ཨ་རིའི་སྐྱབས་བཅོལ་དང་གནས་སྤོ་དང་འབྲེལ་བའི་ལས་ཁུངས་(USCIS)ཀྱིས། གནས་སྤོ་(སྐྱབས་བཅོལ།)དང་འབྲེལ་བའི་ལས་གཞི་ཚང་མ་རེ་ཞིག་མཚམས་འཇོག་རྒྱུ་ཡིན་པ་བསྒྲགས། ལས་ཁུངས་འདིས། ཨ་རིའི་རྒྱལ་ནང་དུ་འཛུལ་བའི་གནས་སྤོ་བ་ཚང་མར་ཞིབ་འཇུག་ཆ་ཚང་བྱས་རྗེས་མ་གཏོགས། ལས་གཞི་འདི་བསྐྱར་གསོ་བྱ་རྒྱུ་མིན། ཨ་རིའི་མི་དམངས་ཀྱི་བདེ་འཇགས་ནི་དང་པོ་རེད་ཅེས་བསྒྲགས།
དེའི་དོན་ནི་ཨ་རིའི་རྒྱལ་ནང་དུ་འདུག་ཆོག་པའི་ཆོག་མཆན་ཞུས་ཟིན་པའི་སྙན་ཞུ་ཚང་མ་དང་། འབུལ་རྒྱུའི་སྙན་ཞུ་བཅས་ཚང་མར་ཆོག་མཆན་སྤྲད་རྒྱུ་མཚམས་འཇོག་དང་། སྙན་ཞུ་འབུལ་མཁན་དག་ལ་ཞིབ་འཇུག་བྱ་རྒྱུ་ཡིན་ཞེས་པ་དེ་རེད། འགྱུར་བ་འདིའི་ཐད་ཀའི་རྒྱུ་རྐྱེན་ནི།
གཟའ་ལྷག་པའི་ཉིན། ཨ་རིའི་རྒྱལ་སར་ཨ་ཧྥི་གྷན་གྱི་མི་ཞིག་གིས་མེ་མདའ་བརྒྱབས་ནས་རྒྱལ་སྲུང་དམག་མི་ 2 ལ་རྨས་སྐྱོབ་ཚབས་ཆེན་བཟོས་ཤིང་། དེ་ལས་དམག་མི་བུ་མོ་ལོ་ 20 ཅན་ཞིག་རྐྱེན་འདས་སུ་ཕྱིན་ཟིན་པ་དེ་གྱུར།
སྔོན་དཔག་ལྟར་སྒྲོ་ནལ་ཁྲི་རམ་ཕུ་སྲིད་གཞུང་གིས། གོ་སྐབས་འདི་བཟུང་ནས། བྷ་ཀྲན་གྱི་སྐབས་སུ་ཨ་རིའི་རྒྱལ་ནང་ལ་འཛུལ་བའི་མི་ཚང་མར་གཞི་རྒྱ་ཆེ་བའི་ཞིབ་འཇུག་ཅིག་བྱ་རྒྱུ་ཡིན་པ་གསལ། འདིའི་སྔོན་དུ་ཡར་རྒྱས་མ་ཕྱིན་པའི་རྒྱལ་ཁབ་ཚང་མ་ནས་གནས་སྤོ་བ་ལེན་རྒྱུ་མཚམས་འཇོག་དང་། རྒྱལ་ཁབ་ 19 ནས་ཡོང་བའི་མིའི་གནས་སྡོད་ཡིག་ཆ། དེབ་ལྗང་ཁུ་ལ་བསྐྱར་ཞིབ་བྱ་རྒྱུ་ཡིན་པ་བསྒྲགས། འབྲེལ་ཡོད་གནས་ཚུལ་གསར་བ་གང་ཡོད་སྐབས་ཐོག་ཏུ་དགོད་རྒྱུ།