རྒྱ་ནག་གིས་ཁེ་ན་ཀྲའི་ཞིང་ལས་ཐོན་རྫས། ཡུངས་སྣུམ་གྱི་སྟེང་ནས་སྒོ་ཁྲལ་བརྒྱ་ཆ་ 85% ནས་བརྒྱ་ཆ་ 15% བར་བསྙུང་རྒྱུ་དང་། ཁེ་ན་ཀྲའི་ངོས་ནས་རྒྱ་ནག་གི་གློག་རྫས་རླངས་འཁོར་ཀྱི་སྟེང་ནས། སྒོ་ཁྲལ་བརྒྱ་ཆ་ 100% ནས་བརྒྱ་ཆ་ 6.1% བར་བསྙུང་རྒྱུར་མོས་མཐུན་བྱས།
བདུན་ཕྲག་འདིའི་གཟའ་མིག་དམར་ཉིན། ཁེ་ན་ཀྲའི་སྲིད་བློན་མར་ཁི་ཀར་ནེ་རྒྱ་ནག་ཏུ་ལམ་ལ་ཆས་ཤིང་། ཁོ་དང་རྒྱ་ནག་གི་སྲིད་འཛིན་ཞེ་ཅེན་ཕིན་གཉིས་ཐུག འདི་ནི་ཕྱི་ལོ་ 2017 ལོ་ནས་ཁེ་ན་ཀྲའི་སྲིད་བློན་ཞིག་རྒྱ་ནག་ཏུ་ཕྱིན་པ་ཐེངས་དང་པོ་དེ་གྱུར། ཁོ་དང་ཞེ་ཅེན་ཕིན་གཉིས་ལོ་སྔོན་མའི་ཕྱི་ཟླ་ 10 ནང་ལྷོ་ཀོ་རེ་ཡར་ཐུག་པ་དེ་ཁོ་གཉིས་ཐུག་པ་ཐོག་མ་དེ་གྱུར། ཐེངས་འདིར་རྒྱ་ནག་དང་ཁེ་ན་ཀྲའི་བར་ཚོང་དོན་གྲོས་མཐུན་ཆེན་པོ་ཞིག་འཇོག་ཐུབ་པ་ནི། རྒྱལ་ཁབ་གཉིས་ཀྱིས་ཕན་ཚུན་གྱི་སྟེང་བཀལ་བའི་སྒོ་ཁྲལ་བསྙུང་རྒྱུ་གྲོས་མཐུན་ཟིན་པ་དེ་ཡིན་པ་བསྒྲགས།
དེ་ལྟར་ན་ད་ལོའི་ཕྱི་ཟླ་ 3 ཚེས་ 1 ཉིན་ནས། རྒྱ་ནག་གིས་ཁེ་ན་ཀྲའི་ཞིང་ལས་ཐོན་རྫས། ཡུངས་སྣུམ་གྱི་སྟེང་ནས་སྒོ་ཁྲལ་བརྒྱ་ཆ་ 85% ནས་བརྒྱ་ཆ་ 15% བར་བསྙུང་རྒྱུ་དང་། ཁེ་ན་ཀྲའི་ངོས་ནས་རྒྱ་ནག་གི་གློག་རྫས་རླངས་འཁོར་གྲངས་ 49,000 ཡི་སྟེང་ནས། སྒོ་ཁྲལ་བརྒྱ་ཆ་ 100% ནས་བརྒྱ་ཆ་ 6.1% བར་བསྙུང་རྒྱུར་མོས་མཐུན་བྱས་ཟིན་པའི་གནས་ཚུལ་ཐོན། འདི་ནི་ཕྱོགས་གཉིས་ཀར་རྒྱལ་ཁ་ཞིག་ཡིན་པ་བསྒྲགས་ཤིང་། དེ་བཞིན་རྒྱ་ནག་གིས་ཁེ་ན་ཀྲའི་རྒྱལ་ནང་དུ་མ་རྐང་འཇོག་རྒྱུར་ཤུགས་ཆེ་རུ་འགྲོ་སྲིད་པ་བཤད།
ཕྱི་ལོ་ 2024 ལོར་ཨ་རིའི་སྲིད་འཛིན་བྷ་ཀྲན་གྱིས་རྒྱ་ནག་གི་རླངས་འཁོར་སྟེང་སྒོ་ཁྲལ་བཀལ་རྗེས། ཁེ་ན་ཀྲས་ཀྱང་རྒྱ་ནག་གི་གློག་རྫས་རླངས་འཁོར་སྟེང་སྒོ་ཁྲལ་བརྒྱ་ཆ་ 100% བཀལ། དེའི་ལན་དུ་རྒྱ་ནག་གིས་ཁེ་ན་ཀྲའི་ཞིང་ལས་ཐོན་རྫས་ཨ་སྒོར་ཐེར་འབུམ་ $2 ཀྱི་རིན་ཐང་སྟེང་སྒོ་ཁྲལ་བཀལ། ཨ་རི་ཕུད་རྒྱ་ནག་ནི་ཁེ་ན་ཀྲའི་ཚོང་གྲོགས་ཆེ་ཤོས་གཉིས་པ་དེ་ཡིན་པ་གསལ། ཡིན་ན་ཡང་། ཐེངས་འདིར་ཁེ་ན་ཀྲའི་སྲིད་བློན་གྱིས། རྒྱ་ནག་དང་ཁེ་ན་ཀྲའི་བར་གནད་དོན་ཚང་མའི་ཐད་མཐུན་གྱི་མེད། འགྲོ་བ་མིའི་ཐོབ་ཐང་དང་རྒྱལ་ཁབ་གཞན་གྱི་འོས་བསྡུའི་ཁྲོད་ཐེ་བྱུས་བྱེད་རྒྱུ་སོགས་ཀྱི་ཐད་ནས། ཁེ་ན་ཀྲའི་ལངས་ཕྱོགས་གང་ཡིན་པ་ཐེངས་འདིར་གསལ་བོར་བཟོས་ཡོད་ཅེས་བཤད།