གསལ་མེད་པའི་སྲིད་བྱུས་(Ambiguous policy)ཞེས་འབོད།